السلام عليكم، تصرفك صحيح إنك متكلمهاش تاني وتركز على دراستك. أنا متفهمة مشاعرك وإحساسك إنك ناضج وواعي بس خلينا واقعيين ونفكر في احتمالات المرحلة العمرية اللي أنت فيها حاليًا. سواء مشاعرك ناحيتها كملت وثبتت أو تغيرت مع الوقت، إنك متقربش حاليا هو التصرف السليم. من ناحية عشان أي علاقة غير رسمية بينكم هتكون مرفوضة شرعًا ولا ترضي الله ومن ناحية تانية عشان القلب متقلب خاصة في العمر ده والمشاعر متغيرة وهي ممكن لو تعلقت بك تتغير بعد كده أو انت تتغير وطرف منكم يتجرح في النهاية زي ما بيحصل في أغلب العلاقات. ** المطلوب منك حاليًا، تركز على دراستك وتفوقك وتبني مستقبلك. ما دام قررت الزواج يبقى تستعد وتعرف إيه المطلوب منك للقرار ده ومسؤولياته. تكون واقعي ومتعلقش نفسك وتكون مستعد لأي احتمال، يعني مثلا ممكن انت تتغير زي ما قلنا، ممكن هي متوافقش لو تقدمت لها وممكن توافق، ممكن أهلها يلاقوا لسه سنها صغير أو أنت لسه مش جاهز. خلي في بالك إن كل الاحتمالات واردة لكن الثابت الوحيد إن لو ربنا مقدر إنكم يكون لكم نصيب مع بعض هيكون إن شاء الله. بالتوفيق في دراستك وحياتك وربنا يكتب لك الخير حيثما كان ويرضيك به.
العفو، بالتوفيق إن شاء الله.
تم النشر الثلاثاء، ٢٥ نوفمبر ٢٠٢٥
فاهم حضرتك وعارف انك مش القصد احباط.. ربنا بس اللي يعلم اذا كان هي من نصيبي ولا لأه وانا مش قدامي غير اني ادعي.. لو بقت من نصيبي يبقى خير ولو مبقتش يبقى خير برده عشان ربنا مختارلي الصح ويمكن تكون واحده احسن منها كمان تكون من نصيبي وربنا وحده اعلم بكده.. شكرا على نصيحة حضرتك ليا
تم النشر الثلاثاء، ٢٥ نوفمبر ٢٠٢٥
أيوه أكيد فاهمة قصدك... أنا بس بقول لك مع تركيزك على مستقبلك وقرارك إنك تتقدم إن شاء الله تكون مرن ومستعد لأي احتمالات تانية عشان التعلق الكبير بتخيل واحد ممكن مستقبلا لا قدر الله يسبب إحباط لو خالف المستقبل توقعاتنا... مش بقول كده خالص عشان أحبطك والله.
تم النشر الثلاثاء، ٢٥ نوفمبر ٢٠٢٥
متفهم جدا كلام حضرتك وعارف كل ما في بالك بس انت بتكلم في نقطة اني اركز على مستقبلي وإن شاء الله لما اخلص اتقدملها وانا حضرتك ابويا موافق بس الفكرة بس كلها اني اخلص وكده وحضرتك اكيد فاهمه قصدي
تم النشر الثلاثاء، ٢٥ نوفمبر ٢٠٢٥
شكرا جدا لحضرتك على كلامك ده
تم النشر الثلاثاء، ٢٥ نوفمبر ٢٠٢٥
لعرض الإجابة في فدني اضغط هنا