إزيك يارب تكوني بخير عرفت إنك قلتي إن والدك هو اللي اختارلك المسار وإن أهلك مش موافقين على الهندسة ومش مقتنعين بفكرة الشغل أونلاين وكده فحبيت أحكيلك تجربتي يمكن كلامي يكون اتأخر شوية بس يمكن يخليكي ترضي بالموضوع أو على الأقل تبصي له من زاوية تانية أنا تقريبًا شبه الموضوع ده حصل معايا بالظبط بس مش تهديد يعني أهلي مكانوش راضيين يغصبوني بس في الأول كانوا بيقولوا لا هندسة ملهاش لازمة للبنات ووالدتي كانت بتقول إنها عارفة ناس شخصيًا وأنا شفتهم أصلًا وكانوا بنات حلمهم هندسة واتخرجوا واشتغلوا مدرسات رياضيات في الآخر طبعًا عارفة إن دي مجرد نبذة ومينفعش نعمم من كام تجربة بس عمومًا أنا في الآخر اقتنعت إني أمشي في الطريق اللي أهلي شايفينه مناسب ليا وصدقيني لحد دلوقتي الحمدلله مش ندمانة وبحس إن كلامهم كان صح من ناحية الأمان الوظيفي وكده ومن الحاجات اللي ساعدتني أتقبل الموضوع إني أصلًا متعددة الهوايات وبحب حاجات كتير جدًا فعلًا بس طبعًا مش بنفس الدرجة فمكنش عندي مشكلة إني أختار حاجة وأسيب حاجات تانية لأن أصلًا عندي أكتر من حاجة ممكن أتعلمها وأجربها وأطور نفسي فيها بعدين وده مش معناه إن الطب لازم يكون حلمك أو إنك تحبيه بالعافية زيي لكن حتى لو مش حابة الطب فأنتِ إن شاء الله هتلاقي كلية أحلى في نفس المسار تليق بيكي ومسار الطب وعلوم الحياة أصلًا من أكتر المسارات اللي فيها كليات وتخصصات وعارفة يمكن يكون واخدك الحماس للحاجات اللي بيشجعوا عليها دلوقتي زي الشغل أونلاين والـAI والبرمجة ووو لكن صدقيني مش كله بينجح في ده والمجالات دي فيها منافسة قوية جدًا ومنافسين أقوياء فمش الموضوع سهل لمجرد إننا بنسمع عنه كتير طيب أنتِ لسه برضو حابة الكلام ده يبقى لي متضربيش عصفورين بحجر يعني تختاري مسار الطب وتجتهدي فيه وتجيبي آخرك وتدخلي كلية حلوة وفي نفس الوقت تتعلمي بعد كده البرمجة مثلًا أو أي حاجة من أدوات الـAI وساعتها تكوني جمعتي بين حاجتين بحيث لو أي حاجة اتغيرت في واحدة منهم يبقى معاكي التانية وأنا شايفة إن من أحسن الحاجات اللي ممكن تكون عندك أصلًا هي القدرة على التكيف إنك تعرفي تكملي وتنجحي حتى لو الطريق اتغير عن اللي كنتِ مخططاله وخلي هدفك دايمًا السعي والاجتهاد وتحقيق النجاح أيا كان المكان اللي هتكوني فيه ومش معنى إن الطريق اللي كنتِ عايزاه الأول اتغير إن حلمك انتهى أو إنك مش هتقدري توصلي لحاجات بتحبيها ممكن الطريق بس هو اللي يتغير وأنا مش بقولك تعملي زيي أو تتنازلي عن حلمك أنا بس بحكيلك تجربتي يمكن تخليكي تبصي للموضوع من زاوية تانية وهحطلك كمان رابط سؤال شبه حالتك أتمنى تشوفيه يمكن يفيدك https://www.fedni.net/q/60318714 بالتوفيق 🤍
للامانه اكتر حاجه محيّراني لحد دلوقتي بس فيزيا و ممكن اغيّر بس معتقدش 😅
تم النشر الأحد، ٢٣ أغسطس ٢٠٢٦
اخترتي فيزيا ولا ماث
تم النشر الأحد، ٢٣ أغسطس ٢٠٢٦
ايواا 🙂
تم النشر الأحد، ٢٣ أغسطس ٢٠٢٦
اي دا انتي قدي
تم النشر الأحد، ٢٣ أغسطس ٢٠٢٦
اسماعيلية خدو من عندنا ٢
تم النشر الأحد، ٢٣ أغسطس ٢٠٢٦
انا بس استغربت من حاجه لان عندناف نفس المدرسه واحده جابت ٩٦% ف المستوي التالت و اخدوها ف التصفيات ف مش عارفه ازاي م اخدوكيش أنتِ، محافظة اي
تم النشر الأحد، ٢٣ أغسطس ٢٠٢٦
العفو شكرا علي اي بس،،ربنا يكتبلك الخير ويوفقنا جميعًا يا جميلة.💗
تم النشر الأحد، ٢٣ أغسطس ٢٠٢٦
وكمان بما إن أخوكي مر بنفس الموقف وقدر في الآخر يقنعهم فلو هو متفهم موقفك وموافقك ممكن يساعدك ويتكلم معاهم أو يوضح لهم وجهة نظرك.. هو أكيد حاسس بيكي أكتر من أي حد لأنه مر بنفس التجربة. فحاولي لآخر نفس وإن شاء الله ربنا يوفقك وتقدري توصلي معاهم لحل يرضيكي ويرضيهم. ولو لا قدر الله في النهاية الموضوع ما مشيش زي ما نفسك فبرضه متعتبريش إن كل حاجة انتهت أو إنك ضيعتي فرصتك. ممكن الطريق يتغير لكن ده مش معناه إن الحاجات اللي بتحبيها لازم تختفي من حياتك، ولا إنك مش هتقدري تتعلمي البرمجة وتكملي فيها بعدين.
تم النشر الأحد، ٢٣ أغسطس ٢٠٢٦
وممكن فعلا كون والدك ووالدتك مهندسين من ضمن أسباب تمسكهم برأيهم يمكن بحكم إنهم في المجال شايفين حاجات أنتِ مش شايفاها أو عندهم تصور معين عن مستقبلك. فلو ده جزء من الموضوع يمكن لو عرفتي هما خايفين من إيه بالظبط وتناقشتي معاهم فيه، يبقى أسهل في إقناعهم.
تم النشر الأحد، ٢٣ أغسطس ٢٠٢٦
أنا بس شخصيًا شايفة إن البرمجة والحاجات اللي شبهها مش لازم بالضرورة تكون هي المسار الدراسي نفسه عشان الواحد يكمل فيها. ممكن تتعلميها من بره بالكورسات والممارسة والمشاريع وتفضلي تطوري نفسك فيها جنب دراستك. أكيد ده مش هيبقى نفس دراسة المجال بشكل أكاديمي ومتخصص لكن ممكن جدًا الواحد يوصل فيها لمستوى كويس. وبالنسبة للقرارات الجديدة دي للاسف آه القرار ده طلع ولسه شكلها هتطلع قرارات تانية كمان، صدمة ورا صدمة. وأنا كمان مش بحب الطب خالص وللأمانة مش شايفة نفسي دكتورة أبدًا لكن أنا ارتحت للمسار ده واقتنعت بيه فلو كملت فيه هحاول أتأقلم معاه وأشوف الخير اللي ممكن يكون فيه. إنما كلية الطب نفسها مش حاسة إنها مناسبة ليا.
تم النشر الأحد، ٢٣ أغسطس ٢٠٢٦
يبنتي أنا فاهمة قصدك أكتر دلوقتي، خصوصًا إنك فعلًا جربتي البرمجة بنفسك وعملتي مشاريع ووصلتي لمرحلة كبيرة، فطبيعي جدًا تزعلي لما كل ده يتشاف كأنه مجرد حماس أو إن حد لعب في دماغك..ومعلش إني دخلتك في تجربتي أنا بس أنا كمان كنت بحب البرمجة جدًا لما جربتها وكانت فعلًا من الحاجات اللي بستمتع بيها والحمد لله جبت 100% في المستوى الأول والثاني ولسه لحد دلوقتي حاباها ومهتمة بيها.
تم النشر الأحد، ٢٣ أغسطس ٢٠٢٦
الحمد الله ع كل حال لسا الاختيار الرسمي مش فتح ان شاء الله هحاول لأحد اخر نفس معاهم والحمد لله علي كل حال شكرا انك اهتميتي وقراتي كلامي دلوقتي مش في أيدي غير دعاء والحمد لله
تم النشر الأحد، ٢٣ أغسطس ٢٠٢٦
واه حاجة كمان انا بابا وماما مهندسين 🙃🙃 ف دا يمكن من ضمن أسباب رفضهم وكمان انا عندي أخ اكبر مني وحصل نفس السيناريو بكل حاجة بس هوا وقف قصادهم ودخل علمي رياضة بس هندسة وقفت معاه ع نص ف مية وطبعا عشان مش يزعلوه دخل خاص ودا سبب آخر ان هما مش هيدفعو فلوس ف حاجة مش مضمونة
تم النشر الأحد، ٢٣ أغسطس ٢٠٢٦
اه و حاجة كمان حتة اني اخد المجالين مع بعض صعب صعب جدا بذات مع كلية طبية عايزة اصلا مذاكرة وهيا تعب لوحدها وغير كدا البرمجة صعب تتاخد كهواية هيا اصلا لوحدها بحر كبير ممكن لو سبت مجال طب بس انا بفكر لي مدخلش الحاجة اللي بحبها من اول لي افضل الف وبعدين يا مش بكلية كلية بتيدني اسم واساسيات فقط يعني ابقي software engineer وبعدين بقا بقيت المهارات وكل كورسات وافتكرت من نفسي كل دا ع شخص نفسه عشان كدا في كتير خريجين من كليات دي ومش لاقيني شغل عشان هوا ببساطة دخل ع كلام ناس هوا نفسه مش عايز هوا شم عرف يتطور من نفسه او هوا عايز شغل دقليدي في مكتب مش أونلاين ودا طبعا صعب وكمان حتة منافسة عالية ف مجال دا اكيد عالية ف كل حتة واي مجال طالما شخص مش ف دماغه خلاص بقا عادي مش مهم تدخل التخصص اللي بيجيب فلوس اهم حاجة تدخل انت حاجة بتحبها وتتميز فيها وتكون الأفضل طب ما في مدرس كبر وبقا عنده سناتر ومدرس تاني لسا قاعد في مدرسة ع قد مرتب المدرسة ولا راح ولا جيه
تم النشر الأحد، ٢٣ أغسطس ٢٠٢٦
اه وبالمناسبة دلوقتي الوزير عامل ان مسار طب اللي هوا علمي علوم يعني معدش فيه كلية حاسبات او كلية ذكاء اصطناعي بقيت من مسار هندسة فقط اللي هوا علمي رياضة اللي هوا اهلي مش عايزين ادخله عشان فيه مجال اللي بحبه
تم النشر الأحد، ٢٣ أغسطس ٢٠٢٦
وبعدين انا مش بقول عايزة برمجة كدا من مفيش انا فعلا حابها ولقيت نفسي وانا جربت بنفسي وعملت مشاريع وكتبت أكواد حتي كان عندنا مادة ف اولي ثانوي اسمها برمجة كان عليها امتحانات وقالو اللي هيتفوق فيها هياخد وتدريب في شركة وبتاع انا قولت حلو دا هيببقي حافز ودليل قدامهم اني فعلا عايزة مجال دا ومش بقول اي كلمتين سمعتهم قالو هتاخد ٦٠ طالب بس تمام المهم كان في مستوي اول وتاني والحمد جبت ١٠٠% في حين أن كان معايا راحو امتحنو اول مرة وشقطوا وبعدين كان في إعادة وسقوط تاني وحتي فكرة انا من اول مرة بقا وجبت ١٠٠% وكان بعد كدا عشان ادخل التصفيات دي هيا كنت ف اجازة كان شروطها اني اخلص مشاريع كدا ارفعه وامتحن مستوي تالت واجيب فيه ١٠٠% بالمناسبة المشاريع كان ليها وقت محدد وانا الحمد الله حققت كل شروط دي وبعد كان في انترفيو تقريبا اللي دخل انترفيو دا حوالي ١٠٠ طالب فقط من اصل ان الي دخل التصفيات حوالي ١٠٠ ألف طالب تمام المهم بعد الانتريفو دا هياخدو منهم ٦٠ طالب فقط عشان يتدربوا وفي ١٠ منهم يسافروا اليابان المهم النتيجة ظهرت والحمد الله يعني مكنش ليا نصيب ف تدريب وكان في حفلة تكريم بردو بس اسمي منزلش الحمد الله ع كل حال لسا باعتليني ايميل من اسبوع كدا اني متقبلتش بس انا وصلت لحاجة زي كدا بردو دا إنجاز بصراحة انا مش زعلانة انا فخورة بكل اللي عملته اني اجيب درجات دي وكلها واذاكر وانا ف اجازة انا اكيد مبسوطة المهم انا عملت كل دا وقعدت مع اهلي وفرجتهم وريتلهم كل دة مفروض لو أهل تانيين كانو شالو بنتهم شيل المهم بعد كل دا بابا فالي ماشي هتدخلي طب بردو انا حاولت وعملت كل حاجة عشان اثبتلهم المفروض إنجاز زي دا مع شركة يابانية وامتحانات يابانية لو ناس تانية كنت اجد ىد فعل احسن بس الحمد الله ع كل حال
تم النشر الأحد، ٢٣ أغسطس ٢٠٢٦
هوا انا مش حابة الكليات طبية خالص ولا اي حاجة فيها اني اخد مسئولية روح قدامي انا اصلا مش بقدر اشوف حد بياخد قدامي حقنة مش بقدر يعني تعالي اديني انا الحقنة ومشوفش حد قدامي ياخدها مش بقدر معرفش ولما كلمتهم وقولت ليهم كدا قالو لا انتي بتدلعي وهما اصلا بيدخلوا الكلية بيتعودوا وانتي ادخلي تخصص سهل و معرفش اي وكلام دا كله
تم النشر الأحد، ٢٣ أغسطس ٢٠٢٦
تمام انا بخير الحمد لله
تم النشر الأحد، ٢٣ أغسطس ٢٠٢٦
لعرض الإجابة في فدني اضغط هنا