السلام عليكم، بصي يا نورهان نصيحة لك في المذاكرة أو أي عمومًا في أي حاجة في الحياة بلاش تعتمدي على الشغف. انتظار الحماس والشغف عشان تبدئي تعملي المطلوب منك مش هينفعك. الأهم من الشغف، الإلزام وإحساس المسؤولية. طول ما بتطاوعي نفسك ومصدقاها إنها ملهاش نفس في المذاكرة طول ما هتفضلي واقفة مكانك والأيام بتمر ومع الوقت الضغط بيزيد عليكِ. فالفكرة كلها إنك تلزمي نفسك، اقعدي مع نفسك وهاتي ورقة وقلم واكتبي إيه الأسباب اللي تخليكِ لازم تذاكري وإيه النتائج السيئة (السلبيات) اللي هتترتب على عدم مذاكرتك. غيري تفكيرك تجاه المذاكرة، إذا هتفضلي شايفاها مسؤولية تقيلة وواجب لازم تعمليه هتلاقي عقلك بيخترع أسباب عشان يسوف ويبعدك عن المذاكرة عشان يمنع عنك الألم والضغط، فالحل إنك تفكري فيها بطريقة مختلفة، فكري إنك هتذاكري بس نصف ساعة هتتعلمي خلالها حاجة جديدة وبعدين هتاخدي راحة تكافئي نفسك بحاجة بتحبيها. دوري على يوتيوب على عنوان (ذاكر بذكاء ذاكر أقل) هتلاقي طرق هتنفعك تذاكري بطريقة ذكية بحيث تذاكري بتركيز أكبر في أقل وقت. أنصحك كمان تبحثي هنا في فدني من خلال شريط البحث هتلاقي أسئلة كتيرة نفس سؤالك أو شبيهة به وفيها نصائح كتيرة إن شاء الله تفيدك وتاخدي اللي يناسبك منها. بالتوفيق إن شاء الله.
امين يارب العالمين ولكي بمثل 🤍
تم النشر الأربعاء، ٣ سبتمبر ٢٠٢٥
العفو، وبالتوفيق في دراستك وكل أمورك إن شاء الله.💚💚
تم النشر الأربعاء، ٣ سبتمبر ٢٠٢٥
شكرا علي نصيحتك يقمرر وربنا يجازيكي خير 🤍
تم النشر الأربعاء، ٣ سبتمبر ٢٠٢٥
لعرض الإجابة في فدني اضغط هنا