محمود عطية

ان شاء الله حاجة زي كدة بتيجي بالمحاولة اكتر من مرة ممكن نوقف في نص الطريق بس بعدها هنصلي تاني و نكمل و نقع و نقوم و هكذا لحد متلاقي نفسك بقيت/ي بتصلي لوحدك في مواعيد الصلاة كمان بس المهم عدم اليأس و الدعاء و كثرته ان ربنا يثبتنا على الصلاة و يهدينا و ان شاء الله الانتظام هيجي ، و كدة كدة مع كثرة المحاولة الصلاة هتبقى جزء من الروتين اليومي اللي بنحزن لما منعملهوش و هنعمله بعد كدة بكل حب و ربنا يثبتك إن شاء الله

وعليكم السلام و رحمة الله كلنا عندنا مشاكل متفاوتة في الصعوبة من الطفولة و للأسف المشاكل مبتخلصش و هتفضل معانا لحد اخر يوم في حياتنا وده عشان احنا في دار اختبار. بلنسبة للأهل فمحدش بيختار اهله احنا بنيجي و بناخد نصيبنا و الخير فيما كتبه الله،اهلك ممكن عيوبهم كتير و مبتخلصش بس اهلك ولازم تستحمليهم و تكوني بارة بيهم،ممكن ابوكي ظروفه وحشة و مش هيقدر يدخلك كلية السن وحتى لو مش ده السبب اديله الف سبب لأنه ابوكي ،انا ابويا مش موجود خالص وعمره مصرف على دراستي او اكلي و الحمد لله على كل حال اما امك الست كتر خيرها ربتك و كبرتك و بلنسبالها انتي لسة طفلة لحد دلوقت حتى لو وصلتي ٥٠ سنة ،لما تعارضك في حاجة قوليلها حاضر و متكلميهاش لو زعقت في مرة متركزيش الكلمة مش هتنقص منك حاجة او هتلزق فيكي و بلنسبة للحب و كلام الشباب فهو حرام مهما كانت صورته ،لازم تتمسكي بعفتك و متكلميش حد و مترخصيش نفسك لأي كلمة حلوة من شاب شكله حلو خليكي غالية محدش يوصللك غير اللي يتقدم و يدخل البيت من بابه مع حد من اهله عشان يبقى الكلام كلام كبار مش لعب عيال و برضك صدقيني مفيش اي حب صادق او حقيقي بعد سنة٦ ابتدائي كلها عبارة عن شهوة و اعجاب و حب يعني مقرف و اخرته دايمآ سيئة و عمر محد للأسف مهيديكي حنان زي ابوكي او امك او يعوضك عنه حتى الفيب الحمد لله سهل انك تبطليه لو كسرتي الفيب و دي خطوة شجاعة و كبيرة تجاه طاعة الله و اللي بيخطو خطوة في سبيل الله بيخطو الله نحوه الف خطوة و ربنا يعينك و يوفقك ان شاء الله

بصي مدام ابوكي عصبي استحمليه و اللي يقوله تجاهليه و متاخديش على خاطرك ،روح ذاكري و ركزي في دراستك و متقعديش قدامه كتير تجنبآ لأي انفعال ولو طلب حاجة اعمليهاله هو مش دايملك فحاولي تاخدي رضاه و مهما قال او عمل هو مازال بيحبك متكرهيهوش لان الاب نعمة غيرك كتير بيتمنوها بحلوها و مُرها السنة دي مهمة لازم تركزي فيها وبلنسبة لطريقة مذاكرة فعالة فمقدرش اساعدك لأني تايه زيك بس بحاول وربنا يعينك ان شاء الله

عندي اخت زيك و تابعت مع دكتور اسمه عبد الله عبد العظيم عند شارع السبق لو تقدري تروحي تكشفي عنده و ان شاء الله تخفي زيها ابوكي ممكن حاسس بالذنب و مش عارف يتعامل معاه و كل مبيشوفك يفتكر اللي حصل، اقعدي معاه و كلميه و صاحبيه و امك الله يشفي عنها مش بتكرهك وحتى هو كمان مش بيكرهك بس مش عارفين يوصلولك شعورهم تجاهك كويس و بلاش تاخدي الامور على اعصابك اتعلمي ازاي تضبطي نفسك عشان كل متزعلي اكتر و تتعصبي هتلاقي نفسك وقعتي تاني فبلاش تعصبي نفسك على اي حاجة ، الدنيا فانية مفيش حاجة فيها مهمة اهم حاجة هي العبادة ،قربي من ربك في الشهر الكريم ده و ادعي اختي حاليآ خفت تمامآ و شايلة البيت كله بعد وفاة امي و بتتضغط احيانآ بس بتسيطر على نفسها كويس بحيث انها متتعبش تاني ربنا يعينك و يوفقك و يشفيكي ان شاء الله و الانتحار ده حل مؤقت آثاره هي الخلود في جهنم ، هل يومين حزن اهلك هيعيشوهم على وفاتك و بعدين ينسوكي اهم؟

ابتدي بحاجة بسيطة زي كتاب فن التعامل مع الناس لديل كارنيجي او كتاب مزرعة الحيوان لجورج اورويل و عندك كتاب اول ٢٠ ساعة و عندك كتب دينية زي فاتتني صلاة و زاد دول كلهم في قمة البساطة و كمان لو لاقيتهم صعبين ممكن تبتدي بكتاب العظماء المائة كله قصص لعظماء مسلمين و لو معرفتش تفهم قصة واحد منهم روح ابحث عنها او روح للعظيم اللي بعده و واحدة واحدة هتفهم كل المصطلحات الصعبة ان شاء الله

انتي لسة صغيرة و في بداية سن المراهقة اللي كله تقلبات هرمونية و مشاعرك هتبقى زي اسهم البورصة شوية فرحانة و شوية متعصبة و شوية زعلانة و عايزة تعيطي طيب نعمل ايه؟ منضيعش الوقت ده في اننا نتكلم مع حد غريب عشان ممكن يستغلونا و منفضفضش لأي حد عشان ممكن مع اقل مشكلة يفضحو اسرارنا و يفضل انك تفضفضي مع امك اذا امكن و ابوكي لازم توريه انتي حنان عشان يوريكي هو بالمقابل حنان خصوصآ ان الراجل شخصيته منطقية يعني مبيتفاهمش بالمشاعر زي البنات فهتلاقي امك حنانها اكبر من ابوكي وعشان كدة لازم تبتدي انتي مع ابوكي و توريه الحنان عشان يردهولك بطريقته هتلاقي اصحاب سوء هيقولولك نكلم ولاد او الولد ده بيبصلك شكله معجب بيكي متسمعيلهمش مفيش اي ولد في السن ده بيحب البنت عشان شخصيتها هي يا إما مشاعر عابرة هتبرد مع الوقت و هتزهقو من بعض او مجرد شهوة و هيكون عايزك تبعتيله صور ليكي ،متأمنيش لأي ولد مهما كان انا ولد و قريب من سنك و عارف الولاد بيعملو ايه في السن ده هتلاقي كل العلاقات سطحية و تافهة جدآ و هترخصي نفسك منغير سبب حافظي على نفسك عشان ابوكي و عشان امك انتي سمعتك من سمعتهم لو قصرو معاكي فيوم سامحيهم عادي متحاوليش تستبدليهم بأي انسان مهما كان وربنا يعينك ان شاء الله

ربنا يكون في عونك اولآ للأسف مبنخترش اهلنا قبل منتولد احنا بنيجي و بنشوف مكتوبلنا ايه ، ويا طلعو كويسين او طلعو غير توقعاتنا ،و دايمآ هيكون الخير فيما كتبه الله لنا ،ابوكي للأسف مهما كان عصبي و مهنا كان وحش في معاملته و صعب هو مازال ابوكي خصوصآ انه في سن ال٧٠ دلوقت وخصوصآ لو انسان مريض و بيحتاج مساعدة هتلاقيه عصبي اكتر عشان بيحس ان اللي حواليه مش طايقينه بلاش تتسرعي و تتجوزي عشان تهربي من ابوكي اختاري شريك حياتك بحرص لانه ممكن يكون زي ابوكي و ممكن يكون احسن من ابوكي على حسب اختيارك ليه فبلاش تتسرعي و تندمي بعدين حضرتك استحملتي ٢٢ سنة استحملي شوية كمان و اختاري بتمهل عارف هيكون طلب صعب بس متزعليهوش ومتاخديش على كلامه سواء زعق او دعا او شتم اسمعي من هنا و طلعي من ودنك التانية متاخديش على كلامه عشان هو مش دايملك

الاكتئاب مرض مش سهل و مش هينفع انك تشخصي نفسك بيه لمجرد انك عملتي استبيان انتي ممكن يكون اللي عندك بس مجرد حالة من الحزن الوحدة مع الوقت بتتحل ان شاء الله و خصوصآ لو روحتي نوادي سواء العاب رياضية او مكتبات او قصور ثقافة و اتعرفتي هناك على حد عشان طبعآ طول مانتي قاعدة في البيت هتحسي بلوحدة الافكار المشوشة حتى انا بعاني منها و بسرح كتير فيومي بس مش مديها اكبر من حجمها مع الوقت ان شاء الله هتروح لأني عارف سببها حاولي انتي تعرفي ليه افكارك بتتشوش و عالجي المشكلة ،طبعآ في عوامل بتزيد شعور الوحدة و بتشوش الافكار زي التيك توك و الريلز و المقاطع القصيرة بأنواعها ،حاولي تبعدي عن التليفون و تشغلي وقتك اكتر سواء بوظيفة او بكتاب او بأنك تنزلي تجيبي طلبات البيت و دي ابسط حاجة تشغلي نفسك بيها لان وقت الفراغ لو مستغليتيهوش بيستغلك و ربنا يعينك ان شاء الله

عشان كدة ربك امرنا بغض البصر عشان منتعلقش بالطريقة الصعبة دي ،غض بصرك عنها و اشغل نفسك بشغلك و ركز في دنيتك اما لو قعدت فاضي طبيعي تيجي في بالك ولو بصيت عليها كتير طبيعي هتحبها اكتر عشان انت انسان و الانسان أجوف و ناقص ميقدرش يتحكم بشهواته ،قرب من ربنا كدة و ان شاء الله يرزقك بالأحسن منها بس لازم تغض بصرك عنها و عن كل الاجنبيات سواء قرايبك او مش قرايبك و تعلقك بيها ده وحش و بقى بالطريقة دي مضر ليها وليك احسن حاجة تعملها دلوقت انك تبعد و تشغل نفسك بحاجة مفيدة بعيدآ عن قصص الحب و الكلام ده و ركز في شغلك و حياتك و ربك هيرزقك بنصيبك ان شاء الله

مهما اختلفتو اوعي تبعدي عنها الاختلاف لا يفسد للود قضية مش فاكر القصة تمامآ بس شيخ تجادل مع تلميذه بخصوص فتوى راح التلميذ زعل و مشي ، بعدها الشيخ خبط على باب تلميذه و قاله الا يصح ان نختلف ونظل اخوة؟ و برضك امك مش هتدوم فلازم حتى لو مش حابة تجبري نفسك تقعدي معاها و تنولي رضاها و طبعآ لازم تقربي من ربنا عشان يوفقك لباقي حياتك الحياة زي المبنى و اساس المبنى ده الدين لو الدين و الايمان اقوية المبنى هيكون قوي و رمضان داخل و اهي فرصة تقربي من امك و ربك في نفس الوقت و ربنا يخليهالك ان شاء الله

حضرتك المجال ده منافسته عالية اوي اوي و هتشتغل ضد دكاترة كليات و ناس عندها ٤ و٥ لغات ده لمجرد انك تنافس لازم يكون عندك سمعة في المجال سابقة ده غير انك لازم تعمل اول كام خدمة ببلاش او بسعر برخص التراب عشان تشد الناس و تجيلك ده غير ان طلبك مش موجود مفيش شغل سهل و اجره عالي خصوصآ الكتابة عشان الروبوتات احتلت المجال ده كله بس ممكن لو عايز تعمل صفحة فيس بوك او تشتري واحدة جاهزة و تبتدي كتابة عليها لو غرضك الادب و الروايات او القصائد بس غير كدة صعب تلاقي

حرام طبعآ واعرفي مدام انك مخبية الموضوع يبقى اكيد غلط عشان لو عادي مش هتخافي وتخبيه الراجل لو محترم هيدخل البيت من بابه و يتقدم مش هيقولك ابويا حالف عليا اضعف الايمان انه يجي مع ابوه خطوبة حتى مش قراية فاتحة بس مينفعش يجي لوحده من ورا ابوه كمان عشان لو ابوه عرف بعدين مش بعيد يحلف عليه ميتجوزكيش بما انه راجل بيحلف بلشكل ده قوليله جيت كان بها مجتش و جالي احسن منك هاخده و هيكون ده نصيبك ولو مجاش لاقدر الله حد وهو جيه يبقى خير و بركة بس تتكلمو من ورا ابوكي و تستنيه يخلص جيش و ممكن يزهق منك او مشاعره تبرد مع الوقت اصلا و يمل منك و يسيبك و ميردش عليكي و يكون ضيع وقتك ده كله في انتظاره ربنا يعينك و يرزقك بابن الحلال ان شاء الله

فكرت انك تشتغل في سنتر؟ بس لو عايز ربح هتحتاج تدرس للمرحلة الثانوية و ممكن برضك لو معاك ميزانية تجيب عربية معاقين و تشتغل اوبر و الشغلانة هتكمل معاك ملهاش علاقة بالسن و ممكن تجيبلك عربية نص نقل مشاويرها حلوة و فلوسها مش وحشة او ممكن تجيب بما ان الاعاقة مش مؤثرة اوي لو تقدر موتسيكل و تروح بيه الدروس او تشتغل اندرايف و ديدي وربنا يفتحها عليك و يرزقك ان شاء الله

بصي هي الاجازة اسبوعين وصغيرة لوحدها بما انها برأيك ضاعت قولي الحمد لله ولن يصيبنا إلا ما كتب الله لنا تخيلي انك لو خرجتي كان ممكن لاقدر الله تصيبك حاجة وحشة و ربنا منعها عنك و فداكي بلأجازة هل هتقولي لا وعاوزة اتصاب بس اخد الاجازة واخرج؟ بصي قولي الحمد لله دائمآ و ابدآ فيه ناس الاجازة دي حصللهم حاجات وحشة فيها للأسف كتير و ضاعت منهم زيك ان شاء الله تتعوض و ممكن ايام الجامعة تكون اجمل كمان متعرفيش ربنا مخبيلك ايه وربنا يوفقك في جامعتك ان شاء الله و يهديكي

غلط يا استاذة غلط تثقي فيه ده غريب ده غير انه ممكن يقول لاخوكي و الصعيد بيتعاملو مع الامور دي بشدة جدآ يعني اقل حاجة هيقولك عرفتيه منين او هيسأله عرفك منين و لو هو مش صعيدي مش هتعرفي تتجوزيه عشان الصعايدة مش بيدو برا اولا كدة و بسم الله العلاقة دي حرام وغلط،مهما وثقتي فيه او موثقتيش ،مفيش واد محترم هيدخل موقع زي ده و زي معرفك و زهق منك هيعرف غيرك عادي،مترخصيش نفسك لكلاب الشارع انتي لسة صغيرة ما شاء الله و نصيبك مش هيروح لحد والله انتي غالية مينفعش تكوني موجودة على موقع و واحد يختارك بناءآ على صورة صفحتك لو عجبتيه او لا و مدام طلب صورتك يبقى عايزك عشان عجبه شكلك تعديل: و ممكن يقول لاخوكي كل حاجة برضك فخلي بالك

بص انا من سنك و من طولك وعارف ان ماشاء الله اغلبية اللي معانا زرافات و طوال اوي بس هقولك حاجة هي عمرها ما كانت بالطول ممكن طويل بس غبي طويل بس ضعيف و رفيع طويل بس تافه و ملهوش لازمة انا طولي ١٦٩ و وزني ٦١ يعني على الحسبة دي انا قصير و رفيع كمان بس بتمرن و جسمي حلو و بقرأ كتب و بكسب علم و معرفة و عندي لغة و لو حد من اصحابي احتاجني مش بقصر معاه في حاجة انا عايزك تشوف ان هي مش بالطول ابدآ و لعلمك الطوال عضلاتهم بتتبني ابطأ مني و منك يعني انت تقدر تبني جسم رهيب جدآ في طولك ده ده كله بعيدآ عن ان نموك بيقف عند سن ال٢١ و بتختلف طبعآ من شخص لشخص، بس انت عندك فرصة تطول و لو مش بتتمرن و ابتديت تتمرن هتطول و كتافك هتبقى اعرض بس هتحتاج ترفع وزنك شوية لو رفيع زيي وهما الولاد كدة عمومآ بنجرح فبعض و بنتتريق على بعض عادي و مع الوقت هتكتسب مناعة للكلام الفاضي ده ولعلمك انت مش قصير اساسآ وربنا يعينك ان شاء الله و يوفقك

بصي متعامليش حد زي مبيعاملك عشان لو عاملتي الخبيث بخبث و الحقود بحقد و الظالم بظلم انتي بقيتي خبيثة و حقودة و ظالمة و الصفات كلها اجتمعت فيكي و طغت على شخصيتك الطيبة عاملي الناس بنية صافية مهما كان مسعاهم ولو سمعتي حد فوق جبل بيقول انا ربكم الاعلى افترضي انه بيقرأ قرآن متفترضيش انه كافر على طول النوايا بتاعت ربنا و ربنا هيحاسب كل شخص على نيته انتي اعملي اللي عليكي و سيبي الباقي على ربنا ولن يصيبنا إلا ما كتب الله لنا بإذن الله حتى لو اجتمع علينا كل الخبثاء في الدنيا ربنا يعينك ان شاء الله ويوفقك

ابتدي القراءة في البداية عشان المهارة دي لازمها انك تسمعي اكتر من انك تتكلمي على عكس فهم البعض ليها، اقرأي كتاب فن التعامل مع الناس لديل كارنيجي هيعجبك كتاب خفيف و مش طويل ،ولو مش بتحبي القراءة مع انها مهارة مفيدة جدآ عقليآ تقدري تشوفي ملخص الكتاب على طول بس هتحرمي نفسك من تجارب الكاتب و خبراته بالنسبة للمشاكل انا مقدرش افيدك فيها اوي لأني زيك صعب اني اثق في حد و احكيله اللي فقلبي كله ،بس بتعامل مع المشكلة دي بطرق تانية سواء من التمرين او الكتابة ، افتحي نوتة على تليفونك واكتبي كل اللي في بالك فيها و هتحسي انك فضفضتي بكل اللي في بالك لو ملقيتيش حل لمشكلتك بتفسك جربي تصيغي المشكلة على انها لصديقتك مش ليكي و انتي بتسأليلها مش اكتر و محدش هيحس

انتي مش محتاجة اخصائي الاخصائي ده اخر حل و حل انا ارفضه من اساسه لان اضراره اكتر من منافعه ممكن تكوني خجولة بس مش اكتر و دي مش حاجة وحشة في البنت ،انتي بتتكلمي مع الناس اللي واخدة عليهم بس بتتكسفي قدام الباقي عشان مش واخدة عليهم و الحل بسيط مع اني مش شايف انها مشكلة كبيرة وهم اكيد شايفينها زيي اقعدي معاهم كتير حتى لو مش هتتكلمي اقعدي و بس و اخرجي معاهم و مرة على مرة هتقولي كلمة ولا كلمتين تلقائي وان شاء الله ربنا يعينك

بص انت دلوقت شخص بيغرق تمام؟ اللي بيغرق لازم حد يجي ينقذه ،فعشان كدة هطلب منك الحاجة اللي ممكن تكون بتتجنبها،روح لحد ثقة من العيلة و احكيله و قوله يساعدك و صدقني هي دي مخرجك الوحيد ،قوله كل حاجة قوله بتجيب منين الترامادول و بتشوف الافلام الاباحية امتى و ازاي و فين برضك و قوله انت بتجيب فلوس ازاي عشان الترامادول و بص عاوزك تقوله كل التفاصيل عشان لما تيجي بعد كدة ترجع متقدرش تتحايل عليه و حتى لو جربت ترجع قوله انت بتبقى عامل ازاي وانت لسة واخد الترامادول و شكلك ازاي و تصرفاتك وقوله لما تكون مش واخده من فترة بتبقى عامل ازاي وبص اهم شئ عشان تنجح :اختار الشخص ده بعناااااية و يكون شخص يتمنالك الخير بدون مقابل و اللي في رأيي هو شخص من التلاتة (اختك-ابوك-امك) ممكن ابوك وامك لو ميعرفوش هيكون رد فعلهم جامد بس صدقني ده اخف بكتيييير من اللي هتدخل فيه قدام بسبب السكة دي وربنا يعلم اني قلتلك خطة انت لو اتبعتها مش هترجع تاني ابدآ ان شاء الله بس ابتدي على طول دلوقت بعد متقرا الجواب ده وربنا يشفيك ان شاء الله و يعافيك و يردك احسن من الاول

متسمعيش اغاني حزينة قربي من ربك ابعدي عن الفيديوهات المؤثرة و الكلام العبيط ده اللي بيحاول يخليكي تتأثري بلعافية الاكتئاب صعب صعب صعب و مش أي حزن بيتقال عليه اكتئاب ممكن تكوني حزينة شوية مش لازم تكوني مكتئبة و كلنا عندنا مشاكل و كلنا بنزعل بس عادي مكملين ،مش هنقف عند كل حاجة تزعلنا و نعيط وبرضك مهما كان السبب اللي زعل اللي قدامك متستهزئيش بيه كل شخص عنده درجة تحمل و كل شخص متربي بطريقة مختلفة و كل شخص عنده مشاكله

انتي متعرفيش المبلغ كام و برأيي لو كبير راعي ظروفهم واصبري شوية لحد متتحل لو مش مستعجلة و بلمرة عشان ميشكوش فيكي مع انهم لو شكو فيكي هيكون مش من حقهم لان لو بقالك فترة كبيرة كنتي هتقدري تعمليها من زمان بس معملتيهاش بس لو مبقالكيش كتير اصبري شوية قدام مراعاة لظروفهم و بلمرة عشان ميتكلموش عليكي

بصي انا كدة كدة هقولك لازم تصلي وده امر مفروغ منه بس ابتدي واحدة واحدة مش لازم تدخلي تختمي القرأن ٤ مرات ولا حاجة لا ابتدي بالصلاة على الاقل و تصدقي عشان لو اللي عندك مرض تشفيه(مش مرض مادي ممكن قلبك اصابه مرض او ممكن ابتلاء من ربنا في اقرب شئ الى قلبك) ولو معندكيش وقت للقرأن تقدري تعطري لسانك بذكر الله على الاقل وربنا يعينك ان شاء الله

بصي انتي اكيد سمعتي عن حلول زي التمرين و قراية الكتب و سماع البودكاستات و كل الكلام ده و ممكن تكوني جربتيه و معملش نتيجةبلفعل بس انا هقولك ان على الاقل انك تحطي العادات دي في حياتك احسن من انك تحشيها بالعادة السرية بس وازني بين العادات السيئة و العادات الحسنة قربي من ربك و ادعي كل يوم انه يشفيكي لان ده مرض و مبيخفش غير بمشيئة ربك لا بمشيئة اخصائي نفسي او بمشيئتك و دي شوية نصايح ممكن تفيدك. ١-متعديش: متعديش انتي مبطلة بقالك قد ايه انسيها خالص و ابعدي تفكيرك عنهاعشان متستنيش دايمآ لحظة سقوطك و عودتك ليها ٢-اوعي تقعدي لوحدك: لو قعدتي وحدك الشيطان بيستلمك و بيقعد يوسوس في ودنك و يقولك تعمليها و يقنعك انك خلاص قعدتي فترة كويسة و خلاص مش هتضرك مرة واحدة ٣-اوعي تبطليها واحدة واحدة: استراتيجية زي دي لازم حد يتابع معاكي فيها غير كدة هتبوظ منك ،لازم توقفيها و تقطعي العادة من جذورها و تقفلي الباب ده نهائيآ وربنا يعينك و يخفف عنك ان شاء الله

ابتدي كتابة مذكرات في نوتة التليفون انا زيك و مبثقش في اي حد او احكيله عن مشاكلي حتى عيلتي و ابتديت اكتب كل اللي بيضايقني و يفرحني في نفس الوقت في النوتة على برنامج مايكروسوفت نوتس عشان سهل و مبيعلقش و الحمد لله مش بحس بنفس الرغبة في اني افضفض لحد عن مشاكلي و ربنا يعينك ان شاء الله

للأسف احنا مبنخترش اهلنا و لازم نتحملهم بحلوهم و مُرهم و ممكن تكون فترة خطوبة عادي لحد متتخرجي وتكوني عرفتيه اكتر و عرفتي شخصيته ولو خايفة من الزواج عمومآ انا بواجه مشكلة قريبة من مشكلتك حاليآ بسبب علاقة ابي وامي رحمها الله السيئة جدآ اخواتي البنات خافو من الجواز و بقو رافضينه و حاليآ بحاول اغير نظرتهم للموضوع عشان يتقبلوه وان مش كل الجوازات زي بعض وربنا يوفقك ان شاء الله و يرزقك بالزوج الصالح

نزلي بس اكتبي اسماء مختلفة ولو هما قرَّاء اكتبي ان القصة خيالية عشان تكوني شيلتي كل الشكوك من عليكي و لو تقدري يكون اسم الكاتبة مستعار هيكون حلو اوي بس برضك فيه كلام بيتنشر وكلام لا يعني اسرار عائلية هتفضحك و هيعرفو ان انتي الوحيدة اللي تعرفيها و اكيد انتي اللي كتبتيها و برضك تقدري تجسي نبضهم من ناحية الموضوع ده و تسأليهم بس منغير متوضحي وربنا يكتبلك اللي فيه الخير

ده خوف من المجهول مش من الموت بصي يا استاذة حضرتك لازم تقربي من ربنا و تحبيه عشان متخافيش من الموت ،ازاي هتخافي من مقابلة شخص انتي بتحبيه؟ بس عشان ده يتم لازم توريله قد ايه انتي بتحبيه و تصومي و تتصدقي و تصلي و تعملي اللي بوسعك كله عشان متخافيش الموت يعني عايز اقولك انا احيانآ لو عملت معصية بخاف جدآ ربك ياخد امانته وانا يعمل المعصية دي بس بعدها بستغفر و بدعي ربنا و مبخفش نهائي عشان واثق في رحمته بلنسبة للدكتور النفسي انتي مش محتاجاه و متسمعيش اي حد يقولك عندك اكتئاب او مرض نفسي او اي شيئ عشان محدش فيهم دكتور ده غير ان الاطباء النفسيين بنفسهم مش بيقولو نفس الكلام عشان علم النفس للاسف مازال غير دقيق مثلا ممكن تروحي لدكتور يقولك انتي سليمة فتروحي لغيره يقولك مكتئبة فتروحي لغيره فيقولك بتعاني من قلق مفرط فابعدي عن سكة الدكاترة النفسيين و حاولي تستعيني بلاقرباء و تفضفضي لحد موثووق جدآ و ميفضحش اسرارك

بصي انتي محتاجة تهدي و تفكري بعقلانية شوية ، انا اهلي بيعملو كدة ليه؟ هل الغلط مني؟ و اسألي نفسك و خديها واحدة واحدة شوفي هل الموضوع يستاهل في المقام الاول كل الزعل ده او هو موضوع عبيط وانا مكبراه؟ هتعرفي مع الوقت ان كل المشاكل تافهة وان مفيش حاجة تستاهل الزعل او العصبية ،نتعصب على بعض ليه واحنا كلنا رايحين في الاخر ،منستحمل بعض الكتم سنة دول و كدة كدة كلنا هنمشي و اوعي تفكري بلانتحار لانك كدة هتخلدي في النار و هتتعذبي بنفس الطريقة اللي قتلتي نفسك بيها و هتكوني كفرتي بالله كلمي ابوكي وامك و صاحبيهم عشان هما مش دايمينلك و افتكريلهم الحلو اللي عملوهولك وهي فترة و هتعدي

قولها ان الموضوع مش بإيدها وان ده اختيار ربنا ليها و ان قصر القامة مش عيب في البنت او في الولد و كلها مكتوبة من عند ربنا ولو حاسة بنقص بسبب كدة خليها تعوضه بعلم نافع لغة او رياضة او كتب او اي شئ يميزها و يملئ فراغ قصر القامة لازم انت برضك تتقبلها و توريها انها مفيهاش حاجة عشان هي تتقبل تفسها و كلمها في موضوع انها بتعيط بسرعة و قولها ان ممكن ناس تستخدم ده ضدها مستقبلآ

ربنا يعينك على ما بلاكي حاليآ انتي مش محتاجة حد يحتويكي ابدآ لأن كل الرجالة في الاول و الاخر رجالة و مينفعش يكلمو بنت اجنبية انتي لازم تتوجهي للعيلة عشان هما بس اللي تقدري تثقي فيهم و بلنسبة للمقاطع الاباحية انتي لازم تتقربي من ربك و تصلي و الحمد لله انك بنت لان البنت بتكون اسهل في الاقلاع عن الافلام دي ،شهوة الولد بتكون غير مستقرة بس البنت بتكون متراكمة يعني الولد ممكن شهوته تكون شديدة قوي فجأة و وقت تاني تكون منعدمة ،البنت بتكون مختلفة بتكون متدرجة مش بتيجي فجأة فالسيطرة عليها بتكون اسهل بكتير انا مفضلش انك تقولي لحد او تفضفضي ابدآ بمشكلتك دي لاي حد مهما كان و حاولي توقفيها من نفسك قبل ما حاجز الستر يتشال لانه موضوع كبير جدآ خصوصآ اننا عرب فالتعامل معاه غير هين بلمرة تعديل:ربك غفور رحيم يغفر كل الذنوب و غفر من قتل ١٠٠ نفس بلا حق مبالك بذنبك؟ بس اوعي تأمني مكر الله برضك و تقولي انه غفور رحيم و تنسي انه شديد العقاب

ابوكي في مكان احسن دلوقت و مع ربه ادعيله كتير واعرفي ان دعائك ليه بيوصلله فادعيله كتير و تصدقيله عشان تدخلو الجنة سوا ان شاء الله. انا بقولك الكلام ده عشان انا بمر بيه بلفعل امي توفت رحمها الله من اسبوعين و من وقتها وانا بسرح كتير و بنسى كتير ممكن ادفع فلوس وانسى اخد الباقي و ممكن انسى منهج كامل في اي مادة و بطلت اذاكر من وقتها و وقفت تمرين و بقيت قاعد مبعملش حاجة بس الحمد لله بدعيلها كتير قبل منام و بتصدقلها في كل فرصة بأي مبلغ مهما كان حجمه و الحمد لله واحدة واحدة برجع للتمرين و خلاص هفضل زعلان و مكتئب لأمتى؟

للاسف هي مش بالتدريب او القراءة او اي حاجة من الكلام ده هي عبارة عن قوة عزيمة خالصة و سبب و هدف انت هتبطل عشانه لو تقدر تقول لحد كبير و تحكيله وانا عارف انها صعبة اوي بس لو قدرت و عملتها هتعمل تغيير كبير جدآ و هتكون عون ليك انك تحكي مع حد هقولك برضك كام نصيحة من اخ مر باللي بتمر بيه ١- انساها: متعدش انت مبطل قد ايه انساها خاالص عشان متفضلش فدماغك و تستنى يوم معين ترجع فيه ٢-ادعي كتير قبل متنام: كل حاجة بتوفيق من ربك لازم تدعي عشان ربك يوفقك ٣-اشغل يومك: لو نزلت من البيت طول اليوم وقعدت في الشارع هتنساها و مش هتعملها و هترجع تعبان و هتنام ٤-ركز اوي في دي: اوعى تقعد لوحدك ،الشيطان بيستلمك لما تقعد لوحدك و بيفضل يزن في ودنك

على حسب السن لو سنهم صغير فده طبيعي يحصل من اطفال و محدش هيكلمهم بس لو سنهم كبير لازم تحطي حدود عشان لو لاقدر الله كبرو كدة ممكن يضربوكي و هما كبار و نبهي امك لاهمية التربية وانها متخليش اخواتك يجو عليكي عشان ميضربوكيش في غيابها و يظلموكي لما يكبرو وربنا يكون في عونك ان شاء الله

الانسان مبيتصلحش غير لو ربه هداه غير كده انتي مش ميكانيكي للبشر و العلاقة من النوع ده محرمة يعني صلحتيه او لا هي حرام في حرام انا مش جاي اقلب عليكي المواجع بس بنبهك لحرمانية الامر ده الشديدة واتمنى انك تنسيه و ربك يهديكي لو عايزة تنسيه اشغلي وقت فراغك عشان وقت الفراغ هو العدو الاول للبشر كلهم من ناحية ان الشيطان بيدخللك في وقت فراغك و من ناحية ان عقلك بيفكر كتير و الموضوع هيتعبك ف اشغلي اوقات الفراغ

ليه تتخلصي منها وهي طبيعية اصلا في كل الناس،كلنا بنتخيل قصص قبل مننام و كلنا بيفكر في اللي فات و كلنا بنفكر نعمل ايه في الموقف الفلاني ونتخيل سيناريوهات اثناء يومنا و ده مش شئ خطير وربنا يعينك و يعننا و يوفقك ان شاء الله

سيبك منهم و متفكريش فيهم تاني و اعرفي انك لو مكانهم عمرك ما كنتي تعملي كدة لحد فيهم و الدنيا واسعة و تقدري تصاحبي بنات غيرهم بس طبعا لازم يكونو محترمين و تختاريهم كويس عشان ميتكررش اللي حصل ده تاني و إن شاء الله تكون فيها خير ليكي انهم بعدو عنك و متجيش على نفسك بزيادة عشان ناس متستاهلش عشان هتندمي على ده قدام و خليكي قوية مش اي حاجة تخليكي تعيطي💪

يا اخويا لازم تكون متوضي اول ب اول و تصلي من اول م الاذان ياذن الموضوع هيكون متعب بس هتتعود عليه بعدين وهيكون موضوع سهل جدا صدقني عشان مفيش حاجة بتفضل صعبة للابد هي مشكلة تعود بس و ربنا يعينك و يعيننا ان شاء الله

طيب حضرتك ما انتي مش هتعرفي تكشفي لنفسك لازم حل من الاتنين يا تقولي لامك او تروحي مع نفسك لدكتورة و انا ارجح تقولي لامك لان لو لا قدر الله حاجة حصلت هي هتعرف هتعرف و ان شاء الله مفيش حاجة و محصلكيش حاجة وربنا يعينك ان شاء الله

انت بتحكي للناس عشان يشجعوك و ده شيئ عادي كلنا بنعمله بس مينفعش تعتمد عليه اوي عشان اغلبنا دلوقت بقو ناس سفيهة بتحاول تقول نكتة على اي موضوع و انت هدفك اتحول لنكتة عندهم كدة، شوف انت عايز تبقى ليه في الامن السيبراني و هل الموضوع هينفعك مستقبلآ فعلا ولا هو موضوع مش هيجيب همه وانت عجبتك الفكرة بس. انا هقولك كلمة الكل قالهالك و كل اللي هيرد هنا هيقولهالك وانت بلفعل هتكون متوقع تقراها و معرفش هتريحك ولا لا بس ان شاء الله ربنا يرشدك للي فيه الخير (متسمعش كلام حد و ركز في حلمك)

متقدريش تردي او تكلميها دي امك مهما عملت انتي آخرك تدعيلها بالهداية فقط غير كدة هيعتبر عقوق للوالدين و دي كبيرة شوفي انتي بتعملي ايه بيخليها تعمل كده و تجنبيه و صاحبيها عشان هي مش هتدوم وربنا يعينك على تحملها ان شاء الله

احذفي السوشيال ميديا و خلي توبتك صادقة لأن دايمآ هيكون فيه ناس قذرة هتحاول تكلمك في امور زي كده و خدي نصيحة مني اوعي ثم اوعي الشيطان يوزك و تقولي اقوله و اعترف له و ممكن يسامحني لان ده مش هيحصل ربنا سترك متشيلش الستر من على نفسك بنفسك و استغفري ربك كتير و ادعي انه يشفيكي من المرض ده

ابعدي عن العلاقات المحرمة من النوع ده لان نهايتها دايمآ سيئة و من كلامك باين انه كان شخص متدلع بزيادة و غير متقبل للرفض و منضجش و عقله صغير انتي لو كنتي كملتي كان المستوى هيعلى اكتر من مجرد بوسة او لمسة لان هو اتعود عليها ف هيكون عايز يرفع المستوى اكتر واكتر كل شوية ف بلاش ترجعي و بلاش تدخلي فعلاقة مع اي شاب خارج اطار الزواج لانها مجرد متعة مؤقتة و نهايتها سيئة دايمآ و اكيد ابوكي رحمه الله مكنش هيحب يشوف حد بيعمللك حاجة زي اللي هو عملها

ادخل حاجة على قد امكانياتك عشان متندمش الطموح حلو بس بلمنطق ،انت لو مش شاطر في المادة و المادة دي اساسية في الكلية بلاش تدخلها عشان متكرهش الكلية بسبب المادة ْشوف انت بتحب مادة ايه او انت عايز تبقى ايه وشوف الكلية اللي هتساعدك في هدفك ده

تطبيق Alarmy مش بيطفي غير لو حليتي مسألة رياضية صعبة او هزيتي التليفون كتير اظبطي المنبه و خلي التليفون في اخر الغرفة عشان تقومي و تطفيه و نامي بدري عشان طبعآ لو نمتي متأخر مش هتصحي حتى لو جابو ديك يصيح جمبك

يا ابن عمي انا صعيدي زيك و فاهمك حاجة زي كدة ليها دخلتين يا تاخد اخ كبير ليك معاك او تاخد امك او تراضي ابوك بحاحة عشان يوافق ،هاتله حاجة فرحه بيها وهو و رايق اطلب منه يجي معاك ولو رفض و نشف دماغه خلاص قدر الله و ما شاء فعل و الحمد لله هو مش رافض البنت هو رافض يجي معاك بس روح انت و اتعذر بأي حاجة لو تقدر

حضرتك عشان تعرفي تكلميه و تتعاملي معاه لازم تتعلمي الدين و تكلميه بيه مش مجرد تعرفي كلمتين من فيديو يوتيوب او صفحة في جوجل لازم تعرفي هو تفكيره عامل ازاي عشان تكلميه بيه و قبل اي حاجة متخافييش عشان اللي معاه حق مبيخفش حتى لو جيه يمد ايده متوريهوش انك خايفة وريه انه مش هيعرف يوصللك غير بلكلام و كلمي اخواتك البنات واقنعيهم برأيك في غيابه عشان في حضوره يقنعوه معاكي و اقري كتب اكتر وثقفي نفسك عشان تعوضي التعليم اللي فاتك

ابتدي بكتابة مذكرات خاصة تفضفضي فيها بكل حاجة في قلبك عشان متتراكمش المشاكل جواكي و تتمني الموت زي ما ذكرتي. و انا في ظني انك حاليآ بتفكري بلطريقة دي تجاه ابوكي و امك بسبب التراكمات،حاولي تبتدي صفحة جديدة و اتكلمي معاهم بكل هدوء وانسي كل اللي فات معاهم و اديلهم فرصة ،دول اهلك في الاول و الاخر اكيد هما مش بيكرهوكي. ربنا يكون في عونك ان شاء الله و يرفع شأنك

زي ما صديقنا قال فوق ممكن يكون بسبب التيك توك و الشورتس و الريلز و حلها انك تسمع بودكاست او تقرا مقال او كتاب ،الموضوع هيكون متعب في البداية بس هتلاقي مع الوقت مفعوله شغال،و حاول توقف شورتس و تيك توك واي فيديو اقل من خمس دقايق عمومآ ،اسمع فيديوهات لهيثم طلعت او اسمع فيديوهات لأي حد عمومآ مبيحاولش يسرق انتباهك بلموسيقى العالية و الزوم الكتير في الفيديو و تغيير الخلفية عشان ده كله بيقلل فترة الانتباه عندك

شوفي لو هو لسة في نيته انه يكمل او لا، ممكن عايز يفركش بس محرج و مش عارف يجيبها ازاي ولو مش عايز خلاص اصبري عليه و ممكن مشغول فعلآ ونصيبك ان شاء الله محفوظ حتى لو مكنش هو و ربنا بيختار لك الخير اللي هو شايفه مش اللي انتي شايفاه وربنا يرزقك بابن الحلال اللي يصونك و يقدرك ان شاء الله

لا مش تستستيرون هو اي حد لما بيبتدي جيم بيلاحظ الفرق وانت بالمثل

مرني باقي الجسم عشان توازني بين كل جسمك عشان الترابيس متبنش اوي و لعلمك هي مش مشكلة ابدآ عشان انتي عمرك ما هتبني عضلات زي الولاد جسمك هيكبر شوية و بس القوة اللي هتزيد و الرشاقة و الصحة فمفيش خوف ان شاء الله 💪💪

لا، اقصد ما دام. حقك عليا

تقدر تحمل برنامج chat Gpt ابعتله الكلمة و اسئله عن معناها وهيكلمك زي متكون بتكلم انسان طبيعي و هيفهمك معنى الكلمة بطريقة حلوة ولو مفهمتهاش تقدر تخليه يبسطها اكتر

انا مبرجحش ان حد يروح لأخصائي نفسي و كل نصايحي بتكون بعيدة عنهم بس انت محتاج استشارة اخصائي نفسي ، بس برضك هقولك حاجة انت ممكن متكونش مركز فيها اوي ،كلنا فينا عيوب و مميزات و للأسف عيننا مصممة على انها تشوف العيوب و متشوفش المميزات و قليلآ جدآ و نادرآ ان حد يتكلم عن مميزاتنا مع اننا بنحتاج اننا نسمع مجاملة او كلمة حلوة بس للأسف مبنسمعهاش ،فيه ناس كتير عصبية وانا اعرفهم بس كلهم قلبهم طيب و مبيرضوش حد يزعل منهم ، اذاك لنفسك و تمنيك الموت لا هيريحك ولا هيريح حد بلعكس انت هتتحاسب على كل ده ،بلاش تعور نفسك اكتر لأن الصيف جاي و مش هتعرف تخبي ايدك تاني و ممكن حجاب الستر يتشال من عليك وقتها ، صلي و ادعي ربك انه يهديك و يرحمك الهداية و الرحمة كنزان لايفنيان ابدآ ممكن متفهمش قيمتهم دلوقت بس هتفهمهم اكتر في المستقبل و ربنا يهديك ان شاء الله و يرحمك برحمته التي وسعت كل شئ ،و الموت هيجيلي و هيجيلك لوحده مش محتاجين نروحله ،بس هل انا وانت جاهزين اننا نقابله؟ هل تركنا شئ نشكر عليه؟ ام سنترك الم في قلوب احبائنا؟

تمام شكرآ يا سيدي هسكت

متنقطعش بس خليك في الحدود جدآ يعني لو ليها اخ كلمه هو او كلم ابوها او امها متكلمهاش هي و اسألهم عن اخبارهم كلهم مش هي و بس عشان تكون صلة رحم فعلآ

خلاص كدة بما انك فهمت نفسك هتقدر تتعامل مع الموضوع بشكل احسن ان شاء الله

يا اخي انت في الاخر ذكر وانا ذكر و شيخ الازهر بنفسه ذكر بنتشارك كلنا في حب الاناث مهما كانت نيتنا او كلامنا و عشان كدة لازم انا وانت و شيخ الازهر نغض بصرنا عشان شهوتنا متتحكمش فينا عشان مهما عملنا هي اقوى مننا فبنبعد قدر المستطاع عن اننا نتواجه معاها في المقام الاول

فاهمك وعندك حق فعلآ انا متأكدتش كويس و مختلفتش معاك انك تخاف عليها اكتر من نفسها بس متأمنش لنفسك لو كدة عشان انت في الاول و الاخر رجل و عندك رغباتك وانا طبيعي مش هفهم نيتك لان النوايا عند الله ممكن انا بنفسي مفهمش نيتي احيانآ

هي حتى لو خطوبة مازالت مينفعش بس ربنا يهديك ان شاء الله للخير

ايه نوعية الاقتناع اللي انت عايزها؟ عايزه يكون جواز عن حب و تتكلمو سوا و تخرجو قبل الجواز ولا عايزه صالونات بناءآ على سمعتها و اخلاقها؟ اول نوع ده مرفوض و حرام ان بنت تخرج مع حد اجنبي و تكلمه خارج اطار الحاجة و امك مش هتقدر تجبرك على حاجة انت مش عايزها ولو حصل صدقني هي مش هتختارلك بنت وحشة عشان تخرب عليك حياتك

يا اخي انا فاهم انك مستحرم بس المشكلة انك انت اللي ابتديت الموضوع بطريقة غلط المفروض كنت تغض بصرك و متكلمهاش بعيدآ عن نطاق الحاجة وعشان كدة اتعلقت بيها و مش كل حاجة بنعوزها بناخدها و صدقني لو كانت ملاك على الارض و مش من نصيبك مش هتاخدها و حتى ان كانت سطحية او عميقة خلاص سيبها براحتها انت مقتنع ان الدعاء بيغير الاقدار و مش مقتنع ان ربنا شايللك نصيبك ليه؟

لا منا مش هعرف اساعدك لو انت مش عايز تسيبني اساعدك اقل حاجة جرب تعمل اللي قلتلك عليه قبل متحكم عليه بلفشل وانا كل كلامي معاك مدعيتلكش انها تجيلك انا بدعي ان نصيبك الاحسن منها هو اللي يجيلك

اشغل وقت فراغك متقعدش فاضي عشان متفتكرهاش و تفكر فيها و استغفر كتير على الاقل ١٠٠ مرة في اليوم و متقعدش لوحدك اقعد دايمآ مع ناس و صوم اتنين و خميس و ان شاء الله متفكرش فيها تاني او على الاقل مش زي الاول

ادي نفسك فرصة و هتلاقي احسن ان شاء الله و ربنا يوفقك

يا اخي انت مش مصدق ليه انها بالنصيب؟ مهي ممكن متكونش مكتوبالك خالص هتعمل ايه؟ هتكفر بالله و هتبقى وحش مع الناس؟ محدش بيهدد ربنا و لو عملت خير فهو لنفسك و لو عملت شر فلنفسك برضك مش بنت اللي تعمل فيك كدة و لو اصحابها مأثرين فيها و اقنعوها خلاص سيبها الست اقتنعت بكلام اصحابها ،انا مش عايزك ترخص نفسك عشان واحدة مش عايزاك انا عاوزك تكون غالي و محدش يوصللك بسهولة متخليش بنت تعمل فيك كل ده و تقوللي ربنا احل الحب العفيف مهو الحب العفيف مش بيخرب حياة الانسان كدة و بيشغل وقته كله بيه ،ربنا يهديك ان شاء الله

حضرتك انا لو شايف كدة كنت هقولك روح طور من نفسك وغير شكلك عشان تحبك بس صدقني الموضوع مش مستاهل و تعب على الفاضي ،تخيل معايا انك بتحط ورق دهب على فحمة ،الفحمة لسة فحمة بس عليها طبقة رقيقة و هشة من الدهب و ده مجرد مثل مقصدش بيه اي اهانة بس الغرض هو ان الاصل هيفضل نفسه مهما غيرت مظهره،دور على حد يحبك زي منتا الدنيا واسعة و ده مجرد ابتلاء من ربنا متفكرش فيها تاني و هتلاقي ان شاء الله احسن منها

منا مش هديك امل واضحك عليك بس البنت من كلامك باين انها مش عايزاك بلاش تضيع وقت اكتر عليها و شوف دنيتك وربنا هيرزقك بالأحسن منها ان شاء الله

الحب مش حرام طول ما هو في القلب طبعآ بس البنت رفضت حضرتك كتير و كده ممكن تجبرها توافق وهي متضررة و بعدين تكرهك بإلحاحك عليها و ممكن تبتدي زي ما حضرتك قلت تكرهك اكتر فخليها براحتها عشان الزواج مفيهوش اجبار و مش بيجي بإلالحاح وربنا يرزقك احسن منها إن شاء الله

بص هي الدنيا كدة فيها الوحش و فيها الحلو و ربنا مش هيديك اختبار انت مش قده عشان مش هيحملك فوق طاقتك هو مديك ابتلاء وانت تقدر تعديه ان شاء الله بس متيأسش و برضك اقرأ كتب و تثقف عشان تعرف تتعامل مع الناس اكتر و تقدر تتعرف على الشخصيات المتنوعة و مع الوقت هتلاقي كل الناس شبه بعض و الشخصيات بتتعد على الصوابع و هتعرف تتعامل معاهم

بص يا اخويا انت عامل الناس بنية صااافية مهما كانت معاملتهم ليك و برضك الشغل ليه طريقة معينة في التعامل يعني عندك مثلا في الشغل متاخدش شغل حد،متساعدش حد في شغله و تشتغله معاه و خلي دايمآ رقم واحد في علاقاتك عيلتك محدش احسن منهم و متديش حد اهتمام اكتر منهم حتى لو وحشين او مش بيوروك حبهم وجرب رتب علاقاتك بترتيب معين زي مثلآ معرفة زميل صديق صاحب و عيلة و العيلة رقم واحد و المعرفة ده شخص تعرف اسمه و الزميل رفيق شغل او مدرسة او سكن لحد ميساعدك في موقف شديد يخليه يوصل لرتبة الصاحب و طبعآ محدش يوصل للعيلة عشان دول معروفين

احكيلي اكتر مش قادر تتعامل معاهم بتتوتر و بتتهته في الكلام مثلآ او خجول او حاجة مختلفة؟

طيب ليه كدة ايه اللي حصل؟

ما شاء الله الاجابات على السؤال كتيرة بس للأسف انا مش شيخ و معنديش اي خبرة او معرفة في الناحية دي بس شايف جواب استاذة سارة مقنع بحيث انك لازم تستغلي الوقت ده بطريقة افضل خصوصآ ان الروايات ملهاش اي قيمة علمية و بتضيع وقت كتير و ممكن برضك يكون فيها كلمات الحادية و برأيي الكتب العلمية افيد بكتير و لو متعلقة بلكتب القصصية اكتر اقرأي كتب عن السيرة الذاتية سواء من سيرة النبي عليه الصلاة و السلام او سيرة مالكوم اكس او سيرة هتلر فيه سير ذاتية كتير هتعجبك

غالبآ حضرتك كنتي مستنية حد يقولك كدة برضك و يأكدلك تفكيرك ،ربنا يوفقك ان شاء الله

لو تعرف تروح لأبوها تكلمه و تسأله وتدخل البيت من بابه هيبقى حلو اوي و اتكل على الله ولو عايزاك هتوافق ولو لا يبقى ربنا شايل لك احسن منها و هتكون رحت و دخلت البيت من بابه وعملت اللي عليك و سعيت وإن شاء الله ربنا يديك اللي فيه الخير ويوفقك

من وجهة نظري ممكن يشخصها غلط خصوصآ ان كل دكتور ليه نظرته و تشخيصه و بناءآ على التشخيص ده ممكن يكتبلها ادوية غلط تبوظ الدنيا اكتر ،ممكن برضك يكون الشخص محتاج انه يتكلم بس مع حد يسمعه فيروح لدكتور نفسي و الدكتور ده يشخصه بناءآ على كلامه بمرض مش عنده برضك و هو عمومآ علم النفس و الدكاترة النفسيين زي ما قلت لحضرتك معاييرهم مختلفة بسبب ان العلم ده لسة حديث ،و برضك بناء على كلام السائلة انا شكلي بصيت للمشكلة بصة سطحية بناء على اني مبحبش اكبر المشاكل بس من كلامها شكلها اكبر من اللي تصورته و انا مش دكتور او عالم انا بدي نصيحة للسائل ممكن يقتنع بيها او لا ،وربنا يباركلك على تعبك المستمر مع الناس هنا❤

انا مقصدش اقلل ابدآ منك واقولك انك طفلة ولو حسيتي بكدة حقك عليا انا بحاول اساعدك وربنا اعلم بنيتي و لو كلامي زعلك اسمعيه من هنا و طلعيه من الودن التانية و ربنا يوفقك ان شاء الله و يعينك على مشاكلك

يا ماما الاكتئاب ده مرض نفسي لازم دكتور نفسي يشخصك بيه غير كدة انا وانتي منقدرش نقول ان ده اكتئاب ،فكري فيها كدة طيب انتي عندك ١٢ سنة و الكل لسة بيتعامل معاكي على انك طفلة و اختك ١٤ سنة وهي كذالك مازالت طفلة دلوقت ايه السبب في حزنك؟ فكري في السبب وهل يستحق؟ و انتي لسة مشفتيش قد ايه الدنيا وحشة و جالك اكتئاب على حد قولك مبالك لما تكبري و تشوفي الظلم و الفساد و الفقر و البرد و الجوع و تشوفي احبائك بيموتو قبلك؟ انتي لسة على باب الدنيا لازم تكوني قوية و متخليش حاجة تأثر فيكي متبقيش ضعيفة نفسيآ اي حد يأثر فيكي

مدام شايفة انهم هيشكو يبقى هي عشرة وحشة للأسف و مدام كدة يبقى يخبطو راسهم فلحيط خليهم يظنو براحتهم محدش ليه عندك حاجة و زي مبتقولي انتي تقدري تاخدي من الدرج الرئيسي اسهل و منغير محد ميحس ولو حد وجهلك كلمة اقفلي الباب فوشه و قوليله انك محترمة ولو كنتي عايزة تسرقيهم كنتي عملتيها من زمان و متقدميش اي اعذار تانية غير لو الكلام كتر و مسكتوش عشان ميقولوش انك مجهزة كلام للموقف و مستعدة و يشكو اكتر

خلاص اتكلي على الله انتي مش هتسرقي ٥٥٠ اقل حاجة هتكملي ال٦٠٠ لو كدة و اكيد الدرج فيه اكتر ،محدش هيشك فيكي ولو شكو تبقى مشكلتهم وربنا يوفقك وتلاقي شغل احسن ان شاء الله

السجاير التانية اكبر مشكلة وللأسف مش هتقدري تصلحيه فياتخديه بيها او متاخديهوش وانا لو هجوز اخواتي استحالة اجوزهم لمدمن عشان مش مضمون ،ممكن فمرة ميكونش معاه فلوس فيتعصب او يتهته او ميعرفش يفكر عدل انا متقبل انه طيب و مؤدب و كل حاجة بس برضك مستأمنهوش على اختي

انا مش شيخ بس برأيي كملي صيامك بما انك نويتيه و متسمعيش لكلام الشيطان خصوصآ بما انك مش متأكدة و ان شاء الله ربنا مش هيحاسبك على حاجة بدون قصد زي دي ،في غسل الجنابة فيه اكتر من طريقة للغسل و كلهم ينفعو عشان الغسل له شروط لو عملتيها تكوني اغتسلتي فأبحثي عن شروط الغسل برضك و شوفي لو صح او لا

اغلب مشاكلنا حلولها واضحة و قدامنا بس بنروح نسأل برضك عشان نفضفض بلمرة فلازم تعرفي انتي غرضك الحقيقي ايه؟ احيانآ بيكون فيه في دماغك سبب بس انتي رايحة لسبب تاني بدون وعي منك بس ده بيكون رغبة عقلك اللاواعي و برضك لو محبتيش فكرة الكتابة تقدري تيجي برنامج زي ده و تفضفضي في صيغة سؤال و الناس هتحاول تحللك مشكلتك او اقلها يسمعوكي

متقوليش على نفسك كدة حتى لو هم وروكي انهم شايفينك كدة ، بما انك بتشتغلي فهفترض انك بتشتغلي ٨ ساعات و ممكن بتنامي ٨ زيهم يعني باقيلك ٩ ساعات ،تقدري توزعيهم بطريقتك بحيث انك متصطدميش بيهم في يومك على الاقل لحد ما ربنا يهديهم ،و زي مقلتلك مهما عملو و مهما قالو هما اهلك و لازم و حق عليكي انك تطيعيهم ،لو كلموكي وقالو اي حاجة قولي حاضر وبس مهما كان كلامهم سواء اهانة او تجريح هزي راسك وخلاص كلامهم مش هينقصك حاجة ،و من ناحية الموت متدعيش على نفسك بيه تاني كلنا هنوصلله كدة كدة فبلاش نستعجل هي مرة اللي هنعيشها وخلاص خيلنا نعيشها

طيب ايه السبب لكل ده؟ وهل سبب مقنع؟ لو سبب مقنع صالحيهم و اعتذري عشان دول اهلك ولازم تطيعيهم وحتى لو مش مقنع صاحبيهم و لو كلموكي او دعوا عليكي سيبيهم يتكلمو كلامهم مش هينقصك حاجة،الناس دي مش دايمالك و تمالكي نفسك عشان متخسريش وظيفتك بسبب المشاكل العائلية عشان لو خسرتي وظيفتك هتكوني كدة معاهم ٢٤ ساعة طول الاسبوع

ده حمض هيدروكلوريك و للأسف الاجابة مش مكملة سطرين على بعض عشان اكتبلك اجابة فكتبتها تعليق وانا مش كيميائي انا طالب ادبي ٣ ثانوي

البنت بطبيعتها بتنجذب لابوها اكتر من امها وانا متفهم كدة بس انتي لازم تتقبلي الواقع ،مينفعش تفضلي زعلانة و توقفي حياتك كلها هو لو هنا مش هيرضيه اللي انتي بتعمليه ده حاولي تشغلي نفسك بمواضيع مختلفة و اشغلي تفكيرك دايمآ و ان شاء الله هتقدري تتخطي الفترة دي و هي في الاخر فترة و هتعدي ان شاء الله

بصي انا شايف انك اللي محتاجاه انك تفضفضي مع حد يسمعك و تتكلمي بكل اللي عايزاه بس مينفعش تكلمي حد غريب من على النت عشان هو بيفتش في تليفونك و عشان الناس على النت مش موثوقين و مينفعش تكلميهم عشان في منهم ناس مريضة ممكن تضرك جامد بدل متساعدك فأحسن حاجة هي انك براحة ترتبي افكارك و تكتبيها في نوتة على التليفون زي مذكرات ليكي و تكتبي و تقضفضي فيها بكل اللي في نفسك و ان شاء الله ترتاحي و تعرفي ترتبي افكارك

طيب مفيش حد اتقدملك كويس ؟ حاولي تدي حد فرصة مش لمجرد انه من طرف اخوكي يبقى زيه ممكن يكون احسن منه

مشكلة الثقة دي بيعاني منها ناس كتير و حلها انك تثبتي لنفسك انك تقدري تثقي فيها ، حاولي تعملي حاجات جديدة عليكي و معملتيهاش قبل كدة و تبتدي تتعلمي حاجات مختلفة زي انك تبتدي تتمرني او تتعلمي لغة جديدة و كل متتطوري فيها ثقتك بنفسك هتزيد اكتر ان شاء الله وربنا يوفقك❤

طيب متعرفيش تكلمي مرات اخوكي تخليها تحننه عليكي لو هي بتعرف تتعامل معاه؟

يا استاذة سيبيها تقول اللي تقوله كلامها مش هينقصك حاجة ،تجاهلي الوحش و افتكريلها الحلو

تقدري تدخلي حد كبير من العيلة؟

في الاول و الاخر ابوكي ولازم تستحمليه بحلوه و بمُره و مهما كانت طريقة معاملته ليكي انت في الاخر بنته مش لازم يوريكي ان هو بيحبك عشان يكون بيحبك ممكن يكون قاسي احيانآ و ممكن تشوفي انه مش طايقك خالص بس في الاخر ابوكي استحمليه و احمدي ربنا على نعمة الاب اللي كتير اتحرم منها

دي فترة وهتعدي غالبآ لو عمرك صغير بين ١٥ و ٢٠ هتعدي بيها بسبب تغيرات فلهرمونات