omar mohamed

متيأسش ومتبطلش تحاول تبعد وتتوب حتى لو كل يوم طول ما انت بتحاول اكيد هتوصل .. حاول تقلل المصادر اللي بتاخدك لكدة زي الاتستجرام مثلا او التيك توك وهكذا اي برامج بتحس انها دايما بداية المشكلة ... وطالما عندك احساس التناقض يعني انت قادر تميز الغلط من الصح وانك عاوز تتغير للاحسن ادعي ربنا يغيرلك الحال وربنا يشفيك من كل داء يارب ويرزق زوجة صالحة ويصلح حالك

الشعور بالاحتياج دايما صعب وبيخلينا نفكر ونتعامل بطريقة غلط اوقات كتير وبيكون نابع من العاطفة ليس الا وان الواحد بيحاول يقدم اللي مفتقده او بيتعامل ومعتقد ان اللي قصاده هيعمل نفس اللي هو بيعمله وده مبيحصلش .. وكل ده بيسبب قلة ثقة في الشخصية ونقعد نسأل نفسنا هو انا وحش؟ هو انا فيا عيوب؟ هو انا معقول محدش بيحبني؟ شوف رغم ان الانسان صابر وراضي وبيقول الحمدلله لكن مش قادر يتخلص من المشاعر وسؤال نفسه اسئلة كل شوية النقطة اللي بتدور حواليها كل ده هو حب الشعور بالتقدير واننا مهمين في حياة حد واننا فارقين ووجودنا مهم لكن عشان الانسان يستقبل ده لازم يصدره الاول وميتعاملش مع الناس انه اقل منهم لا انا ولا يقلل من نفسه في اي حاجة ويدي لنفسه حقها وميفضلش كل شوية يأنب نفسه ويلومها لحد ما تبقى هشة وضعيفة وفوق كل ده لازم يهتم بأمور دينه وصلاته ويدعي ربنا وان شاء الله كل حاجة هتكون تمام

هو موقف صعب خصوصا ان الجواز نسب وعيلة وانت مش هتاخدها لوحدها واي حاجة هتحصل هيتجاب سيرة والدها ممكن انت تضايق او هي تضايق فتجنبا لكل ده مستقبلا اصرف نظر وصلي استخارة وولو فيه خير وليك نصيب ربنا يقدمهولك ان شاء الله

مش عارف مدخلتش جيش دي لاسباب اعفاء ولا انت ليك جيش ومقدمتش لو ليك جيش ومقدمتش فهو قبل اي كلام لازم تخلص جيشك عشان تعرف تتحرك براحتك ومتبقاش مقيد ... تاني حاجة المعهد مش هيضيف حاجة وانت خريج من مكان تاني واللغة بتفيد عموما في كذا حاجة .. المشروع براس مال صغير حقيقي مقدرش افيدك بافكار تكون مجزية وعشان تتقدم لبنت لازم تكون مستقر في شغل حاول تقدم بكليتك في مجالك لو ملقتش ولقيت فرص سفر سافر اخر حاجة انت٢٤ سنة لسه قدامك وقت طالما ربنا كاتبلك عمر مفيش حاجة فاتتك نصيبك هيجيلك

افتكر اني بعد ما خلصت ٣ ثانوي ودخلت هندسة كنت حاسس اني خلصت طاقتي وكنت زعلان ان مفيش حد اعرفه معايا حتى كليتي كان طريقها منفصل مكنتش بقابل حد وفضلت كتير لحد ما قربت من ناس وبدات اصاحب ناس بالتدريج انتي بس افتحي عينك شوية واحدة واحدة هتلاقي نفسك صاحبتي المهم تنقي صحبتك لان دي حقيقي اللي هتكمل معاكي ولو صاحبتي حد وطلع وحش متتكسفيش ولا تتحرجي انك تبعدي عنه لان حقيقي رحلة الكلية الناجحة بتكون بالصحاب الطيبين

اي طريق صح بيشوفه الانسان ويحب يمشيه النصيحة الاولى لو مش عاوز تمشي لوحدك شوفلك صاحب شبهك يساعدك .. في المرحلة اللي انتي فيها بقيتي محتاجة تجددي اصحابك مش بقولك غيريهم واقطعي معاهم لا بس بقيتي محتاحة حد يشد ايدك للطريق الكويس اللي حاباه بالمقابل نصيحتك ليهم ده دليل على محبتك وانك عاوزاهم يبقوا كويسين اينعم مفيش استجابة لكن انتي بتعملي اللي عليكي زي ما قولتلك مش لازم تقطعي علاقتك بيهم لكن محتاجة تضيفي ناس تانية لحياتك تستفيدي منهم اكتر..

اول حاجة نسال عنها هي اننا بنصلي ولا لا ؟ وبندعي ربنا يعينا ويساعدنا ولا لا ؟ لان من غير دول هنلاقي نفسنا مش عارفين نتحرك ولا نعمل حاجة نيجي بقى للثانوية العامة واحنا لسه في شهر ١٠ يعني انتي قدامك وقت طويل اطول من شهر اغسطس تقدري تعيدي المنهج كله مرتين اصلا فمتحطيش في بالك انك متاخرة وضاع مني كتير والجو ده لا عادي كل حاجة لسه ف ايدك واكتر كمان وانا دايما بقول ان الثانوية العامة ماراثون طويل مش مجرد سباق سرعة بيخلص بسرعة لا اللي نفسه اطول هو اللي بيكمل للاخر ممكن تكون بدايتك بطيئة لكن مع الوقت تسبقي كل اللي طلع قدامك استعيني بالله ورتبي مذاكرتك للمواد واعملي اللي عليكي وخليها على الله وافتكري ان النجاح في النهاية له طعم يستاهل نعمل عشانه ..

ممكن تطوري نفسك في مجالك مبديا انك تبقي تعرفي تستخدمي الكومبيوتر كويس بتشتغلي على برامج الاوفيس كويس تبقي فاهمة في مجال النت عموما بتعرفث تعملي سيرس على اي حاجة وبتعرفي تطلعي المعلومات اللي عاوزاها من على النت يبقى عندك ولو فهم بسيط في الصيانة ممكن تفهمي نظام عمل الشبكات وهكذا هي كلها حاجات قد تبدو بدائية لكن فيه ناس كتير متعرفش اي حاجة عن الكلام ده

بص انت في مرحلة عفوية بتبقى عاوز تجرب كل حاجة واي حاجة وعاوز تعمل حاجات كتير مع بعض عاوز اقولك ان كلية هندسة هي طريق الملتزمين بس انت نقي صحبتك فيها كويس لان دي اللي هتكمل معاك وعلى حسب صحبتك هتلاقي طريقك اختار الناس اللي ملتزمة وبتهتم بالصلاة عشان يشدوك ويشجعوك معاهم وهتلاقي نفسك بالتدريج حياتك بتتحسن دينيا ودنيويا ودراسيا كمان انا كنت في الكلية وخلصت الحمدلله فبقولك على حاجات من واقع وتجارب قدامي وبالنسبة لقدرتك على المذاكرة هترجع بالتدريج وطالما ربنا وفقك ودخلت الكلية بجهودك يبقى ربنا عارف انك قدها ان شاء الله وانت اجتهد واعمل اللي عليك وحاول تستفيد من ايامك في الكلية هتفرق معاك اوي حقيقي بعدين كنت اتمنى ان حد يديني نصيحة زي دي ومتاخدش الكلية انها مواد وعاوزين ننجح لان كل اللي هتفهمه كويس هتلاقيه بعد ما تخلص ومبروك يا باشمهندس مقدما ..

مفيش شك ان الشعور بالاذى النفسي واحد من اصعب الحاجات اللي بتعدي على الانسان عموما لكن بتختلف في الدرجات وحسب الشخصيات فيه ناس ممكن ترد ده بأذى وفيه ناس ممكن تنتقم وفيه ناس ممكن يجيلها حالة نفسية او تكتئب وفيه ناس بتمتص الموضوع وتنساه وفيه ناس بيعلق معاها الموضوع لفترة وفيه ناس بتقدر تسامح ان الانسان يكون بطبعه بيسامح ويعفو دي مش حاجة وحشة اكيد دي نعمة من ربنا لكن المسامحة والعفو بالنسبة لينا كبشر اكيد ليها حد معين وبعدها الانسان بيتغير سلوكه شوية بالذات لما يتعرض لموقف من حد مكنش يتوقع منه كدة الحل في كدة ان ميسلمش نفسه لدماغه ويتجاهل الشعور ويعاند نفسه ع كدة ويدعي ربنا يجبر بخاطره والمسامحة هنا بتكون لله عشان منفتكرش الناس اللي اذتنا لان طول ما حرارة الموقف جوانا هنفضل فاكرين وهيتجدد الشعور فلازم الانسان يعفو عشان خاطر نفسه اولا واكيد هيكون قطع علاقاته بالشخص اللي سببله اذى وحتى لو قابله يتجاهله كانه مشافوش ومع الوقت الامور هتبقى احسن ان شاء الله كل حاجة مع الوقت بتروح

محدش فينا بيختار اهله ولا بيختار نفسه ولا ظروفه بس ربنا قالنا " وبالوالدين احسانا" يعني كلنا مضطرين نتحمل اي امور بتحصل منهم وكلمة الاضطرار هنا مش اننا نعاملهم من تحت الضرس لا بمعنى اننا ملزمين بكدة .. وجايز يكون ضررك من افعالهم هو باب ليك عند ربنا كون انك صابر ومتحمل الاذى احتراما وتقديرا ليهم ربنا فاتحلك الباب ده تزود بيه رصيدك من الحسنات والصبر على البلاء حاول متزهقش على قد ما تقدر واحتسب الامر لله واكيد مسيرك هيبقالك حياة والامور هتخف لكن متقطعش بيهم لان عقوق الوالدين شر وشر مؤذي.

ما رميت اذ رميت ولكن الله رمى الايمان بالله والتوحيد به من اهم ركائز العقيدة وطول ما انسان متقين من كدة هيعمل حاجات متتوقعهاش لان الاسلام دي عزة وكرامة وليس دين مهانة وانبطاح ربنا في كلامه لينا في القران اننا نقاتل من اعتدى علينا يعني منقفش نتفرج ونسكت وحتى الرسول وصى على كدة وفيه حديث انه : جاء رجل إلى رسول الله صلى الله عليه وسلم فقال: يا رسول الله، أَرَأَيتَ إن جاء رجُل يُريد أَخْذَ مالي؟ قال: «فلا تُعْطِه مالك» قال: أَرَأَيتَ إن قَاتَلَني؟ قال: «قَاتِلْه» قال: أَرَأَيتَ إن قَتَلَنِي؟ قال: «فأنت شهيد» قال: أَرَأَيتَ إن قَتَلْتُه؟ قال: «هو في النَّار ده احد مفاهيم العقيدة ان الاسلام مقلناش نخاف ونقعد واليهود قوم جبناء عمرها ما يواجهوا وش في وش لازم حربهم من بعيد وصواريخ اما قتال فردي فهم طبيعتهم ووصفهم في القران كدة جبناء معندهمش عقيدة صحيحة حتى وقت غزوة بدر ان لم تخني الذاكرة لما كان عدد المسلمين ٣٠٠ والكفار ١٠٠٠ والنبي عليه افضل الصلاة والسلام دعى ربنا ونزلت آيه " اني ممدكم بألف من الملائكة" يعني عندنا مواقف وحاجات كتيرة ان ربنا دايما في ضهر المسلم المؤمن الموحد الواثق في الله ربنا ينصرهم ويثبتهم ويرزقهم فرج قريب

فيه حتة كدة في منتصف الحديث ان عندك طفل مش عارفة تركزي معاه.. الحقيقة ان هو ده اللي لازم يبقى محور اولوياتك واهتمامك لا الشغل ولا الدراسات ولا اي حاجة اهم في الوقت الحالي التربية اصعب شيء خصوصا بعد غزو التكنولوجيا والريلز والتيك توك وما شابه .. انتي حاطة لود على نفسك مش مطلوب منك حتى شغلك ده المفروض هو على قدر استطاعتك ومياثرش على اولادك كون ان فيه تاثير وتقصير ناحيتهم يبقى لازم تعملي ستوب وتعيدي حساباتك الدنيا دار فناء مفيش حاجة تستاهل كل ده وانا بالمناسبة بقعد اقول لنفسي كدة اهم حاجة اننا نسيب بصمة صحيحة وانتي ربنا كرمك بطفل هو اهم زرعة وبصمة في حياتك وانه يطلع صالح ويدعيلك هدي نفسك وخفي المسؤوليات اللي زيادة على الفاضي .. اتعلمي اكلة جديدة تابعي دورات تربية وبلاش نظام التربية الاوروبي .. جربي مثلا تعدلي حاجات في بيتك ولو بسيطة .. واكيد لو مش بنصلي لازم نلتزم ونصلي وندعي ربنا يعينا على كل حاجة ان شاء الله ربنا يزيح همومك وييسرلك امورك

من تجربة الاغتراب اكتر حاجة بتهون شعور الغربة هي الناس اللي معاكي نفسهم لو مفيش راحة وامان من ناحيتهم هتحسي نفسك طول الوقت مشتتة وقلقانة ودماغك بتودي وتجيب .. والواحد بيكون كفاية عليه الاغتراب فالافضل تبعدي عنها باي حجة ولو كانت مادية حتى لان انتي اخدتي عنها صورة وطبع وغالبا عشان تغيريهم هيكون صعب شوية .. اما بالنسبة لتعلقك باهلك الموضوع هيكون رخم شوية ف الاول بس مع الوقت هتلاقي نفسك اتأقلمتي المهم يبقى خروجك ودخولك محدود وللضرورة ومش معنى انك بعيد عنهم ده يديكي حرية لاي حاجة بل بالعكس ده هيزود مسؤولية عليكي وفي نفس الوقت تبقي حامية نفسك من اي موقف ممكن يحصل

اكتر حاجة عارف انها بتأثر في نفسية اي حد من صغره هو انه ميلاقيش الحنية اللي بيحتاجها في البيت لانها بتخليه يدور على اي حاجة شبها وللاسف بيلاقيها برا في صور كتيرة واوقات مبيبقاش عارف الصح من الغلط .. طيب خليني اقولك ان قصة انك شايلة ذنبه دي انسيها واركنيها على جنب انتوا الاتنين كنتم غلط والاولى انك تبصي لغلطتك وهي انك تبعدي عن التطبيقات والبرامج دي وتفوقي لنفسك ميصعبش عليكي هو مسيره هيفوق ويعرف ويفهم ان ده كان مينغعش خصوصا انه كان وقت مزيف .. شوفتك قولتي انك قطعتي علاقتك بيه وقفلتي كل حاجة ياريت تستمري على كدة ومتدوريش على حنية برا وادعي ربنا يرزقك بزوج صالح يعوضك عن كل حاجة وادعيه كمان يرزقك بذرية صالحة تقدري تديهم وتعوضيهم عن اللي دورتي عليه على الاقل انتي هتبقي فاهمة كويس احتياجاتهم .. احيانا الغلط بيكون القلم اللي بيخلينا نفوق والاهم انك موقعتيش في حاجة كبيرة.

اولا مش عاوزك تبقى مخضوض وقلقان اوي كدة الامور بسيطة ان شاء الله انت ممكن بس قلقان او متوتر من تالتة ثانوي ودماغك شغالة كتير ونفس الوقت عاوز تثبت نفسك وتحقق حاجة انت مش مطلوب منك غير انك تعمل اللي عليك وتذاكر على قد ما تقدر ومفيش حاجة تعينك وتساعدك غير الصلاة وانك تدعي ربنا يوفقك ويكبتلك الخير وخليك فاكر دايما ان ٣ ثانوي ماراثون مش سباق ١٠٠ متر وخلصت لا اللي نفسه طويل هو اللي بيوصل فمتخلصش كل طاقتك من اول شهرين خليك متابع كل المواد اول باول وذاكر بترتيب اكيد هتلاقي نفسك سابق في مواد ومواد لا المهم تبقى متابع كويس كل حاجة واللي ربنا كاتبهولك هتاخده ومتركزش مع حد خليك مع نفسك ممكن حد تسمع انه بيذاكر ٥ ساعات مثلا وانت ساعتين بس ممكن متبقاش عارف ان انت استيعابك في الساعتين قده ماهو هو استوعب في ٥ خلي مقياسك دايما هو باللي بتقدر تنتجه وتطلعه ربنا يوفقك ويكتبلك كل خير ان شاء الله

مفيش اهم من العلاج الديني لان محدش هيقدر يساعدنا زي اللي خلقنا هي نقطة غير علمية اكيد بس حسب الفطرة بتاعتي بحس ادوية الاكتئاب دي فيها حاجة غلط هي ممكن بتهدي او تسكن او تغير حاجة لكن برضو الاكتئاب مش مرض عضوي ده مرض نفسي ومفيش حاجة تهدي النفس زي الصلاة والقران والصوم وعشان تعملي كدة لازم تسمعي محاضرات تفهمي فيها دينك وتعرفي ان ده مش حال المسلم وان المسلم مينفعش اصلا يكتئب سيبك من العلم الحديث كل ده بالنسبالي انا مسميات عندك على اليوتيوب الشيخ سمير مصطفى وايمن عبد الرحيم وعلاء حامد ادخلي على اي حد واتفرجي عليهم واسمعي شوية في امور الدين واقراي قران وادعي ربنا يخرجك من الكرب ده وواظبي على اذكار الصباح والمساء ياريت متكسليش نفسك وتشدي همتك من تاني طالما لسه ربنا مديلك صحة وعافية واحمدي ربنا على اي حال انتي فيه اسال الله العظيم ان يفرج همك ويفك كربك ويصلح حالك

كل حاجة بنستخدمها نقدر نصنفها روبوت التليفون والغسالة والتليفيزيون والكومبيوتر وماكينات التصوير بالاضافة الى شغل المصانع وخطوط الانتاج كل حاجة من دول بتعمل حاجة الانسان مبيقدرش يعملها ومنهم اللي بيسهل حياة الانسان الانسان صاحب التطوير وهو المؤسس الربوت ما هو الا متلقي معندوش مشاعر طبعا والكلام بتاع الافلام اغلبه كدب وبالفرض انهم حطلوا مشاعر بتكون عبارة عن صور مخزنة في ذاكرته عن شكل المشاعر الكلام ده كله بيتم بالاكواد والبرمجة زي اي حاجة الكترونية والعقل بتاعه زي التليفون والتطبيقات ماهو التليفون لما بتقوليله انقل دي احفظ دي صور دي اكتب دي بيعمل هو نفس الفكرة مبياكلوش طبعا لانهم بطاريات شحن يعتبر او حسب مصدر الطاقة اللي بتشغلهم وطبيعي هيكون اسرع منك لانه معندش اريح اشرب شاي ولا ادخل الحمام ولا ارد على تليفون ولا اصلي ولا هنام ولا اي حاجة هو بيشتغل بكامل طاقته لحد ما تخلص هو في النهاية وسيلة للمساعدة لكن شيطان النفس ممكن يحوله الى آلة تخريب الصوره خلصت بس حلو؟

هو غلطان ؟ اكيد غلطان وليكي حق في كل حاجة بصي هو عارف ان مفيش زيك وانك احسن منها ده دليل انه فضل ماسك فيكي لما اصريتي على الطلاق طيب قصة الحلفانات وانه كل شوية يرجع دي نفس ضعيفة وهي كانت واخدة حتة جواه مش حب لا شعور انفلاتي شوية بصي اغلب العلاقات اللي بنشوفها بيكون ناقصها ان الزوج والزوجة يكونوا اصحاب وبينهم لينك تفاعل وهزار حتى لو فيه قلة ادب بس مش على بعض اكيد وبرضو العلاقة تفضل كل واحد بيحترم التاني ده بيخلي الراجل عنده قابلية انه ممكن يكلم مراته في اي حاجة لكن الاغلب بيكون ماشي بينهم معاملة صارمة مفيهاش خد وهات اينعم محترمين وبنحب بعض وكل حاجة لكن الراجل عنده حتة فساد كدة لو مقدرش يطلعها او يسيطر عليها بيبدا يشوف منفذ او مخرج فيه اللي بيقدر يمنع ده وفيه لا لو قابل حد يحركه من الحتة دي طبيعي هيضعف ومتقوليش انا بهتم بنفسي وجميلة والكلام ده لا هتلاقي رجالة بتبص لستات في نظر البعض دي شعبية ازاي ده بصلها ده بص مراته لكن هو مبيشوفش كدة هو بيشوف الحتة اللي اتحركت جوا عاوز يخرجها انا مبدافعش ومبديش مبرر لكن بفهمك منظور قد يكون البعض مبيبصلوش او مش فاهمة هو للاسف عنده الحتة دي ضعيفة عشان كدة كان متمسك بيكي لانه عارف انتي ايه اما هي فكانت حاجة شاغلاه وخلاص مش اكتر مشاعرك الداخلية محدش يقدر يلومك عليها لكن فيه رجالة كتير في مواقف تانية بتضرب ام ولادها وتطلق وتخرب الدنيا وحسب ما قرانا انتي مذكرتيش حاجة من دي طالما اديتوا نفسكم فرصة تصالح جربوا تتكلموا في تجديد او اساليه شاف فيها ايه شغله حاولوا تطوروا من علاقتكم سوا كل واحد يتعلم اساليب جديدة ربنا يصلحلكم الحال

اعتذرلك لو رأيي ممكن يبقى صادم شوية لكن تعالى نبص لاساس الجواز وهو الاستقرار والاستقرار بيتمثل في ان ليك عمل ثابت ودخل مادي ووضعك مستقر وانت حاليا تفقد الاتنين انا بكلمك بمبدا انك رايح تكلم والدها ودول اول حاجة هيسالك عليها ده طبعا بعد ما هيشوف اخلاقك وان كنت كويس ولا لا لو عاوز رايي بلاش الموضوع عشان انت شخصيا هتتعب اما قصة الزواج من اجنبية او عدمه ده بيكون حسب شخصيات الناس ومدى توافق العادات والتقاليد لان اكيد ده شيء مهم ربنا يصلح الحال يارب ويرزقك الزوجة والذرية الصالحة

هي الفكرة اننا في زمن كله بيبص لكله والناس خلت مقاييس الحلو والوحش في حاجات مش اساسية ناس كتير حلوة متتعاشرش وناس زيي وزيك بنقول عليهم عاديين لكن قعدتهم حلوة وتتحب سيبك من التيك توك والانستجرام والسناب شات وكل ده فيك وكدب وفلاتر دي حياة مش صح كلنا بيطلعنا حبوب وقبل المشوار المهم بيوم هل هنقعد بقى خلاص مصالحنا تموت؟! اكيد لا مش منطقي يعني والفلوس مبتعملش حاجة انتي عارفة لو بقى معاكي فلوس على تفكيرك ده هتقضيها عمليات لحد ما تبهدلي شكلك ونفسك وفي النهاية هيكون ناقصك اهم من الفلوس هو الرضا بالنفس وتبص لنعم تانية ربنا مديهالك غيرك بيقول ياريت انا مكانها واتوقع انك قاسية على نفسك في الحكم هون على نفسك كلنا فينا الحلو وفينا الوحش احنا باكدج على بعضه مش بننقي صفاتنا وشكلنا وبعدين لما تجيلك الحباية تاني اخرجي اللي هيشوفوكي عندهم هما كمان واحدة بس انتي مش شايفاها 😅 قولي الحمدلله انك بصحتك وقادرة تعملي حاجات كتير واستعيذي بالله من الافكار دي لانها نفس شيطانية عشان تكدر عليكي حياتك حاولي تقربي اكتر من ربنا وان شاء الله كل حاجة هتتحسن

ضحكني من تحت لتحت 😅 هي القصة مفهومة ونوايا العمة واضحة ربنا يهديها ويهدينا ويصلح حالنا جميعا مفيش عليكم ذنب لكن ممكن تكلموها على طول بالتليفون وتطمنوا عليها وان وجب زيارة ممكن تروحوا ولو وقت صغير وتمشوا لان فهمت من ملناش مكان هناك انكم مفيش مكان تباتوا فيه او مش عارف جايز المسافات بينكم بعيدة وخلي والدك يروح معاكم عشان يسكت عمتك 😅 ربنا يصلحلكم الحال

اولا اتكلم مع نفسك وتصارح ان اللي حصل ده ملكش ذنب فيه ومش بارادتك ولا باختيارك تاني حاجة اقنعها انك راجل طبيعي مفيش حاجة اسمها شاذ ده فعل محرم وفطرة غير سوية ومتحكيش مع حد في القصة دي ولازم تلتزم الصلاة وتقرب من ربنا وتطلب منه يساعدك ويعينك انا مش عارف انت سنك كام بس روح لاخصائي عشان لو فيه اي مرض او تعب ياقر عليك وتعافى واطلب من ربنا يرزقك زوجة صالحة متفكرش في الموضوع كتير مع نفسك وقول لنفسك انا كويس وطبيعي واقنعها بكدة ربنا يعفو عنك ويشفيك يارب

مع الحلول الطبية التزمي باذكار الصباح والمساء وحافظي على صلاتك طبعا وياريت لو تخلي والدتك ترقيكي او ترقي نفسك رقية شرعية وممكن النوم ده انعكاس انك خايفة او قلقانة من الثانوية العامة خدي الامور ببساطة ومتوتريش نفسك لسه السنة طويلة وعلى مهلك

طب انتي لسه كتكوتة ايه الكلام الكبير ده بصي ليا اخت من سنك كدة وعندها اصحاب برضو وكانت بتشتكي منهم قولنالها تبعد عنهم وتشوف اصحاب تانيين كويسين انتي هتلاقي كل اصحابك اللي في سنك بيتغيروا كتير لحد ما تكبري خليكي مع البنات الهادية الطيبة متصاحبيش اي حد وخلاص وبعدين اي حاجة تحتاجيها ادعي ربنا وقوليله يارب انا عاوزة الحاجة دي يارب انا خايفة من الحاجة دي ومتقلقيش من حاجة ومتخليش حاجة تضايقك ولو على بابا وماما متزعليش منهم هما بس خايفين عليكي شوية وميقصدوش يزعلوكي وبعدين مش عندنا مدرسة هتبدا بقى ولا ايه عاوزين مذاكرة كويس

كان الله في العون وربنا ييسر الامور باذن الله ممكن يبقى عندي وجهة نظر مختلفة شوية انتي كبنت مش مطالب منك في الحياة تكسري الدنيا خصوصا ان الحياة بقت صعبة تاني حاجة رفقك بحالة والدك ده ربنا هيجازيكي عليه خير ان كان فيه مجال تاني تقدري تدخليه بدون مصاريف توكلي على الله فيه اراء بتقول انك تشتغلي مع الدراسة لكن ده بيعتمد على حاجات كتير اولهم مصاريف الكلية كام ؟ ووالدك لو ضحى هيقدر يدفع منهم كام ؟وعندك اخوات ولا لا لان بالتبعية الكلية مش مصاريف السنة وخلاص لا ده فيه اكل لبس مواصلات ورق وغيره وغيره كمان لو انتي اشتغلتي هتقدري توفري كام ؟ وبرضو الكلية تاني هتفرق عشان تذاكري وتكملي كويس ما انتي مش داخلة الكلية تشتغلي وتصرفي عليها انتي ووالدك خدي العوامل دي في اعتبارك قبل اي قرار وفي النهاية انتي كبنت هيكون اولويتك ان شاء الله المفروض لبيتك دي حاجة فطرية وطبيعية مش عيب والله ولا حاجة ولو عملتي نجاح في مجال الشغل فده حاجة اضافية لنفسك

طيب من الاخر هو كان عاوزك تيجي معاه سكة ارتباط وكلام عاطفة وكدة وانتي صدتيه وحاول يشتغلك ويلعب على مشاعرك ويحسسك بالذنب مرة ومرة تانية يختفي ويراقبك ومرة يدخل يكلمك ويحاول يصلح الدنيا ومرة كويس كل ده وانتي مستجبتيش ومفيش منك مدخل ودي حاجة تحسبلك الحقيقة تاني حاجة شيخ ايه اللي سأله !! ده شيخ منصر طبعا هو ولا سال شيخ ولا سال حد ده كداب اساسا ومفيش حاجة اسمها الحب بالجوهر الجوهر ده كان لاعيب كورة فانتي يابنت الناس امسحيه وامسحي اي رقم واي حاجة تخصه واسم امه وابوه وكل اللي يعرفوه والتليجرام اعملي الحالة بتاعتك للفريند فقط مش للعام مش اي حد معاه اليوزر نيم بتاعك يخش يشوف ولو فكر يكلمك متديش فرصة اساسا لو بيقولك ساعديني بموت سيبيه يموت اسمعي مني وبلوك وديليت وكل حاجة

في الحقيقة منقدرش نحط نفسنا مكان اي طرف لان الحكم على القصة ظاهري فقط كمان كل واحد فينا بتختلف عنده درجات التسامح يعني ممكن الموقف بتاعه انتي سامحتي فيه وقدرتي تعديه ممكن هو في موقفه حس احساس وحش وممكن يكون شخص مش سوي نفسيا انه بيعمل نفس الموقف وبيحطك في نفس اللفة لما جه يعتذرلك كتير في الحالتين انتي يفضل نبعد عنه انا دايما بشوف الناس تقول العلاقات لازم فيها بلوك عشان يبان الحب ! لكن في وجهة نظري ده عبط لان العلاقات مبنية على الاحترام والتقدير وحتى لو انتهت فهي انتهت يبقى ملوش داعي انا عندي ناس كانت غالية عليا جدا ومبقيناش نعرف شكل بعض حتى مش مبنتكلمش لكن معملناش بلوك ولا حاجة تجاوزي الشخص ومتوقفيش قصاد الموقف طالما قفل الباب ومشي اقفليه انتي كمان واختفي ومتنزليش عن نفسك حاجة ولا تنشري اي اخبار هتلاقيه بعد فترة بيحاول يلفت الانتباه وهتتاكدي وقتها ان قفلك للباب كان صح

اولا ياباشمهندس مبتتحسبش كدة انا زيك مهندس موقع وفي الاول كنت بشوف ان واجب احترام الكبير والصغير من المدير للعامل لكن فعليا لا فيه فئة لازم تشد عليها وتوريها تعامل صارم وان الشغل شغل وطبعا بدون قلة ادب على حد معانا شركة مقاول باطن في المشروع مديرها حرفيا طوله يمكن ١٥٠ ل١٦٠ وعايز اقولك ممشي الناس بتوعه ع كلامه وكل حاجة باذنه وليه احترامه وسطهم الشغل مش محتاج اللين اكتر من اللازم خصوصا ان اغلب العمالة بتحب تستظرف وتهزر قدامك كذا حل عشان تعمل كارت ارهاب انت كدة كدة مسؤول نبه على اي حد مثلا ع الحاجة الفلانية انه لو معملش كذا هتخصمله او هتجبله جزا والله اخد كلامك ياهتمام يبقى كويس استهتر يبقى ميلومش غير نفسه ومفيش حاجة اسمها جسم اكبر منك احنا مش في جيم ولا حلبة مصارعة ولازم تفهمهم بالطريقة كل واحد يشوف شغله وخلي حد يفكر يجي جنبك المكان اللي انت شغال فيه مش هيسمي عليه طالما انت صاحب حق وبتتكلم في شغل معلش للاسف الواحد بيكتشف ان الناس عاوزة كدة في الشغل

والله محدش عارف الخير فين وارتباطك الشديد اوي بالشخص ده برضو مش سليم القلوب بتتغير في لحظة استخيري ربنا في الموضوع وادعي بالخير فقط متدعيش تقولي يارب انا عاوزاه هو وبس مش يمكن يطلع شر ؟ فانتي دايما دعوتك بالخير وان ربنا يوفقك في الاصلح ليكي ولو ليكي نصيب في حاجة هتاخديها ولو مخدتيهاش الايام هتعرفك ربنا منع عنك الحاجة دي ليه ووقتها هتقولي الحمدلله

قبل اي حاجة عاوزك تهدى وتاخد نفسك الدنيا بسيطة ان شاء الله تاني حاجة اسمحلي اسالك اخبار الصلاة ايه ؟ والدعاء ؟ وهل بتدعي ربنا يعينك ويساعدك ولا لا ؟ كل دي امور اهم من اي حاجة نيجي لطريقة المذاكرة انت تقدر تجمع بين الاتنين انك تقرا وتفهم وبعدها تسمع بصوت وتحفظ وفيه انك تكتب الكتابة بتساعدك تثبت المعلومات بشكل كبير وكتر الحل والممارسة والمراجعة بيخليك فاكر دايما معظم الشرح والاجابات ومتركزش مع حد سبقك ولا حاجة انت ممكن اللي شايفه سابقك ده ربنا مثلا مديله سن ٤٠ سنة ويتوفى وانت تكمل حياتك وتعديه فهمت الفكرة ؟ فكل واحد ربنا مديله حاجة وواخد منه قصادها وكلنا منعرفش اي هي انت اعمل اللي عليك واطلب العون من الله وتوكل مفيش تأجيل اكتر من كدة واخطبها زي ما تيجي تيجي بس المهم تكون حاولت وان شاء الله ربنا يوفقك

وايه اللي بيخليكي تضغطي على نفسك بالشكل ده ؟ مفيش حاجة تستدعي ان الانسان يكتم نفسه بالطريقة دي كدة بتموتي نفسك بالبطيء خصوصا لو امور متستاهلش وممكن تبقى في نظرك كبيرة او انتي مدياها اكبر من حجمها بالنسبة لنقطة النظام محدش فينا بيختار اهله هما فيهم مميزات وفيهم عيوب لكن تقدري تختاري شريك حياتك بعد كدة وتبقي متكلمة معاه وتفهمي طباعه وسلوكه عشان تبقي مرتاحة في بيتك مستقبلا انما والدك ووالدتك خلاص هما كدة مينفعش نجرحهم بكلام ولا نزعق فيهم واخر جزئية متفكريش كتير في اللي جاي انتي وانا واي حد ميعرفش ايه اللي هيحصل كمان كام دقيقة مش بكرة حتى فحطي في دماغك انك تسيبها على ربنا واللي في نصيبك هتاخديه مهما كان وحتى لو عرفتي حاجة هتحصل ومقدرلها تحصل يبقى هتحصل ومحدش هيقدر يمنعها ادعي ربنا يعينك على نفسك وكل ما تجيلك افكار غريبة استعيذي بالله من الشيطان واقراي سورة الاخلاص

اولا وقبل كل شيء ربنا يرحم والدتك ويغفرلها يارب بصي في فيديو شهير للشيخ سمير مصطفى بيقول فيه اننا منقدرش نعمل حاجة ومنقدرش نستحمل اي حاجة عشان احنا بشر لازم نستعين بالله سبحانه وتعالى ونطلب منه العون دايما لاننا مخلوقات ودايما محتاجين مساعدة من اللي خلقنا .. ربنا عمره ما هيضيع تعبك ولا يعمل حاجة ضد مصلحتك كل ما علينا هو اننا نحاول ووالدك ممكن حصله اضطرابات نفسية بعد وفاة والدتك فبقى عنده افكار واحتياجات ويمكن مشاعر مش مفهومة بالنسبالك وهتلاقي ده للاسف بينعكس على شخصيته بالسلب اغلب الاوقات وطالما انتي الحمدلله بتعرفي تذاكري وتجيبي مجموع حلو يبقى هتقدري ان شاء الله في تالتة ثانوي تحققي اللي انتي عاوزاة كل اللي عليكي انك تستعيني بالله وطبعا مش هوصيكي ان الصلاة اهم من كل اللي فات ده

داومي على اذكار الصباح والمساء وادعي دايما وقولي اللهم اهدني و قني شر نفسي وطالما مفيش حاجة حصلت من اي شخص يبقى خرجي الافكار دي من راسك وحتى لو حصل احنا بشر كل الناس تصيب وتخطأ محدش هيفضل تعبان غيرك وارمي دايما حسن النية من صفات المؤمن انه بيحاول دايما يبقى متفائل وفيه مقولة عن الصالحين التمس لاخيك سبعين عذرا فيما معناه انت متعرفش اللي قدامك عمل كدة ليه او ايه السبب فمش معنى انك هتتتعاملي بحسن نية ومع اول موقف تقولي ده انا غلطانة ده انا استاهل ده انتم كلكم وحشين لا اكيد مفيش الكلام ده اعرفي اللي قصادك عمل كدة ليه ولا ايه اسبابه يمكن كان غصب عنه ولا ميقصدش ولا تعبان وعنده ظروف صعبة هوني على نفسك وكل ما يجيلك افكار شك اتفلي عن شمالك ٣ مرات واستعيذي بالله من الشيطان ٣ مرات واشغلي نفسك باي حاجة تانية

ايه الهدف من انك تكدبي ؟ الانسان بيكدب عشان خايف من حاجة او بيكدب بهدف لفت الانتباه او بيكدب بسبب سوء طبعه وخبث نواياه فانتي اني واحد من دول ؟ واي نوع من التلاتة بعد ما تكدبي هتلاقي نفسك بقيتي وحشة اكتر في نظر نفسك وكمان في نظر اللي قدامك لان اكيد هما عارفين انك بتكدبي وبتألفي بس يمكن محدش بيرضى يحرجك لكن هيجي وقت وهتلاقي نفسك بتخسري كل حاجة ده كمان فيه حديث للنبي عليه افضل الصلاة والسلام عن الكذب "وإيّاكم والكذِبَ، فإنّ الكَذِبَ يَهْدِي إلَى الفُجُورِ، وإِنّ الفُجُورَ يَهْدِي إِلَى النّارِ وَمَا يزَالُ العبْدُ يَكْذِبُ وَيَتَحَرّى الكَذِبَ حَتّى يُكْتَبَ عِنْدَ الله كَذّابا". مفيش حد يستاهل انك تباني قدامه كويسة بالكذب ولما تبصي لنفسك وتلاقي حاجة مش عجباكي افتكري ان كل الناس كدة فيها حاجات مش عجباها محدش فينا كامل ومتلوميش نفسك على حاجة مش بايدك في حياتك عموما

قبل كل حاجة الانتظام في الصلاة والدعاء بالتوفيق هو رقم واحد بعد كدة يجي تنظيم الوقت وتنظيم الوقت اننا منضيعش وقت في الفاضي يعني نقلل وقتنا على الفون والميديا ومنراكمش مذاكرة ونبقى متابعين اول باول ونحاول نتجاهل المغريات اللي للاسف بقت كتيرة زي المسلسلات افلام فيديوهات وهكذا ونحاول نحفز نفسنا دايما ومش معنى كدة هندفن نفسنا لا اكيد فيه ايام راحة خروج عشان الانسان يقدر يواصل ويكمل

احيانا بيكون خوف من الغلط او الفشل او اننا نبان مش اصحاب قرار لكن ف الحقيقة مفيش كدة لما يجي ف بالك قرار او فكرة نفذها على طول طالما هي حاجة صح مش غلط ومتديش لنفسك فرصة تفكير كتير ف كل حاجة لان ده بيخلي حتى الحاجات الصغيرة بيحصل فيها تردد وده مش مطلوب

فيه نقطة تانية كتير مننا بيغفل عنها خصوصا اللي بيتعامل بتلقائية وعفوية وهي الحدود .. اللي ممكن نسمح للي قدامنا يتخطاها شوية او بمعنى ادق نسمحله ياخد مساحة زيادة من وقتنا من راحتنا من تفكيرنا ونيجي على نفسنا عشان اللي قصادنا ميزعلش او اني مبقاش كسفته وهكذا لكن في الحقيقة لازم يبقى فيه كلمة لا واني مش مطالب احل كل مشاكل اللي بقابلهم وبتعامل معاهم مهما كان درجة الثقة فيه حاجات مينفعش نحرف فيها طاقة عشان لمجرد المساعدة ونيجي على نفسنا وفي الاخر مبيتقالش شكرا ومفيش حد بيقدر كل حرق الطاقة ده ... يبقى على الاقل ادي لنفسي حق الراحة وده ميمنعش ان لو قادر اساعد حد اساعده لكن مظلمش نفسي عشان خاطر حد ... وقصة الكلية والتعليم دي حاحة مش شايف فيها مشكلة مكانتك مش بالوظيفة المهم انتي بتعرفي تعملي وتقدمي ايه ليكي وللي حواليكي والعلوم الدينية اهم من الدنيوية فيه واحد ممكن يكون تعليمه عادي لكن حافظ القران والتفسير اكيد بنبصله بصة انبهار فقصة الكليات دي متشغلكيش ركزي في كليتك ايا كانت واستفيدي من محتواها وقولي الحمدلله انك حد يعتمد عليه وبيعرف يتصرف فيه كتير غيرك بيغرق في شبر مايه لو دخل يعمل كوباية شاي لوحده😅

حل المشكلة بمشكلة فهو بكل بساطة زيادة مشاكل .. الحدث اللي حصل وانتي صغيرة والحمدلله انك بخير خلاص انسيه وطلعيه من راسك طالما مفيش اي ذكريات او اشخاص موجودين في حياتك من ناحية حاجة زي دي .. ربنا مديلك مميزات وقدرات تانية وانتي بتهربي منها طب ليه ؟ حبي نفسك وشخصيتك متهربيش منها ومش مضطرة تعيشي نفسك قصص وهمية ما تعيشي قصتك انتي بأحداثك الحقيقية وخلي يومك ومساعدتك لغيرك هو اللي بيبسطك .. وتجنبي تتكلمي مع ولاد واقطعي على نفسك شعور الذنب وتأنيب الضمير ده متعمليش زي اللي عارف ان النار بتلسع بس كل مرة بيروح يجرب

الافضل مراجعة وزيارة الطبيب في اسرع وقت ممكن .. سلامات

لا حول ولا قوة الا بالله .. لو خلصت كل الحلول الودي اكيد مش هنقدر نلومك لو فكرتي في حاجة تانية ربنا يعينك وييسرلك الامور

طيب هو بيبعت مصروف لبنته منتظم ؟ تاني حاجة لما رد واتكلمتي معاه كان ايه رد فعله ؟ عرفتيه انك مش ناوية تكملي عرفتيه ان اهلك عاوزين يرفعوا قضية هل اتكلم عن البنت ؟ كمان انتي القضية هترفعيها لايه ؟ عشان مصروف البنت؟

ماهو مفيش تفاهم بناءا عن ايه ؟ رافض وجودكم ولا مبقاش عاوزكم ولا هو ايه تفكيره ودماغه ؟

غالبا ايوة جربي اسالي على الدراسات العليا في جامعات الحكومة وهما هيدلوكي حتى لو فيه في الخاص

ولو خامس جوازة هي دي منظر جوازة؟ وهو ده منظر اب ؟ عمر التربية ما كانت كدة ولا كان الجواز كدة ولا هو ده العدل اللي اتوصى بيه استخيري ربنا في اي خطوة تعمليها وتوكلي على الله انما الوضع اللي انتي فيه ده مينفعش اما قصة القضية دي الله يسامح قوانين الاسرة ومن رأيي طالما دخلتم بالمعروف تخرجوا بالمعروف

للاسف الاحتمالات كتيرة والموضوع متشعب ربنا يتم شفاكي على خير وان شاء الله فترة علاجك متطولش وحاولي تبقي قريبة منه حتى لو العلاقة خارجية هتفرق معاه والحكم بتاع انه مدمن وكدة ميبانش غير لما تخفي وتبقى العلاقة بينكم طبيعية واكيد كلامي مش مبرر لحاجة ولاي تصرف غلط ربنا يصلحلكم الحال

ده شعور طبيعي هيقل بالتدريج كل ما صغرتي حجم الشخص ده ف عينك وانه اصبح بالنسبالك وجوده زي عدمه كمان كل ما قررتي تسامحي لنفسك بهدف انك تنسي الموضوع من دماغك

ادعي ربنا يكتبلك الخير سواء م الشخص ده او غيره بس خلي دعاءك دايما بكدة انتي متعرفيش في النهاية الشخص ده كويس ولا وحش وعن تجربة شخصية مش كل الناس محل ثقة لان مش كل الناس تستاهل ولو ربنا منع حاجة عنك تأكدي انها في مصلحتك

رجعنا لنفس الدايرة .. طالما مفيش امكانية تنقلي الشفت او تغيري القسم يبقى هنفضل في نفس الموضوع للاسف

للاسف لازم طبيب مختص لان اي نصيحة بدون علم هتكون مذية .. ان شاء الله الحالة المادية تسمح وتتحسن ممكن تحاولي تجمعي الكشف ولو ع فترات بس المهم لازم ارشادات طبية

العلاقة السطحية هي اللي التعامل فيها يكون بحدود كبيرة وعلى القد فقط ومبيبقاش للعشم فيها مكان لان احنا بطبعنا مع اللي بنحبهم بيبقى عشمنا فيهم كبير اما مع حد نعرفة معرفة خفيفة بيكون عندنا حذر كبير لو فكرنا نطلب حاجة .. كمان بيبقى معلوماتنا عن بعض قليلة ومساحات الكلام كمان صغيرة يعني واغلب العلاقات دي بتكون في الكليات والشغل

من تجربة شخصية مكان العمل لو مش مريح نفسيا او التعامل فيه مقبول لا انا هعرف اركز واستفيد ولا هقدر افيد لان انا بتعامل مع بشر عدد ساعات كل يوم اكتر من اهلي طبيعي اني احس ع الاقل اني متقبلهم تاني حاجة الاماكن مخلصتش والخبرات عمرها ما بتخلص عشان افضل قاعد في مكان دمي محروق وبضغط على اعصابي بل وممكن اتعب كمان ايه اللي يستاهل كل ده ؟ الشخصيات اللي زي دي ملهاش حل خليها مع نفسها عايشة الدور والسلام عليكم راحنا اهم الانسان بيبقى عاوز اعانة على انه يكمل مش اعانة انه يفضل يحرق في اعصابه وصحته

للاسف الموضوع صعب خصوصا لو الشاب راجل حر ودمه حامي مش هيستحمل كم المواقف دي تاني حاجة الجواز نفسه مش مجرد علاقة بين اتنين لا بين عيلتين غصب عنكم لازم هيحصل مواقف مجمعة واولادكم في المستقبل هيكونوا مربوطين بينكم انتم الاتنين سواء اهلك او اهله ومن رايي ان اهم حاجة في الجواز ان الامور تمشي بهدوء لان الراحة النفسية اهم حاجة

اعتبريه هو كمان مش مناسب لان العملية شكلها مش مريح ولو حصل واتصالحوا هتبقي انتي في خانة مش حلوة .. حاولي اللي يتقدملك يكون عاوز يعيش بهدوء في بيت هادي مش داخلين خناقة ونشوف مين يستحمل اكتر

ممكن نذكر انواع المشاكل عشان نقدر نرد بافادة

صعب الا لو الرسالة بتتسجل على الخط

غالبا طريقة التواصل بينكم هي المفتاح لان لو التواصل شات اغلب الوقت بيكون الموضوع بايخ وبيهدم حاجات كتير عكس انكم في وش بعض او بدرجة اقل التليفون .. كمان اختلاف الطبع طبيعي يعمل سوء تفاهم المهم طريقة التعامل بينكم مع سوء التفاهم والموضوع ده هيزود معرفتكم ببعض اما بالنسبة للمشاعر ل واحد بيكون عنده طريقة تعبير معينة واكيد محدش فينا شبه التاني. الفكرة هي مقارنة الطباع بتاعتكم ونشوف هل فعلا هننفع مع بعض لا لا

اسوأ شعور بيعدي على الانسان هو لحظة الندم بعد ما بيعمل حاجة عارف انها بتأذيه لانه بيقعد يسأل نفسه ليه كدة ولحد امتى هفضل كدة .. محدش هيخلصك منها غيرك عشان خاطر نفسك وصحتك وحياتك وحاولي تقربي من ربنا وتشوفي حد يعينك على كدة ومتقعديش لوحدك كتير مفيش حاجة اسمها الادمان مبيروحش لا بيروح وبيخلص وكل حاجة المهم نشتغل على كدة ادعي ربنا يخلصك منها ولو وصل الامر انك تروحي مراكز علاج ووقاية روحي متستنيش على نفسك لسه باقي في عمرك وقت كبير تصلحي فيه كل حاحة .. ربنا يقويكي ويعينك وينصرك على نفسك

بعيدا عن العادات المجتمعية الزواج بكمال البلوغ والعقل وزمان كان الاصل الجواز بدري حاليا سن الجواز بيتاخر بسبب ظروف الحياة والمعيشة وقلة الفلوس وكتر طلبات الاهل وحاجات كتير لكن الجواز بدري بيعف الانسان وميبقاش مشغول بشهواته ويبقى مركز لشغله او دراسته او ايا كان الفكرة كلها انك تكون قادر تنفق عليها

والله هي مسألة شائكة وحسب نواياه في الحقيقة ورث المرأة للمرأة الراجل ملوش فيه الا لو كان حسن النية وان اخواتك مثلا طبعهم سيء او ممكن ياكلوا حقك فبينبهك لكدة اما لو غرضه انك تجيبي الورث وبعدها يبدأ يلف ويدور عشان ياخد منه ولا يقولك اصل مشروع وهكذا دي صفات طبعا مش حلوة ان مكنش المرأة تعطي برضاها يبقى الامر مش محبب وطالما مفيش ضائقة مالية ولا مثلا مديون وهيتحبس وهي قدامها تساعده يبقى خلاص يعني فلوسها معاها هي حرة فيها

مفيش افضل من الكشف عند دكتورة محترمة للافادة طبعا ده لو الامكانية المادية متاحة

اغلب المنتجات لازم استخدام متواصل بلا توقف اللي بيجيب نتيجة مع الوقت هو الرولر اللي بيمشي على الشعر وبيتاخد معاه ميندوكسيل تقريبا وبتستمر معاه والنتيجة بتظهر بعد فترة وبعدها بتبطله وبتاخد مكانه امبولات فيتامينات ولكن بالتدريج وكل ده وانت مستمر مع الرولر واكيد لو كشفت هيكون احسن وهتاخد النظام بالتفاصيل

استعيذي بالله دايما من الشيطان واقراي سورة الاخلاص لان ده وسوسة منه تنغز حياة العبد ومرحلة الشك دي مرحلة صعبة خليكي عارفة ان كل حاجة لينا نصيب فيها هنشوفها وان كلنا لينا معاد دي سنة الحياة حقك تخاقي على اهلك اللي بتحبيهم لكن خوف دنيوي متخليهوش يبقى هو محور حياتك لان كل حاجة مكتوبة عند ربنا سبحانه وتعالى حتى لو عندك قدرة تعرفي هيحصلهم ايه برضو مش هتقدري تمنعيه هوني على نفسك وادعيلهم ربنتا يحفظهم من كل شر واتعلمي ازاي تخليها على الله لانك في النهاية مخلوق لا يملك ا اي شيء

عشان اقنعتي نفسك بالحالة دي وتعايشتي معاها وسيبتها تسيطر على عقلك بس هو الحقيقة ان الحياة مش كدة مينفعش الانسان يبقى منعزل بالشكل ده .. راجعي نفسك وشوفي ايه الغلط اللي عملتيه جايز تكوني لسه بتكرريه واتعلمي من الغلط شوفي مقصرة مع نفسك في ايه رتبي اولوياتك وارضي والدك ووالدتك وشوفي حق العبد لربه جايز عندك تقصير في الصلاة كل ده بيخلي الانسان عايش تايه في الدنيا عشان مفكر نفسه لوحده هيقدر يعمل كل حاجة لكن في الحياة احنا نكرة منقدرش من غير مساعدة ربنا نعمل حاجة شوية برد بيقعدوا اتخن تخين في السرير " يقول احد السلف كنت اسال الله في علف حماري" يعني بيدعي ربنا باكل للبهيمة بتاعته اللي هو ابسط الامور .. التزمي اذكار الصباح والمساء وصلي مهما كنتي مش حاسة بلذة العبادة كل حاجة مع الوقت هتدوب وتفك وتتحل

ايه الموقف اللي حصل استدعى انك تعملي كل ده في نفسك؟ محدش بيقوم في يوم وليلة يلاقي نفسه مضايق كدة غير اكيد بسبب تراكمات او مواقف وكمان فيه حاجة حاسك ناسيها وهي ان لينا ربنا نساله ونطلب منه وندعيه يعينا ويساعدنا مينفعش تبقي قافلة على نفسك بالطريقة دي اكيد فيه حاجة جواكي واجهيها متهربيش منها

المفروض فيه تدريب للمستجدين في خدمة العملاء وغالبا برضو فيه شيفتات عمل فممكن تلاقيها ماشية مع الكلية شوفي موقع وي او المصرية للاتصالات ممكن تلاقي عليها تقديمات عمل

فتح الحساب البنكي سهل مفيهوش حاجة اما قصة الراتب ده حسب الشركة نفسها والمكان ولو قصدك هتضمني ازاي حقك ده بيعتمد على المكان اللي انتي هتشتغلي معاه

اللي يساعدك انك تركزي ف المقرر اللي عليكي وتحاولي تستوعبيه كويس ومش هتلاقي الموضوع صعب زي ما انتي متخيلة اكيد حاجة حلوة انك عاوزة تنمي فصاحة اللسان وتزودي المعرفة اللغوية لكن الثانوية العامة محتاج ذكاء في التعامل بدرجة متقلش عن الشطارة

زي ما انتم تجاهلوها وتجنبوها وادعولها ربنا يهديها لان مفيش حاجة دايمة لا فلوس ولا شقة ولا اي حاجة

خلي بالك ان فيه ناس كتير حاولت تزيد زي كدة والموضوع فتح معاهم جامد تعاملي بحذر في الموضوع ده عشان متندميش

طيب حاولي تتكلمي معاه واساليه ايه اللي مضايقة منكم او بقى شايف ايه مش عاجبه وكلميه وفهميه انكم زعلانين ومتأثرين بوفاة والدتك وانكم مش بتمنعوه من حاجة حاولي تستدرجي معاه في الكلام يمكن يتجاوب ويرد وتفهمي منه انا عارف ان سنكم صغير لكن لازم تبقوا عارفين في النهاية ده والدكم وله حق عليكم مهما حصل

اعماركم كلكم

للاسف هو موقف صعب التعامل فيه طب اعماركم قد ايه عشان نقدر نفهم البعد الزمني للاشخاص ؟

نتجاهله منتعاملش معاه منديلوش فرصة لاي كلام لو حصل ورخم علينا منسكتش طالما معانا دليل وبما ان شخصيته وسمعته معروفة ده اكبر دليل الشخصيات اللي زي دي طول ما هي شايفة اللي قدامها ساكت وهي بتسوق فيها عشان كدة لازم تاخد على دماغها بالادب والادب معاها التجاهل وانكار الوجود

ربنا ييسرلك الامور يارب وتتشال عنك المظلمة دي

خلاص يبقى تسال في الجمارك نفسها طالما الموضوع مفيهوش حبس ولا حاجة او حد تبعك برضو يروح يسال لو فيه اشكالية عليك

ولو رجعت بيبقى على استحياء اللي هو لربما اللي قصادها مال او حاجة كبري برضو دماغك منها في كل الاحوال الحياة مش ناقصة مرض

الافضل تسأل حد مختص بنفسك او حد يسألك لان ده موضوع مينفعش فيه اراء

يعني هو تعلق وهمي للموضوع لانه كان واخد حيز في فترة ما في حياتها لكن مع الوقت هيروح واما يجي التفكير بلاش تندمج معاه تشغل نفسها باي حاجة تقوم تعمل حاجة حلوة تنزل تشتري حاجة تذاكر لو وراها مذاكر تكلم حد من صحابتها وهكذا المهم تتجاهل اي حاجة قديمة

معلش هي تجارب وبنتعلم منها المهم اننا نتعلم ونعرف كدة نميز ونفهم اللي قدامنا عاوز ايه ولا ايه تفكيره اهم حاجة تفضي دماغها من الدوشة اللي حصلت وتتبسط انها خلصت من قصة صداع زي دي

بعتذرلك نيابة عن الست والدتك 😅

عشان باظت خلاص اصل الشخصية دي بتحب الحاجة تبقى تحت نظرها وايديها وهي المسيطرة لو لقت ان فيه حد بيعاملها راس براس لا وكمان مش معبرها ولا مديها اهمية ولا عارفة تاخد منه حاجة هتكمل معاه ليه ؟

على حسب يعني انتي عاوزة منها ايه في الاخر او طموحك منها ايه وبعدين فيها قسم التجهيزات والمطابخ اعتقد هيعلمك اكتر وكمان يفتحلك كذا حاجة يعني انك تشتغلي في اماكن اكل كبيرة او فنادق ويمكن تبقي مقدمة برامج انتي وحظك او مشروع اكل وسيبك من جو التريقة وهزار الناس ده لو انتي مش محددة حاجة اما لو محددة حاجة فاكيد هتلاقي غرضك

اكيد الانسان بيبقى متضايق نفسيا بس طالما في اطار الشغل االي معايا فخلاص بنستعين بالله ونبدا وهي هتخلص لوحدها اما لو برا اطار شغلي يبقى لا اقدر اتكلم واقول مش تبعي

في البروفايل

ايوة والحقيقة انا معرفش ايه نوعية التقديمات اللي لازم كاميرا فيها دي هل مطلوب منك فيديو ؟ تاني حاجة ممكن متوافقيش على permission الكاميرا

الفيس بوك