اوقات بشك إني ممكن أكون بعاني من اضطراب القلق بس كتير بحس اني بوهم نفسي
بقالي سنين يمكن من ٢ اعدادي وانا دلوقتي داخلة تالتة جامعة بعاني من حاجات ثابتة ممكن درجتها قلت او اختلفت :
١. تفكير زائد وتحليل المواقف والكلام بشكل مستمر وطول الوقت حتى لو موقف بسيط.
٢. القلق من المستقبل والسيناريوهات اللي ممكن تحصل ولازم اكون حاطة خطة في دماغي احتمالات ممكن تحصل.
٣.مقدرش انام غير وانا مخططة يومي هيمشي ازاي والمواعيد عني سيف بحس بخنقة وتوتر وضغط لو عارفة اني عندي مشوار بس معرفش الساعة كام .
٤. خوف من الرفض أو الهجر أو إن شخص مهم يبعد ومؤخرا بقى يخليني اول ما أحس ان علاقتي بحد بدأت تتعمق بحس كأني خايفة أو يحصل رد فعل اندفاعي بالكلام او التصرفات وأبدأ أبعد بسرعة.
٥. الاحتياج للطمئنينة، لما بيبقى في حاجة معرفهاش او هعمل حاجة جديدة بحتاج ديما حد يطمنني ويهديني ان دا طبيعي او دي حاجة عادية متخوفش، او لو حد بحبه ببقى حاسة اني محتاجة انه يأكد دا بس مش بطلب او اخرج الاحتياج دا .
٦.القلق من الأعراض الجسدية والخوف من أن تكون مشكلة صحية ولكن يتلاشي الاحساس بإقناع نفسي إني اتوهم.
٧.صعوبة تهدئة التفكير ممكن افضل صاحية مش عارفة انام من كتر ما انا مش قادرة اكنترول الأفكار واللي غالبا سلبية.
٨. جلد ذات قوي جدًا بعد الأخطاء أو المواقف لو غلطة صغيرة بعمل لنفسي محكمة وبحس بجد انها نهاية العالم وان الناس كلها شايفاني غير مسؤولة وفاشلة.
٩. التوتر من المواقف الاجتماعية لو في مناسبة ببقى محرجة جدا كمان لو حد سلم عليا، وبتكسف وبتوتر لو راجل في محيط الشغل او الكلية نطق اسمي بحس اني عاوزة الارض تتشق وتبلعني كدا.
١٠. القلق عند وجود مشاعر أو علاقات قريبة وأحيانًا الرغبة في الانسحاب رغم الرغبة في القرب.
١١. ظهور القلق جسديًا: شد في الجسم، ألم مع العصبية، إحساس بالضغط والتوتر، ورعشة أحيانًا، الشعور بأنني أريد التكلم اتكلم كثيرا لكنني لا أعرف ماذا اقول او كلامي غير مرتب.
١٢. صعوبة تحمل الجهل بحاول أعرف "هو ليه حصل؟ وإيه معناه؟ وإيه اللي هيحصل بعد كده؟ طب فلانة بتفكر في ايه؟ طب يا ترى انا متشافة ازاي؟ "
١٣. لو حد سألني سؤال فجأة حتى لو عارفاه دماغي بحسها بتقف بحس كإني بحاول أشغلها معلقة احساس انك ماسك موبايلك بتحاول تحركه بس التاتش مش شغال.
١٤. ذاكرتي ضعيفة بنسى بسرعة
اوقات بحس انه لاء دا مش طبيعي وكتيير بقعد اقول اكيد لاء يعني متهيألي اساسا وانا اللي مركزة زيادة بس حتى اللي حواليا لاحظوا اني بتوتر بسرعة ممكن من حاجات بسيطة اوي زي الأخصائية طلبت مني أجيب لها شريط لزق من الدولاب وانا بدور عليه كانت ايدي بترتعش بس انا مكنتش حاسة بتوتر عالي اوقات بحس انه انا طول الوقت متنشنة ومتوترة بس اوقات بحس متهيألي فاهمين حاجة؟
أنا فاهمة تمامًا اللي بتمرّي بيه، ومش هقولك إنك بتوهمي نفسك. اللي وصفتيه من تفكير زائد، قلق مستمر، خوف من الرفض، وتوتر جسدي ونفسي، ده شيء حقيقي وكتير بنات في سنك بيحسوا بنفس الضغط ده، خاصة مع الضغوط الدراسية والاجتماعية. اللي بدأ من إعدادي واستمر لحد دلوقتي مش حاجة بسيطة، وإنك لاحظتي إن الناس حواليكي شافوا التوتر ده كمان بيأكد إن الموضوع مش مجرد تخيل. الأعراض اللي ذكرتيها (التحليل الزائد، الخوف من المستقبل، صعوبة النوم بدون خطة، جلد الذات، والتوتر الاجتماعي) بتشير لنمط قلق عام مع عناصر من القلق الاجتماعي وصعوبة في التنظيم العاطفي. ده مش عيب ولا ضعف، ده إشارة إن عقلك بيحاول يحميكي بطريقة مفرطة. ربنا أمرنا بالتوكل والسعي للعلاج، فمش غلط تطلبي مساعدة متخصصة عشان تقدري تتعاملي معاه بطريقة أفضل. جربي تبدئي بخطوات عملية بسيطة: اكتبي مخاوفك كل يوم في ورقة وقسميها لـ"أشياء أقدر أتحكم فيها" و"أشياء خارج سيطرتي"، وادعي ربنا بالتيسير والطمأنينة قبل النوم. لو قدرتِ تلاقي متخصص نفسي (حتى لو أونلاين في البداية) هيساعدك كتير، وممكن تبحثي على فدني عن أسئلة مشابهة عشان تشوفي تجارب بنات تانيين. أنتِ مش لوحدك في ده، وإنك فتحتِ الموضوع دلوقتي خطوة قوية جدًا. لو حابة تفضفضي أكتر أنا هنا.
تم النشر الأحد، ١٣ سبتمبر ٢٠٢٦
انا اتشخصت باضطراب القلق ونوبات الهلع والوسواس القهري من سنتين وكل الاعراض الي انت قلتيها كلها كانت عندي فانا انصحك انك تروحي لدكتور نفسي وده مش عيب ولا عار ده مشكله ومرض زي اي مرض جسدي وربنا يكتبلك الي فيه الخير وانا مش باكدلك انك مريضه بالقلق لاني مش دكتور ولكن روحي عشان تطمني
تم النشر الثلاثاء، ١٥ سبتمبر ٢٠٢٦
قريت كلامك كله وحقيقي حاسس إن أكتر حاجة متعبة عندك مش القلق نفسه قد ما هي إنك بتحاول تفهم وتفسر كل حاجة بتحصل جواك وحواليك فبدل ما تحاول توقف التفكير تمامًا جرب تتعامل معاه بشكل أبسط لما حاجة تقلقك اسأل نفسك هل في حاجة أقدر أعملها دلوقتي؟ لو فيه اعملها وخلاص ومتفضلش تفكر في الموضوع أكتر من كده ولو مفيش حاجة تقدر تعملها يبقى مفيش فايدة إنك تفضل تعيد نفس السيناريو في دماغك سيبه لوقته وارجع للي في إيدك وبرضه لو حسيت بتوتر أو حاجة غريبة في جسمك حاول متقفش عندها وتفضل تسأل نفسك هو ده طبيعي؟ طب ليه حصل؟ طب يمكن يكون فيه حاجة؟ لأن كل ما تركز مع الإحساس أكتر ممكن تحسه أكتر خده كإحساس عابر وكمل يومك وفي موضوع الناس والعلاقات متحكمش على حاجة من موقف صغير. حد اتأخر في الرد؟ مش شرط يكون زعلان منك. حد اتغير معاك؟ متفترضش أسوأ احتمال من غير دليل سيب تصرفات الناس هي اللي توضّحلك الحقيقة. وأهم حاجة متستناش إنك تبقى هادي عشان تعيش حياتك. اعمل اللي وراك حتى لو قلقان شوية. مع الوقت هتبدأ تفهم إن مش كل إحساس بالخوف معناه إن فيه خطر فعلًا وخلي الجملة دي قدامك مش كل فكرة لازم أصدقها ومش كل إحساس لازم أفسره ومش كل احتمال لازم أستعد له ولو لقيت إن الموضوع بقى معطلك عن دراستك أو حياتك أو علاقاتك بشكل واضح، ساعتها متستحملش لوحدك، وممكن تكلم متخصص يساعدك تفهم الموضوع وتتعامل معاه بشكل أحسن
تم النشر الاثنين، ١٤ سبتمبر ٢٠٢٦
اعتذر لحضرتك اني هقول الكلام بشكل سطحي قليل ومبسط ولكن الفكره لازم التوكل علي الله وعيش اليوم بيومه أو عمل خطه اسبوعيه بجد أقصي هو روتين حياتي لازم تمشي عليه لأن تخطيط سيناريوهات دا مش غلط ولكن التخطيط لو جه عليكي بالسلب من كثره التفكير وحرق الدماغ فيجيب التقليل منه بطرق و عمل خطه أسبوعيه وليس شهريه أو سنويه أو التفكير في المستقبل البعيد هو ما يجعل الخطه الاسبوعيه عن غيرها فيها حاله من الكفائه في قوه الأداء والرضا عن النفس لو فكرتي علي المستقبل البعيد مش هتثقي بنفسك وهتقاقي وتختفي وتتوتري ودا هيسبب ضعف تركيز وتشتت دائم ف لازم تقللي كل السلبيات وحاولي بطرق معينه عشان تتغلبي برضه علي الوساوس الي بتجيلك برضه لأن كثره التفكير تسبب الوساوس، طيب كثره التفكير دي جيه منين، علي حسب كل شخص وأسألي نفسك برضه تعرفي ولكن المشترك من التفكير في المستقبل حتي لو فكرتي في المستقبل تفكير قليل في فص ف الدماغ بالمختصر هو الفص اللاوعي وهو بياخد الأفكار المستقبليه ويبني عليها احتمالات واعتبارات وطرق للبناء والحل والفص اللاوعي لتكوني معوداه علي انو يحلل كل كبيره وصغيره ويتفرع فيها ودا هيسبب ازمه معاكي ولكن بالمختصر المفيد بدل م تعملي خطه لحياتك عشان تحققي المطلوب أو الهدف المرجو فكري قبليها انك محتاجه تخططي ازاي تخططي تحلي المشكله من جذورها ودا ممكن يتحل بكذا طريقه ولكن الطريقه الشهيره هي عن طريق انك تخططي لعمل نظام برنامج صحي للدماغ بحيث تحلي كل المشاكل الي بتعيق طريقك، وبالتوفيق يارب ويجازي الصابرين علي صبرهم وربنا هيجازيكي خير ان شاء الله وفقك الله في حياتك إن شاء الله.
تم النشر الاثنين، ١٤ سبتمبر ٢٠٢٦
خوف
تم النشر الاثنين، ١٤ سبتمبر ٢٠٢٦
لعرض السؤال في فدني اضغط هنا