ازاي الواحد ممكن يتخطي فكرة إنه حاسس طول الوقت انه المكان مش مكانه سواء مع اهله أصحابه حاسس ان ملوش مكان ف حياته هو شخصيا
غالبا انتي لسه صغيرة في السن ... وعلشان كده ده ممكن يكون طبيعي الى حد ما خاصةً في سن المراهقة اللي ممكن تحسي فيه كل الاحاسيس ديه كلها. من تقلبات مزاج، وان محدش فاهمك، محدش مستوعبك، شايفينك غريبة طول الوقت .. وهكذا هتتعاملي ازاي من الموضوع ده .. حاولي الفترة ديه ميبقاش شغلك الشاغل هو انك تبرري للناس، متحاوليش تعملي ده كتير خصوصا لو هيجي على حساب طاقتك. متحاوليش كمان ترضي اللي حواليكي على حسابك انتي، يعني انتي لو مش عايزة تخرجي مثلا مع اصحابك وانتي عارفه انهم مثلا ممكن يقولوا عليكي نكدية .. لا سبيهم يقولوا اللي يقولوه ومتخرجيش. المهم متعمليش حاجة غصب عنك. طيب ما كده فعلا هيقولوا عليا نكدية؟ يا ستي سبيهم يقولوا اللي يقولوه .. مش مهم، المهم انك متعمليش حاجه مش هتبسطك. طيب ما كده ممكن يبعدوا؟ اه ممكن، ولكن هل انتي محتاجة اصلا لناس حواليكي اساسا ممكن ميقدروش مثلا تعبك معظم الوقت، ميقدروش شخصيتك، مش بيحاولوا اساسا انهم يفهموكي؟ مظنش الواحد محتاج ناس زي دول في حياته. ابدأي انتي على الجانب التاني انك تثقفي نفسك اكتر، تهتمي بالحاجات اللي فعلا انتي مهتمة بيها، تحاولي تقربي منك اكتر وتفهمي احتياجاتها، تعرفي الحاجات اللي بتفرحك، واللي بتزعلك .. تقربي منك اكتر. ابدأي انزلي انشطة تطوعية، او حتى لو كانت اونلاين .. هتلاقي ناس شبهك وهتعملي علاقات مع ناس ممكن تكون قريبة منك ف التفكير. اهتمي بصحتك اكتر سواء النفسية والجسدية .. وانزلي روحي العبي رياضة. بتمنى ليكي التوفيق
تم النشر الأحد، ٢٣ يوليو ٢٠٢٣
أول حاجه ساعات لما بنكون مش لاقين حد متوافق مع الفكر الخاص بينا و نعرف إن فكرنا متوافق مثلاً مع الدول الغربية أو فى مكان ما المهم إنو مش فى البلد اللي إحنا فيها بنحس إن ده مش مكنا ولا إننا محبوبين وسط المجتمع حتى ممكن لوهله تظني إنك مخطوفة😂 طب نعالج الإحساس ده إزاي؟ و هل ده فعلاً إحساس حقيقي ولا بس وهم العظمة؟ علاجه بيكون إنك تحاولي تتوافقي مع مجتمعك مش كله بس الجزء اللي قريب أوي منك مثال: صحابي بيحبوا الخروجات و اللعب و الهزار و بيتفرجوا على أفلام مصرية و أنا عكسهم تماماً بحب أقعد لوحدي و لو هلعب بلعب لعب هادئة مش مزعجة و مش بحب الهزار السخيف و بتفرج على أفلام أجنبية و بحب القراءةء علشان اتأقلم معاهم مش اغير من نفسي بل أحاول افهمهم و كتقدير منهم هيحاولوا يفهموني (و ده حرفياً اللي حصل معايا ) (لو فى نقطة مش واضحه أقدر اوضحلك بمثل تاني) هل الإحساس ده حقيقي؟ هو هنا أنا مقدرش أقولك الاحساس ده حقيقي ولا لا علشان ممكن فعلاً تكوني أعقل من المنطقة اللي حوليكي و ممكن لا بس أنت مش بتشاركيهم فى اهتماماتهم، لكن عايزة تعرفي و تجربس لنفسك سواء هو صح ولا غلط تقدري تصنعي عالمك الخاص فى واقع افتراضي و تسمحي للفئة اللي شبهك تخش أو لو فى الإمكان تقدري تغيري المنطقة الحاليه اللي أنت عايشه فيها و تروحي تعيشي فى المكان اللي شايفة إن تفكيرك متوافق مع أهله و عيشي هناك فتره عجبك المكان مبروك عليكي اكتسبي أصدقاء جدد معجبكيش مبروك عليكي برضوا عرفتي قيمة أهلك و ناسك. وبس.
تم النشر الأحد، ٢٣ يوليو ٢٠٢٣
ما الناس مش وظيفتها تفهمنا والله لو ربنا رزقنا بحد فاهمنا فدى حاجه كويسة لو مفيش خلاص مش حاجه أساسية ،المهم انا احاول افهم نفسى ، وعاوزه اقولك أن أغلب الناس بتنفر من كثر الشكوى والشخص الى دايما متضايق وكدا ،لو فيكي الحاجه دى غيريها ،انا كنت فاكره أن انا اول ما دخلت الكلية كنت كارهه الكلية جدا وكنت دايما بشتكى ودايما زعلانه ومكنش فيه حد بيفضل معايا ولا كنت عارفه اكون صحاب بعد فترة مع تأقلمى مع الكلية غيرت من نفسى وبقيت مبشتكيش كتير وكونت علاقات كتير أغلبها او يمكن كلها سطحيه لأن انا كنت حابه انها تبقى كدا اصلا ، ف ايوا كتر الشكوى وكتر التذمر بيبعد الناس عنك وبينفرهم ، وكمان مش لازم يبقي فيه حد قريب منك جدا لو انتى معدتيش بتثقى ف حد فممكن تكونى علاقات بس تكون سطحييه بس ،برضوا العلاقات السطحية بتبقى مريحه ،لو ملقتيش الشخص الى شبهك يبقي اوعى تقربى من حد ،تعاملى عادى بس سطحى ،وركزي ف حياتك اكتر وانك تطورى شخصيتك وتتطورى من نفسك ومرة بمرة هتلاقي ربنا رازقك بناس تفهمك الحاجات دى بتبقى ارزاق برضوا ، ف ادعى برضوا ربنا يرزقك ، ولو مفيش حد الدنيا فيها حاجات كتير تعمليها تغنيكى عن الناس
تم النشر الأحد، ٢٣ يوليو ٢٠٢٣
بقيت بخاف اقرب من الناس عشان بقيت طول الوقت حاسه ان محدش فاهمني وبقي كله يشتكي انهم شايفني شخص كائيب ونكدي رغم اني تعبانه وحاسه بضغط من تفكيري وحاولت أعمل زي ما قولتي واشترك ف جمعيات خيرية بس بحكم ان الاجازه بقالها كتير ف كلهم قفلو اوبشن ان حد جديد ينضم
تم النشر الأحد، ٢٣ يوليو ٢٠٢٣
انا فعلا حسيت بكدا كتير جدا ، اعمليلك انتى حياة ليكى تفرحك ،ودورى على حاجات تبسطك واعمليها ،اتعلمى حاجات نفسك تتعلميها ،املى حياتك ،احفظى قرآن وشوفى فيديوهات تفسير وفيديوهات تفهمك دينك، الإنسان بطبيعته بيحتاج ناس حواليه ،لو مفيش ناس استبدليهم بحاجات تملى وقت فراغك ،وصاحبى ناس جديدة ،ممكن تشتركى مثلا فى جمعيات خيرية زي احلى شباب للبنات بس ،فيه منهم بنات كويسة كتير والله ممكن تتعرفى على ناس منهم وتدخلى حياتك ناس جديدة لو انتى حابه، أغلبنا حس بكدا انتى مش لوحدك ❤️
تم النشر الأحد، ٢٣ يوليو ٢٠٢٣
لعرض السؤال في فدني اضغط هنا