السلام عليكم
أنا في حاجة عايزة أدعي ربنا بيها بس مش عارفه ينفع ولا لا يعني بصراحه انا في اولى ثانوي عايزة ادعي ربنا أنه يبعتلك الإنسان اللي يحبني ويصوني وأنا في السن ده لاني محتاجه شخص يعيني ويساعدني في حياتي إن كان الدراسية أو النفسية بس مش عارفه ينفع ولا لا
وكمان عشان احنا في زمان فتن وعايزة أحفظ نفسي لان غصب عني بنظر الشباب وانا بحاول دايما اغض بصري ممكن اللي يقرأ السؤال يجاوبني لو سمحتوا
وعليكم السلام ورحمة الله وبركاته يا حبيبتي 🌸 أولاً، الله يبارك فيكِ ويحفظكِ، أنتِ بنت صالحة وواعية في سنكِ ده، ومحاولتكِ غض البصر والحفاظ على نفسكِ من الفتن شيء عظيم يفرح ربنا فيه. الدعاء باللي في قلبكِ يجوز ، لأن الدعاء عبادة مفتوحة، والله سبحانه يحب اللي يسأله بصدق وثقة. بس خلينا نصيغ الدعاء بشكل أفضل عشان يجي في الوقت المناسب ويكون خير لكِ، زي: "اللهم ارزقني زوجاً صالحاً يخافك، يحبني ويصوني، يعينني في ديني ودنياي." ده هيحميكِ من الفتن، ويفتح لكِ أبواب الخير. بس المهم دلوقتِ بالنسبة لك إنك تركزي على دراستك (أنتِ في أولى ثانوي، ده وقت ذهبي للنجاح)، واطلبي المساعدة الدراسية والنفسية من أهلكِ أو مدرسين موثوقين، أو حتى من خلال تطبيق فدني نفسه – في خبراء رائعين في https://www.fedni.net/experts ممكن يساعدوكِ في الدراسة والدعم النفسي. ادعي كتير، وثقي إن ربنا أحسن الماكرين ويعرف اللي في قلبكِ. ابحثي في فدني عن أسئلة مشابهة هتلاقي إجابات كتير مفيدة. ربنا يوفقكِ وييسر أمركِ يا رب 💕
تم النشر الثلاثاء، ٢٤ فبراير ٢٠٢٦
وعليكم السلام ورحمة الله وبركاته ، فى الحقيقة اللى انتى حاسة بيه دا هو شعور مؤقت متخافيش ،إن شاء الله مع الصبر ومجاهدة النفس ربنا هيعينك ويعينا كمان ، وعموما مش شايف حاجه تمنعك من الدعاء هو بس فى حاجه صغيرة شوية وهى أن سنك صغير شوية ، لكن حاجه حلوة جدا منك انك بتجاهدى نفسك متبصيش للشباب ودا من فضل ربنا عليكى واللى إن شاء الله يعود عليكى بعد كده زى مثلا إن الشباب هيغضوا بصرهم عنك ، ونصيحة متخشيش فى اى علاقة دلوقتي ، بكلمك بصراحة ، دلوقتي انتى فى السن دا مش عارف اقولها ازاى بس اللى هو ايه بتبقى محتاجة حد تتكلمى معاه يحبك تحبيه بس بعد فترة وبعد اول اسبوعين متتكلموش هتعرفى إن دى كدبة ومشاعر مش حقيقية اصلا ، هتكتشفى إن دا كان مجرد احياج ، أنا لا أعرف أنك قلتى انك خايفة من الفتن والحاجات دي اصلا بس حبيت افتح عقلك اكتر وبارك الله فيكى 🤎🍂
تم النشر الثلاثاء، ٢٤ فبراير ٢٠٢٦
اكيد هتلاقى اللي يحبك ، ويقدرك ،ويحترمك ، لأن من ترك شيئ لله عوضه الله خيرا منه .اه هو فعلا لازم تكوني ازهر بس في مناهج على اليوتيوب افضل من مناهج الأزهر لو حابه تتعلمي العلم الشرعي، يفضل انك تسمعي دروس تزكيه في البدايه.هي دي مش حجه خالص وان شاء الله تلبسيه شوفي حد من اهلك يكون بيحبك وليكي كلام معاه ،واقنعيه انك تلبسي النقاب ،وخليه يقف معاكي .أن الحمد لله اختي الصغيره لبستها النقاب واهلي كانوا رافضين في الاول وهي حاليا اولى اعدادي ازهر .ف السن مش مشكله برضو 🙂وأحلى حاجة في البنت رزانتها. ما تخليهوش يحس بحاجة ولا تخليه محور حياتك، التقل دايماً بيكسب. مشاعرك فترة وهتعدي في السن ده المشاعر بتبقى قوية بس متغيرة. بكرة تكبري وتضحكي وتقولي أنا كان ذوقي كدة إزاي؟ ومستقبلك هو اللي باقيلك ركزي في مذاكرتك وشطارتك، النجاح بيخلي ليكي هيبة وكاريزما تخلي الكل هو اللي يتمنى نظرة منك. وفري قلبك للصح ما تستهلكيش مشاعرك بدري في حكايات مراهقة غالباً مش بتكمل. و خليكي إنتي النجمة اللي الكل بيبص عليها، مش اللي قاعدة بتراقب حد. برأيي انتي مش محتاجه حد يدعمك انتي محتاجه حد يوجهك شوفي لو عندك اخوكي الكبير ملتزم دينيا خليه بوجهك وينصحك أو ابوكي او اختك او امك المهم حد من محارمك ربنا يسعدك يارب
تم النشر الثلاثاء، ٢٤ فبراير ٢٠٢٦
بصي . إنتي مش ناقصة عشان حد يكملك أجمل حاجة ممكن البنت تعملها في سنك، إنها تفهم إنها كيان مستقل. ربنا خلقك وليكي بصمة في الدنيا مش مجرد نصف بيدور على نصف تاني. لما تملي قلبك بحب ربنا وبتقديرك لنفسك، الاحتياج اللي حاسة بيه هيتحول لـ استغناء. والاستغناء ده هو اللي بيخليكي غالية في عيون نفسك وقوية قدام أي فتن. بدل ما تشغلي بالك بفلان أو علان، أو تستني حد يجي يصونك وإنتي لسه برعمة صغيرة😊.. صوني إنتي قلبك. اعتبري قلبك ده أمانة غالية جداً، وشايلاها للي يستحقها فعلاً في الوقت الصح. الحب الحقيقي زي الثمرة، لو قطفتيها قبل ما تستوي بتبقى مُرّة، لكن لو صبرتي عليها وقتها بتبقى أحلى بكتير. عارفة يعني إيه يصونك? ربنا هو اللي بيصون القلوب. بدل ما تدعي ربنا يبعتلك شخص، ادعيه إنه يؤنس وحشتك بيه. قولي له: "يا رب، أنا قلبي فيه مشاعر كتير ومحتاجة ونس، فاجعل أنسي بك، واكفني بحلالك عن حرامك". صدقيني، اللحظة اللي هتحسي فيها إن ربنا كفاية عليكي، هي اللحظة اللي هتبقي فيها أسعد بنت في الدنيا. والارتباط والمسؤولية والوجع والغيرة.. كل ده جاي جاي في وقته. ليه تستعجلي الهم؟ عيشي خفة سن الـ 16 سنة. اضحكي مع صحابك، ذاكري، احلمي بكيانك كبنت ناجحة. خليكي حلم صعب الوصول إليه، مش بنت مستنية أي حد يعدي يسندها. والجمال الحقيقي إنك تكوني زهرة مقفولة على نفسها، ريحتها حلوة بس مفيش حد يقدر يلمسها إلا اللي يدخل البيت من بابه وبإذن صاحب البستان بعتذر عن الإطالة 😊 وجد ربنا يحفظك ويسعدك يارب
تم النشر الثلاثاء، ٢٤ فبراير ٢٠٢٦
ودا فعلا ال فهمته في اخر فترة أنا كنت بفكر كدا لاني كنت عايزة شخص يعوضني بالحب والحنان بس انا كنت ناسية أنا عوضي هو ربنا مش إنسان
تم النشر السبت، ٢٨ فبراير ٢٠٢٦
بصي مفيش مشكله تدعي ربنا انه يرزقك الزوج الصالح بس بلاش حته انك شايفه الزواج هيا الحاجة اللي هتصلح حياتك. لا انتي اللي في ايدك تكوني سعيدة مع نفسك واكتفي بيها مش مستنيه زواج يجي يحسنلك حياتك ويغيرها لا انتي غيرها بنفسك.
تم النشر السبت، ٢٨ فبراير ٢٠٢٦
تمام شكرا
تم النشر السبت، ٢٨ فبراير ٢٠٢٦
العفو ربنا يحفظك ويكرمك 😊موفقه باذن الله متنسيش أن في رمضان الأعمال بتتضاعف الفرص بسبعين فرض والنافله بفرض وحافظي على السنن الرواتب 😊
تم النشر الثلاثاء، ٢٤ فبراير ٢٠٢٦
تمام شكرا اوي ومش هنسى اي حاجة نصحتيني بيها وهعمل بيهم إن شاء الله
تم النشر الثلاثاء، ٢٤ فبراير ٢٠٢٦
شكرا اوي بجد وأنا الحمد لله محافظة علي الصلوات الا صلاة الفجر مش بعرف اقوم اصلي يعني مثلا بنام 2 لما اكون خلصت مذاكرة مش بعرف اقوم اصلي الفجر ودي الحاجه الو حيد ال مضيقاني وبحفظ قرآن الحمد لله وكمان في حاجة كمان أنا عندي هدوء مقلق يعني أن ما كنت هادئة يعني كنت بضحك بهزر كدا أما دلوقتي أنا ممكن ال قدامي صوتة راح من كتر الكلام وصوته العالي ومش بتأثر ومش عارفه دا كويس ولا لا وكمان عندي في البيت الحل لما اي شخص من البيت يتعصب اني فعلا بفضل ساكته ولا كأن في شخص بيتعصب جنبي فا مش عارفه دا كويس ولا لا حتي عندي الشيخ ال بحفظ عندة قرآن هو الشيخ بيضرب صعب علي الحفظ وكدا فالمهم لما اختي أو صاحبتي يضربوا بيعيطوا علي طول أما أنا بكون بهزر وأنا بضرب ال هو مش بيخطر اصلا علي بالي اعيط فأنا مش العارفة الحاجات دي طبيعية
تم النشر الثلاثاء، ٢٤ فبراير ٢٠٢٦
شكرا اوي علي نصيحتك يا استاذة وكلامك غير نظرتي لحاجات كتير شكرا اوي بس آخر حاجه ممكن تقوليلي ازاي اقرب من ربنا وأية الحاجات ال بيوجب علينا كمسلمين نعملها وأية المفروض نتعلمه عن دين الإسلام وآسفة اني بسأل كتير بس احيانا النصيحة حتي لو من شخص غريب بس ممكن تكون سبب في تغييرنا
تم النشر الثلاثاء، ٢٤ فبراير ٢٠٢٦
كلام جميل اوي ما شاء الله ووضحلي امور كتير وفعلا معاك حق بس هو ممكن فعلا الاقي ال يحبني بجد في المستقبل يعني حاليا الجواز بقى عبارة عن صالونات وبس لا في رحمة ولا مودة وكمان أنا في ثانوي عام ونفسي ادخل كلية ادرس فيها العلوم الشرعية بس سألت البعض بيقولوا لازم اكون في أزهر وكمان نفسي البس النقاب اوي بس اهلي مش قابلين وعاملين حجه اني لابسة نظارة معا إن شفت اكتر من بنت منتقبة ولابسة نظارة وآخر حاجه بصراحه انا معجبة بولد بس انا الحمد لله كل ما اشوفه بغض بصري واقعد استغفر يعني كل لما اشوفه مش عارفه ليه بفضل افكر فيه بس والله بحاول امنع نفسي برأيك في ظل كل ده طبيعي اكون محتاجه حد يدعمني بس معاك حق ربنا احسن من اي شخص وكفيل يريحني ويشيل عني الهموم
تم النشر الثلاثاء، ٢٤ فبراير ٢٠٢٦
بعمرك جدا طبيعي انك تنجدبي للي بعمرك او شباب في شكل عام لهيك قبل كان زواج بكير كمان انا ههه بعد 16 بلشت احس انو في بنات حويليتي بل بدايه بلشت اشوف نظرات اعجاب عجبتني بعدين قلت انا ما خرجي اعمل هيك ومستحيل افوت بي علاقه صرت اغض بصر مش يعني اطلع عل ارض صرت لا اصادف عين بنت او جها بطلع كائنها اختي ومستحيل يصير بينا شي ول الحمدلله هلق بطلت افكر بل موضوع اساسن يعني هيا فتره ويتعدي سنه تقريبن تمت معي
تم النشر السبت، ٢٨ فبراير ٢٠٢٦
جميل جدا ربنا يثبتك وان شاء الله تتوافقي لصلاة الفجر بس انتي بتيجي على نفسك في السهر، وجسمك بيفصل شحن الساعة 2. لو عايزة الفجر، نامي بدري و اصحي للفجر وبعدها كملي مذاكرة. متجلديش نفسك، ربنا عارف نيتك وتعبك. وإنك بتسكتي وقت الزعيق أو مش بتعيطي لما حد يتضرب قدامك، ده مش قلة إحساس، ده غالباً رد فعل دفاعي من عقلك عشان يحميكي من التوتر الزيادة، أو ببساطة طبيعة شخصية رزينة. ما تخليش كلام الناس يحسسك إنك غلط؛ البرود أحياناً بيكون ذكاء عاطفي عشان تحافظي على طاقتك. موضوع الشيخ والضرب طبيعي لو شايفة إن الموضوع هزار من وجهة نظرك. كل واحد بيعبر عن زعله بطريقة، وإنتي طريقتك إنك بتمتصي الصدمة بهدوء. انتي طبيعية جداً، بس الهدوء المقلق اللي بتقولي عليه ده معناه إنك بتكتمي كتير. حاولي تلاقي وقت تفرغي فيه مشاعرك دي كتابة، فضفضة، رياضة عشان الهدوء ده ميكبرش ويتحول لضغط عليكي بعدين تمام 😊 ربنا يسعدك
تم النشر الثلاثاء، ٢٤ فبراير ٢٠٢٦
ازي تقربي من ربنا ربنا بيقول ...وما تقرَّبَ إليَّ عبدي بشيءٍ أحبَّ إليَّ ممَّا افترضتُ عليه..الأولويات ابدئي بالأساس اللي مفيش فيه فصال، وهو الصلاة. الصلاة هي الوصلة اللي بينك وبين ربنا. حاولي تظبطيها على قد ما تقدري، حتى لو لسه مش مثالية، المهم متقطعيش الوصل ده. الدين مش خبط لزق، ربنا بيحب العمل المستمر حتى لو قليل. ابدئي بورد صغير من القرآن ولو صفحة، أو أذكار الصباح والمساء. الحاجات الصغيرة دي هي اللي بتبني روحك من جوه. اتعلمي عن ربنا مش بس أوامره قبل ما تعرفي إيه الحلال والحرام، اعرفي مين هو ربنا؟ اسمعي عن رحمته، ولطفه، وأسمائه الحسنى. لما تحبي ربنا بجد، هتلاقي نفسك بتعملي اللي يرضيه بحب مش بتكليف تقيل عليكي. متعتذريش أبداً إنك بتسألي.. إنما شفاءُ العِيِّ السؤَالُ يعني دواء الجهل هو السؤال. وكونك بتدوري على النصيحة حتى من حد غريب، فده معناه إن قلبك حي ومنور ربنا يحفظك 😊 لو في حاجه تاني اسالى
تم النشر الثلاثاء، ٢٤ فبراير ٢٠٢٦
عليك السلام ـ يجوز لا مانع ان تدعي الله ان يرزقك الزوج الصالح
تم النشر الثلاثاء، ٢٤ فبراير ٢٠٢٦
لعرض السؤال في فدني اضغط هنا