ازاي اعامل اهلي كويس هم بتصرفاتهم بتخليني اتعصب ومش بعرف انا بقول اي بشتمهم وبرد عليهم وأحيانا امي لما بتضربني بضربها يردوا انا حاولت كتير والله وطلبت من ربنا بس هم مش عايزين يفهموا ان طريقتهم بدايقني وبتخنقني ومش بعرف اتحكم ف عصبيتي ممكن بكون بغلط مثلا بس مش الغلط اللي يخليهم يدعوا عليا دعاء يوجع القلب بشوف اهل اصحابي بيتعاملوا ازاي مع ولادهم بغير منهم ومش عارفه اعمل فكره امشي واسيب البيت بس انا بنت ومحدش هيسيب ابويا ف حالوا وابويا ميستاهلش مني كداا وفكره اموت نفسي اكتر من مره بس بخاف من ربنا ومره شربت سم بس انقذوني وابويا كان هيروح ف داهيه بسببي مش لاقيه اي حل وحتي الكلام معاهم مش بيجيب نتيجه ومش حابه ادخل حد من عيلتي بينا مش بحبهم وهيكون احراج لابويا ان اروح اشتكي لحد من اهلوا جدتي كانت تتعامل معاهم وتزعق فيهم بس اتوفت ممكن حل عشان انا تعبت 🥺🥺
جربتي مرة تعامليهم كويس حتى عن الغلط؟ يعني جربتي مرة مترديش الغلط بالغلط ... ولقيتي نتيجة؟ يعني مثلا انتي جربتي تردي وتضربي كمان مامتك، مش شايفة ان الموضوع كبير شوية ؟ كمان ده اكيد هيزود من معاملتهم الوحشة ليكي؟ فحاولي تفهميهم .. وتقدمي تنازلات شوية .. انتي ممكن يكون سنك صغير او ف مرحل المراهقة واللغبطة اللي انتي فيها ده انا فهماها .. بس مش هتكون علطول جواكي . ف حاولي تفهمي هما محتاجين ايه ؟ وتعمليه وتحاولي انتي كمان تفهميهم احتياجاتك بس بهدوء وعقل.
تم النشر الاثنين، ٣١ يوليو ٢٠٢٣
انا كنت هفكرك بالآيه دى عشان تقدرى تتعاملى مع مضايقاتهم وقوله : ( ولا تستوي الحسنة ولا السيئة ) أي : فرق عظيم بين هذه وهذه ، ( ادفع بالتي هي أحسن ) أي : من أساء إليك فادفعه عنك بالإحسان إليه ، كما قال عمر [ رضي الله عنه ] ما عاقبت من عصى الله فيك بمثل أن تطيع الله فيه . الحقيقة شوفت باقى تعليقاتك واتصدمت انتى محتاجة تعرفى يعنى ايه احترام للاهل اولا وانك ليكى حدود بتقفى عندها خصوصا مع الاب والام ..مهما كانوا . جميل سؤالك انك مش عاوزة تكونى بتتعاملى غلط وده بيدل انك جواكى سليم .الحمدلله اول حاجة تستغفرى ربنا عن كل تصرف طلع منك غلط . افتكرى ان الرسول عليه الصلاة والسلام مسمحش ابدا باهانة الاب والام حتى لو كانوا بيدعوا أبنائهم للكفر بالله. فمهما قولتى انا بعمل عشان بيعملوا هيفضل غلط. اقعدى مع نفسك وافتكرى حدود ربنا فى التعامل مع الاباء والامهات. فهمى نفسك الصح والتزمى بيه . البيت اللى انتى فيه هو اللى عملك الشخص الحالى اللى بيقرر لنفسه ده ياكل فين ويقعد مع مين . كلمة شكرا وتقديرك ليهم الاول انك تحترمى نظام البيت ده زى ما هو ...حتى لو مش عاجبك ( لانهم ف الاساس مش بيقولوا حاجة غلط ) مش عاجبك الاكل اتفضلى اقفى اتعبي واعملى اكل للبيت كله بنفسك ( انا تقريبا متوقعه انك مش عاجبك الاكل البيتى وعاوزه حاجات كلها جديدة وغير صحيه وخلاص) او العكس
تم النشر الثلاثاء، ١ أغسطس ٢٠٢٣
لو انتي لسه في سن المراهقه ، فاحب اقلك انك دلوقتي بتكوني شخصيتك لسه واهلك مطب صناعي ف الطريق دا فا قدامك حل من حلين يا تفضلي كدا ف نكد وخناق ، يا تفكري ف طريقه تتجنبيها بيهم ..... انما بقا لو مش ف سن المراهقه ، فا ياريت تدوري ع كريقه للتواصل معاهم من غير انانيه منك
تم النشر الاثنين، ٣١ يوليو ٢٠٢٣
بكل بساطة عاملي اهلك كويس...... الحياة تنازلات ما بالك انتي هتتنزلي لمامتك وباباكي بغض النظر عن اجر الطاعة عند ربنا بس انتي اتنازلي شوية في الاول والموضوع هيتحسن ان شاء الله.....خدي الامور ببساطة شوية وانا شايف من وجهة نظري المتواضع ان معظم المشاااكل بتحصل بسبب ( العناد ) فنبطل عناد ف بعض الدنيا هتكون اهدا .....في جملة بتردد ف دماغي دايما لو حصل اي خلاف بيني وبين ابويا ( انت ومالك لابيك ) حاولي تفهمي الجملة دي شوية وربنا يعينك يارب ويهديكم ككلكم لبعض ان شاء الله
تم النشر الاثنين، ٣١ يوليو ٢٠٢٣
بصي يا حبيبتي حاسة بكل خرف بتقوليه حاساه فعلا. الحل بدون ما تفكري كتير انك تشغلي وقتك برة البيت،، دخلي اي حاجة في حياتك دخلي عدد ساعات مذاكرة زودي نشاطات برة دخلي كورسات حفظ قرآن و احاديث زودي كورسات زودي ساعات جيم او مقابلات اصدقائك.. فيه سن معين بيحصل تصادمات كبيرة بين الاهل و الابناء و الاهل اتربوا كدة وعاشوا كدة و عمرهم ما هيدركوا انهم بيضروكي.. تجنبا للعقوق حاولي تتجنبي اذاهم تجنبي الدخول في النقاشات و الجدالات قولي نعم و حلضر و خلصي نفسك سمعيهم االي هما عايزينه حتى لو مش هتعمليه خليكي ذكية .. عامليهم بالمعروف و اشغلي وقتك بعيد يا حبيبتي بدون تقصير معاهم طبعا.. يا رب تكوني فهمتيني لان ده اسلم حل و نجاحه مضمون ١٠٠٪ و هترتاحي
تم النشر الاثنين، ٣١ يوليو ٢٠٢٣
تصدقي بالله؟ هي دي العيشة اصلا ..اومال انتي عايزه اهل مش سائلين فيكي تبوظي تفسدي تولعي حتى ميفرقلهمش ؟! كلنا اهالينا بيعملوا معانا كده عشان خايفين علينا وده طبيعي فما بالك انهم شافوا منك قبل كده انك روحتي لما سابوكي على راحتك اذيتي نفسك وشربتي سم.. حاولي تقربي من ربنا وتسيبي كل اصحاب السوء وتروحي تدوري على اصحاب صالحين يعني مثلا شوفي اقرب مكان بيحفظ قران مثلا واتصاحبي على البنات هنالك هيحببوكي في الدين وبالتالي الدين هيبعدك عن الي بتعمليه وانتي اول واحده هتلاحظي الفرق قبلهم كمان❤️...وبمناسبة انك بتغيري من اهالي صحابك هما اكيد كل الاهالي بيزعقوا وبيتخانقوا بس اكيد مش هيعملوا ده قدامك! كلنا بنبقى عايزين نظهر احسن ما فينا قدام الناس وده طبيعي حتى روحي اسالي صحابك دول هو امهاتكوا مبيزعقوش؟ ابهاتكوا بيتخانقوش معاكوا؟ هتلاقي ان الاجابه واحده وان ده الطبيعي في الاهل بيحاولوا يحافظوا علينا حاولي تشوفي الموضوع من وجهة نظرهم هتفهمي❤️..ربنا يهديكي ويهديني والمسلمين لاهاليهم يارب.
تم النشر الاثنين، ٣١ يوليو ٢٠٢٣
مش بقدر اتحكم ف عصبيتي ولو سكت وطنشت بيزودوا اكتر ومش دايما بكون انا اللي غلطانه عايزين يتحكموا ف حياتي انام امتي واكل اي واخرج امتا وكل حاجه ودي مش عيشه خالص
تم النشر الاثنين، ٣١ يوليو ٢٠٢٣
لعرض السؤال في فدني اضغط هنا