السلام عليكم
اسفه مقدما انى هطول عليكم
انا محتاجه دكتور نفسي او راجل يرد عليا لأن انا حاسه بحيره كبيره و خايفه اكون ظالمه أو مش راضيه بعيشتى مثلا
انا مخطوبه لابن عمى من بعد ما بابا اتوفى و اللى من العيله و اللى بره العيله كلها بيقول أن احنا لبعض بصراحه الموضوع دا كان مدايقنى بس شيلتها من دماغى لحد ما في شخص جه يتقدم ليا و وقتها عمى اللى هوا ابو خطيبى اتكلم مع عمى اللى انا عايشه معه و طلبنى منه و وقتها عمى وافق و قربنا الفاتحه و العريس اللى كان متقدم نزلته بنت عمى علشان اليوم يعدى
المهم احنا قربنا نكمل سنه قاريين فاتحه و مفيش اى تقدم خالص هو كان بيشتغل ساب الشغل علشان المرتب ضعيف و لحد دلوقتي مش لاقى شغل مناسب دى حاجه تضايقنى بس انا بحاول اتجاهلها و بقول فتره و هتعدى
فب بدايه الخطوبه قالى أن عمى كان بيلمحلو أنه يجيى يتقدم و هو كان بيعمل مش واخد باله أو بتجاهل الموضوع لحد ما ابوه قاله انت عايزها و هو قاله ايوه
لما حكالى الموقف دا اضايقت جدا حسيت انى حمل ع عمى مع أن دا محصلش منه هو قالى كدا و احنا كونا مكملناش 10 ايام قاريين الفاتحه المهم طنشت الكلام دا و عديت الموضوع دايما بيقولى انا معرفش يعنى اى حب بس معاكى بحس بإحساس حلو اوى و بيقولى انتى دنيتى و راحتي من راحتك و أنه مبقدرش يستغنى عنى
بس لما بنتخانق كل خناقه بيقولى لو مش حابه نكمل قوليلى و انا هجيب العيب من عندى كل خناقه بيقولى انتى تستاهلى حد احسن منى بس انا جوايا حته نضيفه علشان كدا عايزك
كل خناقه معيشنى في توتر و أنه في لحظه ممكن يروح يقول لعمي أنه مش هيكمل
المشكله انى مش هموت عليه ولا مش هعرف اكمل من غيره بس كل مره بحسه أن لما تحصل مشكله يقول ظروفى و مش ظروفى و بيطلعنى انانيه و ماديه لدرجه انه قالى قبل كدا انى ماديه و بحب الفلوس وقتها خدت الموضوع بهزار و مرضتش اعمل مشكله و عديتها زى ما بعد حاجات كتير
و من ضمن الاتهامات أنه مره قالى أن في حد في حياتك
و مره شتمتنى بلفظ مش كويس و قالى انا بحاول الفت انتباه الشباب ليا و انى بتشرmط قدامهم علشان يبصولى اسفه ع اللفظ بس هى اتقالتلى كدا
مره برضه كان بيغلس عليا و ضايقنى و لما مردتش عليه قالى انتى مدايقه قولتله لا عادى انت عبيط هزعل من كدا قالى انت قليلة الادب و متربتيش و لما قولتله اى اللى انت بتقوله دا قالى اعتبرينى مرايا الحاجه اللى هتعمليها هردهالك
جيت بعديها بكام يوم قولتله انا مش عايزه مرايا انا عايزه راجل يكون ضهرى و سندى عايزه راجل لما اغلط يعلمنى الصح و يقولى الصح من الغلط فراح قال لخالتى دى بتقولى عايزه راجل و مقالهاش ع الموضوع من أوله و لما قولت انا مش عايزه اكمل فكان بيعيط و زعل
و كل شويه يقولى هو انا معنديش كرامه علشان بصالح و برضيكى طيب قولى انا كرامتى فين حسسنى أن عمى و خالتى اقرب ناس ليا أنهم ضدى مش في صفى
مره كنت بهزر معه و بقوله انت مش مضمون مع أن مكنش قصدى حاجه بس راح قال لخالتى برضه و سخنها عليا لدرجه جت اتخانقت معايا و اللى لحظتها الفتره الاخيره بيجي يقولى خالتك بتقول انك عملتى كذا و كذا و انا بكبر دماغى علشان هى عايزه تسمع منى عنك حاجه وحشه و يروح يقول لخالتى انى بقول انها بتعامل ولادها احسن منى و انى و انى و كلام كتير
قولولى اعمل اى لما قبل كل مشكله يقولى قوليلى لو مش عايزه تكملى انت تستاهلي حد احسن منى
دا غير أنه كل فتره بيقولى أنه ممكن يرجع للشرب تانى
المشكله ان ماما و بابا انفصلوا لما كنت صغيره و لحد دلوقتي انا اللى بتلام ع الغلط أعلى لدرجه عمى قالى انتى زى امك
بالله عليكم حد يقولى اعمل اى لانى تعبت
و صل بيا التفكير انى اموت نفسي و استرجعت عنها و بقيت بدعى ع نفسي أن ربنا يجعل بموتى
لو هتقولولى صلى استخاره صليتها 3 مرت و كل مره احس بديقه و خنقه و المشكله لو هو مش عايزنى ليه بيعمل كل دا ليه حاسه انه بينتقم منى لو هو مش عايزنى ليه بيعمل معايا كدا ولا دا عادى و انا مكبره الموضوع
بصي يا بنت الناس، الكلام ده مش محتاج دكتور نفسي، محتاج وقفة صريحة مع نفسك. إنتي في علاقة سامة بتسحب من روحك وصحتك كل يوم، و اللي بيشتمك بألفاظ وحشة، ويخونك في سمعتك، ويقولك إنتي قليلة الأدب وما تربيتيش، ده شخص مش بيحبك، ده شخص بيكسر فيكي عشان يسيطر عليكي. ولما بقلك ..لو مش عايزة تكملي قوليلي وأنا هجيب العيب من عندي.. دي حقنة تخدير عشان يحسسك بالذنب وتفضلي معاه .واتهامه ليكي إن في حد في حياتك أو إنك بتلفتي نظر الشباب، دي علامه بتقول إن حياتك معاه هتبقى سجن من الشك والظلم. الشخص اللي بيسخن أهلك عليكي (خالتك وعمك) وبيروح ينقل كلام ويشوه صورتك قدامهم، ده مش سند ده شخص بيقطع شجرتك عشان تقعي وتلجأيلي هو بس. نصيحتي ليكي الاستخاره نتيجتها في الضيقة والخنقة اللي إنتي حاسة بيها دلوقتي.. ربنا بيبعتلك رسايل إن الطريق ده آخره وجع قلب.الزواج مش ستر مع شخص بيقلل منك الوجع اللي إنتي فيه وإنتي مخطوبة هيكون أضعاف وإنتي متجوزة ومعاكي أطفال.كرامتك اغلى من كلام العيله العيلة مش هي اللي هتعيش النكد والشتيمة بدالك. اللي يفرط في كرامتك قبل الجواز، هيدوس عليكي بالجززمة بعده. الشخص اللي بيهدد بالرجوع للشرب أو بيلومك على ظروفه المادية ده شخص غير مسؤول، وبيرمي فشله عليكي. لو كلامك صادق في كل الالي كتبتيه خدي قرارك بفسخ الخطوبة دي . عيطي يومين، اتوجعي شهر، بس ما تضيعيش عمرك كله مع شخص بيخليكي تتمني الموت. إنتي تستاهلي حد يشيلك فوق رأسه، مش حد يدفنك وإنتي صاحية.بعتذر على الإطالة 😊 وجد ربنا يحفظك ويسعدك
تم النشر الاثنين، ٢ مارس ٢٠٢٦
السلام عليكم ورحمة الله وبركاته - اولا حكايته الانتحار دي يا ريت تشيليها من دماغك لانها اولا والاهم حرام وكفر ثانية انتي لو موتي نفسك مفيش حد هيقول اصلا تعبانة او عندها مشاكل لاء للاسف هيقولوا انك غلطتي علشان كدا موتي نفسك - انتي ليه عاملة في نفسك كدا ليه مستحملة الكائن دا مع العلم انك مش مرتاحة معاه وحتي بعد ما صليتي الاستخارة وبردو مش مرتاحة ابعدي افسخي الخطوبة دي لانك فعلا تستاهلي حد احسن منه واحد محترم لا يشتمك ولا يهينك محتاجة حد يكون حنين يعوضك وراجل يحميكي ويحافظ عليكي لكن لما انتي بتعاني منه من دلوقتي يبقي هتعملي ايه لو اتجوزتيه هيبقي وضعك من سئ لكارثي -انا عارفة انك حاسة انك حمل علي عمك علشان كدا مستحملة لكن لاء انتي لو مش حابة كدا انزلي اشتغلي واصرفي علي نفسك علشان الاحساس دا يروح حتي لو بتدرسي ادرسي واشتغلي واقفي علي رجلك لغاية ما يجيلك راجل محترم ومتدين وحنين يحميكي ويعوضك - ربنا يصلح حالك يا رب ويقويكي
تم النشر الأحد، ١ مارس ٢٠٢٦
السلام عليگم، أولا، ربنا يعينك ويفرج همك ومشكلتك. ابعدي خالص عن فكرة الانتحار... مفيش حاجة تستاهل أبدا تخسري دنياك وآخرتك عشانها. حل مشكلتك سهل وفي يدك بس خليك قوية وحاسمة في قرارك. إيه يخليك متمسكة بشخص زي ده؟ من كل اللي حكيتيه واضح إنه غير سوي ومتلاعب وهيتعبك نفسيا ونتيجة الزواج مش هتكون في صالحك أبدا. كفاية قوي موضوع الإهانات والشرب. ده سبب واحد كفيل يخليك تهربي من الزواج ده وتعرفي إنه شخص لا يصلح يكون زوج ولا أب صالح لأولادك في المستقبل إن شاء الله. خليك عارفة، اللي بتشوفيه دلوقتي من معاملته لك وتصرفاته أقل من ١٠٪ من اللي هتشوفيه بعد الزواج... دي مجرد عينة ومقدمة لحياتك معه بعد كده لو فضلت مكملة. اهربي بجلدكقبل ما تخسري نفسك ومستقبلك... اعتقد إنك تستحقي شخص أفضل من كده بكتير. فقدري نفسك واوعي تاخدي قرار مصيري زي ده تحت تأثير عائلتك أو خوفك منهم أو إحساسك بالذنب. اقعدي مع نفسك كده ورتبي أفكارك واكتبي كل السلبيات والعيوب ولو فيه أي ميزة تخليك تفكري تتغاضي عن كل العيوب اللي ذكرتيها فاكتبيها على جنب وقارني. واعتقد لما تلاقي الوضع بالتفصيل قدامك والصورة واضحة أكتر لك هتقدري تحسمي قرارك باللي فيه الخير لك. ادعي ربنا كتير في رمضان يفرج همك ويختار لك الخير والأصلح. بالتوفيق.
تم النشر الأحد، ١ مارس ٢٠٢٦
وعليكم السلام ورحمة الله وبركاته يا حبيبتي، أول حاجة، أشكرك إنك شاركتيني اللي جواكِ، وأنا هنا عشان أسمعك وأساعدك بكل صدق وتعاطف. أنتِ مش لوحدك في الحيرة دي، ومش غلطانة إنك حاسة كده. خليني أقولك رأيي بوضوح: لا، ده مش طبيعي خالص، وأنتِ مش مكبرة الموضوع . السلوكيات اللي بيتصرف بيها خطيبك (التهديد بالانفصال كل خناقة، الإهانات، الشكوى للعائلة، التلميح للرجوع للشرب، والغيرة المفرطة) دي علامات علاقة سامة ، مش حب صحي. ده بيخلق توتر دائم ويضعف ثقتك بنفسك، وده مش اللي المفروض يكون في خطوبة قبل الزواج. أنتِ مش السبب، ومش ظالمة نفسك: العائلة بتدعم الزواج عشان "من العيلة"، بس ده مش كفاية لو مفيش راحة نفسية أو استقرار (زي الشغل اللي مش لاقيه لحد دلوقتي، وده حقكِ تشعري بقلق منه). كلامه عن "حمل على عمك" أو "مش عارف الحب" ده عذر، مش تفسير. واللي بيعمل مشكلة كل شوية ويروح يشكي لخالتك، ده بيحاول يسيطر على الموقف ويخليكِ تشكي في نفسك. مقارنتك بأمك أو لومك على الطلاق ده ظلم كبير، ومش حقكِ تحمليه. أنتِ مش زي حد، أنتِ إنسانة تستاهلي احترام ورعاية. إيه اللي تعمليه دلوقتي، خطوة بخطوة: خدي وقت لوحدك وصلي الاستخارة تاني : قلتِ إنك صليتيها، بس جربي ترجعي لربنا بقلب هادئ أكتر، وادعي "اللهم إن كان خيرًا لي في ديني ودنياي فاقدره لي". لو الضيقه مستمرة، ده إشارة قوية إن ربنا مش راضي. اتكلمي معاه صراحة مرة واحدة هادئة : قوليله "أنا عايزة علاقة فيها احترام وثبات، مش تهديدات وإهانات. لو مش قادر، خلينا نفكر جديًا في الفسخ قبل ما نكمل". لو رد بتهديد أو شكوى للعيلة، ده تأكيد إن المشكلة فيه مش فيكِ. حددي حدودك مع العيلة : قولي لعمك وخالتك "أنا بحترم رأيكم، بس قراري لازم يكون براحتي النفسية. مش هقبل إهانات أو توتر دائم". هما مش ضدكِ، بس العادات العائلية دي بتزود الضغط. ركزي على نفسك : ابدئي روتين يومي يقويكِ (قراءة قرآن، رياضة خفيفة، هواية تحبيها). أنتِ قوية، وده اختبار من ربنا عشان يختارلك الأفضل. تذكري قوله تعالى: "وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ" (البقرة:216). لو حسيتِ إنك مش قادرة تتعاملي لوحدك، روحي للخبراء في فدني : https://www.fedni.net/experts – فيه دكاترة نفسية ومستشارين زواج متخصصين هيقدروا يساعدوكِ بشكل شخصي وسري. كمان، ابحثي في فدني عن أسئلة مشابهة زي "مشاكل خطوبة سامة" هتلاقي إجابات كتيرة تساعدكِ. أنتِ تستاهلي راجل يكون سندكِ وضهركِ، مش مصدر توتر. متفكريش في الموت أبدًا، ربنا قال "لَا تَقْتُلُوا أَنفُسَكُمْ" ، وراح يفرج همكِ إن شاء الله. أنا معاكِ قلبًا وقالبًا، ردي عليّ لو عايزة تتكلمي أكتر. 💕
تم النشر الأحد، ١ مارس ٢٠٢٦
سيبيه لإنه من تصرفاته دي مش متزن ومتفدريش تفهميه
تم النشر الثلاثاء، ٣ مارس ٢٠٢٦
الموضوع فعلا صعب وحيره ومش مجرد كلام حقيقي بجد
تم النشر الاثنين، ٢ مارس ٢٠٢٦
قربي لربنا واسجدي واحكيلو واشكيلو هترتاحي صدقيني عن تجربة
تم النشر الاثنين، ٢ مارس ٢٠٢٦
@Ahmed Rehan طيب المفروض اعمل اى انا صليت استخاره كذا مره و حسيت بضيقه بس ف نفس الوقت قابلت ايه عسى أن تكرهوا شيئا و هو خير لكم بس برضه مضايقه و مش عارفه اتعامل معه زى الاول
تم النشر الثلاثاء، ٣ مارس ٢٠٢٦
بحاول استغل رمضان و حاله القرب من ربنا و بحكيلو و اشكيلو والله @وليد الترامسي
تم النشر الثلاثاء، ٣ مارس ٢٠٢٦
و لما جيت واجهته بالكلام أن فعلا عمى اتكلم معه قالى انا كان قصدى أنه هوا عارف ظروفى و غير كلامه كله
تم النشر الأحد، ١ مارس ٢٠٢٦
لعرض السؤال في فدني اضغط هنا