السلام عليكم، أنا مش عارفة عمرك قد إيه لكن ممكن أخمن إنك صغيرة شوية. مش هقول إنك غلط أو بتبالغي أو بتبحثي عن الشخص المثالي... أي بنت بتفكر في الزواج أكيد نفسها في إنسان يكون ملتزم وعارف دينه كويس. لكن، الصورة مش بالكمال اللي متخيلاه ولا فيه قاعدة هتمشي عليها بالمسطرة في اختيار الزوج الصالح، التوقعات العالية هتسبب لك إحباط خاصة مع أحوال الشباب الأيام دي إلا من رحم ربي. ** وأخشى إن تفكيرك بالطريقة دي ممكن يجذب أشخاص في ظاهرهم متدين لكنهم أبعد ما يكونوا عن الصفات اللي بتبحثي عنها، ممكن تقعي مع شخص فهمه للدين ضيق... (هتقولي احتمال المجتمع هو اللي بيقول عليه متشدد) لأ... فيه أشخاص فعلا بياخدوا الدين من منظور ضيق للغاية لدرجة تحريم ما أحل الله والتشديد حتى في الأمور الخلافية اللي اختلف عليها العلماء طوال مئات السنين. وممكن مثلا تلاقي فيه الصفات اللي قلت عليها لكن من ناحية تانية مش فاهم فقه الزواج ولا إزاي يعامل زوجته زي ما الإسلام أمر ويبقى فاهم قوامته عليها فهم خاطئ ليس من الدين في شيء... وللأسف نماذج من دي كتير موجودة في الواقع. ** كمان ممكن من خلال النظارة الضيقة اللي أنت لابساها تعتقدي إن أي شخص فيه صفة واحدة ناقصة من دي هو شخص لا يستحق الارتباط به، حتى الإنسان الملتزم (التزام حقيقي) هو شخص غير كامل وبيجاهد، ممكن يرتكب معاصي ويجاهد في التوبة وممكن قوي تكتشفي إنه له ذنب ملازمه ومش قادر يتخلص منه. فالخلاصة، لا أحد كامل، توقعي ألا تجدي كل الصفات التي تبحثين عنها في شخص واحد. تريثي واقرأي كتير جدا وطوري من عقلك وتفكيرك ونظرتك للحياة والزواج وحقوقك وواجباتك كامرأة مسلمة، وقتها هتقدري تحكمي على الأشخاص اللي بيتقدموا لك وتختاري شريك الحياة الصح اللي تثقي إنك هتقدري تأسسي معه أسرة مسلمة سليمة. تحياتي.
لعرض الإجابة في فدني اضغط هنا