عندي مشكلة اتمني الافادة ، دلوقت اتجوزت من فترة بنت قريبتي والحقيقة ان الاختيار كان وقت زعل علي حد ومن غير تفكير كتير …. لأن كنت رافضها من الاول ، بعد شهر علي طول لقيت حمل وربنا رزقنا ببنوتة زي العسل .. لكن الصراحة المشكلة فيا لأني مش عارف اتعايش مع الوضع اطلاقا ومن اول ما اتجوزت علي طول وكأنك نزلتي عليا بمية تلج …..ومكنتش عايز موضوع الحمل دا بس اللي حصل وكله خير.. انا مستحمل بقالي ٣ سنين وبقول انها مش غلطتها دي غلطتي انا بس اوقات بتعب لأني مكنتش اتمني ان حياتي تكون كده اطلاقا خصوصا اني عندي اكتئاب وكذا تعب تاني وللاسف هي حتي مش بتعرف تتكلم معايا ولا ليها ف اي حاجة عايشين كاننا غُرب .. ومكنتش اتمني ازعل حد مني لا هي ولا والدتي بس مش عارف اعمل ايه مع العلم اني مش بزعلها وبحاول علي قد ما اقدر اعمل ربنا فيها
لكن انا غير راضي ومش عارف اعمل ايه وكمان بنتي مقدرش استغني عنها ،،، ومحدش يقولي حاول تحبها لأني حاولت بصراحة ومش عارف ..
المشكلة متشعبة برأيي، جزء مرتبط بيك، وجزء مرتبط بزوجتك، بس لإنه كل واحد فينا مسؤول عن ذاته وفقط فعليك إنك تبدأ بنفسك أنت، وتبدأ تجزء مشكلتك لمشكلات صغيرة، علشان تحل جزء جزء علشان تقدر تحل كل المشاكل. وأنا شايفة إنه البداية مع الاكتئاب اللي بتمر بيه، محتاج تعرف سببه، وتعالجه، لو مش قدرت تعمل بنفسك حاول تلجأ لمختص نفسي، الاكتئاب مشكلة عويصة بيترتب عليها كل المشاكل التانية. النقطة التانية إن الحب مش بيجي كده اللي هو أنا هركز إني أحبها فهحبها الفكرة كلها في نقطة انه تجمع بينكم ذكريات مواقف علشان تقدر تحس بشعور نحيتها، حاول تبدأ انت. خدها واخرجوا خروجة حلوة في مطعم أو ملاهي العبوا كلكم وخدوا صور، وكلوا ايس كريم وفشار نزل حاجة تتفرج عليها معاها. اقعد معاها مرة واقولها احكي لي، أنا عايزة اسمع منك. واتعرف على شخصيتها. حاول تركز معاها وتشوف تفاصيلها، تشوف تفاصيلها في حياتك تشوف يومك من غيرها عامل ازاي، بص على مراتك كتير، ركز فيها صدقني لما حواسك تشتغل معاك الشعور مع الوقت هيتنقل لقلبك شوية شوية. ممكن كمان تروح لأخصائي أسري وتطلب مساعدته. المهم في كل ده انك تاخد قرار انك تبدأ
تم النشر الأربعاء، ١٦ أغسطس ٢٠٢٣
ابدأ بنفسك ...مشكلتك مش هتتحل بيها ولا بغيرها اكتأبك وتعبك لازم يكون فى وضع مستقر اصلا وتكون بتسعى تتحسن بعد ما تكون مستقر لوحدك وقتها تقدر تاخد قرار ....وكل قرار وليه تبعاته ....هتختار تكمل هتعاملها بما يرضى الله كزوجتك حتى وان لم تمتلك قلبك ( مودة ورحمة ) هتختار تنفصل ...هتتحمل تبعات ده من زعل ولوم من اللى حواليك وهتتحمل التبعات المادية ...من حقك تطلق اذا شئت لكن بشروط عليك عدم تجاوزها ...والا هتبقى حملت نفسك ظلم قدام ربنا عقابه صعب .
تم النشر الثلاثاء، ١٥ أغسطس ٢٠٢٣
دي مش مشكله واحده دول كذا مشكله في بعض مبدأيا جزاك الله خيرا على حرصك انك تعامل ربنا في زوجتك ومتظلمهاش نمسك بقية المشكله بقى حضرتك بتقول انك كنت رافضها من الاول وربنا سبب الاسباب وقدر الاقدار وكانت من نصيبك ومفيش شهر ولقيتها حامل ورزقت ببنوتة اذن هذا هو قضاء الله لك وهو الخير والانسب والاصلح لك ينقصك في النقطة دي انك ترضى بما كتبه الله ووفقك له وتستشعر انها فيها خير ليك انت مسيطرة عليك جدا فكرة انك كنت رافضها ومكنتش عايزها وده مخليك ساخط على وضعك الحالي ومش عارف تتعايش معاه او تتقبله ولكن الحقيقه انك لو تزوجت ال كنت نفسك فيها او ال مكنتش رافضهايمكن كنت هتلاقي فيها عيوب صعبه جدا تنغص عليك حياتك .لو حضرتك بتقرأ روايات انصحك تقرأ رواية اكتشفت زوجي في الاتوبيس حضرتك لم تذكر اي شئ صعب في زوجتك غير انها مش بتتكلم معاك ولا ليها في اي حاجه والحقيقه ان ده خطأ فكري بيقع فيه رجال كثير جدا اول الزواج لان الطبيعي في اي ست انها بتحب تحكي وتشارك زوجها تفاصيل يومها واي انسان ربنا خلقه بيكون ليه ميول او اهتمامات معينه . كل ده معناه انكم انتم الاتنين لسه مش عارفين بعض ومش مكتشفين شخصيات بعض ولا مقربين من بعض طبعا الزواج بيكون نقله كبيرة جدا في حياة البنت وبيترافق مع لخبطه واضطرابات داخليه ونفسيه كتيرة جواها وبيزداد الامر صعوبه لما تحمل على طول قبل كا تفوق من نقلة الزواج تخيل مع كل ده ينتقل لها شعورك بالرفض او عدم ارتياحك او عدم شعورك بالاستقرار اكيد كل ده بيخلي اي ست تتطفي ( تنطفئ) وده بيفسر كلامك انها مش بتتكلم معاك ولا ليها في اي حاجه حضرتك حاول تتقبل امر الله بزواجك منها وتستشعر ان ربنا اختار لك الاصلح والاخير لك حاول تبدأ تدعمها وتساعدها وتتشارك معاها يومها وتفاصيله وتساعدها في مسؤوليات البنت والبيت شويه حاول تقعدوا سوا وتتناقشوا عن عيوبكم وايه ال بيعجبك فيها وال بيعجبها فيك وال بيضايقها منك وبيضايقك منها ويكون كلام بحب وهدوء وصفا مش حرب ولا اثبات حق باختصار حضرتك حاول تعيش وتعمل معاها ما كنت ستفعله مع اي امرأة اخرى كنت ستتزوجها عن رضا وطيب خاطر وادعي كتير رب قنعني بما رزقتني وبارك لي فيما اعطيتني واخلف على كل غائبة لي منك بخير ولو عندك امكانيه ممكن تزوروا مستشار اسري موثوق زي استاذ محمد فتحي صاحب صفحه دفا البيوت ودكتور اسامه يحيى ابو سلامة صاحب صفحه قرة وممكن تقرا بوستات استاذ محمود توفيق تحت هاشتاج كن جميلا المهم انك تعيش حياتك بشكل طبيعي لان مشاعرك بتنتقل لزوجتك واي ذرة اهتمام وحب هتحسها منك هتلاقيها بدأت تتجاوب وتبذل جهدها لسعادتكم ان شاء الله
تم النشر الخميس، ١٧ أغسطس ٢٠٢٣
حاول تاخدها وتروح لمختص -استشاري علاقات زوجية واسرية .. ل ربما تجد مخرج ل اللي انتم بتمروا بيه .. الموضوع ده كويس جدا لاي اتنين شايفين انهم مش عايزين يهدوا البيت ونفسهم في فرصة تخلي علاقتهم احسن مع بعض. جرب ومش هتندم، اعتبرها فرصة .. لعل وعسى الامور تجد فيها جديد.
تم النشر الثلاثاء، ١٥ أغسطس ٢٠٢٣
انت زراعت شعور عدم الرضا والرغبة من أول الأمر ولا تريد أن تظلمها ولكن ما نرغب لا يتحقق ونفرض انك تطلقتها ونظرت الي أخري ستكون سعيد أول الأمر ولكن فيما بعد ستلوم نفسك كثيرا تذكر ما تراه شرا يكون خيرا فيما بعد انت تبحث عن الحب الذي تحلم به ولكن هذا ليس موجود كما نرا انت بتحب زوجتك لانك تخاف أن تظلمها وترعي شعورها انت ليس سيئاً ولكن تحتاج العمل علي نفسك وتذكر ما اجمل أن يكون لك طفلة كفيلة أنها تحل بعض المشاكل وتجعل الرابطة قوية ليست كل البيوت تبني علي الذي نتمني ارضي بزوجتك وتحدث معها حاول انك تكون صديق قبل الزوج ستشعر بجمال العلاقة ولكن تحت مسمى الصداقة اقعد معها وقول لها أنت بتشوفني ازاي وايه العيوب وايه المميزات ونفس السؤال لها وان لم تفلح بتقبل هذه الفرصة فالطلاق أولي ولكن تذكر طفلتك ولا توذي مشاعرها كي لا تكون عندها فقد لأبيها وحبه فالمستقبل ابنتك تستاهل حاول مرة أخرى
تم النشر الثلاثاء، ١٥ أغسطس ٢٠٢٣
اتكلم معاها واحكيلها ايه المشاعر والحاجات اللي محتاجها منها وقولها انتي غريبة عني بسبب كذا وكذا وقرب منها واتكلموا كتير هتلاقي الدنيا اتظبطت إن شاء الله
تم النشر الثلاثاء، ١٥ أغسطس ٢٠٢٣
مزرعتش شعور ولا حاجة اكيد مكنتش اتمني ان دا يحصلي لأني اصلا بحاول جاهدا البعد عن أي ضغوط او مشاكل وعمري ما كنت اتمني يوم ان بنتي تبقي بعيدة عني ودا السبب اللي مخليني قاعد لحد دلوقت من يوم ما عرفت ان في حمل .. لكن انا مش لاقي نفسي والله انها ثقيلة ك من يحمل فوق ظهره جبلًا ...
تم النشر الثلاثاء، ١٥ أغسطس ٢٠٢٣
لعرض السؤال في فدني اضغط هنا