السلام عليكم، الثقة بتيجي من حبك لنفسك وتركيزك عليها، إنك تعرفي ليه احنا هنا في الدنيا وإنك معك ورقة امتحانك ومحتاجة تركزي عليها هي بس ولا تشغلي نفسك بورق امتحانات باقي الناس. كل ما عشتِ عشان هدف كبير وخليتِ كل يوم إنك تشتغلي على نفسك وتكوني أفضل ولو بخطوة واحدة عن اليوم اللي قبله كل ما هتحسي إنك بتحققي حاجة وشعورك بالإنجاز والتغير هيزود ثقتك بنفسك. مش مهم الناس الباقية بتحقق إيه حتى لو بتحقق في نفس الحاجة اللي انتِ نفسك تحققيها، لأن كل واحد اختباره مختلف وإمكانياته وظروفه مختلفة. كل واحد له رحلته، فاستمتعي أنتِ برحلتك لحد ما توصلي للهدف، ممكن حتى اللي ماشي في نفس طريقك يكون بدأ قبلك، تكون إمكانياته مختلفة، خطواته مختلفة، ومش معنى إنه وصل الأول إن ده عيب فيكِ. أنتِ مش في سباق معاهم، أنتِ في رحلة حياتكِ أنتِ وحدك. ** طبعا السوشيال ميديا ونشر الناس صورهم وإنجازاتهم (حتى الوهمية منها) سبب في انتشار الإحباط وشعور الغيرة ومقارنة النفس بالآخرين، فلو ده من الأسباب عندك الغيها خالص واقتصري استخدام السوشيال ميديا للضرورة وللتعلم. ** وكل ما نفسك توسوس لك فكريها بالنعم الكتير اللي ربنا أنعمها عليكِ في نفس الوقت اللي ناس كتير تانية محرومة منها، وافتكري حديث رسول الله عليه الصلاة والسلام إننا ننظر للأعلى مننا في الدين عشان نتطلع نبقى زيه وننظر للأقل مننا في الدنيا عشان نفتكر نعم ربنا علينا ولا نزدريها. "انظروا إلى من هو أسفلَ منكم ولا تنظروا إلى من هو فوقَكم ، فإنه أجدَرُ أن لا تزدَروا نعمةَ اللهِ عليكم" *** ركزي على نفسك وحققي إنجازات وأنتِ هتوصلي إن شاء الله. بالتوفيق. https://dorar.net/hadith/sharh/91515
لعرض الإجابة في فدني اضغط هنا