أنا محتاجة أحكي حاجة طويلة شوية ومحتاجة رأي ناس من غير حكم عليا لأني حاسة إني تايهة ومش عارفة أتصرف إزاي
أنا داخلة صيدلة في جامعة خاصة وده كان قرار أنا نفسي فيه بس من وقت ما بدأت آخد الموضوع بجد وأنا عندي خوف كبير من المستقبل المصاريف مش قليلة وأنا مش عايزة أحس إني بضغط على أهلي أو إنهم بيضحوا بحاجات كتير عشاني وفي نفس الوقت أنا فعلًا نفسي أكمل وأثبت لنفسي إني أقدر
المشكلة إن الدراسة نفسها مخوفاني أنا مش من الناس اللي بتعرف تقعد تذاكر بالساعات وتركيزي بيخلص بسرعة وكمان في مواد زي الكيمياء والإنجليزي كنت دايمًا بحس إني مش فاهمة أساسياتها كويس فبقيت خايفة أدخل الكلية وأبدأ أراكم وأفشل أو أندم إني اخترت الطريق ده وكان قدامي اختيار حكومي
ولسه جوايا سؤال هل كان المفروض أختار الطريق الأسهل ماديًا وأريح أهلي ولا أكمل في الحاجة اللي أنا نفسي فيها وأحاول أتحمل
وفوق موضوع الكلية عندي ضغط في البيت وأوقات بحس إن قراراتي مش كلها بإيدي وإن أي قرار آخده لازم أحسب رد فعل أهلي ومصاريفه وتأثيره عليهم فبقيت حتى الحاجات اللي المفروض أفرح بيها بخاف منها
وكمان عندي شخص في حياتي وعلاقتنا بقت جزء من الضغط اللي أنا حاسة بيه هو بيحبني وبيخاف عليا وأنا مقدرة ده لكن في مواقف بحس إني بين إني أراعي مشاعره وبين إني أعيش حياتي وآخد قرارات تخصني وحصلت بينا مشاكل بسبب خروجات وحاجات تخص الكلية وحياتي الجديدة
وأوقات بحس إني مهما عملت هكون مقصرة مع حد يا إما معاه يا إما مع أهلي يا إما مع نفسي وأكتر حاجة متعبة بالنسبة لي إني مش عارفة أنا المفروض أركز في إيه الأول هل أركز في الكلية وأعتبرها مستقبلي وأبعد عن أي حاجة تشتتني ولا أحاول أشتغل جنب الدراسة عشان أساعد في مصاريفي ولا أكمل في صيدلة مهما خوفت وأدي نفسي فرصة ولا أكون واقعية وأختار الطريق الحكومي وأوفر على أهلي
أنا كمان بفكر في مستقبلي بعد التخرج هل فعلًا هقدر ألاقي شغل كويس وهل هقدر أوصل لدخل كويس وأعتمد على نفسي ولا أنا بحلم بحاجة أكبر من إمكانياتي يمكن من بره الموضوع يبان إن عندي كلية وخلاص لكن أنا من جوايا شايلة كل الحاجات دي فوق بعض وبفكر في كل قرار ألف مرة لدرجة إني بتعب من التفكير نفسه
أنا مش محتاجة حد يقولي اعملي اللي يريحك وخلاص لأني أصلًا مش عارفة إيه اللي هيريحني محتاجة ناس أكبر مني أو مروا بتجربة شبه دي يقولولي إزاي أوازن بين أهلي والكلية والعلاقة والمستقبل وهل طبيعي إني أكون خايفة بالشكل ده في بداية طريق جديد
ولو كنتوا مكاني إيه الحاجات اللي كنتوا هتفكروا فيها قبل ما تكملوا في نفس الطريق وياريت اللي هيرد يحاول يفهم الصورة كلها قبل ما يحكم لأني فعلًا محتاجة نصيحة مش حكم
أولًا الله يعينك اللهم آمين! بصي عامةً أنتِ قولتي جاوبوا من وجهة نظركم بس إحنا مش هنقدر نشوف الصورة كاملة لأنك أنتِ هتكوني أكتر واحدة عارفة نظام بيتك وأهلك! ثانيًا أعتقد أهلك ما شاء الله مقتدرين ماديًا إنك تدخلي خاص لأن البيت الـ بيفكر يدخل خاص بيكون مقتدر وغير كدا أكيد والدك عارف مصاريفك. الجزئية المهمة تفكيرك فـ المستقبل وهل هتقدري ولا هتقصري هو عامةً حتى لو دخلتي حكومي هتذاكري برضو عدد ساعات كتير جدًا خاصةً لو أنتِ عايزة ترتبي على دفعتك وتطلعي من الأوائل! الحاجة الأخيرة صلي أستخارة ولو شايفة إنك في حاجة حكومية كويسة ومستقبلها حلو زي مثلًا حاسبات، ولو دخلتي كلية حكومي تقدري بفلوس الخاص تشتري لاب توب وتأخدي كورسات وتشتغلي على اللغة من أول السنة وهتكوني شاطرة في كليتك! لكن لو أنتِ خايفة ومترردة صدقيني غيرك هيقرر مكأنك حاولي تفهمي أكتر أهل بيتك هل هما عايزينك تدخلي صيدلة عشان نظرة الناس ولا عشانك وعشان أنتِ عايزة تدخليها وهي كلية أحلامك! بس لو أنتِ مش هتعرفي تقعدي وتذاكري صدقيني مفيش كلية علمية هتنفعك عشان أغلبهم عاملين زي ثانوية عامة في المذاكرة.. هقولك رأيي بكل إختصار استخيري فكري في كلية حكومية واستفيدي بفلوس الخاص في لاب توب وكورسات وأنشطة وكتب ( طبعًا لو أهلك فهموا الجزئية دي) شوفي ناس داخلة صيدلة خاص ممكن تروحي الكلية وتسألي الدكاترة مثلًا، احكي لهم إنك مترددة وخايفة وهل الكلية ليها مستقبل! استعيني بالله وادعي كتييير بالتوفيق!🤍
تم النشر الثلاثاء، ٢٢ سبتمبر ٢٠٢٦
أولاً، أقدر تمامًا الشعور اللي بتمرّي بيه، وهو طبيعي جدًا في بداية طريق جديد زي ده. الخوف من المستقبل والضغط المالي والأكاديمي والعائلي والشخصي كلهم متراكمين، وده بيخلّي الواحد يحس إنه تايه ومش قادر يركز على أي قرار. خليني أساعدك أفكّري في الصورة كلها بطريقة عملية، مع الحفاظ على قيم التوازن والمسؤولية اللي بتدعمك إسلاميًا، زي الاعتماد على الله مع الأخذ بالأسباب، وبرّ الوالدين دون إهمال نفسك. ابدئي بترتيب الأولويات الداخلية: الصيدلة قرارك أنتِ، وده يعني إنكِ قادرة على الالتزام به لو قسمتِ الدراسة لأجزاء صغيرة بدل ما تفكّري في ساعات طويلة. جربي طرق عملية زي تلخيص المواد بصوتك أو استخدام تطبيقات بسيطة للمراجعة اليومية القصيرة، وركزي على بناء الأساسيات في الكيمياء والإنجليزي من خلال فيديوهات تعليمية قصيرة أو مجموعات دراسية في الجامعة. لو الضغط المالي كبير، فكّري في خيارات واقعية مثل التقديم على منح دراسية داخل الجامعة أو البحث عن فرص عمل جزئي مرنة بعد السنة الأولى، لكن لا تجعلي العمل يطغى على الدراسة في البداية لأن النجاح الأكاديمي هو استثمار طويل الأمد يخفف الضغط على أهلكِ لاحقًا. بالنسبة للعلاقة والضغط العائلي، حددي حدودًا واضحة: تواصلي مع أهلكِ بصراحة عن مخاوفكِ دون تحميلهم عبء القرارات كلها، وفي العلاقة ركزي على أن قراراتكِ الشخصية والمهنية تحتاج مساحة للنمو، مع الحفاظ على الاحترام المتبادل. لو المشاكل تتكرر بسبب الخروجات أو الدراسة، فكّري في كيفية جعل العلاقة داعمة بدل ما تكون مصدر توتر إضافي. وبالنسبة للمستقبل بعد التخرج، الصيدلة مجال فيه فرص جيدة إذا بنيتِ مهاراتكِ تدريجيًا، فلا تقللي من إمكانياتكِ، بل خططي خطوة بخطوة مثل التدريب الصيفي أو الشهادات الإضافية. الخوف ده طبيعي، وكتير من الطالبات مرّوا بتجارب مشابهة ونجحوا لما ركزوا على خطوة واحدة في الوقت الواحد. جربي تكتبي قائمة بالإيجابيات والسلبيات لكل خيار (الاستمرار في الخاصة أو التحويل)، ثم استشيري الله بالاستخارة وخذي قرارًا يناسب قيمكِ وقدراتكِ. لو عايزة آراء إضافية، ابحثي عن أسئلة مشابهة على فدني لتحصلي على وجهات نظر متنوعة. أنتِ قادرة، وكل خطوة صغيرة هتساعدكِ تبني ثقتكِ بنفسكِ.
تم النشر الثلاثاء، ٢٢ سبتمبر ٢٠٢٦
بصي يابنت الناس الخوف في البداية طبيعي جدا بس متخليش كثرة التفكير تشتتك ادخلي صيدلة واستغلي الفرصة وطالما أهلك موافقين ويدعموكي يبقى هم شايفينك تستاهلي وركزي كل طاقتك في دراستك وتأسيس نفسك أول سنة من غير ما تشغلي بالك بفرعيات أو شغل جانبي دلوقتي ولا تحملي نفسك فوق طاقتك وحطي حدود لشخصيتك وحياتك عشان محدش يضغطك أو يعطلك عن حلمك وافتكري إن رزقك ومستقبلك مكتوبين وربنا مش بيضيع تعب حد أبدا ...وجد والله ربنا يحفظك ويسعدك
تم النشر الثلاثاء، ٢٢ سبتمبر ٢٠٢٦
لعرض السؤال في فدني اضغط هنا