السلام عليكم ورحمة الله وبركاته
انا عندي ٢٠ سنه من فترة كنت تعبانه عندي شويه التهابات في معدتي
وفي وقتها ملقتش غير دكتور راجل وكنت مستحيل اروح عنده وبعد ما حالتي بقت صعبه اضطريت اروح عنده . فبعد ما كشف عليا سألني هل البيريود منتظمه ولا بتتأخر وانا اتكسفت اقوله انها بتتأخر جدا ومش منتظمه فقلت له انها منتظمه 😥 ودلوقتي ندمانه لان وحده من صحابي قالت لي ممكن تنقطع و متجيش تاني
علشان امها قبل ما البيريود تنقطع من عندها كانت بتعمل كده زيي
تيجيها متأخر وتنزل حاجات بسيطه جدا
انا حاليآ عايشه في قلق وخايفة وفي نفس الوقت معنديش القدرة اروح لدكتورة أو حتى دكتور
السلام عليكم، زي ما ذكية ذكرت في إجابتها فيه أسباب كتير سواء عضوية أو نفسية تتسبب في تأخير الدورة وعدم انتظامها. لازم كشف عند طبيبة نساء عشان تعرفي السبب. ملكيش دعوة بكلام صاحبتك عموما ومتخليش القلق يسيطر عليكِ ويزود الحالة لأن التوتر والقلق برضه من أسباب عدم انتظام الدورة. إذا مش عندك القدرة تروحي لطبيبة في عيادة خاصة، روحي أي عيادة خارجية تابعة للمستشفيات الحكومية، الكشف سعره مناسب. لو المشكلة مش مادية ومثلا محرجة أو فيه مشكلة تقولي لأهلك فأعتقد صحتك أهم بكتير من أي سبب تاني يمنعك من الكشف. متتأخريش في الكشف عشان لا قدر الله لو فيه أي سبب عضوي تعرفيه بدري قبل ما يحصل أي مشاكل زيادة. وإن شاء الله تكون حاجة بسيطة أو يكون مجرد قلق وعدم انتظام هرمونات. وألف سلامة عليكِ.
تم النشر الثلاثاء، ٣٠ ديسمبر ٢٠٢٥
مبدئيا دي صحتك و دي معلومات صحية مفيهاش كسوف ياريت لما حد يسألك ع حاجة تقولي بصراحة هو دكتور شايفك كحالة يقيمها و يساعدها مش شايفك كواحدة ولو مكسوفة خدي معاكي حد من اهلك او دخلي الممرضة اتمني لو تقدري تزوري الطبيب تاني دكتور او دكتورة اللي يريحك بس متتكسفيش في المعلومات الطبية رجاء لو مقدرتيش تروحي لدكتور و استحال الأمر حاولي تبطلي سكريات و تخسري الوزن هترجع تيجي تاني ثانيا حوار والدة صحبتك هي والدتها ممكن تكون كبيرة شوية ووصلت سن الياس فالدورة عندها بتقطع و ده طبيعي في سن السيدات دي لكن انتي واحدة عندها ٢٠ سنة متقارنيش نفسك بيها هي بس غير منتظمة و مع متابعة الدكتور هتتظبط
تم النشر الثلاثاء، ٣٠ ديسمبر ٢٠٢٥
وعليكم السلام ورحمة الله وبركاته يا حبيبتي 🌸 أولاً، متخافيش خالص، تأخر الدورة الشهرية شائع جداً عند البنات في سنك (20 سنة)، ومش معناه إنها هتنقطع نهائياً زي ما سمعتي عن أم صاحبتك. ده ممكن يكون بسبب حاجات كتيرة بسيطة ومش خطيرة دايماً، زي: التوتر والقلق : زيك دلوقتي، بيأثر على الهرمونات مباشرة. التهابات المعدة أو مشاكل هضمية : اللي عندك، بتغير التوازن الهرموني. تغييرات في الوزن أو التغذية : نقص وزن أو زيادة مفاجئة. هرمونات غير منتظمة (زي متلازمة المبيض متعدد الكيسات - PCOS، شائعة وبتعالج). أسباب تانية زي مشاكل الغدة الدرقية أو حتى الحمل (لو في علاقة). اللي عملتيه مع الدكتور مفهوم، الخجل طبيعي، بس دلوقتي المهم تتابعي نفسك. خدي خطوات عملية دي : سجلي تاريخ الدورات السابقة في تطبيق (زي Flo أو Period Tracker) عشان تشوفي النمط. كلي متوازن: فواكه، خضروات، بروتين، وقللي الوجبات السريعة عشان الالتهابات. نامي 7-8 ساعات يومياً، وامشي نص ساعة يومياً (مش رياضة قاسية). اشربي شاي زنجبيل أو نعناع يومياً لتهدئة المعدة. لو استمر التأخير أكتر من شهرين، روحي لدكتورة نساء فوراً – هتلاقي عيادات نسائية مريحة وخصوصية. مش لازم دكتور راجل، وده هيطمنك تماماً بفحوصات بسيطة زي سونار أو تحاليل هرمونات. في Fedni، شوفي الخبراء في https://www.fedni.net/experts، في دكاترة نساء وتغذية هيقدروا يساعدوكِ أونلاين. وابحثي عن أسئلة مشابهة في التطبيق عشان تشوفي تجارب بنات تانيين. أنتِ قوية وهتقدري تتحكمي في الموضوع ده، ربنا يشفيكِ وييسر أمركِ. لو عايزة تفضفضي أكتر، أنا هنا 💕 (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الثلاثاء، ٣٠ ديسمبر ٢٠٢٥
انتي في جامعه؟ ممكن تروحي قسم النسا في مستشفى الجامعه بتاعتك هيكون أفضل وأحسن تعرفي سبب المشكلة وتحليها وبلاش تنتظري آراء ناس... روحي لدكتور أفضل
تم النشر الثلاثاء، ٣٠ ديسمبر ٢٠٢٥
لو عندك وحده صحيه أو مستشفي حكومي روحي الكشف مش بيبقى غالي فيها أو في جامعتك لو في جامعه بيبقى في عياده في الجامعه أو هم ممكن يحولوكي على مستشفى تبع الجامعه
تم النشر الأربعاء، ٣١ ديسمبر ٢٠٢٥
لعرض السؤال في فدني اضغط هنا