السلام عليكم، تعبك واستهلاكك النفسي وضع طبيعي ومش مستغرب أبدًا. يعني أنتِ منتظرة إيه؟ مخلية أمانك وحياتك كلها مرتكزة على شخص ومخلياه هو الكون بالنسبة لك فطبيعي لما يتخلى عنك ويؤذيكِ تحسي إن كونك كله اتهدم. ولما تخلي واحد بالنسبة لك زي ما قلتِ الدنيا والدين (وأتمنى أكون قرأت التعبير ده بالغلط أو أنتِ كتبتِه غلط) طبيعي هيبقى رضاه عنك أهم من رضاكِ عن نفسك وتقديرك لها، وحتى أهم من رضا ربنا لأنك قلتِ محدش يقول ابعدي عنه. ولو هو مش زوجك أصلا ولا فيه رابط شرعي بينكم يبقى ربنا غير راضي عن علاقتك به لكن أنتِ خليتيه هو أهم حاجة ومستمرة في حاجة حرام تغضب ربنا. ** مش هامك حتى إنه عنده استعداد يبيعك في لحظة وخلاص بعد ما راحت حلاوة البدايات وبقيتِ بالنسبة له زي أي بنت بيقول لك مع السلامة بكل بساطة وأنتِ لسه بتشكري فيه وتقولي هيسعد البنت اللي هيحبها وحظها حلو؟ ** ليه بجد مخلية نفسك قليلة قوي كده؟ يعني شايفة نفسك لا تستحق شخص يحبك ويقدرك وتكوني غالية عنده ومش بسهولة كده يبيع ويؤذيكِ؟ طبيعي ميقصرش معك في الأول لأن اللي زيه بيكون بيصطاد البنت فلازم يغرقها باهتمام ويحسسها قد إيه بيحبها وهي غالية عليه، وبعد كده بعد ما تخلص التسلية أو تبقى البنت عادية بعد ما راحت الزهوة والغموض حواليها فخلاص كده مش محتاج يغرقها باهتمامه وهيتعمد يهمل ويتجاهل عشان تبعدي من نفسك. ولو البنت مبعدتش بعد كل ده هيبعدها هو ويقطع العلاقة بطريقة تخليها مجروحة ومكسورة طول العمر. ** فليه بجد تعملي في نفسك كده؟ مش هقولك ابعدي زي ما أنتِ مش عاوزة تسمعي، هقولك اقعدي مع نفسك كده وراجعي حياتك وشوفي اللي أنتِ فيه ده وضح صح ويرضي ربنا ويرضيكِ عن نفسك ولا لأ. وفي النهاية اعملي اللي يريحك لأن محدش فينا خسران حاجة، مفيش غيرك في الوضع ده كله متأذي.
تمام، بس نصيحة بجد من تجارب ناس كتير حوالينا، غلي نفسك وخليها هي الأولوية عندك.. شباب كتير للأسف أول ما البنت بتتعلق بهم وتبدأ هي اللي تعطي اهتمام وغرقانة بمشاعرها في العلاقة بيهملها وبيعتبرها لازقة وبيزهق منها لكن لما يحس إنها مركزة مع نفسها وممكن يخسرها ومش فارق معها إنه يروح أصلا بيفضل متمسك بها... جايز فيه رجال كويسين ومتزنين نفسيًا لكن من تجارب كتييييرة للأسف ده اللي ملاحظ. الله أعلم هل ده السبب أو هو لقى إن الظروف مش سامحة بزواجكم أو مش هيكون قد المسؤولية أو كان متخيل الزواج هيكون سهل لكن لقى الأمر الواقع حاجة تانية ومش مستعد لده فغير رأيه ولا هو مشاعره اتغيرت ولا فيه سبب تاني. فيه احتمالات كتيرة بس الأكيد إنك متشرتيش أبدا حد بايع... اشتري نفسك وغليها ومتقوليش مشاعرك اتهدرت ولا ذكريات ولا كل ده... عادي الوقت بينسي لو مش مكتوب لكم تكملوا، هتزعلي شوية وتكملي حياتك عشان نفسك تستحق ده منك ومفيش أبدا أبدا حد يستحق تدمري نفسك عشانه. خدي لفة في التطبيق واقرأي الأسئلة اللي عن التخلص من التعلق وهتلاقي نصائح تساعدك تتخلصي من تعلقك ده. الموضوع هياخد وقت وشوية جهد لكن مش مستحيل خالص. ربنا معك.
تم النشر الثلاثاء، ٣٠ سبتمبر ٢٠٢٥
هو جيه وكلم اهلي وكنا محددين معاد الخطوبه كمان حوالي 8 شهور لظروف تخصني وتخصوا و والدتوا كلمت اهلي وكلوا تمام..بس عمتن المعامله اتغيرت مع الايام وبقي في زعيق ليا وطريقه وحشه اوي احيانا وانا عشان العيش والملح وصعبان عليا الوقت اللي ضاع معاه ده كلوا اللي مكنش قليل خالص وصعبان عليا مشاعري اللي اتهدرت وكل ده فمكنتش بفكر اني ابعد كنت بس بدور أن احنا نتفاهم ونرجع زي الاول تاني لأن اصلا لو بعد انا مش هكون كويسه خالص لا انا متعلقه بيه بجد وبذكرياتوا معايا ومعنديش بقي أصحاب ولا اخوات ولا الجو ده فهماني
تم النشر الثلاثاء، ٣٠ سبتمبر ٢٠٢٥
لعرض الإجابة في فدني اضغط هنا