محتاجة امل لانى مش عارفة اعيش من ساعة التشخيص حاسة انه حياتى وقفت
انا بنت عندى 28 سنة مصابة بقصور بالمبيض و المخزون يعتبر صفر و بحب الاطفال جدا صدمت بتشخيصى مع وجود صعوبة بالحمل مستقبلا و بنفس التوقيت فى حد محترم متقدم وانا عمرى ما استريحت لحد بس هو استريحتله
و من هنا نزل عليا قهره بقلبى شوية برضى بقضاء الله وقدره وشوية بقول ليه اشمعنا انا طب انا اذيت مين هو انا وحشة للدرجة دى و انا لسه هقوله لان لازم يعرف قبل الجواز بس بفكر ارفضه عشان م احرمه من فكره الاطفال
انا قلبى واجعنى وصعبان عليا نفسى و بقعد اقرأ عن قصص حمل مستحيلة يمكن يكون اختبار من رب العالمين ويرزقنى بس بنفس الوقت خايفة انا مقهورة وحاسة حياتى وقفت وانه خلاص كدة شوية بحمد ربنا وشوية بحس محتاجة حد يطبطب على قلبى و غصب عنى ببص للى حواليا و بشوف ربنا رازق ناس ميستاهلوش يكون عندهم اطفال و مش مقدرين النعمه الى بايديهم فبتصعب عليا نفسى وبحس انى قليلة
هوني عليك التشخيص الطبي لا يمنع إرادة الله أنجبت مريم ولم تتزوج وأنجبت امرأة زكريا عليه السلام وهي عقيم وكثير نساء أنجبن بعد ال ٤٠ ورغم قول الأطباء مستحيل وليس الهدف من الزواج الإنجاب فقط وإنما لتسكن روحك لروحه ونفسك لنفسه وبعد الزواج نأخذ بالأسباب ونبحث عن حل طبي والحلول اليوم كثييييييييييرة جدا والأكثر منها مشكلات الهرمونات والتبويض عند الفتيات يعني مش لوحدك ورغم ان كتير أوي أوي بنفس المشاكل الا انهم بيتزوجوا وينجبوا دون علاج كمان
تم النشر الجمعة، ٧ نوفمبر ٢٠٢٥
ربنا قادر يفتحلنا باب احنا ما كنا متخيلينه، قادر يرتب أيامنا ومشاكلنا بشكل نضل نفكر كيف صار... نفكر كيف صار؟ كيف نجحت الأمور؟ بس ما نلاقي جواب غير بقدرة وفضل ربنا♡ ربنا عظيم خديها فرصة، امسكي المسبحة واستغفري الليلة كتيير وتفكّري بنعم ربنا وقومي الليل وبالغي بالدعاء اسأل الله ان يرزقك الزوج الصالح والذرية الصالحة وان يكثر من ذريتك صالحة معافاة
تم النشر الجمعة، ٧ نوفمبر ٢٠٢٥
أنا حاسه بقلبك قد إيه موجوع… ومقدره الخضة اللي عديتي بيها. أوقات تشخيص واحد بيخلي الإنسان يحس إن الدنيا اتقفلت فجأة… وإن كل اللي كان بيحلم بيه اتسحب من تحت رجليه بس خليني أقولك حاجة يمكن تكون هي اللمسة اللي محتاجاها دلوقتي… حياتك ماوقفتش هي بس اتلخبطت شوية، وده طبيعي جدا الفقد اللي بيحصل جوا النفس مش بسيط وحقك تتلخبطي وتعيطي وتخافي… وحقك كمان تدوري على أمل اللي إنتي فيه مش تقليل منك ولا عقاب… ولا دليل إنك وحشة أو أقل من حد بالعكس… الناس الطيبة أوقات بيتحطوا في امتحانات صعبة لأن ربنا عارف أد إيه قلوبهم واسعة وقد إيه يقدروا يقوموا تاني. وقصور المبيض مش نهاية الطريق… الطب بيتطور وفي قصص حصل فيها شبه المعجزة رغم إن الأرقام كانت صفر. مفيش حاجة على ربنا بعيدة بالنسبه للشخص اللي متقدم… صدقيني اللي بيحب بصدق مش بيقف عند التفاصيل دي. مهم إنه يعرف بس مش عشان يسيبك… لأ عشان يبقى داخل معاكوا على نور وصدق وراحة. وفي رجالة كتير بيختاروا الست اللي ترتاحلهم و تحكلهم على أي حاجة تانية… فيه اللي يفضل قلب حقيقي على كل الدنيا. ما تحرميهوش ولا تحرمي نفسك بسبب خوف… ادي لنفسك فرصة واديله فرصة يفاجئك برد فعله. وإحساسك لما تشوفي ناس مش مقدرين نعمة الأطفال… ده طبيعي لأن دا جوع جواكي لكن مش حسد الإنسان مش بيضعف لما يتوجع… بالعكس ده دليل إنه قلبه حي. ولو محتاجة حد يطبطب على روحك… إسمحي لنفسك تعيشي الوجع بس ما تفضليش لوحدك فيه. إتكلمي… إفتحي قلبك… وافكري إن ربنا ساعات يبعت لينا ناس في اللحظة الصح عشان يشيلوا معانا جزء من الحمل أنتي مش قليلة… ومش منتهية… ومش مكسورة. إنتي بنت قوية عديتي صدمة كبيرة ولسه واقفة على رجلك. ربنا قادر يبدلك خير… وبطرق يمكن عمرك ما تتخيلها إمسكي في الأمل… حتى لو بايد واحدة
تم النشر الجمعة، ٧ نوفمبر ٢٠٢٥
بصي أنا بشوف معجزات للخلفة يامة قدامي بسبب قيام الليل في ستات كتير ربنا رزقهم الخلفة بسبب القيام والدعاء فدا يكون طريقك زيهم مفيش يا بنتي مستحيل مع ربنا الواحد مننا اقسم بالله ساعات الدنيا كلها بأراضيها الواسعة بتقفل في وش الواحد خالص ومش بيكون ليها أسباب الأسباب معدومة عشان الحاجة الفلانية تحصل لكن سبحان الله بترفع أيدينا وفجأة من حيث لا تحتسب نجد الخير كله جه زي ما الآية بتقول "ومن يتوكل على الله فهو حسبه إن الله بالغ أمره قد جعل الله لكل شيء قدرا "
تم النشر الجمعة، ٧ نوفمبر ٢٠٢٥
وعليكم السلام ثقي في الله ربنا العاطي والوهاب ربما تشخيص الدكتور انك مش هتعرفي تخلفي دا على حسب قدرة العلم اللي وصلنالو لحد دلوقتي يعني في المستقبل ممكن العلم يكتشف بعد كده أن الست ممكن تخلف عادي جدا بنفس حالتك فدا تشخيص دنيوي انت بني آدم وربنا اللي خلقك روحيلو صلي القيام وادعي زي ما نبي الله زكريا ما كان بيدعي زوجته كانت عقيم وربنا رزقه يحيى أمرك كله لله والشخص اللي متقدملك ده ياريت متضيعهوش من ايدك ولازم تقوليلو عالحقيقة عشان يبقى عارف ويكون معاك يساندك وهنا بالظبط دا الاختبار التاني ليك لازم تتقبلي رأيه أما يرفضك أو يقبل وتساعدوا بعض ومتضغطيش عليه وانت بتقوليلو الحقيقة وياريت لو في امل تقوليلو برده عليه علاقة من اولها تكون مبنية على الصراحة والحب والأمان من كلا الطرفان انا اسف لو هيزعلك بس لابد منه اعملي الصح لنفسك
تم النشر الجمعة، ٧ نوفمبر ٢٠٢٥
بعد سعات ربنا بيحوش عن الإنسان شر هو فكره خير ليه وإذا كان القداء من عند ربنا والإنسان ملوش يد فيه يبقه نفرح مش نزعل والعوض دائمن بيكون عظيم بس لازم نرضا ونفرح
تم النشر الجمعة، ٧ نوفمبر ٢٠٢٥
لعرض السؤال في فدني اضغط هنا