السلام عليكم ورحمه الله وبركاته
انا ثانويه عامه وطبعا عارفه ان الشهرين دول اهم من اللي فات يعني ممكن اللي كان من اول السنه مش متمكن اوي يبقا بيرفيكت ودي فرصه كويسه حابه ان الفتره دي تبقا من أجمل الفترات اللي عدت عليا في الثانويه محتاجه حد من الدفعات اللي فاتت يعني ممكن أقصي حد يكون خلص بقاله ٥ سنين بلاش علشان خاطري يبقا حد مخلصها بقاله ١٠ سنين او اكتر يجاوب بعد اذنكوا يعني حابه يبقا حد لسه كان بيخوض التجربه قريب وياريت لو حد من السنه اللي فاتت او اللي قبلها يجاوب على الاسئله دي هكون ممتنه جدا🥹💗 .
▫️أول حاجه أكمل منصه ولا سنتر!
مع العلم ان باخد عربي وفيزياء منصه ونزلت كيمياء وأحياء وانجلش واولي وتانيه كنت منصه يعني متعوده لسه بادئه جيولوجيا من ٣ ايام يوتيوب .
◻️ تاني حاجه عملت جدول لم المنهج في ٣٠ يوم مشيت عليه ٣ أيام منتظمين بس صعب اوي بصراحه واجبات سنتر مع مذاكره جديد وقديم ٣ مواد مثلا نص باب كيمياء مع اول درسين جيولوجيا والوحده الاولي نحو وبحل عليهم في نفس اليوم بفتكر شرح وبعدين بطبق الحل ودا سادس يوم ليا في الجدول خلصت من شويه نص مذاكره اليوم الرابع السؤال هنا بقا اكمل بالجدول ولا لا .
◽ بعيدا عن كل دا الكيمياء في السنتر لسه هيراجع يوم ٢٤ في الشهر دا والانجلش بيحل قديم بس معتمد علي اننا نجاوب السؤال الأول الاجابه B والتاني c وكدا يعني ويمكن كميه الحل بتبقا كتير احيانا مش بلحق احل كل دا في البيت ولما بروح السنتر اول لما المستر يقولي جاوبي بجاوب الاسئله بتاعتي بس فاهمين يعني مثلا لو هما ٢٥٠سؤال ممكن اخد نقطتين منهم بس علشان الباقي يجاوب وطبعا ببقا عايزه احل دة كله لوحدي وبعدين اراجع ورا المستر بس مذاكره للقديم بالجدول مع الجديد بصراحه الموضوع متعب اوي.
ولو اخدت منصه اعتقد ان هغير الجدول علشان امشي مع مراجعه الاونلاين وكدا واسمع الشرح الملخص اللي منزلينه للمنهج بردو علشان اكيد فيه أجزاء نسيتها وشايفه ان بتوع السنتر مش هيعملوا حاجهةغير اننا نحل وشايفه ان الكيمياء مثلا محتاجه وكل واحد بيحل بالدور بردو وفي الاخر هنحل ٤٠ سؤال مثلا علشان لو المستر هيوضح الاسئله ودا تضييع وقت.
***
⬜ قفلت الفون خالص وبعدت عنه يعني بقا عادي مش شاغلني خالص ومعايا اللاب بذاكر عليه وعليه الابليكيشن دا ومفيش حد من صحابي يعني الحمدلله مفيش تضييع وقت شبه الاول.
النهارده شيلت المذكرات اللي خلصت فيها حل الاسئله والاسكتشات اللي خلصت علشان احس ان الدنيا هاديه ومنظمة لكتب المراجعه بجانب ان فيه مذكرات تانيه بردو موجوده لسه جمب كتب المراجعه لو احتاجت حاجه من اللي شيلتها هرجع للكتب تاني بردو عادي ماعنديش مشكله.
◽ازاي اثبت الحفظ بقا عارفه ان طبيعي ابقا ناسيه بس لما برجع اقرأ بعدها ب ٤ ايام مثلا او اسبوع ببقا ناسيه خالص وخصوصا الأحياء بذاكر عن طريق ان اشرح لنفسي المعلومه واثبتها بالحل
اعمل اسكتش لكل ماده واكتب فيه الاسئله اللي حليتها غلط واراجعها ليله الامتحان مع الاسترشادي ولا يبقا اسكتش كله واقسم كل جزء فيه لماده وارجع للكتب اللي كانت معايا من اول السنه وكان واقف معايا اسئله واراجعها تاني ولا مش هتفيدني زي أسئله الاسترشادي والمراجعه
اخر حاجه علشان انتوا زهقتوا مني بس دي اول تجربه ليا وعايزه اكون طالعه منها كسبانه أن شاء الله 🥹💗.
***
اذاكر كام ماده في اليوم يعني اذاكر مادتين واحل عليهم في نفس اليوم ولا اذاكر ٣ في اليوم واحل عليهم اليوم اللي بعده عارفه ان دا مش هينفع مع نزول السنتر خالص بس قولوا الصح اللي انتوا شايفينه انتوا اكبر مني بردو وهتبقوا فاهمين اكتر مني💗💗.
كنت ناويه اشترك مراجعه منصه وانزل سنتر بس مش كله يعني الفيزياء مثلا والاحياء منصه وسنتر وممكن الكيمياء بردو ولا مش هلحق اعمل كدا وهبقا ضاغطه نفسي وظالماها؟
وهل ممكن اكافئ نفسي كل جمعه مثلا افتح الفون واتفرج علي كارتون بحبه او بودكاست ولا بلاش افتح الفون ولا ايه ؟
الاسئله دي شاغله بالي اوي يمكن من شهر ٣ وبصراحه مش عايزه اضيع الفرصه من ايدي عايزه اطلع من السنه دي وانا راضيه باللي عملته والنتيجه مش فارقه هي بتاعت ربنا اللي شايف لينا الخير دايما 🥹💗💗💗💗
وعليكم السلام ورحمة اللة وبركاتة بصى خلاص فاضل شهرين لازم على الأقل شهر منهم متنزليش سناتر إطلاقا يعنى متنزليش من البيت أنا مش عارف إيه اللى فاضلك من المناهج فى السناتر بالظبط بس لو خلصتى المناهج ف سيبك من السناتر نهائيا وخليكى أون لاين الشهرين دول تقريبا هم أساس الثانوية كلها ف لنعتبرها فترة زمنية مغلقة فيها حياه خاصة هترسمى قوانينها انتى __أول حاجة التليفون غير مسموح قانونا فى تلك الحياه حتى لو على سبيل المكافأة يوم الجمعة هيبقى ليه تأثير سلبى عليكى وممكن نكافئ نفسنا بحاجات تانية أجمل وأفضل واستخدامك للتليفون فى تلك الحياة يعاقب علين القانون __ تانى حاجة تحددى مشاغل يومك الإجبارية وتنظميهم وبعد ما تعملى كدا لازم على الأقل ربع يوم كامل خاص بيكى انتى تذاكرى وتراجعى فيه مادة ك حد أقل و مادتين ك حد أقصى دول يبقوا بعيدا عن المنصات __ تالت حاجه بلاش جدول ٣٠ يوم انتى فاضلك كام ٣٠ يوم أصلا الجدول أو التنظيم اللى هتعمليه يبقى على حيب الإنجازات يعنى أنا عايزة أنجز الحديثة كاملة فى الفيزياء أبدأ أقسمها ولنعتبر المفروض الإنجاز دا أكون تميته خلال ٤ أيام يبقى جدولك تقسميه على أربع أيام وهكذا __ الحل الحل الحل الحل وهنا أقصد انك تحلى انتى بإيدك وتبحثى عن الإجابه مش تحلى مع مستر مثلا انتى كنتى بتقولى ازاى أثبت حفظى وتثبيت حفظك بالحل وفيه تركايه وانتى بتحلى لو فيه سؤال معرفتيهوش متسيبهوش وتكسلى ارجعى للدرس اللى فيه السؤال دا واحفظى اجابته حفظ كدا وبعدين روحى حليه بحيث لو قابلك تانى فى أى مكان وأى امتحان تكون انتى أصلا حفظتيه لازم الحل لازم تحلى كتير كتير كتير أووى __ مش عارف المنصات اذا كان فى المراجعات كويسه ولا لا بس أنا كنت بفضل اليوتيوب واراجع انا بنفسى علشان مبقاش مربوط بميعاد أو بوقت فيديو أو ما شابه بس كنت ببقى ملتزم باللى بقوله وبعملة فعل سواء جدول أو انجاز معين المفروض أنجزه أو ما شابه فاهمانى __ أهم حاجة علاقتك بربنا وأهلك لأن حرفيا الفترة الجايه النفسيه هى اللى بتفرق طالب عن طالب أوعى تسمحى لنفسك تقعى تحت أى ظرف من الظروف ربنا يوفقك ويكرمك ويرزقك اللى بتحلمى بيه 🤍
تم النشر الجمعة، ٣ أبريل ٢٠٢٦
وعليكم السلام ورحمة الله وبركاته ممكن أفيدك في حتة تكملي منصة ولا سنتر بجد أول ما تخلصي منهج وتراجعي مرة ولا اتنين كملي أونلاين هيفرق معاكي اوي في الوقت والمجهود وهتستفادي أكتر وبالنسبة للفون أنتي بتقولي مش فارق معاكي دا كويس جدًا خليكي كدا وأهم حاجة متفتحيش كتير ولا تتعودي عليه وكمان برضو متضغطيش نفسك جامد عشان متجيش ليلة الامتحان متكونيش طايقة الكتاب
تم النشر الاثنين، ٦ أبريل ٢٠٢٦
وعليكم السلام ورحمة الله وبركاته يا قمر! 💗 أول حاجة، برافو عليكِ جدًا، أنتِ منظمة وواعية أوي، وده أكبر نجاح في الثانوية العامة. الشهرين دول فعلاً فرصة ذهبية، وإن شاء الله هتطلعي منهم كسبانة زي ما عايزة. هقولكِ النصائح اللي نجحت مع آلاف اللي نجحوا قبلكِ (من خبرة اللي بيشاركوا في فدني)، وهرد على أسئلتكِ واحدة واحدة بشكل عملي. خلينا نبدأ: 1. منصة ولا سنتر؟ كملي المنصة للعربي، فيزياء، كيمياء، أحياء، إنجليزي، جيولوجيا . أنتِ متعودة عليها، والمراجعات الملخصة هناك (مع الشرح + حل) أفضل من السنتر اللي بيضيع وقت في الحل الدوري. السنتر كويس للواجبات، بس لو هتركزي، المنصة هتغطي المنهج كله بسرعة + تثبيت. جيولوجيا يوتيوب كويس، بس ركزي على قنوات موثوقة أو اللي في المنصة. اقتراح: اشتركي مراجعة منصة لـ فيزياء، أحياء، كيمياء (مش كلهم مع سنتر، هتضغطي نفسك). هتغطي الضعف وتحلي لوحدك. 2. الجدول: تكمليه ولا لا؟ عدليه مش وقفيه! 30 يوم كتير صعب مع السنتر. اعملي جدول جديد: 45-50 يوم (لحد الامتحانات)، قسميه لأسابيع: أسبوع لمادة رئيسية + مراجعة سريعة للتانية . مثلاً: يوم 1-2: كيمياء جديد + قديم (نص باب بس). اليوم 3: جيولوجيا + حل. خدي 4-5 ساعات مذاكرة يوميًا + ساعة حل ، مع استراحة صلاة وأكل. مشي 3 أيام = نجاح، كملي بتعديل عشان يناسب السنتر (خلي السنتر جزء من الجدول، مش إضافة). 3. مشكلة السنتر (كيمياء/إنجليزي): الحل: حلي في البيت الأولويات . ركزي على أسئلة الاستشاري + أخطائكِ السابقة (مش 250 سؤال كلهم). في السنتر، حلي اللي المستر يقوله + 20-30 إضافي. بعد كده، راجعي الحل معاه. لو المنصة نزلت، غيري الجدول لتمشي معاها – الشرح الملخص هيذكركِ المنسي، وهتحلي أكتر لوحدك بدون ضغط. 4. تثبيت الحفظ (خصوصًا أحياء): ممتاز إنكِ بتشرحي لنفسكِ! كملي كده + اعملي "كروت فلاش" أو أسكتشات صغيرة لكل درس: كلمات مفتاحية + رسوم + أسئلة غلط . راجعيها يوميًا 10 دقايق (تقنية "سبيسد ريبيشن": اليوم، بعد يومين، أسبوع). للأحياء: حل + شرح = أفضل. الأسكتشات للأخطاء الشخصية أحسن من الاستشاري ، بس راجعي الاستشاري أسبوعيًا. لو نسيتِ، عادي – الرجوع هيثبت. 5. كام مادة في اليوم؟ 2 مواد يوميًا: واحدة جديد/قديم + واحدة مراجعة خفيفة + حل عليهم في نفس اليوم . مثلاً: صباح أحياء، مساء جيولوجيا. الـ3 صعب مع السنتر، هيحرقكِ. الصح: 2 + 1 ساعة قرآن/دعاء للتوفيق . 6. منصة + سنتر لبعض؟ لا، مش هتلحقي وهتضغطي نفسكِ . اختاري: منصة للرئيسيات (فيزياء، أحياء، كيمياء)، سنتر للواجبات بس. أنتِ مش ظالمة نفسكِ، بس واقعية أحسن. 7. المكافآت؟ أيوة، كل جمعة افتحي الفون ساعة واحدة (كارتون أو بودكاست إيجابي) ده هيحفزكِ، مش هيضيع وقتكِ لأنكِ قفلتيه أساسًا. بس حددي الوقت بالطماطم (تايمر)! نصيحة عامة: رتبي مكانكِ زي ما عملتِ، استمري بدون فون، صلي النوافل وادعي ربنا (سورة الكهف يوم الجمعة). ابحثي في فدني عن "مراجعة ثانوية عامة" هتلاقي نصائح من طلاب شبهك هيساعدوكِ. أنتِ هتنجحي إن شاء الله، النتيجة من ربنا، بس الجهد ده راضي عنه. 💪🥹🫶
تم النشر الخميس، ٢ أبريل ٢٠٢٦
بصي زي ما قولتي الفتره دي هي أهم فتره لو اهملتى الشهرين دول انت كدا بتضيعي مستقبلك طيب تعملى اي اولا علاقتك بربنا دي اهم حاجه والدعاء اذكارك صلاتك قيام الليل متسبهومش المذاكره بقا بصي هاتي آخرك هاتي آخرك بجد الفتره دي . طبعا بدأتوا مراجعه عايزاكى تلتزمى بجداول المراجعه الي هيعملها كل مستر ومتعمليش جداول انت مع نفسك لأن غالبا مش هتمشي عليها وهتحسي نفسك مشتته علي الفاضي ف الاحسن انك تتبعي الخطه الي هيعملها المدرس. طيب تنزلى سنتر ولا اون لاين الافضل الفتره دي خليكي اونلاين طول ما انت بتعرفي تلتزمي السنتر هيضيع منك وقت جامد وهو اصلا مفيش وقت بالنسبه للمذاكره اهم حاجه الحل الحل الحل حلى كتير علي قد ما تقدري والدروس الي ناسيها راجعي عليها مراجعه سريعه وحلي عليها الحل الفتره دي اهم حاجه هيثبت معاكى المعلومات ويكشفلك نقاط ضعفك
تم النشر السبت، ٤ أبريل ٢٠٢٦
وعليكم السلام ورحمه الله وبركاته اول حاجه زي ما انت ما قلت الفتره ديت هي اهم فتره بالذات اهم شهرين والعبره بالنهايات عامه يعني فانت قدامك شهرين فلازما تعرفي ازاي ان انت تنظمي وقتك اول حاجه تبعدي عن السوشيال ميديا تماما تبعدي عن اصدقاء السوء تمام تقفلي اي باب تواصل خارجي ما تخليش فيه غير هو انت بس بعد كده تقراي قران كل يوم تحافظي على صلواتك الخمسه دي اهم الثلاث حاجات المفروض ان انت تعمليهم في الفتره ديت وفي نفس الوقت لازما تذاكري كل يوم اقل حاجه مادتين اقل حاجه عندك مادتين بشرط الماده اللي تيجي تذاكريها تذاكري جزئيه منها والجزئيه اللي تذاكريها تحلي عليها او تلخصيها وبالذات ان انت بداتي في مراجعات نهائيه فلو كنت مثلا بتاخدي مع مستر خالد صقر او مستر محمد صلاح او غيرهم فلازما تلتزمي بالمراجعات والجزئيه للمدرسين يدوها في المراجعه ما تزوديش عنهم تذاكر الجزئيه اللي هم ادوها لك وتحل عليها وتراجعيها مع نفسك تاني وبعد اما تخلصي الجزئيه للمدرسين اديها لك تبداي تذاكري حاجه ثانيه من ماده تانيه انت كنت مرقمها وانت ما جبتهاش
تم النشر الأحد، ٥ أبريل ٢٠٢٦
لعرض السؤال في فدني اضغط هنا