إيمان أيمن

محتاجه تتواصلى مع معالج ضرورى لأن وارد جدا يقلب بوساوس

بتعرض اى مشكله بتواجهك سواء نفسيه اجتماعيه شخصيه ومتخصصين بيردوا عليك

الأحلام اللى بتظهرلنا نتيجه تفكيرنا اللاوعي فعلى حسب أفكارك وانشغالك ومخاوفك بتظهر فى أحلامك فمحتاجه تعملى مراقبه ذاتيه وترصدى الأفكار السلبية ولو معرفتيش تعملى ده الافضل تتواصلى مع معالج نفسى منعا من تفاقم الموضوع لأن على المدى البعيد ده هيأثر على جوده نومك وبالتالى انتاجيتك ف حياتك الشخصية والاجتماعية والمهنية

محتاجه تعملى تشيك اب كامل Vitamin D,Cbc, ونشوف اى ناقص وتعالجيه بالتدريج وكمان خوفك من المستشفى ده اكيد وراه سبب من الطفوله جايز انت مش فكرته حالياً بس محتاجه تعرض تدريجى ونعرف الفكره الرئيسيه اللى هى المسببه للخوف ده ولو الموضع مأثر على حياتك ممكن تتواصلى مع معالج والموضوع ابسط مما تتخيلى

محتاجه تعرفى نفسك أكتر وتزودى ثقتك بنفسك بالإضافة لإنك بالتدريج تتعودى على القراءة وتبنى جسر قوى من الوعى والثقافة وده أكيد هيخليكى تقدرى تتعاملى وتكون موضع اهتمام فى أى جلسه كمان محتاجه تحاوطى نفسك بناس ناجحه تشجعك على ده وتنقى دائرة المعارف والأصدقاء من حولك

جميل جداً بتمنى نقدر ننشر وعى أكبر بأهمية العلاج النفسى خاصةً مع كم الضغوطات النفسية اللى بقت موجوده فى عصرنا الحالى

مقدره جدا شعورك والضغط النفسى والصراع اللى عايش فيه ممكن ده ميكونش وسواس لأن تشخيص الوسواس القهرى ليه أبعاد كتير وأسبابه برضو كتير وهل هو مرض الوسواس ولا اضطراب الشخصيه الوسواسيه هل مأثر على حياتك بشكل كامل ولا ف أجزاء منها ففيه اسئله كتير وتاريخ عائلى بيحدد كل ده والافضل تتواصل مع معالج نفسى لأن من الواضح انك لسه فى الأول خالص علشان الموضوع ميتفاقمش ومتقلقش مش بيستمر معاك للأبد بيتعالح وبترجع كويس من تانى

كل شخص فى الحياه يستاهل فرصه اجهز واتقدملها لأن الإنسان بيندم أنه معملش ،مش أنه عمل والشكل مش مقياس لأنه يخليك تاخد خطوه لورا استعيد ثقتك بنفسك وخد بالاسباب وربنا هيقف جنبك

كويس جدا انك بتحاولى تطبقى حاجه المفروض انها من أساسيات ديننا الإسلامي ولكن محتاجه تتعلمى توكيد الذات وازاى تحطى حدود ومتتجنبيش لأن التجنب عمره ما كان حل ده مجرد هروب مؤقت فالبتدريج اتعلمى المواجهه وخلى عندك حدود واضحه ومبادئ متكسريهاش علشان حد والصح صح مع الكل بلا استثناء

طبيعى جدا تقع لأن ده ادمان سلوكى يعنى عاده خاطئه قابله للتعديل والانتكاسه لابد عنها ولكن محتاج تفهم ان عقلك بيهرب من حاجه هو مش حاببها لحاجه تتعود أنه يحبها فهربت من الضغط ليها فمحتاج تتعلم مهاره اداره الضغوط ولو مقدرتش على ده لوحدك الافضل تتواصل مع معالج نفسى

محتاجه تعرفى انت بتلجأى لده امته لما بتكون زهقانه حاسه بفراغ الدنيا هاديه ومفيش حد معاكى لما هتعرفى التوقيت ده هيفرق جدا معاكى زى مثلا لو فى وقت فراغك يبقى نشغل وقتنا بحاجات مفيده ونتحدى نفسنا لمده 21 يوم ونشوف النتيجه ولووقت ما يكون مفيش حد جنبنا نحاول دائما نتواجد ف مكان فيه ناس مع أن ده مش صح اوى بس حل مؤقت لحد ما نتعلم المراقبه الذاتيه ولكن لو الموضوع تفاقم وخرج عن سيطرتك يبقى المتابعه مع معالج نفسى اكيد أفضل وربنا يعفو عنك يارب

بصى أنا مقدره احساسك وقد اى دى مشكله كبيره بالنسبالك ومعطلاكى عن خطوات كتير ف حياتك بس الموضوع هيفضل كبير طول ما انت مش بتاخدى خطوه علشان يتحل احنا كمعالجيين نفسيين ادربنا على ده كتير وفيه تكنيك علاجى فعال جداً فخدى خطوه واطلبى المساعده