السلام عليكم، هو التعميم مش صح أبدا، فبلاش عشان تعاملت مع حد معين تاخد ده قاعدة تطبقها على الكل. ** واللي بتقوله ده بينطبق على الجنسين مش على البنات بس، هتلاقي حتى في الشباب فيه منهم لما البنت تبقى صادقة وبتحبه وبتشتري رضاه وبتعمل كل حاجة عشان تسعده وتؤكد حبها له، بيتعامل معها كشيء مُسَلم به وممكن حتى يهملها ويؤذيها ويكسر قلبها طالما ضامن وجودها، على عكس لو بنت مغرورة وشايفة حالها عليه، أو واحدة عاملة حدود ومش بتظهر مشاعرها أو مش بيبقى ضامنها طول الوقت ولا ضامن مشاعرها فبتلاقيه متمسك بها أكتر. فممكن نقول ده سلوك بشري، ومش مقتصر على جنس معين. *** هفترض إن العلاقة اللي بتتكلم عنها هي ارتباط رسمي مش صحوبية. (لو صحوبية أو ارتباط غير شرعي الأفضل تبعد وتحافظ على قلبك من العلاقات دي وكل مشاكلها) *** أنت مش محتاج تكذب وتحور عشان تحصل على رضا وقبول الطرف الآخر، المفروض تعرف يعني إيه علاقة سوية ومتوازنة وإنك تكون وسط في علاقاتك وفي نفس الوقت واضح وصريح ومقدر نفسك ومش بتخليها آخر أولوياتك وتيجي عليها عشان خاطر حد، وساعتها اللي هيقدرك ويعرف قيمتك فعلا هيختارك مش هيختار حد تاني كذاب وبيحور. واللي هيرفض صراحتك وشخصيتك يبقى مش هو الشخص المناسب لك.
لعرض الإجابة في فدني اضغط هنا