السلام عليكم، شكرا يا عمر إنك وجهتِ لي السؤال وأرجو إن شاء الله أقدر أفيدك. ** بالنسبة لموضوع التأجيل فمش هقدر أنصحك به أو لأ. الأمر يرجع لك. أنا جربت تأجيل مادة قبل كده في الكلية على أساس هيكون فيه وقت كتير أخلصها فيه لكن مر الوقت ودخلت بعد كده الامتحان التاني بنفس درجة المذاكرة اللي أجلت عشانها، وطلبة كتير في الثانوية قرروا التأجيل بحجة المذاكرة بجدية من أول السنة لكن حصل نفس مشكلة التسويف وتراكم المنهج. فهل أنت متأكد لو أجلت هتذاكر فعلا وتجتهد ولا هو مجرد مهرب حالي من الضغط والقلق من الامتحانات؟ *** أنت عندك مشاكل (زي الانتظام والنوم والضغط النفسي) محتاجة تتظبط عشان فعلا لو أجلت تستفيد من السنة اللي أجلتها. ** متاخدش قرار التأجيل تحت تأثير الخوف والتوتر واقعد مع نفسك بهدوء وقيم وضعك، هل فعلا مستواك لا يسمح بدخول الامتحان ولا ده مجرد إحساس نابع من خوفك وقلقك؟ وعلى فكرة، ناس كتير دخلت الامتحانات وهي حاسة بالضياع وإنها مأنجزتش ومش هتعرف تحل وحققوا نتائج أفضل مما تخيلوا. ليه تفترض الأسوأ لنفسك؟ **** الاستخارة بتصليها وأنت متيقن إن ربنا هيختار لك الأفضل، فأنت خلاص ركز دلوقتي إنك تذاكر الأيام الباقية على الامتحان وفي الآخر اللي فيه الخير ربنا هيختاره لك. *** مش مطلوب منك غير السعي دلوقتي. ** لا تستهون بالكم ساعة اللي بتذاكرهم في اليوم حتى لو قليلين. التوتر وتفكيرك إنك وراك كتير مخلصش ويا ترى الامتحانات هتبقى عاملة إزاي وأنا هعمل إيه، الأفكار دي كلها بتوترك زيادة وتشوشك. ومفيش فائدة منها ولا هتمنع حاجة في المستقبل. ** الحل إنك توقف الأفكار دي وتخلي همك كله المذاكرة، حتى لو ملحقتش تخلص كل حاجة، مش مطلوب منك تقفل المنهج، مطلوب منك تسعى لآخر لحظة وتروح الامتحان فايق ومركز عشان اللي ذاكرته تستدعيه في الامتحان. ** مش عارفة امتحاناتك باقي لها قد إيه بس لو هديت وركزت تقدر تستغل الوقت كويس مهما كان قليل. لو عرفت تفصل كم ساعة بعيد عن المذاكرة تهدي نفسك فيها هيكون كويس، ارسم أو انزل شم هوا أو العب لعبة بتحبها، المهم حاجة تفصلك عن الضغط عشان تشحن نفسيتك. قلل كافيين عشان تعرف تظبط نومك. النوم الكتير ده مهرب نفسي، ثبت موعد للصحيان وأكد على البيت يصحوك فيه مهما حصل. لو غرفتك مكركبة أو كل الكتب قدامك ده غلط... اختر مادة واحدة بس، الكتاب بتاعها والدفتر ولو موبايل بتسمع الشرح منه واقعد في مكان فاضي وهادي، الدوشة والكركبة والكتب الكتير قدامك هتحسسك إن وراك جبل مخلصش. لا تخلي تركيزك باقي قد إيه متراكم، ركز على أقدر أخلص كم قد إيه. قسم المذاكرة لفترات بينها خمس دقائق راحة، تقوم تتمشى فيها، تشرب حاجة منعشة، تغمض عينيك وتسرح (المهم لا تمسك موبايل وتسكرول) عن تجربة ونفعتني، حاول تفصل فترات المذاكرة بقراءة بعض القرآن، زاحم مذاكرتك بالقرآن عشان ربنا يبارك فيها. ردد كتير الفترة الجاية ذكر (لا حول ولا قوة إلا بالله العلي العظيم) و(حسبي الله ونعم الوكيل). *** أحمد أبو زيد كان عامل فيديو (خطة إنقاذ الثانوية العامة) https://www.youtube.com/watch?v=TD3wa_bCcWY مسمعتوش كله الصراحة بس هو فيه نصائح كويسة إن شاء الله تنفعك. مش لازم تلزم نفسك بكل حاجة قالها لو حسيت إنها مش مناسباك... خد اللي يناسبك للأيام المتبقية. ** في النهاية، أهم شيء إنك تستعين بالله وتتوكل عليه بيقين وتعرف إنه هيكتب لك الخير حيثما كان إن شاء الله. طولت عليك بس حاولت أفيدك قد ما أقدر. لو لسه عندك أي سؤال اكتب لي في تعليق. بالتوفيق.🌺🌺
العفو، سعيدة جدا إني ساعدتك ولو شوية.. متقلقش واعمل اللي عليك وربنا إن شاء الله هيوفقك.💚🌺
تم النشر الأحد، ١٤ يونيو ٢٠٢٦
شكرا انا حسيت بالأمل لما قرأت نصيحتك شكرا جدا ❤️❤️
تم النشر الأحد، ١٤ يونيو ٢٠٢٦
لعرض الإجابة في فدني اضغط هنا