تم حذف هذا السؤال
السلام عليكم، هو طبيعي نكون مختلفين عن بعض، احنا مش مفروض نكون نسخ واحدة. ففكرة اختلافك عن اللي بتعرفهم أو حتى اللي بترتاح لهم دي حاجة عادية متخليش الأمر حاجز كبير خاصة لو لقيت الأشخاص دول كويسين وهيكونوا صحبة صالحة لك. كمان مش مشكلة لو حد علق على الاختلاف، ليه بتاخد الأمر بمنحى سلبي؟ ممكن بيقول ملاحظة عابرة مش نقد سلبي أو رفض لاختلافك عنه. *** وفيه فرق بين الاختلاف والعيب، احنا ممكن نختلف في السلوك والكلام لكن فيه أساسيات وخطوط حمراء لو الاختلاف ده يمسها يبقى هنا نقف ونقيم الوضع. هل سلوكي يمس الخطوط دي وهل يؤذي الآخرين ولا هو ببساطة إن أنا مش شبههم؟ *** ممكن لو حد وجه لك الرأي ده بدل ما تسأل عموما ليه شايف كده أو إيه يخليه يقول كده خليك محدد واطلب منه يذكر موقف أو مثال عن الاختلاف اللي يقصده. ولو معرفش يحدد مثال فبلاش أنت تحكم على نفسك من مجرد تعليق عام ممكن ميقصدش أي شيء سلبي. *** الحل مش في البعد عن الناس، أنت ممكن تتدرب على مهارات التواصل الاجتماعي وتتطورها، وبما إنك قلت بتتكلم عن نفسك بشكل مفرط وده يمكن يضايق أشخاص مش بيحبوا الناس اللي دايما بتتكلم عن نفسها فممكن دي حاجة تتحل بالتدريب وإنك تمرن نفسك إنك تستمع أكتر. *** ومش لازم تتغير عشان ترضي حد أو تحافظ على علاقتك بحد، ممكن تبقى على طبيعتك وفي نفس الوقت تكون قريب من الناس، أنت مش مجبر على اختيار حاجة من الاتنين. *** الناس اللي بتشاركك نفس فكرك واهتماماتك موجودين أكيد بس محتاج تختار التواجد في أماكنهم، يعني لو لك هوايات معينة أو أنشطة تحب تمارسها ممكن تنضم لنوادي أو ورش أو تنزل مكتبات، هتلاقي الناس اللي شبهك وده هيقلل فجوة الاختلاف اللي بتقول عليها. وفي نفس الوقت تتابع حياتك عادي مع المختلفين عنك، ده هيعطيك نطاق أوسع من التفاعل الاجتماعي والتجارب الحياتية، الاختلاف بيثري الحياة عامة، هتتعرف على وجهات نظر مختلفة وأساليب حياة واهتمامامت مختلفة. فمتهربش واسمح للاختلاف بالتواجد في حياتك، وحاول تفرق برضه بين الملاحظات العادية والنقد الإيجابي وبين التعليقات الساخرة والأحكام الجارحة. خليك مرن أكتر، وكويس إنك مش بتتعلق بحد، لكن برضه بلاش تكون منعزل تماما، خليك وسطي في علاقاتك. وبلاش تحول اختلافك لنقمة وتكون حساس من ناحيته، ومع الوقت هتلاقي إنها مكنتش مشكلة ولا حاجة. وبالتوفيق.
تم النشر الجمعة، ٣٠ أكتوبر ٢٠٢٦
أنا شايفة إن اعتمادك على نفسك حاجة كويسة، بس خلي بالك إنك متحولش الاعتماد على النفس لخوف من التعلق بالناس. مش كل شخص هيدخل حياتك لازم يكمل معاك للأبد، وده مش معناه إن وجوده كان بلا قيمة أو إنك لازم تبعد قبل ما تتأذي. وبالنسبة لاختلافك، مش كل اختلاف محتاج يتعدل، ومش كل تعليق من حد عليك معناه إن فيك حاجة غلط. اللي عنده ملاحظة حقيقية يقدر يقولها باحترام ويوضح قصده، إنما إن حد يحسسك إنك مختلف من غير ما يقدر يفسر إزاي، فدي مش مسؤوليتك إنك تفضل تدور على إجابة ليها. خليك على طبيعتك، واتعلم تسمع النقد من غير ما تخليه يهز صورتك عن نفسك، وفي نفس الوقت متقفلش على نفسك ومتخافش تحكي عن نفسك. مش مطلوب منك تقلل من وجودك أو تخبي أجزاء منك علشان الناس ترتاحلك. اختار بس مين يستحق يعرفك بجد، ومين وجوده في حياتك مريح وآمن ليك.
تم النشر الأحد، ١ نوفمبر ٢٠٢٦
أولاً، أنا فاهمة إن اللي بتمر بيه ده مش سهل، وإنك بتحس إن اختلافك بيخلّي الناس تبتعد أو تعلق عليه بطريقة بتجرحك. ده شعور طبيعي لما الإنسان يكون عنده وعي بنفسه وبيحاول يفهم ليه علاقاته مش بتستمر. بس خليني أقولك حاجة مهمة: الاختلاف مش عيب، ومش لازم يكون سبب في الإزعاج لو اتعاملنا معاه بطريقة صح. اللي بيحصل معاك غالباً إن طبيعتك المستقلة ووجهات نظرك الخاصة بتخلّي بعض الناس يحسوا إنك "مش زيهم"، وده بيخليهم يعلقوا بدون ما يقصدوا الإيذاء أحياناً. لكن الرد اللي بتتمناه (إن حد يقولك إيه اللي مختلف فيك بالضبط) مش بيجي لأن معظم الناس مش بيقدر يعبّر عن ده بوضوح، أو بيخاف يجرح. بدل ما تركز على "إيه اللي فيا مختلف"، جرب تركز على "إزاي أقدر أستخدم اختلافي ده بطريقة إيجابية". يعني، الاستقلالية والصراحة والتفكير المختلف دي صفات قوية، بس ممكن تحتاج شوية توازن في طريقة عرضها عشان الناس تقدر تتقبلها. نصيحتي العملية: ابدأ بملاحظة نفسك في المحادثات. لما تحس إنك بتتكلم عن نفسك كتير، حاول تسأل الطرف التاني أسئلة عنه، ده بيخلّي الحوار متوازن ويقلل الشعور بالاختلاف. اختار الناس اللي بيشاركوك نفس القيم أو الاهتمامات، حتى لو عددهم قليل. مش كل الناس لازم تبقى قريبة منك. ولو لقيت نفسك بتبتعد عن الجميع، جرب تاخد خطوة صغيرة زي إنك تشارك رأيك بطريقة ألطف أو تشرح وجهة نظرك بدون ما تدافع عنها بقوة. أنت مش لوحدك في الشعور ده، وكتير من الرجالة بيمرّوا بنفس التجربة. المهم إنك تستمر في تطوير نفسك بدون ما تغير جوهرك. لو عايز تتكلم أكتر عن موقف معين حصل معاك، أنا هنا أسمعك. ولو حابب تشوف تجارب مشابهة، ابحث عن أسئلة مشابهة على فدني.
تم النشر الخميس، ٢٩ أكتوبر ٢٠٢٦
في حاجه مشابهه للي انت بتوصفه ده وهي التعلق بالله طبيعي ان كل الناس تبقى مراحل وبينتهوا مع انتهاء المرحله او بيروحوا يعني ولكن الاصل هو التعلق بالله فقط فلما بتكون في حاله من الاستغناء الناس بتضايق يعني بيشوفوا ان هم ما بقوش فارقينلك بمعنى اصح قادر تعمل حاجاتك وتعيش من غيرهم ودي حاجه كويسه اصلا ولكن ما ينفعش الانسان يوصل لدرجه البعد التام عن الناس لان الانسان بطابعه اجتماعي فعادي التعامل مع الناس يكون عادي ولكن مش بتعلق لكن في الاصل يبقى في تعامل عادي
تم النشر السبت، ٣١ أكتوبر ٢٠٢٦
@.. .. فعلا هوه دا الصح
تم النشر الاثنين، ٢ نوفمبر ٢٠٢٦
لعرض السؤال في فدني اضغط هنا