أنا متجوزه بقالي سنتين، خلال السنتين أنا قعدت منهم يعتبر سنه عند أهلي من كتر المشاكل من اهله أنا نفسيا مش كويسه ولا هو بس أنا وصلت للانهيار آخر فتره وبقيت ألطم كتير وأحاول أموت نفسي وآخر مشكله من يومين
أنا من كتر الضغط قلت لمامته لانها بتحلف مش يعيش معايا ولا يكلمني ويطلعني من البيت انه عيل علشان يتحلف عليه ولما زعق قولتله بس يا راجل بيتحلف عليك متعاشيرش مراتك ولا تقعد معاها وطلع فوق الشقه الخاصه بينا المشكله كبرت وضربني لدرجة وشي اتعور ودماغي تعبتني
وأنا قلت كلام كتير وأنا بلطم على وشي مش فاكره نصه أنا بحبه جدا وهو بيحبني بس دلوقتي يعتبر وقفنا ع الطلاق وأنا مقدرش انهي العشره اللي بينا ومعانا طفل وبحبه جدا مقدرش ابعد عنه خالص ومقدرش بجد لفكرة الانفصال أنا تعبانه جدا جدا
الزواج ربنا شرعه للتكامل وليس التناحر وطبيعي انه يحصل خلاف بين كل طرفين وهنا تأتي دور الرحمة اللي ربنا أوجدها بين الزوجين وهي رحمة متبادلة بين الطرفين ليرحم كلآ منهما الاخر وقت الخلاف ووقت الضعف كما جعل المودة واجبة لإظهار الحب والود بينهم ولكن مع شدة الاختلافات تدخل بعض العلاقات في مرحلة العناد واللي فيها بيكون كل طرف متمسك بوجهة نظره دون تنازل عنها ولأجل حل أي خلاف بين الزوجين من الضروري الا يتدخل أحد بينهم لأن تدخل اطراف خارجية قد تنحاز إلى احدهم وهذا ما يجعل المشاكل تتصاعد إلا إذا تدخل شخص حكيم يتقي الله وهنا ربنا قال " وإن يريدا إصلاحآ يوفق الله بينهما " واثناء حل الخلافات لابد من حل أساس المشكلة بعيدآ عن المسكنات التي تجعل المشكلة الاساسية قابلة للتجديد ومن الواضح ان مشكلتك أساسها السكن في بيت العيلة وعدم توافقك مع ام الزوج وهذا ما يجعل الزوج منحاز لأمه مما يثير غضبك تجاهه ويجعلك تجرحيه ببعض الكلام ولأجل انه يثبت قوته وعدم ضعفه كان طبيعي يرد على كلامك بالعنف علشان يثبت عكس كلامك انه بن امه او ضعيف او قليل الحيلة ولا شك ان اهلك لن يتقبلو اهانتك وضربك وهنا تصل الامور للصدام بينكم وعلشان نحل المشكلة دي أولا لازم نمنع الوصول للطلاق من خلال تدخل احد الحكماء من اهلك واهله علشان النفوس تهدى شويا ولأجل ان ابنكم يتربى بينكم وحاولي تسكتي خالص الفترة دي بلاش اي انفعلات او عصبية في التعامل مع الزوج لو في بينكم تواصل او مع احد من اهله علشان الدنيا تهدى وضروري ان اللي يتدخل سواء من عندك او من عنده يكون عنده صبر وحكمه وغير مندفع او منحاز لأحد وبعد كده نقدر نحل اساس المشكلة من خلال استقلالك في شقتك دون اختلاط مع اهله وكذلك اهله لا يتعاملون معك إلا كأنك جاره لهم ولو مفيش شخص حكيم من الاهل فممكن نستعين بشخص آمين زي شيخ مسجد او كبير للبلد او المكان المقيمين فيه ومن الممكن الاستعانه بمرشد أسري أو مختص نفسي للتواصل مع الطرفين لجل الصلح ويارب يصلح بينكم ويهدي حالكم ويبعد عنكم كل شر
تم النشر الثلاثاء، ١٠ نوفمبر ٢٠٢٦
السلام عليكم ورحمه الله وبركاته. هو هنا اكيد في عامل مؤثر على المشاكل الكتيره قوي دي ممكن يكون عامل سلبيه الزوج مثلا ما بيتعملش مع المشاكل بانه يشوف حلول تدوم ممكن يكون ان هو سايب الامور لوالدته انك ذكرتي ان هي قالت كذا وقال كذا فضروري جدا ان احنا لو مش عايزين الامور تنتهي بالطلاق ان احنا نسكت شويه ما نطلعش اي حاجه من ناحيتنا ونقول انا منتظره انت اللي تحل وهسيب لك الموضوع تشوف انت هتحله ازاي ولكن لازم الحل ده يكون مرضي لكل الاطراف واسيبه بقى يعني اسيبه هو يبدأ يجتهد شويه وصدقي يعني لو الشخص اللي معاكي مش بيجتهد فاعرفي انه عمر الحياه ما هتكون. شخص واحد بس هو اللي بيعمل كل حاجه فالموضوع كده كده مش هيستمر للنهايه. هيبقى دائما بنقف في النص هيبقى دايما بنختلف كثير هيبقى دايما في مشاكل كتير لانه مهما كان شخص واحد بيدي مجهود هيجي في مره وهيقف ومش هيقدر يدي المجهود اكتر من كده وهيكون مضغوط فسيبي له تدفى شويه وشوفي هيعمل ايه ومن غير ما تكوني عندك اي اندفاعيه في الموضوع من غير ما تلحي من غير ما تقولي ها فين انت ما بتعملش ليه اديني استنيت وانت ما بتعملش حاجه انت حتى محاولتش تصالحني او تتصرف في المشكله سيبي وقولي له بس انا منتظره انك تحاول انا هستنى اشوف لو فعلا انت باقي عليا ولا لا وابدا انت قيم المشاكل وحلوه.
تم النشر الثلاثاء، ١٠ نوفمبر ٢٠٢٦
لعرض السؤال في فدني اضغط هنا