السلام عليكم، هو دولينجو مجاني لكن فيه إعلانات واشتراكات داخل التطبيق. لكن لو هتتعلمي أساسيات فهو مجاني ومناسب للمبتدئين او لو حد عاوز يتعرف على اللغة بسرعة. أنا جربته لفترة من كم سنة، لكن تركته لما لقيت بديل أفضل وكمان لقيت إنه مش الأنسب، ومؤخرا بقيت أرفض أرشحه لأنه بيدعم الشذوذ وفيه جمل صريحة وتدريبات بتتكلم عن الأمر ده وده خلاني اقفل منه تماما. *** حسب تجربتي ينفع زي ما قلت للمبتدئين، بيعتمد على حفظ مفردات وجمل بسيطة وسهل في تعلمها كأنها لعبة فمتحسيش بالملل في التعلم لكن برأيي ده مش مناسب للي حابب يتقن لغة كويس. ممكن تتعلمي عليه فترة لكن لو جيتِ تمارسي اللغة فعلا ممكن متقدريش ولا تعرفي تكلمي بها أجانب. *** اللي أفضله عنه تطبيق memrise. ده اللي التزمت فيه فترة كبيرة بعد دولينجو... هو كان مجاني تماما لكن من فترة بقى فيه مستويات مدفوعة بس المجاني أعتقد كاف طبعا مع مصادر تانية زي قنوات اليوتيوب (يفضل لمتحدثين أصليين عشان تتعلمي صح) *** جربي كده memrise هو ميزته إن بيسهل عليكِ حفظ أبجدية اللغات بسهولة وتذكرها وكمان قايم على حفظ جمل كاملة مش مجرد مفردات والأصوات الناطقة فيه لأشخاص حقيقيين ومتحدثين أصليين للغة وكمان قائم على المراجعة بنظام التكرار المتباعد اللي بيساعدك تثبتي اللغة في الذاكرة طويلة الأمد. *** ده رابط التطبيق ممكن تاخدي فكرة عنه ولو حبيتِ تحمليه وتجربي إن شاء الله يفيدك https://play.google.com/store/apps/details?id=com.memrise.android.memrisecompanion&hl=en ** نصيحة أخيرة لتعلم اللغات عموما، حاولي متتعلميش بالطريقة التقليدية. اللغة بنكتسبها بالسماع والممارسة، جربي الانغماس في اللغة. اسمعي كتير للغة اللي ناوية تتعلميها، عندك قنوات يوتيوب وبودكاستات، اسمعي في الحاجة اللي بتحبيها عشان متحسيش بملل. لا تتعاملي مع تعلم اللغة زي المذاكرة العادية.. ده ممكن يخليها عبء وضغط بالنسبة لك. ** فيه أسئلة كتير عن تعلم اللغات هنا ابحثي عنها وهتلاقي نصائح أكتر. بالتوفيق.💚💚
@. Nehal وعليكم السلام، العفو يا نهال 💚 سعيدة جدا إنه عجبك، هو فعلا من التطبيقات الجميلة. إن شاء الله تنتفعي به. بالتوفيق.💚💚
تم النشر الأحد، ٢٦ أبريل ٢٠٢٦
السلام عليكم حابة اشكرك @mai mahfouz علي تطبيق memrise انا مكنتش اعرفه ودخلت دلوقتي جربته وطلع حلو واحسن من دولينجو كمان جزاك الله خيرا
تم النشر السبت، ٢٥ أبريل ٢٠٢٦
فعلا انا استفدت..شكرا جدا 🥹🤍
تم النشر السبت، ٢٥ أبريل ٢٠٢٦
وبارك فيكِ ❤️.. العفو، أنا اللي سعيدة جدا إني جاوبتك ويا رب اكون أفدتك.. بالتوفيق في دراستك وكل حياتك.💚
تم النشر السبت، ٢٥ أبريل ٢٠٢٦
بارك الله فيكي شكرا جدا لحضرتك و شكرا علي وقتك انا ممنونه جدا ليكِ 🤍
تم النشر السبت، ٢٥ أبريل ٢٠٢٦
https://www.for9a.com/personality-test
تم النشر السبت، ٢٥ أبريل ٢٠٢٦
تختاري إيه تتعلميه دي ترجع لك ولشخصيتك.. كان فيه نصائح قبل كده تعملي اختبار شخصية بيساعد شوية في تحديد ميولك وأنسب المهارات لك... بالنسبة لأنك بتدخل بعمق أو تتركي الحاجة فعاوزة أقول لك إنك شبهي جدا في النقطة دي.. أنا عادي كنت ممكن أتعلم لغة كذا شهر وأبقى متحمسة جدا وشغوفة ومرة واحدة أوقف وأرجع لها تاني بعد فترة.. طبعا بتتنسي شوية لكن الرجوع بيكون أسهل.. كنت نفسي جدا أتعلم كروشيه وفعلا اشتريت صوف وتعلمته وعملت به حاجات كتير وبعدها تركته وكل فين وفين لما أرجع له... النقطة دي كانت بتضايقني وتحسسني باليأس من نفسي بس تعلمت أبقى مرنة وأتفهم الفترات اللي بمر فيها بانتكاسات وبزهق من حاجة بحبها ومجلدش نفسي.. فعادي تفهمي شخصيتك وطبيعتها وعادي اعملي نظام وامشي عليه واقعي وقومي تاني ودربي عضلة الاستمراية هي مع الوقت بتقوى ومرة مع مرة هتلاقيك بتلتزمي أكتر واو مريتِ بملل او انتكاسة بيكون الرجوع منها أسرع... فتوكلي على الله وابدئي خطوة خطوة.. التغيير بيحتاج صبر ووقت.
تم النشر السبت، ٢٥ أبريل ٢٠٢٦
م دا اللي نفسي اعمله و لكن مش بعرف خالص اما اني ادخل ف حاجه بعمق او اما اني اسيبها
تم النشر السبت، ٢٥ أبريل ٢٠٢٦
لا بالعكس شكرا ليكي جدا.. انا معنديش مشكله اقرأ زي كدا و اشوف وجهات نظر و تجارب مختلفه.. و جد شكرا ليكي و لو في نصيحه ولا حاجه تاني و كدا و مثلا ممكن اختار اي افضل اني اتعلمه.. بصراحه اسفه لاني رحت بعيد عن محتوي السؤال بس لقيت نفسي بتكلم كل دا مره واحده كمان بحس حياتي عشوائيه جدا و بحس بالفشل ف كل حاجه لي نفسي اتعلم من الناس اللي بجد بحسها او بلاقيها منظمه حياتها و عندها روتين معين و كدا
تم النشر السبت، ٢٥ أبريل ٢٠٢٦
المذاكرة عادي، إيه المشكلة بما تنقصي وترجعي تحاولي تحسني.. متفكريش في النتيجة، خلي كل تركيزك على السعي والتعلم وإيه الجديد اللي بتستفاديه كل يوم. أما هتفضلي تعاملي المذاكرة إنها حمل وضغط ونتيجة لازم أقفلها ده كله هياثر بالسلب... ولو بتضحي بحاجات وتحرمي نفسك من حاجات بتحبيها عشان توفري وقت المذاكرة فده مش حل... الأفضل يكون فيه وقت للمذاكرة وفواصل تكافئي نفسك فيها ووقت محدد لهواية عشان تفرغي الضغط وتعيدي شحن نفسك... ده الأفضل وده اللي كنت بعمله في الثانوية وخلاني الحمد لله معشتهاش في ضغط وتوتر. جربي كده وربنا يسهل... أهم حاجة استعيني بالله وافتكري (أدومها وإن قل)
تم النشر السبت، ٢٥ أبريل ٢٠٢٦
العفو يا جميل💚💚.. بالنسبة للسماع فطبيعي إن في البداية متفهميش كل حاجة، مهارات اللغة (الاستماع والتحدث والقراءة والكتابة) بتتطور مع الوقت والاستمرارية. خصصي وقت محدد في اليوم تسمعي فيه.. اختاري مستوى المبتدئين (بيتكلموا فيه ببطء) .. بالنسبة لي جربت مع بعض اللغات إني أسمع بس اللغة بدون ترجمة حتى لحد ما تبقى مألوفة لأذني.. أنتِ ممكن مثلا تسمعي جزء بسيط من الفيديو كذا مرة من غير ترجمة وبعدين تسمعيه بترجمة وطبعا اختاري مستوى المبتدئين عشان الكلام ببطء وهتستوعبي أكتر مع الوقت. بالنسبة بقى لتعدد اهدافك والحاجات الكتير اللي عاوزة تعمليها فأنا حاسة بك جدا وفاهماكِ وأنا جاية لك من المستقبل وبقولك اهدي ومتستعجليش ولا تشتتي نفسك... أنا شتت نفسي كتير وضيعت وقت وحسيت بضيق لأني عاوزة اتعلم حاجات كتير وبحب حاجات كتير ومش لاحقة أعمل كل ده... الحل الوحيد هو تحديد الأولويات والاستمرارية.... هاتي ورقة وقلم واكتبي كل اللي نفسك تتعلميه وتمارسيه وفرغي كل أفكارك على الورق بعد كده رتبيهم حسب الأهمية بعدين اختاري خمسة بس ومن الخمسة دول هتختاري ثلاثة ولو وقتك ضيق هتختاري حاجة واحدة بس دي الأهم فيهم... يعني اسألي نفسك لو مش مسموح لي غير حاجة واحدة بس هختارها هتبقى إيه منهم... أنصحك تشوفي فيديوهات عن نموذج (عجلة الحياة المتوازنة) ده هيساعدك في تنظيم حياتك وتحديد الأهداف اللي تشتغلي عليها واحدة واحدة عشان لا تتشتتي ولا تحسي بضغط من كتر الأهداف. طولت عليكِ 😅 حاولت أختصر وافيدك قد ما أقدر... لو عندك أي سؤال أو نقطة قولي لي وربنا يوفقك. 🥰
تم النشر السبت، ٢٥ أبريل ٢٠٢٦
حبيت اضيف حاجه اني حتي المذاكره اللي ببذل جهدي فيها هوا اه انا مش دحيحه بس بضيع حاجات عشانها و لكن برضو ملقيتش النتيجه المرجوّه و ما زلت بنقص درجات زيي زي اي حد 🙁
تم النشر السبت، ٢٥ أبريل ٢٠٢٦
و شكرا ليكي ي دكتورة 🤍
تم النشر السبت، ٢٥ أبريل ٢٠٢٦
طيب بس انا جربت قبل كدا كتير اني اسمع بودكاست او حتي فيديوهات حلوه تلات دقايق ف اليوم و لكن مش بكمل للاسف و مش بفهم ولا كلمه من الفيديو.اذا كنت بسمع العربي بالعافيه و بشغل الترجمه للفيديو هل هفهم الإنجليزي بالسهوله دي و كمان ورايا ضغط مذاكره و دايما كل سنين حياتي ضغط حرفيا ف مش عارفه امتي هتعلم اللغات دي و انا نفسي جدا يبقي عندي تعدد مواهب او مثلا ابقي مثقفه و عندي معلومه ف كل حاجه ولكن للاسف الواحد برضو كل مره بيرجع لنقطة الصفر ف كل حاجه...كان نفسي احفظ القرآن و وو لكن مش ناجحه ف حاجه بجد..كمان خلاص بالنسبه ل نظام التعليم الجديد ف هتبقي السنه الجايه و اللي بعدها سنه مصيريه.. مش عارفه امتي هحقق اللي نفسي فيه كل اللي اعرفه اني بحب العلم و التعليم مهما كان صعب و نفسي جدا ابقي حاجه كبيره و افيد المجتمع 😔
تم النشر السبت، ٢٥ أبريل ٢٠٢٦
لعرض الإجابة في فدني اضغط هنا