السلام عليكم ورحمة الله وبركاته
أنا مش عارفه اقول ايه بس انا حاليا تايهة من جميع النواحي. مره واحده لقيت نفسي كده. انا كنت متفوقة متدينة وكنت بحب نفسي.
دلوقتي انا بحس اني غريبة وبقيت بكره المرايا. بعدت عن ربنا اوي وكل ما ارجع ابعد تاني مش عارفه الصراحة انا مالي وليه حصلي كده بس برجع واقول مش مهم الأسباب هرجع وبرجع يومين واتنكس شهرين.
انا بس نفسي ارجع لنفسي. انا عندي ١٩ سنة لكن حاسه اني عجزت. نفسي افرح اهلي بيا مكونش عبء عليهم.
انا الايام دي عندي خلافات كبيرة مع اهلي لاني مش قادره اعمل حاجة من اللي هما عايزنها فبسمع على طول وهما بيشتموني وساعات بشوف الكره في عينهم بس انا اللي وصلتهم لكده حقيقي انا نفسي ارجع اسمع كلامهم زي زمان بس انا نفسي مش زي زمان وعلطول خايفة افضل كده تايهة.
انا مش عايزه اكون كده مش عايزه افضل علطول سرحانة وعايزه انام وماسكه التليفون.
انا والله العظيم بحاول في كل نفس اني اتطور لكن برجع دايما فقدت الأمل في نفسي. حاسه بعجز عمري ما حسيت بيه. لما اهلي بيسألوني مالك بقولهم بخير لكنني مش بخير ومعرفش ليه انا مش بخير في حد فاهميني؟
السلام عليكم، أنتِ ممكن ضغطتِ نفسك لفترة طويلة، خاصة لو كنتِ لسه طالعة من مرحلة ثانوية عامة، أو فترة كنتِ بتحاولي فيها تحافظي على تفوقكِ وصورتك المثالية. طبيعي إن يحصل احتراق نفسي أو وظيفي مع الضغوط اللي بنمر بها، حتى لو احنا مش حاسين إنها ضغوط، مثابرتك عشان تتفوقي وإنك تفضلي طول الوقت البنت المطيعة المتفوقة، ده نفسه بيعمل ضغط من غير ما تحسي فمع الوقت لو مفيش تفريغ أو ممارسة لهوايات أو طرق تفرحي بها نفسك، كل ده بيؤدي في النهاية لإرهاق، هتحسي إنك عاوزة ترتاحي وممكن تمري بفترة تبلد وانعدام طاقة أو حتى كره للذات. **** الانتكاس اللي بتمري به كل شوية، ممكن عشان معالجتيش جذر المشكلة فطول ما هي موجودة هتفضلي في نفس الدائرة، وكمان ممكن تكوني لما بتحاولي تغيري بتحطي توقعات كبيرة وأهداف كتير عاوزة تحققيها في نفس الوقت وفي وقت قصير وده مش واقعي وبيؤدي لصدام مع الواقع وتحطم للآمال لما تلاقي مفيش ثمرة سريعة. ** أنصحك تترفقي بنفسك، الأول حاولي تقعدي مع نفسك وتحللي كل اللي مريتِ به وتوصلي لأساس مشكلتك عشان تعالجيها، وإنك توقفي جلد لذاتك وتحميلها فوق طاقتها، مفيش مشكلة لو وقعتِ كل شوية، المهم تفضلي تقومي ومتفقدين الأمل في نفسك. ** شوفي نموذج عجلة الحياة المتوازنة (هتلاقي شروحات كتير له على يوتيوب) اتبعي النموذج في إنك تحددي أهداف صغيرة في كل جانب من جوانب حياتك وتشتغلي عليها واحدة واحدة، واعملي حسابك إن التغيير بيحتاج وقت وصبر. كل ما كانت أهدافك أصغر كل ما هتنجزي أكتر ومش هتحسي بضغط ولا هتملي بسرعة لما تحسي إن مفيش نتيجة. ممكن أرشح لك قناة د. أسماء القاضي، https://www.youtube.com/@dr_asmaaelkady92/videos لها فيديوهات مفيدة جدا، شوفيها وحاولي تطبقي نصائحها، بس زي ما قلت، واحدة واحدة ومتحمليش نفسك فوق طاقتها. ** وأهم من كل اللي فات، الاستعانة بالله بيقين، هو وحده قادر يعينك ويغير حالك للأفضل إن شاء الله. ربنا يوفقك.
تم النشر الجمعة، ٣٠ يناير ٢٠٢٦
أصعب شعور في الدنيا إنك تبصي في المراية وماتعرفيش مين اللي قدامك، تحسي إن البنت الشاطرة، المنورة، القريبة من ربنا، ماتت.. والنسخة اللي موجودة دلوقتي شبح عايش على الموبايل وبيهرب من الواقع بالنوم. وإنتي لسه في أول سلمه في الحياة، بس شايلة شيلة ست عندها ٥٠ سنة. ليه؟ لأنك محملة نفسك ذنب كل يوم بيعدي وإنتي واقفة مكانك. الوجع اللي بتحسيه لما أهلك بيبصولك بكره زي ما إنتي شايفة هو في الحقيقة وجعهم على النسخة اللي ضاعت منك هما مش بيكرهوكي، هما مش عارفين يساعدوكي فبيقلبوا عجزهم لغضب. وإنتي بتبعدي عن ربنا عشان مكسوفة منه، حاسة إنك قصرتِ في حقه. بس الحقيقة إن ربنا هو الوحيد اللي عارف إنك تايهه ودي مش بإيدك، ربنا مش عايزك كاملة، هو عايزك تحاولي ارجعي له وانتي مكسورة، قولي له أنا ضعت مني.. ردني إليك رداً جميلاً السجدة اللي بدموع وانتي ضايعة، أغلى عنده ميت مرة من صلاة وإنتي حاسة إنك مية مية. الموبايل هو كفن لروحك إنتي بتهربي للموبايل عشان مش قادرة تواجهي الفشل اللي حاسة بيه. بس الموبايل بياكل عمرك، بيخليكي تشوفي ناس "مثالية" فتكرهي نفسك أكتر. الموبايل ده هو اللي مخليكي عجوزة.. ارميه وقومي اغسلي وشك، وبصي في المراية وقولي لنفسك أنا لسه هنا، لسه في فرصة ٤. بطلي تكوني عدوة نفسك أهلك بيشتموكي؟ معلش. العالم كله ضدك؟ عادي. بس المصيبة إنك إنتي كمان ضد نفسك. إنتي أول واحدة بتجلدي روحك وتقولي أنا عالة. لو إنتي ماطبطبتيش على نفسك، مين هيطبطب؟ ونصيحة اخيره من اخ بكرة الصبح، الشمس هتطلع سواء قمتي أو نمتي.. بس الفرق إنك لو قمتي غصب عنك، ولو صليتي ركعتين بالعافية، ولو ذاكرتي كلمة واحدة وإنتي مخنوقة. إنتي كده بتنتصري على النسخة الضعيفة اللي فيكي. إنتي مش محتاجة ترجعي زمان إنتي محتاجة تبدأي دلوقتي النسخة القديمة كانت سهلة عشان مكنتش مجربة الوجع، النسخة اللي هتبنيها دلوقتي وإنتي تعبانة هي دي النسخة القوية فعلاً وبعتذر على الإطالة 😊 وجد ربنا يحفظك ويوفقك
تم النشر الجمعة، ٣٠ يناير ٢٠٢٦
وعليكم السلام ورحمة الله وبركاته يا حبيبتي، ذكية معك🌸 أول حاجة، أنا فاهمة تمامًا إيه اللي بتحسي بيه، وده شعور طبيعي جدًا في سنك ده (19 سنة بس، مش عجوزة خالص! 😂). الضياع ده زي الغيمة اللي بتمر، مش هتفضل إلى الأبد، وأنتِ مش لوحدك فيه. كتير بنات زيك بيحسوا كده بسبب الضغوط اليومية، الدراسة، الأهل، والحياة اللي بتتسارع. بس الخبر الحلو: أنتِ عارفة الطريق للرجوع، وده أول خطوة كبيرة. خطوات عملية صغيرة عشان ترجعي لنفسك خطوة خطوة (مش كل حاجة مرة واحدة عشان متنكسريش): ارجعي لرَبّكِ يوميًا، بس ببساطة : ابدئي بالالتزام بالصلاة في موعدها، واقرئي صفحة قرآن صغيرة قبل النوم. قولي "اللهم أعنِّي على نفسي" 10 مرات كل صباح. ده هيبني ثقتكِ ويملى قلبكِ نور، وهيخليكِ تشوفي المرايا تاني بحب. اعملي جدول يومي بسيط جدًا : صباحا: قومي، اغسلي وشكِ، واشربي كوباية مية مع ليمون (هيحرّك جسمكِ). حدّدي وقت التليفون: ساعة واحدة بس يوميًا، وباقي الوقت حطيه جانبًا. مارسي حاجة صغيرة زي المشي 15 دقيقة في الشارع أو البيت، أو رتبي أوضتكِ. هتحسي بإنجاز فوري. مع أهلكِ : اجلسي معاهم في وقت هادئ، قوليلهم "أنا بحاول أتحسن، بس محتاجة دعمكم". هما بيحبوكِ، والكره اللي شايفاه ده خوف عليكِ مش كره. ابدئي تسمعي كلامهم خطوة صغيرة، زي تساعدي في حاجة بيتية يوميًا، وهترجعي الفرحة دي تدريجيًا. فقدان الأمل؟ قاوميه بأهداف صغيرة : كل يوم اكتبي 3 حاجات شكرتِ ربنا عليها (حتى لو صغيرة زي "أنا عندي صحة"). وحددي هدف أسبوعي واحد بس، زي "أدرس ساعة النهاردة". نجحتِ؟ احتفلي بنفسكِ بشوكولاتة! فشلتِ؟ قومي تاني، مش نهاية العالم. أنتِ مش عبء، أنتِ جوهرة هترجعي تتلمع. العمر قدامكِ، وده اختبار من ربنا عشان تقربي أكتر. لو عايزة دعم أكتر، دوري في فدني على أسئلة مشابهة هتلاقي إجابات كتيرة مفيدة، أو شوفي صفحة الخبراء هنا: https://www.fedni.net/experts – فيه مدربات حياة ونفسيين هيساعدوكِ بشكل شخصي. أنتِ قوية، وهترجعي أحسن من الأول إن شاء الله.💕 ربنا يثبتكِ ويفرح قلبكِ.
تم النشر الجمعة، ٣٠ يناير ٢٠٢٦
كلنا كده والله
تم النشر الجمعة، ٣٠ يناير ٢٠٢٦
التطور في أي حاجة مش سهل فلازم تكوني متوقعه أن أي حاجه محتاجه جهد وتعب ومش بسهوله تتعمل فلو عرفتي أصل الموضوع هتعرفي تتعاملي معاه
تم النشر الجمعة، ٣٠ يناير ٢٠٢٦
طبيعي هتتعبي بس في آية في القرآن بتقول (قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ) مهما عملتي ارجعي لربنا والله الدنيا دي دار اختبار. يجماعة دي مش دار نعيم. كلنا تعبانين وتايهين وده طبيعي بس ده كله جزاءه ايه ؟الجنة والجنة تستاهل كل التعب ده
تم النشر الجمعة، ٣٠ يناير ٢٠٢٦
بصي انتي مصعبه الموضوع ممكن تكوني عملتي ذنب في الخلوة ده محتاج قرب من ربنا انك تتوبي وتصلي وتدعي ربنا يسامحك ويتوب عليكي كلنا بنغلط بس الشاطر فينا هو الي يعرف يقوم من الوقعه .انما الاحاسيس الي عندك دي كتير اوي ومش مستاهله كل ده .ان الله غفور رحيم
تم النشر الجمعة، ٣٠ يناير ٢٠٢٦
كل اللي انتي فيه ده بسبب انك مش حاطه في مخك انه عادي تتعبي. احنا بشر مش آلة طول الوقت هنكون كويسين لا هيجي وقت ونتعب عادي فانتي بتجلدي نفسك لانك بشر وبيتتعبي فالموضوع بقا مرهق. صدقيني الدنيا مش مستاهله كل التعقيد ده والله الدنيا دي فانية. انتي بتحاولي وبتقومي بس بتقعي تاني وده طبيعي جدا اصلا مفيش حد علطول مثالي ولا فيه حد مثالي اصلا. هدي أعصابك واسترخي الدنيا عايزه اللي ياخدها بهدوء مش اللي ياخدها كأنها حرب لازم نكسب فيها
تم النشر الجمعة، ٣٠ يناير ٢٠٢٦
لعرض السؤال في فدني اضغط هنا