السلام عليكم، كل أسلوب منهم له مزاياه وعيوبه وفي النهاية القرار معتمد على شخصيتك وطريقتك في المذاكرة والالتزام. يعني المنصات بتوفر وقت كتير بيضيع في الذهاب للدروس والرجوع منها، ولما بترجعي أكيد بتكوني مصدعة وتعبانة وعاوزة ترتاحي فده وقت إضافي بيضيع، لكن لو أنتِ شخص بيحتاج توجيه مباشر ومش بتعرفي تلتزمي لوحدك فممكن مينفعش معك الدراسةأونلاين. نقطة إنك مش فاهمة في المنصات فده عادي لأنها شيء متعاملتيش معه من قبل وممكن بالتدرب أو السؤال تعرفي إزاي نظامها وطريقة المذاكرة من خلالها. الفكرة تحددي الأول أي أسلوب منهم أفضل. يعني جربي كده أسبوعين تذاكري أونلاين حتى لو من خلال دروس موجودة على يوتيوب. فهنقول مثل لو هتذاكري مادة الأحياء، هتشوفي الدرس الأول عن إيه في الكتاب وتشوفي شرحه على يوتيوب. يُفضل تقرأي الدرس بنفسك من الكتاب أول مرة قبل ما تسمعي الشرح وتشوفي فهمتِ إيه مع نفسك وإيه كان صعب تفهميه ولخصي في ورقة المعلومات اللي فهمتِها من قراءتك. بعد كده اسمعي الشرح على يوتيوب وسجلي في دفترك النقاط المهمة أو اللي فهمتِها أو اللي وضحت لك بعد الشرح. هتحلي الأسئلة اللي على الدرس ولو فيه سؤال صعب اكتبيه على جنب، ممكن توجهيه لمدرسك في المدرسة أو تبحثي بنفسك على الانترنت (وده أفضل لأنه بيثبت المعلومة أكتر) ثاني يوم قبل ما تذاكري الدرس التاني هتراجعي الدرس الأول قراءة من الكتاب ومن ملاحظات الدفتر. المراجعة المستمرة والمنتظمة بتثتب معلوماتك فخليها أساس في مذاكرتك. بعد أسبوعين لقيتِ إنك مش بتلتزمي أو مش نافع معك المذاكرة بالطريقة دي يبقى اختاري مدرس كويس على أرض الواقع تكوني بتفهمي منه فعلا وتتابعي معه. وبالتوفيق إن شاء الله.
لعرض الإجابة في فدني اضغط هنا