السلام عليكم
أنا كنت اتعرفت علي بنت من لعبة اونلاين قعدنا بنتكلم حوالي 6 او 7 شهور هي عادي زي اختي مافيش حاجة و هزار و ضحك و بنطمن علي بعض و بنتكلم كل يوم ب الساعتين و التلاتة ده بعد ما خرحنا من اللعبة المهم البنت دي كانت مخطوبة و معرفة خطيبها انها بتكلمني خلال الفترة دي،
من شهرين تقريباً عملت حوار كدا ان خطيبها عمل مصيبة مع بنت تانية فا هي مصدومة منه و زعلانة موت حاولت اكون جنبها رفضت و قالت كلام كتير المختصر بتاعه انها هتبعد فترة علشان تفوق لنفسها و هترجع تاني و لو مرجعتش ابقي ادعيلي بالرحمة فا الكلام ده كلو و اارسايل دي كلها جت ليا و انا نايم
لما صحيت شوفتها فا انا اتصدمت فضلت مصدوم حوالي ساعة ببص على الرسايل و لاول مرة من فترة طويلة اعيط و لما فوقت بعد الساعة قفلت التلفون و كملت عياط فضلت كدا تقريباً لمدة اسبوع احساس بالذنب انها احتاجتني و انا ماكنتش جنبها بعدها بقى حاولت افوق لنفسي و اركز في الدراسة بتاعتي المهم كنت بعدي كل يوم ولازم افكر فيها و بقيت بصلي و ادعي انها تكون بخير و خلاص حتى لو مش هنتكلم
المهم المرحلة دي عدت علي خير و خلاص لسة هبدأ اعيش حياتي عادي لقيتها دخلت ليا بشخصية اختها و تقولي دي نطت من الدور التاني علشان تنتحر و جالها فقدان ذاكرة دائماً و اتغيرت و بقت بتشرب سجاير و فيب و قلعت الحجاب فبسأل اختها طيب و انتو عارفين هي ليه حصلها كدا قالتلي لا قولتها طيب هي كانت قايله ليا عايزة تعرفي برضو رفضت شكيت في الموضوع بس قولت عادي
المهم فضلنا نتكلم حوالي ساعة الا ربع عرفت انها سابت البيت و عند عمتها فبحاول اطمن علي البنت بس مالقتش الموضوع فيه فايدة فا قولت خلاص و قفلت الكلام معاها و قولتلها لو عرفتي حاجة عنها ابقي كلميني
تاني يوم و انا بسكرول على التيك توك لقيت حساب الواد فداخل بشوف الاخبار من عنده ان من قبل ما اللي هي المفروض اختها دي تكلمني على طول بكام يوم الاتنين كانو بيحبو في بعض في ريبوست خدت اسكرين و روحت بعته للي المفروض بيكلمني أو بتكلمني علي انه اختها و قولتلها يارب اختك تبقي بخير و ترجعلها الذاكرة و قمت عامل بلوك
لما بحكي لصحابي قالولي انت حبيتها بس والله انا زعلان عشان كنت هنزل اتخانق علشانها و كمان كانت ساعتها في اي مشكلة كانت بتيجي تحكيلي و دور الملاك البريئ و صعبان عليا نفسي اني فضل حوالي شهر و نص زعلان و كمان هي جاية تكمل عليا بس مفهمتش ليه رجعت او ليه اختها بتكلمني معرفش
السلام عليكم، انسى وارمي الموضوع كله ورا ظهرك وركز في حياتك. عادي زي ما فيه ولاد بيتسلوا بالبنات ويضحكوا عليهم على النت ويستغلوا مشاعرهم فيه بنات برضه ممكن تعمل كده لأي سبب بقى، سواء تسلية أو حاجة نفسية بتدفعها لتمثيل دور معين بتخترعه. الفكرة أنت تعاملت بمشاعر طيبة وقلقت على شخص مهتم لأمره حتى لو هي طلعت مخادعة ومثلت عليك واستغلت مشاعرك فأنت يعتبر ضميرك مرتاح من الناحية دي. (ده طبعا من غير ما نتكلم في نقطة إن مفيش حاجة اسمها صداقة بين ولد وبنت أو زي أختك) فيه حدود للتعامل بين الجنسين تجنبا لكل المشاكل اللي بتحصل من ورا دا. **** عموما، كمل على البلوك ومترجعش فيه ولو هي حاولت تتواصل من حساب تاني وتبرر اللي حصل فبلاش ترجع تتكلم معها واقفل الموضوع ده تماما. وهتاخد وقت وتنسى اللي حصل فركز دلوقتي في حياتك واعتبره كان درس تعلمت منه ومتكررش الخطأ تاني. ركز في دراستك وحياتك واشغل يومك بأهداف مهمة وبلاش تضيع حياتك في الألعاب الأونلاين وكلام النت، فيه حاجات أهم بكتير محتاجة تلتفت لها. وبالتوفيق إن شاء الله.
تم النشر الثلاثاء، ١٣ أكتوبر ٢٠٢٦
عليكم السلام ورحمة الله و بركاته عايز اسألك سؤالين الأول قبل ما أرد عليك لو تسمح بعد أذنك طبعاً،،،،، السؤال الأول إى هو هدفك من السؤال يعني عايز تعرف إى بظبط ولا عايز تسأل عن إى؟ أنا قرات كلامك مرتين و مش لاقي سؤال محدد فلو ينفع تقولي إى هو سؤالك بظبط اكون مشكور،،،،، السؤال التاني، هل أنت مدرك إن مفيش حاجة أسمها صداقة أو اخوات بين الشباب و البنات نهائي؟ و التعامل يكون بحدود فقط هل أنت مدرك بكده؟
تم النشر الثلاثاء، ١٣ أكتوبر ٢٠٢٦
وعليكم السلام ورحمة الله، أول حاجة أحب أقولها لك: اللي مررت بيه صعب ومؤلم، وإحساسك بالذنب والصدمة طبيعي جدًا لأنك كنت بتدي جزء من وقتك واهتمامك لشخص كنت بتشوفه زي أختك. الإنسان بيتأثر لما يحس إن حد كان قريب منه اختفى فجأة، وده مش ضعف، ده دليل إنك إنسان بيحس. اللي حصل بعد كده، خاصة قصة "الأخت" والانتحار وفقدان الذاكرة والتغييرات الكبيرة دي، فيه علامات كتير بتخلي الموضوع مش منطقي. وجود الريبوستات على تيك توك بينها وبين خطيبها السابق قبل ما الرسالة دي تجيلك بأيام، وكمان إنها سابت البيت وعند عمتها.. كل ده بيخلي الرواية مش متماسكة. غالبًا اللي حصل إنها رجعت لخطيبها ومش عارفة تخرج من الموضوع بطريقة نظيفة، فاستخدمت طريقة ملتوية عشان تبعد أو ترجع تتواصل. ده مش ذنبك، ومش لازم تفهم "ليه رجعت"، لأن الإجابة مش هتغير الواقع. أنت دلوقتي قدامك فرصة تختار: تكمل تفكر في اللي فات وتدور على تفسير لكل حاجة، ولا تقفل الباب وتركز في حياتك. الصلاة والدعاء اللي بتعملهم حاجة كويسة، استمر فيهم، وادعي لنفسك بالشفاء والراحة. ركز في دراستك زي ما بدأت تعمل، وخلي يومك مليان بحاجات بتفيدك فعليًا (رياضة، هوايات، مذاكرة). كل ما تملأ وقتك بأشياء حقيقية، هتحس إن الفراغ اللي سابته الرسايل دي بيقل تدريجيًا. لو حسيت إن الموضوع لسه بيأثر عليك ومش قادر تتجاوزه، ممكن تفكر تكتب اللي جواك في ورقة وتحرقه، أو تتكلم مع حد كبير في العيلة تثق فيه. الأهم إنك تعرف إن اللي حصل مش عيب فيك، وإنك عملت اللي تقدر عليه في وقته. دلوقتي دورك تعمل اللي في مصلحتك وتسيب الباقي لله. ربنا يهديك ويشرح صدرك ويبعد عنك أي حاجة بتتعبك.
تم النشر الثلاثاء، ١٣ أكتوبر ٢٠٢٦
لعرض السؤال في فدني اضغط هنا