السلام عليكم ورحمة الله وبركاته
انا مخلصة كلية تجارة من سنتين ملقيتش شغل قلت اشتغل اي حاجه دلوقتي عالبال ما الاقي تبع مجالي بس انا مش بعرف ادور فاشتغلت في صيدليه واخدت خبرة بصراحه وحاليا انا فيها دلوقتي انا مش عارفه ادور علي شغل ولا خليني في الصيدلية رغم اني حبيت المجال دا وفي نفس الوقت عايزة استفاد من شهادتي واخد كورسات أونلاين ممكن اشتغل بجانب دا أونلاين لا اعمل ايه وانا ليا خبرة شوية في الجرافيك ديزايينر بس مش عارفه اطور اكتر
السلام عليكم، أولا، ربنا يوفقك وتلاقي المجال الأنسب لك ويكون مصدر للدخل والاستقلال المادي إن شاء الله. بصي، مش كل الناس بتشتغل بشهادتها فعادي إنك لو لقيتِ مجال تاني أفضل لك من تجارة تستمري فيه. بالنسبة للعمل أونلاين، إذا فيه صعوبة بالنسبة لشغل الجرافيك ديزاين سواء عشان مش لاقية كورسات كويسة تطوريه من خلالها أو أنتِ مش عارفة تطوريه أو مش راضية عن تصاميمك، فممكن تشوفي مهارة تانية وتجربي كده فترة وشوفي هتوصلي لإيه. ** المهارات اللي ممكن تشتغليها أونلاين كتير، بس عشان ممكن تتشتتي بين اقتراحات الناس المختلفة على الانترنت، حددي أنتِ بتميلي لإيه وإيه المهارات اللي حتى لو مش عندك دلوقتي بس موجود بذرة صغيرة تقدري تنميها وتطوريها بحيث تقدري تنافسي فيها إن شاء الله. ** إذا بتميلي للكتابة مثلا، شوفي كتابة المحتوى (سواء إعلانات أو مقالات أو محتوى سوشيال ميديا). ** مش لازم تتركي الصيدلية حاليا خاصة إنك قلتِ إنكِ حبيتِ المجال، منه تكوني بتعملي حاجة بتحبيها ومنه عندك دخل مادي فمش مستعجلة على الشغل عشان الفلوس وتقدري من خلال الدخل ده تستثمري في كورسات تؤهلك للعمل الحر إن شاء الله، أو لكورسات تجارة إذا بعد ما عملتِ مقارنة بين المجالات استقريتِ على إنك تاخدي كورسات التجارة بدل كورسات التصميم أو أي مهارة من مهارات العمل اونلاين. *** أقدر أرشح لك القناة دي إذا حابة تتعلمي أكتر عن العمل الحر وإزاي تلاقي العملاء. https://www.youtube.com/@ClickYourFuture/playlists وربنا يوفقك.💚
تم النشر السبت، ١ أغسطس ٢٠٢٦
وعليكم السلام ورحمة الله وبركاته يا قمر، أول حاجة أحب أقولها لك إنك مش لوحدك في الارتباك ده، كتير من البنات بعد التخرج بيحسوا إن الطريق مش واضح، وده طبيعي جدًا. المهم دلوقتي إنك عندك خبرة حقيقية في الصيدلية وبتحبي المجال، وكمان عندك شهادة تجارة وشوية خبرة في الجرافيك ديزاين، يعني عندك أكتر من خيار مش خيار واحد بس. عشان تعرفي طريقك كويس، ابدئي بخطوة بسيطة: خدي ورقة واكتبي 3 أعمدة (الصيدلية - التجارة - الجرافيك). تحت كل عمود اكتبي إيه اللي بيخليكِ تحبيه فيه، وإيه اللي بيضايقك، وإيه الفرص اللي ممكن تتفتح منه خلال سنة أو اتنين. لما تعملي المقارنة دي هتشوفي الصورة أوضح. لو حابة تستفيدي من شهادتك وأنتِ في الصيدلية، ممكن تبدئي تاخدي كورسات أونلاين في التسويق الرقمي أو إدارة المشاريع أو حتى المحاسبة، وتطبقي اللي بتتعلميه في الصيدلية نفسها (مثلاً تساعدي في تسويق المنتجات أو تنظيم الحسابات). كده هتكوني بتستغلي الشهادة والخبرة مع بعض. أما بالنسبة للجرافيك ديزاين، لو بتحبيه فعلاً، خدي خطوة عملية: اعملي حساب على منصة زي Behance أو حتى صفحة على فيسبوك وإنستجرام، وحطي فيها أعمالك (حتى لو بسيطة). ابدئي بتصميمات صغيرة للصيدليات أو المحلات، وده ممكن يفتح لك فرص فريلانس بجانب شغلك. الأهم دلوقتي إنك متستنيش "الطريق المثالي"، ابدئي بخطوة صغيرة في الاتجاه اللي بيحسسكِ بالراحة والحماس، وبعد شهرين أو ثلاثة قيّمي النتيجة. لو عايزة أفكار أكتر أو تساعدكِ ترتبي أولوياتك، قوليلي تفاصيل أكتر عن إيه اللي بيخليكِ تحبي الصيدلية وإيه اللي بيقلقكِ في كل خيار. وادخلي ابحثي على فدني عن أسئلة مشابهة، هتلاقي تجارب بنات كتير مرت بنفس الارتباك ده. أنتِ قادرة، وهتوصلي للطريق المناسب إن شاء الله.
تم النشر الجمعة، ٣١ يوليو ٢٠٢٦
لعرض السؤال في فدني اضغط هنا