الموضوع محتاج فلسفة للأسف. مافيش حاجة مابتكبرش. مش محتاج مهارة خاصة أو تعليم معين عشان تحقق حاجة خاصة. أي مهارة، أو صنعة، أو مهنة ممكن تبقى حاجة خاصة ومنتجة ومربحة. من ابسط المهن لأعلاها في تصور الناس. في تخصصك - القانون والمحاماة - نعرف إسم زي فريد الديب! وفي اسماء تانية كبيرة في مجالك. مش هاننكر ان بعضهم اتولد ومعاه ملعقة من ذهب، بس ناس كتير بدأت من الصفر. وحتى فيما يوصف بكليات القمة زي الأطباء: أطباء القلب كتير، بس مجدي يعقوب تميز وبقي حالة خاصة جدا، وبدون مبالغة طوابير الحجز عنده بالشهور. نأخد مثال تاني من النقيض عشان الصورة تظهر أكتر: في يوم من الأيام كنت مع مبلط سيراميك واشتكى ان الصنعة مالهاش مستقبل، وقال: "هافضل طول عمري كدة، كنت صبي وبقيت صنايعي ودة آخري وآخر الصنعة". قعدنا نتخيل بكرة ممكن يكون فيه إيه: هل يقدر بكرة يشيل شغل عمارة كاملة؟ آه، وليه لأ! بعدها ممكن ياخد شغل كومباوند كامل؟ آه، وليه لأ! طب لو أخد مقاولة تشطيبات كاملة؟ النهاردة ما شاء الله شغله في العاصمة الجديدة وسلم أبراج كاملة. يبقى حتى الصنعة البسيطة ممكن تتطور وتكبر. أمثلة على انواع شغل ممكن تبدأ فيها النهاردة: سمسرة العقارات : محتاج تليفونك ومعارفك، وتتابع مواقع تداول العقارات. مش قصدي تسوق للكمبوندات الجديدة أكيد، قصدي شقق الأهالي. أقل شقة النهاردة 500 ألف وعمولتك 2%. سمسرة العربيات : سوق المستعمل شغال كويس بسبب أسعار السيارات الجديدة. دة كمان محتاج بس تليفونك ومواقع السيارات ومعاك فني لو معندكش خبرة في فحص السيارات. وممكن تجديد السيارات لو معاك ميزانية محدودة. تشتري العربية وتصرف عليها وتبيعها بمكسب. بس الاتجاه دة فيه مخاطرة بسبب تقلب أسعار السوق. شارك حد : لو شايف نفسك بدون مهارة أو بمؤهلات كافية لأي مهنة أو مشروع، يبقى شارك حد تشتغل معاه بتمويل أو مجهود. وظيفة تانية : ولو مؤقتا، ممكن تشتغل في وظيفة مش محتاجة بمؤهلات زي أمين مخزن، ماسك دفاتر محاسبية، أو سكرتير. ماتستكبرش نفسك على المهنة آو الوظيفة، الظروف غالبا أقوى من أمنياتنا وتصوراتنا عن نفسنا. أخيرا، جوة زي برة. لو معندكش حاجة تقدر تعملها في مصر، هاتطلع برة تعمل إيه؟ هايفضل نفس السؤال موجود: هاشتغل ايه؟! الاستثناء الوحيد إن مهاراتك وامكانياتك موجودة فعلا بس مافيش عليها طلب في مصر، وليها ثمنها في دولة تانية. في أمريكا مثلا، الحقوق كلية قمة. بس هل يا ترى فكرت إنك جايز ظالم نفسك ومش مديها حقها؟ مين تاني قال لك إنك عادي ومش مميز ومعندكيش أي مهارات او قدرات تقدر تستثمرها عشان تقتنع بالكلام دة!
لعرض الإجابة في فدني اضغط هنا