السلام عليكم، أنتِ محتاجة تحبي نفسك الأول وتقدريها. لو بتحبي نفسك مش هتسمحي لأي حد يهينها كده، ولا هتخليها متعلقة بشخص بيؤذيها، موقفة حياتها عليه رغم كل تصرفاته وخياناته. ثم هل متخيلة إن دي الوحيدة اللي ارتبط بها خلال السبع سنين؟ كلامك بيقول إنه لا كان خطيب ولا زوج، صح؟ مجرد مرتبطين؟ فأكاد أجزم إنه مستحيل... إذا كان الرجل بيبقى متزوج وفي علاقة حلال وزوجته مش مقصرة عادي ويروح يخون ولا يتزوج عليها... متخيلة شخص لا يربطه بك إلا علاقة هي شرعًا في ديننا حرام مش هيروح يعرف عليكِ ويصاحب واحدة واتنين وعشرة؟ فوقي لنفسك يا أختي، أنتِ تستحقي أفضل من كده... تستحقي تكوني غالية ومعززة واللي عارف قيمتك ومقدرك هيطلبك من أهلك غير كده يبقى شايفك تسلية مؤقتة لحد ما ربنا يسهل. ** معلش لو كلامي قاسي شوية بس ساعات كتير بنحتاج الكلام اللي يفوقنا لنفسنا حتى لو قاسي. ** قلتِ في تعليقك لذكية إن التنفيذ صعب. التنفيذ هيبقى سهل لما أقعد مع نفسي وأعمل كل جهدي عشان أخليها رقم واحد في أولوياتي، لما ألاقي هدف كبير أعيش عشانه، لما أملأ يومي بإنجازات تخلي ثقتي في نفسي تزيد وتخليني مش محتاجة أشحت عاطفة من حد مش مقدرني ولا يستحقني. ** اقعدي مع نفسك كده وراجعي حساباتك على الورق وخدي قرار ترجعي لربنا وتتوبي وتستعيني به عشان تتخطي كل ده وتكوني أفضل ويكون ربنا راضي عنك. ** بالتوفيق إن شاء الله.
لعرض الإجابة في فدني اضغط هنا