انا الاخت الكبيرة بين اخواتي وفي فتره الثانوية العامة تعبت جدا وخصوصا في فتره الإمتحانات و بعد ظهور النتيجة لحد وقتنا هذا مش عارفه اتخطى و لاني كنت شاطرة و كنت القدوة لاخواتي انا مدمره حرفيا من مجموعي
مش عارفه ارجع طبيعيه بقيت بفكر كتيير في المستقبل وحاسه اني تايهه وبعيط من غير سبب و ساعات بحس إني عايزه أنتحر انا الحمد لله دخلت كلية وكل حاجة بس تخصص مش حاباه وبحاول اتأقلم واغصب عقلي اني اذاكر وأكمل ومش قادره بكره المكان والدراسة فيه واسم الكلية حتى ومفيش ليا الا هي يعني مينفعش احول منها فهل دا اكتئاب ولا اي
حبيبتي عايزه اقولك ان ثانويه عامه مش مقياس عارفه ان انتي تعبتي كتير مذاكره وسهر ودروس بس دا نصيبك ولازم تعرفي ان تعبك دا ما راحش وأن ياما ناس كتير ذاكرت في اللي جاب درجات وفي اللي سقط وفي اللي اتظلم وفي اللي ظلم وفي اللي جاب درجه كويسه في حدود ٨٥ في الميه واتشعلق في النص لانه درجته كويسه وما لحقش كليه زي ما بيقولوا مرموقه عارفه ان حلمنا كلنا من واحنا صغيرين نبقي دكتور او مهندس او ظابط لان احنا تفكيرنا في البدايه كان غلط ولأن دا اصلا ما كانش تفكيرنا كان كلام الناس اللي حوالينا ولازم تعرفي بردو ان في ناس دخلوا الكليه اللي بيحبوها بس جالهم أمراض نفسيه ولا نفسهم كليه ولا نفعهم حلم وفي نفس الوقت ناس دخلت ما تستاهلش بس اناي لازم تفتكري دايما انتي ربنا هيكرمك بس لسه ما جاش الوقت الفرق بينك وبيت حد دخل كليه حاببها ان ىربنا رزقه بدري وانتي رزقك جاي بس متأخر شويه ﴿ يَرْزُقُ مَن يَشَاءُ بِغَيْرِ حِسَابٍ ﴾ وافتكرت انك تعبتي كتير وأن ﴿ وَأَنْ لَيْسَ لِلْإِنْسَانِ إِلَّا مَا سَعَى]الدنيا ما وقفتش حبي جامعتك هتحبك الجامعه ذاكري وكأنك بتحبي تعملي حاجه حببي نفسك فيها لان شيطانك اللي بيحاول يكرهك في الكليه لو ذكرتي وجبتي تقدير اي المشكله ما دا تحقيق حلم ممكن تلاقي شغل يليق بيكي وهيسعدك ربنا وأن شاء الله يسعدك ربنا ويحقق اللي في خير ليكي ودا مش اكتأب يا حبيبتي متخافيش ان شاء الله خير ولو احتاجتي مساعده انا موجوده❤️
تم النشر الأربعاء، ١٤ يناير ٢٠٢٦
اللي انتي حاسة بيه طبيعي جدًا بعد ضغط الثانوية العامة، ومش معناه إن الحياة خلصت ولا إنك فاشلة. المرحلة دي اسمها انتقال وضغط عصبي كبير، وكتير بيعدّوا بحالة تعب وفتور بعد الامتحانات والنتيجة. إنك تبقي متضايقة ومش متقبلة الكلية دلوقتي ده مش اكتئاب بالضرورة، ممكن يكون إرهاق نفسي أو صدمة تغيير مفاجئ. الاكتئاب بيبقى لما الحزن والتعب يكملوا أسابيع طويلة، مع فقدان رغبة في كل حاجة، ونوم وأكل ملخبطين، ومفيش أي إحساس بالأمل. لكن لو المشاعر دي بتقل وتزيد، وبتحاولي تتأقلمي، فده طبيعي جدًا. خدي وقتك، ومتحكميش على مستقبلك من إحساسك دلوقتي. مع الوقت والتجربة الدنيا بتوضح، ولو حسيتي إن الحالة طولت أو مأثرة على يومك جامد، ساعتها الكلام مع أخصائي نفسي هيبقى خطوة صح، مش ضعف.
تم النشر الأربعاء، ١٤ يناير ٢٠٢٦
إزيك ياسكره يارب تكونى بخير بصى ياقمر حالتك النفسيه دى هاتتحسن اول ما تشوفى الموضوع من الزاويه الصحيحه وهى أن الثانويه العامه مش آخر الحياة بالعكس هى بدايه الطريق اللى ربنا أراد وقدر لينا إننا نمشيه والمطلوب منك فى الحياة عموما مش فى ثانويه عامه فقط هو السعى مش النتيجه منك السعى ومن الله السعه إدراك حكمه الله عز وجل فى اللى بيحصل لازم يكون عندك وعى وعلم أن ورا كل اللى بيحصل ده حكمه كبيره من ربنا ولازم تكونى عارفه أن اختيار ربنا اجمل بكتير من اختيارنا لأن ربنا علام الغيوب وعارف مستقبلك هيكون شكله ايه وايه اللى يناسبه وايه اللى ميناسبوش فيجب علينا الرضا بحكم الله وقدره الكليه اللى انتى دخلتيها انا عارفه انك مش حباها ولا متقبلاها بس هو ده الطريق اللى. ربنا اختاره ليكى على سبيل المثال لو انتى بتبقى واثقة فيا ثقه عمياء وانا جيت قولتلك فى طريق آخره خير كبير اوى اوى اوى مستنيكى وأخدتك حطيتك قدام الطريق بس اول ماشوفتيه نفسك نفرت منه واستوحشتيه انتى كدا كدا هاتمشيه لأنه فى النهايه فى هديه ليكى ففي إيدك قرار أما تمشيه وانتى عماله تستنفرى منه أو تمشيه وانتى عماله تحمسى نفسك للهديه اللى هتاخديها وفى الحالتين الطريق هيخلص سواء كنتى فرحانه أو زعلانه ولله المثل الأعلى بس هو ده بالظبط اللى ربنا بيعمله لينا بيحطنا فى مكان احنا مش بنحبه بس بيحطنا لأنه بيحبنا بيحطنا لأن ده الخير لينا واحنا عشان بنثق فى الله وبنحبه بنمشى فى الطريق اللى مش حابينه عشان واثقين فى ربنا أنه مش هايضيعنا الخوف من المستقبل ده بقى ملوش لازمه لأن مش المفروض نخاف من حاجه لسه مجاتش ده غير أنه مش فى إيدينا فمتخوفيش نفسك عيشي اليوم بيومه طول ما احنا عايشين فى يوم الجمعه يبقى منفكرش فى السبت يعنى أطال الله فى عمرك بس احنا ممكن منكنش فى المستقبل اللى احنا بتفكر فيه بس انتى زعلك طبيعى ومش معناه انك بتسخطى على قضاء ربنا لا اطلاقا من حقك تزعلى لأن ده تعب ومجهود بس متخليش الزعل ياخد وقت كبير من حياتك ومتخليش الشيطان يتمكن من دماغك ربنا يوفقك ويقدملك اللى فيه الخير ليكى وتكوني ذات شأن عظيم في الدنيا والآخرة
تم النشر الثلاثاء، ١٣ يناير ٢٠٢٦
والله بصي، انت عندك بس كام مشكلة لو حليناهم هتبقي زي الفلل، او حاجة لازم تدركي أن الله هو مدبر الأمر، يعني اول حاجة حافظي على ورد قرآن يومي في معاد محدد و صلاتك و تشوفي فيديوهات بتتكلم عن تدبير ربنا للأمور، و تصلي على النبي كتييييييييييييير، الصلاة على النبي بتزيل الهم و تفرج الكرب، و مثلا تحافظي على اذكار الصباح و المساء و دعاء (اللهم إني أعوذ بك من الهم و الحزن والعجز و الكسل و الجبن و البخل و غلبة الدين و قهر الرجال)، تاني حاجة لازم تعرفي إن والله الكلية ما نهاية عالم، انت ممكن اصلا جنب الكلية تاخدي كورسات في الحاجة اللي بتحبيها و تشتغلي فيها، ولو كليتك سهلة خدي الشهادة و خلاص بس خدي كورسات في اللي بتحبيه جنب الكلية، واعرفي ان تقييمك كإنسانة مش بمجموع ثانوية ولا بكلية دخلتيها، قيمتك فعملك الصالح و نفعك لغيرك و اتقاء الله
تم النشر الاثنين، ١٢ يناير ٢٠٢٦
لا يا حبيبتي، الثانوية العامة مش آخر الحياة خالص ! هي مجرد مرحلة واحدة في طريق طويل مليان فرص، وكتير جداً ناس نجحوا بعد "فشل" فيها. أنتِ دخلتِ كلية، ده إنجاز كبير بحد ذاته، وده يثبت قوتك. أنا فاهمة تماماً إحساسك بالضياع والدمار، خاصة إنك الأخت الكبيرة والقدوة. الضغط ده طبيعي يخلي الواحد يحس كده، والبكاء بدون سبب والأفكار السوداء (زي الانتحار، اللي الله يبعدك عنها ، حياتك ثمينة عند ربنا وعند أهلك) دي أعراض تشبه الاكتئاب أو الاكتئاب الموسمي بعد الضغط الشديد . مش تشخيص طبي، بس علامات إن جسمك وعقلك محتاجين دعم. خطوات عملية عشان تتخطي: ابدئي صغير : حددي هدف يومي بسيط زي "هذاكر ساعة واحدة بس النهارده وأخد بريك أسمع قرآن". الإنجازات الصغيرة تبني الثقة. غيري نظرتك للكلية : اكتبي 5 حاجات إيجابية فيها (زي فرص الشغل أو المهارات اللي هتتعلميها). لو مش عاجبك التخصص، فكري في تخصصات فرعية أو دورات أونلاين مجانية (زي Coursera) عشان تضيفي لسيرتك الذاتية. روتين إسلامي يومي : واظبي على الصلوات الخمس، وصلي النوافل، اقرئي سورة الشرح يومياً ("فَإِنَّ مَعَ الْعُسْرِ يُسْرًا")، وادعي ربنا يفتح لك أبواب الرزق. التوكل بيخفف الهم. كني قدوة جديدة : أخواتك هيشوفوا قوتك في الصمود والتأقلم، مش في الدرجات بس. قوليلهم قصتك بكلام إيجابي: "الدنيا مش درجات، المهم اللي جاي". لو استمر الإحساس ده، روحي لصفحة الخبراء في فدني (https://www.fedni.net/experts) وابحثي عن متخصص نفسي أو مدرب حياة – في خبراء رائعين هيساعدوكِ بشكل شخصي. كمان، ابحثي في فدني عن أسئلة مشابهة زي "ضغط الثانوية العامة" هتلاقي إجابات كتيرة. أنتِ قوية وهتقدري، يا بنتي! خطوة خطوة، وربنا معاكِ. لو عايزة تتكلمي أكتر، أنا هنا 💕
تم النشر الاثنين، ١٢ يناير ٢٠٢٦
طب و ف لحظة لما تكتشفي ان كل دا تاهيل ليكي في حياتك لطريق مصيري مش هتزعلى على كل الوقت اللي ضيعتيه ف الندم ، النور بيجي ف لحظة
تم النشر الأربعاء، ١٤ يناير ٢٠٢٦
هل القدوه لو مجبش مجموع مبقاش قدوه ؟! اكيد لا القدوه مش بتتحدد بالمجموع المجموع مرحله. عاوزه تكوني قدوه بجد تنجحي دلوقتي مش تفكري في الانتحار علشان مجموع. المجموع دلوقتي حقيقي مش مهم المهم تكوني حد سوي قادر ينجح في أصعب الظروف.
تم النشر الأربعاء، ١٤ يناير ٢٠٢٦
محدش بيعرف ينسى انه كان نفسه يدخل كليه معينه ومعرفش بسبب مجموعه بس يمكن هي مكنتش خير ليكي وىبنا يبقى كتبلك الخير في دي حبيها وطوري من نفسك عشان تبقي قدام اخواتك فعلا انك لسه شاطره وبتحاولي حتى لو مدخلتيش الكليه الي كنتي عاوزاها وان دي مش نهايه الدنيا عادي اننا نبدأ حاجه تانيه وننجح فيها
تم النشر الأربعاء، ١٤ يناير ٢٠٢٦
دي كانت مرحلة انتقالية من الطفولة للشباب ومع الوقت هيزيد نضجك واتزانك النفسي
تم النشر الثلاثاء، ١٣ يناير ٢٠٢٦
روقي دماغك
تم النشر الاثنين، ١٢ يناير ٢٠٢٦
لعرض السؤال في فدني اضغط هنا