انا من فترة كبيرة كنت معجبة ب حد يعني و المفروض أن أهل مامتي و اهلو قريبين و انا أهل مامتي ناس كبيرة و معروفة ف المنطقة يعني ف المهم انا حاولت ادخل اكلم الولد لأن كنا بنتبادل النظرات لبعض خصوصا أن احنا جيران ف الشارع و البيت جنب البيت و بعدين بالفعل اتكلمنا و هو ف الاول رفض يتكلم عشان الأهل بس بعد كدة بدأنا نتكلم كأصحاب و اخوات و كان بيحكيلي علي اللي بيحبها و نقعد نهزر و كدة و كان كلامنا مش بيعدي الحدود فضلنا نتكلم 7 شهور جة بقي من فترة قصيرة لقيتو متغير معايا تماما بيعاملني بطريقة مش كويسة مش بيرد علي رسايلي ف كان الموضوع مدايقني حتي انا دخلت اتكلم معاة و اخد رأيو ف حاجات و كان متغير معايا تماما و انا مكنتش عملت حاجه اصلا ف جة من يومين عمل بلوك من غير أي كلام و من غير أي سبب و انا دخلت كلمتو انهاردة قالي انو مش عايز يتكلم معايا تاني و انا قولتلو تمام يعني متكلمتش معاة كتير ف هل انا مثلا شخص غير مرغوب فية أو شخصية غير قابلة للتعامل ؟و هل هقدر اتخطي وجودة برغم أن مكناش اكتر من اخوات يعني بس هقدر اتخطاة و خصوصا هشوفو علي طول ف هل هقدر؟
هتقدري تتخطي وجوده عادي موضوع انك مش مرغوب فيكي ده بعيد جدا هو ممكن يكون بعد بسبب ظروفه الشخصية مش حاجة انتِ عملتيها
تم النشر الأربعاء، ١٩ أبريل ٢٠٢٣
هو حضرتك مفيش حاجه في الدين اسمها العلاقه بيننا كاننا اخوات هو اما يكون اخوكي او مش اخوكي زي ما ينفعش حد يقولك على شخص كبير ده زي والدك هو اما والدك او اجنبي عنك بس كده علاقتك به وكلامك معاه من البدايه كان غلط شرعا فالحمد لله انه وقف بغض النظر وقف ازاي ثانيا مينفعش تقيمي نفسك وتصنفيها انك شخص غير مرغوب فيه لمجرد ان حد كان بيتكلم معاك وفجاة فضل الصمت والابتعاد يبقى انت كده شخص سئ وغير مرغوب فيه لانك هتقابلي في حياتك مواقف كتير مينفعش تبقي عارفه انك معملتيش حاجه غلط ولا ضايقتي ال قدامك وتكوني صورتك عن نفسك بسبب سلوك ال قدامك خصوصا ان سلوكه حصل بدون اسباب ظاهرة وواضحه ومفيش حد بيكون غير مرغوب فيه من الجميع الارواح جنود مجنده ما تعارف منها ائتلف وما تناكر منها اختلف فال انت مش عاجباه او مش قابلك هتلاقي غيره شايفك احسن واحده في العالم وياريت كل الناس زيك فياريت تمسحي كل ال حصل من دماغك وتكملي حياتك عادي خالص المهم متسمحيش لنفسك يكون في بينك وبين اي شخص اجنبي عنك اي علاقة خارجه عن حدود الشرع والدين ومن يتق الله يجعل له مخرجا ويرزقه من حيث لا يحتسب ربنا يرضى عنك ويشرح صدرك لكل خير
تم النشر السبت، ٢٢ أبريل ٢٠٢٣
الاجابة فى بداية كلامك هو من الاول رفض الكلام وانتى اللى اصريتى.....فموضوع انك مرغوبة او لا ده لما تكونى انتى اللى بتلاقى حد بيحاول يكلمك. لكن انتى اللى سعيتى للكلام معاه وكمان زى ما بتقولى انه بيحب واحده ...فاكيد هو راجع نفسه او حصله مشكلة مع الشخصية القريبة منه واتأكد انه كلامه معاكى اى كان المسمى اللى انتى حاطاه فهو ملهوش لازمه للاستمرار.
تم النشر الخميس، ٢٠ أبريل ٢٠٢٣
طيب لما انتي عارفه انه اساسا فيه بنت بيحبها، وانتي في نفس الوقت كنتي معجبة بيه؟ ف انتي كنتي عايزة ايه من العلاقة ديه طيب؟ يسيب البنت مثلا ولما يبدأ يتكلم معاكي مشاعره تتحرك ناحيتك! المشكلة مش في انك غير مرغوب فيكي، بس هو تحليل ل اللي عمله، ان فيه حاجه خاصة بيه هو، ممكن تكون البنت اضايقيت، ممكن يكون هو محبش انه يكمل في الطريقة اللي كان بيتعامل معاكي بيها، لانه عارف ان كل ده غلط من اوله ل اخره. وان المفروض حدود القرابة لا تتعدي حدود القرابة ..و لا اكتر ولا اقل. ف المفروض دلوقتي ... انك تنهي الموضوع ده من دماغك تماما ... وهتعرفي تتخطي الموضوع ولازم تعرفي ان الموضوع ملوش علاقة ب انك مرغوبة ولا لا.
تم النشر الأربعاء، ١٩ أبريل ٢٠٢٣
لعرض السؤال في فدني اضغط هنا