السلام عليكم ورحمه الله وبركاته
في بدايه الأمر كنت حابه دكاتره نفسيه تشارك في الإجابة على هذا السؤال لأني تعبت جدا ولا اعلم ماذا أفعل أو أي أحد يكون مختص مشكلتي أني في الدراسة الثانوي لم أستطع أن أحقق حلمي ودخلت كليه انا لا أريدها وذلك بسبب المجموع حالتي النفسية تدهورت والصحية وأيضا صرت غير واثقه بنفسي وانطواءيه اكتر أصبحت أكره هذه المرحله ولا احب التحدث بها وأي حديث عنها يذكرني بجميع التفاصيل والذكريات المؤلمه التي مرت وذكري الثانويه تستمر كل عام وهذا الموضوع منتشر في حديث الناس اليومي نفرت من الناس ومن الحديث معهم
أصبحت هذه المرحله لا تمر من ذاكرتي لا اعلم ماذا افعل لا أستطيع أن أركز في جامعتي الحاليه والتي أفكر في أن احول منها وهي التربيه اريد أحد يستشير عليا حلول
السلام عليكم ورحمه الله وبركاته. تعرفي ان انا كمان ما حققتش حلمي في وقت الثانويه العامه اه فعلا ده حقيقي بس انا رغم ان انا ما حققتش حلمي الا اني بعد ما اتخرجت النت كليه لقيت ان انا ما كانش ده حلمي اصلا واللي انا كنت بحلم بيه ده وعايزه اعمله في وقت الثانوي ما كانش ده حلم الحقيقي ولقيت انه الكليه اللي انا دخلتها هي اللي ساعدتني ان انا اكتشف حلمي الحقيقي. خلينا كده نبص إيه اللي بيحصل معنا اللي بيحصل معانا في مرحله الدراسه ان احنا شويه بنمشي في القوالب يعني اللي هو كل الناس بتقولوا او اللي اهلنا بيقولوه لنا او بيمشونا جواه من غير ما نحس ويقنعونا به من غير ما نحس فبنيجي بعد كده كل لما نكبر كل اما نبدا نشوف احنا نفسنا نقدر احنا بقى نستكشف نفسنا نشوف هو احنا عايزين في ايه فعلا هو احنا حلمنا ايه الحقيقي ده بيكون بقى حاجه مختلفه خالص. فانا عايزاكي تبداي تكتشفي نفسك لو قلنا انه الحلم اللي فات ضاع طب هو احنا ما ينفعش نحلم ثاني عشان نحلم من اوله جديد هو احنا لما بنصحى من النوم ويخلص الحلم حتى لو كان من حلم حلو وخلص اكيد بنتضايق انه حلم الحلو خلص ما بنعرفش ثاني يوم ننام تاني ونحلم حلم تاني غيره؟ بنعرف. الحياة نقدر نعمل فيها كده. لما نحلم حلم سواء حققناه أو متوفقناش إن احنا نحققه عادي جدا إن احنا نحلم حلم غيره ونمشي في طريق جديد ونبدأ نشوف حاجات مختلفة نتحرك فيها ونعمل فيها مجهود ده طبعا بيكون صعب لما بيكون الأهل عندهم توقعات مننا هنا بقى دي بيبقى إيه، ده بيبقى الجبل اللي واقف قصاد الطريق بتاعنا أو قصاد اكتشافنا لنفسنا، إيه هو توقعات العيلة. أصل أنا لو مشيت في السكة دي هم برضه مش هيبقوا شايفيني كده كويس برضه كده هم مش هيشوفوا إن ده إنجاز ده بقى معناه إيه ده معناه إنه أنا كده حلمي الأساسي إنه أهلي يشوفوني ناجحة وحلوة وشاطرة أو محققة شيء عظيم وده بقى بيبقى هدف لوحده ده هدفه لوحده وده حلم لوحده بس الحلم ده مش لازم يكون حلم لوحده انا ممكن الحلم ده اربطه بحلم ثاني عادي جدا ممكن يبقى الحلم بتاعي ان انا ابقى كذا واهلي شوفوني ناجحه عادي جدا ممكن جوه هدفه جوه اي طريق ممكن نعمل ده جوه بقى المشاعر اللي بتكون انا زعلانه ان هم اصلا مش قادرين يشوفوا نجاحي او زعلانه ان انا ما قدرتش افرحهم المشاهد دي بقى اللي بتكلبشنا بتخلينا يعني مش قادرين نواكب التطور اللي بيحصل جوانا او الاهداف الجديده اللي بنحطها والتحركات، سلاسل بقى مكلبشانة احنا عايزين نفك السلاسل دي الاول نتخلص من المشاعر دي نتخلص منها ازاي اتكلم مع اهل الكل بساطه كل صراحه يا جماعه انا طول ما انا طول الوقت شايفه انه انا حققتلكوش اللي انتوا عايزينه انا مش هعرف اتحرك في حياتي انا مش عارفه حتى الكليه اللي انا دخلتها انجح فيها فاعمل فيها انجاز يفرحكوا برده انا مش عارفه اعمل ده حتى لو نقلت كليه ثانيه مش هاعرف عند طول ما انا حاسه بالاحساس ده فساعدوني عشان اتخلص من الاحساس ده ان شاء الله يساعدوك لا واحنا كده كده بنحبك واحنا كده كده فخورين بيكي حتى لو ما عملتيش ده اه كان نفسنا في ده ممكن يساعدوكي بالطريقه دي وتبقي تخلصتي من الحاجه اللي مكلبشاكي ومخلياكي متثبته في الارض مش عارفه تتحركي دي خطوه مهمه جدا اتمنى تعمليها وبعدين تكملي بقيه الحاجات.
تم النشر الاثنين، ٢ يونيو ٢٠٢٥
وعليكم السلام ورحمه الله وبركاته متخليش الماضى يسرق منك اللحظه الحاليه انتى فى كليه تربيه دى حاجه جميله جدا ومجموعها كبير اصلا مبيكونش قليل انا بشوف طلاب فى تالته ثانوى دلوقتى كتير حلمهم تربيه عارفه ان انتى اكيد مدايقه ودا حقك جدا تزعلى كليتك عظيمه عارفه كام طالب الايام دى محتاج معلمه حنينه تجبر خاطره عارفه المدرسين الايام دى بتعمل اى فى الطلاب حقيقى الطلاب كلها مشوهه نفسيا تخيلى انتى لما تبقى معلمه حنينه تخيلى كام طفل هيبقا كويس ولما يكبر هيبقا فاكرك طول عمره الدكاتره بالكوم فى كل حته والمهندسين وغيره لكن عارفه يعنى اى تسيبى اثر فى قلب طفل انه جميل ويستحق المعامله الطيبه تفاصيل الثانويه بتاعتك متأكده انك هتيجى فى يوم وتفتكريها بالخير وانتى مش واثقه فى نفسك لى ؟انتى معندكيش غير نفسك اصلا لازم تثقى فيها وتحبيها وتقولى بصوت عالى انا عملت اللى اقدر اعمله واللى حصل حصل وانا استحق اتخلص من مشاعر الذنب وعدم الثقه بالنفس دى يا حبيبه قلبى ربنا يجعلك سبب ان طالب يبقا كويس ويحب نفسه تانى
تم النشر الأحد، ١ يونيو ٢٠٢٥
و عليكم السلام ورحمة الله وبركاته انا فاهمة جدا احساسك و قد ايه ممكن الأمر يكون محبط شوية و ناس كتير بتزعل بسبب ده بس احب اقولك ان الدنيا منتهتش و لسه في فرصة بس الموضوع محتاج منك شوية عزيمة مش معنى أن انتي مدخلتيش الكلية اللي كنتي عايزاها يبقى الدنيا انتهت تقدري تحسني من نفسك و من دراستك في الجامعة الحالية اللي كنتي فيها و افتكري ان هو ده الخير اللي ربنا كاتبهولك و اكيد لو مثلا دخلتي الجامعة اللي انتي عايزاها مكنش هيكون افضل حل ليكي ربنا دايما ليه حكمة ف خليكي واثقة في حكمة ربنا و ان اختياره هو الأحسن مش اختيارنا، احنا بنبقى شايفين ان اختيارنا هو ده احسن اختيار لان احنا بشر بطبيعتنا و نظرتنا الدنيوية محدودة جدا مش بنبقى شايفين الحياة من بعد كده احنا كل تفكيرنا في اللي احنا عايزينه و بس مش بنفكر بعد كده هنكون مرتاحين ولا لا ولا هنكون في أحسن حال ولا لا، ف مش مشكلة تحسي بإحباط اسمحي لنفسك عادي انك تحسي بالزعل و خلي المشاعر دي تطور لمحاولة انك تجتهدي في جامعتك الحالية لان طبعا هتتبسطي لما تشوفي نفسك ناجحة. بالنسبة لذكرى الثانوية المؤلمة، انتي عارفة انتي عملتي ايه كويس و ربنا عارف انتي عملتي ايه و اجتهدتي ازاي و حاولتي ازاي ف ده كفاية عند ربنا و ربنا مبيضيعش تعب حد و لكن بحكمته الكاملة و لطفه و رحمته بينا بيختار الاحسن لينا و قدره كله خير سبحانه و تعالى، ف متكتئبيش يا جميلة و متتجنبيش الناس كلنا عندنا تجارب مريرة و لكن خلي تجربتك نقطة قوتك و تكون سبب في تغيرك للأحسن مش للأسوء، اتكلمي عن تجربتك بشجاعة و إن ده بس بداية الطريق و مش كل الناس اللي نجحت في جانب من جوانب حياتها دخلت اللي هي عايزاه بالعكس هي قابلت عقبات كتير لكن تخطوها، مش مشكلة لو زعلتي بس قومي و حاولي تاني و ربنا هيوفقك بإذن الله
تم النشر الأحد، ١ يونيو ٢٠٢٥
وعليكم السلام ورحمة الله وبركاته، أخيتي العزيزة، أشعر بعمق الألم والضغط النفسي الذي تواجهينه بسبب تجربتك مع مرحلة الثانوية وما تبعها من اختيارات لم تكن من رغباتك الحقيقية. هذا شعور صعب جدا، وأقدر صدقك وشجاعتك في التعبير عنه، فالكثيرون يمرون بمواقف مشابهة لكن لا يجدون من يشاركونهم مواجعهم. لنتحدث معاً خطوة بخطوة: قبول المشاعر والتعامل معها: من الطبيعي أن تشعري بالحزن والإحباط والغضب بسبب ما حدث، خصوصاً إذا كنت تشعرين أن هذا المسار ليس لك. هذه المشاعر ليست ضعفا، بل هي رد فعل طبيعي. حاولي ألا تضغطي على نفسك لتجاهلها، بل ابدأي في الاعتراف بها بهدوء ورعاية. التقييم الواقعي لوضعك الحالي: ستجدين أن الجامعة التي دخلتها ليست حلمك، وهذا طبيعي ويحدث لكثير من الطلاب بسبب ظروف قد لا تتحكمين بها (مثل المجموع مثلاً). اسألي نفسك: هل توجد إمكانية للتحويل إلى كلية أو تخصص يتناسب مع ميولك وقدراتك؟ هل يمكنك استغلال الفرص في جامعتك الحالية لتعزيز مهاراتك أو تعلم شيء تحبينه؟ إعادة بناء الثقة بالنفس: تمرين بسيط يمكنك البدء به: دوّني يومياً شيئاً صغيراً قمت به بنجاح أو شعرتِ بالراحة تجاهه. ركزي على نقاط قوتك وإنجازاتك السابقة مهما كانت بسيطة. التعامل مع الانطوائية والانعزال: من الواضح أنك تشعرين بعدم الراحة مع الناس والناس يتحدثون عن موضوع الثانوية بشكل يذكرك بالماضي المؤلم. حاولي تحديد عدد من الأشخاص الذين تشعرين بالراحة معهم، وابدئي بالتواصل معهم ببطء. لا تجبري نفسك على الكل، بل اختاري من تثقين بهم. طلب مساعدة مختصة: أفضل خطوة هي الاستشارة مع طبيب نفسي أو مستشار أكاديمي. خبراء مثل هؤلاء يمكن أن يساعدوك على فهم ما تمرين به بعمق، ويوفرون لك أدوات عملية تساعدك على النهوض مرة أخرى. وأحب أن أشجعك على زيارة صفحة الخبراء في تطبيق فدني 📌 موقع الخبراء لطلب استشارة نفسية تلائم وضعك. تذكر دوماً أن هذا ليس نهاية الطريق: كثير من الناس تأخرت بداياتهم أو اضطروا إلى التعديل في مسارهم الدراسي، ولا يعني ذلك الفشل بل هو رحلة اكتشاف للذات. ربّما تجدين فيما بعد طريقاً أفضل وأكثر رضاً لنفسك، سواء في نفس المجال أو غيره. إنني أؤمن بقوتك وقدرتك على تجاوز هذه المرحلة، ومع الوقت والصبر ستجدين نفسك أقوى وأكثر معرفة بما تريدينه حقاً في الحياة. إذا أحببتِ، يمكنني مساعدتك في وضع خطة صغيرة واقعية للخطوات القادمة معاً. لا تترددي في طرح أي سؤال أو متابعة الحديث معي يا غالية، فأنا هنا لأدعمك وأساعدك. دمتِ بخير وسلامة يا صديقتي. 💕
تم النشر السبت، ٣١ مايو ٢٠٢٥
بصي انتي لو بس قبلتي فكرة ان كل اللي حصل ده تدبير من ربنا انك تدخلي الكليه دي عشان ربنا شايفك هتبقي احسن فيها من كليه تانيه هتحبي كليتك لان "وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم وأنتم لا تعلمون" وبمجرد والله ما هتصدقي كده ويبقى عندك يقين بده هتحبي الكليتك وهتفتكري كل اللي فات ده وتضحكي عليه وهتقولي ربنا اخترلي الأحسن وساعتها بس هتثقي في نفسك لما تلاقي مستواكي بقا كويس في الكليه
تم النشر السبت، ٧ يونيو ٢٠٢٥
لعرض السؤال في فدني اضغط هنا