السلام عليكم، شكرًا لأنك وجهتِ لي السؤال وأرجو إني أقدر أفيدك بالنصيحة إن شاء الله. أولًا، كويس إنك معترفة إن أساس مشكلتك معه تعلقك به، ده اللي مانعك مش حبك ولا ثقتك ولا عاطفتك نحوه. التعلق إدمان، أنتِ أدمنتِ وجوده وكلامك معه ومش قادرة تتفهمي إنك في يوم تتنازلي وترمي كل الذكريات أو تعترفي لنفسك إنك كنتِ مخدوعة. التعلق طبعا هيحتاج وقت وصبر وشغل على نفسك عشان تقطعيه لكن الموضوع مش مستحيل، ناس كتير قدرت تتخطى وتكمل حياتها. *** بالنسبة للكلام الكتير اللي قاله لك في البداية فالله أعلم كم الصدق فيه من الكذب، بس في غالب العلاقات دي بتكون اسطوانات محفوظة الشباب بيقولوها عشان يثيروا عاطفة البنات، بيغرقها باهتمامه ويحسسها قد إيه هي أهم واحدة والوحيدة اللي حس معها كده وممكن قوي يكون بيكلم عشرة غيرها في نفس الوقت ويسمعهم نفس الأسطوانة. فمتركزيش خالص في الكلام ده وانسيه وركزي في خطوات الخروج من الواقع المؤسف المؤذي لك حاليًا. *** أول حاجة لازم تعمليها، تتوبي لربنا بصدق عن كل اللي فات وتسأليه يغفر لك ويثبتك ويمنع الشيطان يوسوس لك ويستغل ضعف مشاعرك عشان يرجعك للطريق الغلط. ثانيا، ركزي على نفسك وبس، أنتِ قلتِ هو منتظر الرفض ييجي منك؟ وإيه المشكلة؟ مع السلامة وارزعي الباب وراه عادي جدا. قدري نفسك واختاريها، مش هتستفادي حاجة من إنك تفضلي متعلقة بحبال دايبة وأوهام ومعشمة نفسك. ثالثا، لو قعدتِ مع نفسك وكنتِ صادقة فعلا هتلاقي كل العيوب اللي ذكرتِها دي توجهك ببساطة للقرار اللي المفروض تاخديه. ده شخص عكسك دينيا وأخلاقيا، هل شايفاه أصلا ينفع يكون زوج وأب تأتمنيه على نفسك وأولادك؟ شخص متلاعب زي ما قلت، وأنتِ كمان مش عارفة اصلا هو عاوز يتزوجك ولا لأ، يبقى ليه تربطي مصيرك وتعلقي حياتك بشخص زيه؟ أنتِ أقل منه عشان تنتظري قبوله أو رضاه؟ هل متستحقيش شخص مش متردد يكون شاريكِ فعلا وأول ما يحس بمشاعر نحوك ويعرف إنك اللي عاوزها شريكة حياته يجري ويخبط على أهلك، مش يفضل معلقك جنبه بيتسلى ويملأ فراغ وبعد كده يقول لك آسف اكتشفت مننفعش لبعض؟ ** فكري في نفسك وخليها الأولوية... نفسك ومشاعرك غالية جدا وربنا خلاكِ غالية ينطلب رضاكِ مش أنتِ اللي تطلبي رضا حد، أنتِ اللي تقعدي معززة مكرمة تفرضي شروطك مش العكس، فخليكِ زي ما ربنا عاوزك. ** طولت عليكِ بس أرجو إنك بجد تاخدي بالك من نفسك وتنقذيها قبل فوات الأوان. لما تتعبي شوية دلوقتي أحسن من إنك تكسري نفسك وتتعبي سنين طويلة. ** ممكن تاخدي لفة في التطبيق هتلاقي أسئلة كتير عن فك التعلق ومشاكل تانية لبنات كانت في نفس مكانك إن شاء الله تفيدك النصائح الموجودة فيها. ربنا معك ويوفقك للخير.
ما ده عشان إدمان للكلام مع حد، لكن لازم تكوني حاسمة مع نفسك وإلا هتجرك لطريق وحش جدا.. أغلب اللي فتحوا التطبيقات دي حتى لو البداية كويسة ومحترمة ومش كلام وحش زي ما قلتِ بينجروا لطريق وحش واحدة واحدة... دي من خطوات الشيطان. قفل الباب إنك تكوني حازمة زي ما قلت وتلجأي لربنا وبس، لو فيه أي تقصير في علاقتك بربنا صلحيه، واظبي على الصلاة والدعاء والأذكار وسورة البقرة كمان يوميًا. أنتِ دلوقتي في حالة ضعف فالشيطان بيحاول يستغل ده فقوي نفسك بربنا وثقي إنك قادرة تنتصري وتعبري الفترة الصعبة دي وأنتِ أقوى وأفضل من قبل. بدل التطبيقات والكلام مع الناس، اقعدي مع نفسك في خلوة وهاتي ورقة وقلم وسجلي كل أفكارك ومشاعرك وكل اللي مضايقك، اكتبي كل الحاجات اللي كان نفسك تعمليها من وأنت صغيرة، كل المهارات اللي ممكن تتعلميها، النت موجود عشان كده مش عشان نضيع وقت غالي في تفاهات. بعد الخلوة دي هتطلعي بأفكار وأهداف، رتبيها واعملي خطة تمشي عليها يوميًا. املأي فراغك وعاطفتك باهتمامك بنفسك وإنك تعيشي لهدف كبير، خلي كل يوم مشغول بإنك بتتعلمي حاجات جديدة وبتتحسني خطوة خطوة. ده الحل الأكيد عشان تتخطي التجربة وتكوني شخص أفضل إن شاء الله.
تم النشر الأربعاء، ١ أكتوبر ٢٠٢٥
شكرا ليكي انك رديتي عليا بس مشكلتي حاليا اني مش قادرة اتخطى كلامي معاه وابتديت احمل ابلكيشنز اكلم ناس عليها مش كلام وحش بس تعود ان فيه حد فحياتي فهماني عايزة اقفل الباب ده مش عارفة
تم النشر الأربعاء، ١ أكتوبر ٢٠٢٥
لعرض الإجابة في فدني اضغط هنا