السلام عليكم، أولًا، ألف سلامة عليكِ، ربنا يشفيكِ ويعافيكِ. الأعراض دي لها أسباب مختلفة، ممكن يكون فيه أنيميا أو نقص فيتامينات أو أي مشكلة تانية، ممكن حتى روتينك اليومي فيه مشكلة زي إنك تكوني مش بتنامي كويس (ممكن بتنامي كتير بس نومك نفسه جودته مش كويسة) أو فيه قلق وضغط وتوتر وخاصة إنك في ثانوية عامة. فالأول، لازم نستبعد المشاكل الصحية ونطمئن من الناحية دي، فمهم جدا تكشفي باطنة وحسب الكشف والفحوصات هيتحدد إذا كان فيه أنيميا أو نقص فيتامينات أو غيره. *** ممكن كمان الأعراض دي تكون هروب من جسمك، العقل لما بيحس بضغط ومسؤولية كبيرة بيحاول يحميكِ من الألم ده بالتسويف والتسويف هيكون بأي شكل زي النوم الطويل والكسل والإحساس بانعدام طاقتك وشغفك. والصحة النفسية لها عامل كبير وبتنعكس على صحة الجسم... فشوفي إذا كان فيه أي مشكلة في الجانب ده *** أنصحك كمان، لو أنتِ مسلمة... واظبي على أذكار الصباح والمساء واقرأي سورة البقرة يوميًا حتى لو هتقسميها على الأيام وهينفعك جدا تسمعي رقية شرعية... من ناحية عشان الحفظ والتحصين واكتساب البركة في حياتك، ومن ناحية تانية نكون استبعدنا كل الاحتمالات. ** وبالتوفيق إن شاء الله.
شكرا جدا ليكي هطبق اللي قلتي عليه واشوف النتيجه
تم النشر الخميس، ٢٠ نوفمبر ٢٠٢٥
على حسب المشكلة، يعني لو توتر وخوف من الامتحانات وفيه ضغوط من الأهل وأملهم في إنك تدخلي كلية معينة ده ممكن تتعاملي معه حتى لو هيتطلب منك مجهود... مش مستحيل يعني. الفكرة كلها في برمجة عقلك، أول حاجة إنك تفهمي إن الثانوية مش هي اللي هتحدد مصيرك.. هي مجرد محطة في حياتك... أيوه ممكن دخولك كلية معينة يأثر لكن النجاح نفسه في إيدك أنتِ... ثانيا، ترمي كل المخاوف وراء ظهرك وتركزي بس على العمل... أنا مطلوب مني إيه دلوقتي؟ إني أذاكر بس... مش مطلوب تفكري في الامتحانات ولا النتيجة ولا أي حاجة غير إنك تسعي وتكوني مؤمنة إن ربنا مش بيضيع أبدًا تعب حد. ثالثًا، عشان عقلك ميهربش من المذاكرة هتستخدمي معه التحايل، يعني متفكريش إنك قُدامك مذاكرة كتير أو هتقعدي تذاكري بالساعات... قولي لعقلك إنك بس هتقعدي على المكتب 10 دقائق تقرأي فيهم الجزء الفلاني أو تحلي المسألة الفلانية... المشكلة كلها بأول 10 دقائق... وأول خطوة هي الأصعب. مجرد ما قعدتِ وركزتِ بس العشر دقائق دول هتنسي نفسك وتكملي وده عن تجربة فعلا. وافصلي طبعا بفواصل راحة مش طويلة (يا دوب تتحركي وتنشطي جسمك وعقلك) ومتمسكيش الموبايل خلالها أبدًا. وكافئي نفسك بحاجة بتحبيها عشان النفس بتحب ده وبتتشجع كل ما حسستِها بالإنجاز وكافئتِها. رابعًا والأهم، حافظي على علاقتك بربنا، متخليش المذاكرة تأثر سلبًا وبحجة المذاكرة والضغط تنسي عباداتك. كمان زي ما قلت واظبي على الأذكار وخاصة (لا حول ولا قوة إلا بالله العلي العظيم) قوليها كتير خلال اليوم ده هيمدك بالطاقة والعزم عشان تنجزي اللي وراك وتتخلصي من الكسل والخمول. ارجو أكون أفدتك، لو عندك تفاصيل تانية حابة تسألي عنها قولي لي وإن شاء الله أقدر أفيدك.
تم النشر الأربعاء، ١٩ نوفمبر ٢٠٢٥
طيب لو في مشكله في الجانب النفسي من ناحية الهروب وكدا، دي هيكون علاجها ايه ولا اتصرف ازاي؟
تم النشر الأربعاء، ١٩ نوفمبر ٢٠٢٥
شكرا ليكي🫂
تم النشر الأربعاء، ١٩ نوفمبر ٢٠٢٥
لعرض الإجابة في فدني اضغط هنا