خايفة خايفة و قلقانة ع كل إللي حواليا بدون سبب حاسة نفسي fragile و هشة جدا وأي موقف بسيط بيخضني و يخوفني أنا مش مستحملة ضغط الحياة عليا حاسة نفسي مش زي الناس مش عارفة هبقيى أم إزاي و هبقى مسؤولة إزاي و هستحمل ضغط دراما المستشفيات إزاي لما اشتغل
و المشكلة أهلي بيقولولي أنا المواقف الوحشة و اللي بتخوف على أساس إني أنا الكبيرة و أنا اللي هستحمل وأنا أصلا أضعف خلق الله
ولما بتعب مش بيصدقوني و بيكدبوني و بيقولولي إن أنا أصلا بتلكك و المفروض استحمل و بيقولولي إن أنا بعمل كده عشان مش عايزة أتعلم و بحب حد و عايزة اتجوزه على كلامهم يعني أو عاملة مصيبة و بحاول اغطي عليها و إني نكدية زي جدتي و المشاعر دي وملهاش لازمة وأني المفروض استحمل تعليقاتهم المعفنة واقدر أعيش كده
أنا بجد تعبت و مش لاقية حد افضفضله كل اللي احكيله اللي جوا قلبي يرميلي كلمتين زي السم و يمشي و يقوللي إن انتي أصلا مدلعة و بوز نكد و مش وش نعمه و في غيرك عايش حياة أسوأ من حياتك ومبسوط و مش بيتكلم واكتر حد بيقول لي الكلام ده هي أمي
بتقوللي انتي أصلا فاضية عشان كده طول الوقت بتعيطي وإنتي مش وش نعمة أصلا و بتضربي أمثال ناس بتعيش و تستحمل و عايزاني ابقى زيهم وأنا ضعيفة أصلا و مش قادرة و بشبهني بناس أمثال سيئة في حياتها و بتقوللي إني هكبر وابقي زيهم وأني أسوأ واحدة ف أخواتي كلهم
مهما عملت مش عاجب عمرهم ما قالولي كلمة طيبة مرة واحدة والله ما بكدب ساعات بعمل أنا و حد من أخواتي نفس المجهود و نفس الحاجة بس أنا بردو مافيش تقدير ليا وأنا بفضل الوحشة المعفنة اللي مش بتعمل حاجة و الله ببقى واقفة ورا الباب و اسمعهم و هما بيجيبو ف سيرتي بكل سوء
أمي و خالتي أو أمي و هي تحكي لحد من أخواتي عني و ببقى مقهورة إزاي متوقعة مني أتحسن وأنا بالشكل ده أنا اللي خايفة منه فعلا إني يوم اتعب تعب حقيقي و ميصدقونيش و يرموني كده و يقول إني بمثل والله ساعات ببقى بتعذب من الوجع و خايفة اموت واقولهم عايزة اكشف أو أعمل إشاعات و تحاليل أنا تعبانة ... مش بيصدقوني من كتر ما روحت للدكاترة و بيقولو دي اعراض نفسية و هي إللي بتعملك الوجع ... طب تمام اكشف نفسية طيب ما هو مش معقول العذاب ده .. بيقولو لا انتي عايزة تدمني الأدوية؟!
طب أعمل أي يعني مش عايزة أفضل ف جهنم دي لأمتي احسبن عليهم عشان هما أهلي و بحبهم لكن بجد حاسة إني عايشة ف بيئة سامة مش عارفة افضفض لحد فيها أنا تعبانة وإللي حواليا مش بيسمعو أنا بدأت اصدق إني وحشة بجد من كتر اللي بيقولوه عليا
أنا نفسي أعرف بيعاملني كده ليه أنا عملت أي طيب أنا مش صغري وأنا خمس سنين بساعد أمي في كل شغل البيت و بساعدها في تربية أخواتي و بذاكر و بجيب درجات
طب عايزين مني إيه تاني أولع ف نفسي أنا تعبببببببببت والله تعبت ... بس ربنا ارحم بيا
المشكلة إني كل ما أتعامل مع طفل ألاقي نفسي بعامله زي ما أمي بتعاملني خايفة أكبر وابقي زيها بجد خايفة أعمل ف ولادي كده وأنا مش بأيدي
أولاً: بخصوص كلامهم اللي زي السم الناس متفقتش على سيدنا محمد، وهو أعظم وأكمل البشر، تفتكري هيتفقوا عليكي؟ لو بقيتي ملاك بجناحات برضه هيلاقوا فيكي عيب. كلامهم عنك إنك "وحشة" أو "نكدية" ده مراية ليهم هما مش ليكي أنتي. بطلي تدوري على شهادة "حسن سير وسلوك" من ناس هي أصلاً اللي تعباكي. ثانياً: اتعلمي "البرود" عشان تعيشي أنتي بتحرقي أعصابك في نار هما اللي ولعوها، وهمّا ولا سائلين فيكي. البرود مش معناه إنك تبقي شريرة، معناه "تكبري دماغك". لما يرموا كلمة تسم، اعتبريها "هوا" معدي. مديش ليهم رد فعل، لا تعيطي ولا تهتمي اصلا والله العظيم هترتاحي جدا لأن ده اللي بيخليهم يتمادوا. سكوتك ولامبالاتك هما اللي هيحموكي. ثانياً: وجعك والدكاترة هما يئسوا من الدكاترة لأنهم مش عايزين يعترفوا إن "البيت والظلم" هما اللي تعبينك. بطلي تقنعي فيهم يودوكي دكاترة، وخلي تركيزك إنك "تداوي نفسك بنفسك" بالهدوء والبعد عن المشاكل على قد ما تقدري. جسمك هيهدى لما عقلك يبطل يفكر في كلامهم. ثالثاً: أنتي بطلة غصب عن أي حد واحدة زيك شايلة بيت وبتربي إخواتها وهي لسه صغيرة، دي تتشال على الراس مش تتعامل كده . متصدقيش إنك فاشلة أو وحشة. أنتي أنجح واحدة فيهم لأنك صابرة على كل ده. الخلاصة: انسي كلمة "ليه بيعملوا كدة": بيعملوا كدة عشان هما كدة، مش عشان أنتي وحشة. ركزي في مستقبلك: ده مخرجك الوحيد. بكره تشتغلي وتستقلي وتعملي لنفسك حياة مفيهاش صوت عالي ولا تجريح. طبطبي على نفسك: قولي لنفسك كل يوم "أنا كويسة، أنا قوية، وكلامهم تحت رجلي". خليكي "جبل" متهزهوش ريح، وربنا هيجبر خاطرك جبر يتعجب له أهل الأرض والسماء
تم النشر الخميس، ٣٠ أبريل ٢٠٢٦
يا حبيبتي، أنا ذكية، وأنا هنا معاكِ دلوقتي، سامعاكِ بكل قلبي. أول حاجة، مشاعركِ دي حقيقية وصالحة 100% ، وأنتِ مش "دلوعة" ولا "نكدية" زي ما بيقولوا. أنتِ بتعاني من ضغط نفسي كبير، وده بيخليكِ تشعري بالهشاشة دي، خاصة مع بيئة عائلية مش داعمة. تعبتِ وده طبيعي، بس ربنا هيرحمكِ ويفرج همكِ إن شاء الله. ليه أمكِ بتعاملكِ كده؟ مش عشان أنتِ وحشة ، ده غالبًا نمط تربوي قديم من جيلها: بيحاولوا "يقسوا" علشان "يخلوكِ قوية"، بس ده بيضر أكتر ما ينفع. هما نفسهم ممكن يكونوا تعبانين وضغوطهم بتطلع عليكِ، ومش عارفين يعبّروا عن الحب غير بالنقد. مقارنتكِ بغيركِ أو بجدتكِ ده دفاع نفسي عندهم، عشان يشعروا إنهم "صح"، بس ده مش حقيقة. أنتِ مختلفة، ومجهوداتكِ (مساعدة في البيت، الدراسة، تربية إخواتكِ) كبيرة وربنا شايفها حتى لو هما مش شايفينها. إيه اللي تعمليه دلوقتي عشان تتحسني؟ اعترفي بقوتكِ : اكتبي كل يوم 3 حاجات عملتيها كويس (حتى لو صغيرة زي "ساعدت أمي" أو "ذاكرت"). ده هيبني ثقتكِ بنفسكِ تدريجيًا، وهتكتشفي إنكِ مش "أضعف خلق الله". ضعي حدود هادئة : المرة الجاية لما يقولوا كلام مؤذي، قولي بهدوء "أنا بحاول، وده بيوجعني، ممكن نسكت عن الكلام ده؟" مش لازم تصرخي، بس خلي صوتكِ مسموع. لو مش بيصدقوا تعبكِ، روحي لدكتور لوحدك (نفسي أو جسدي) وخدي التقرير، ووريهولهم بدون نقاش. رعاية نفسكِ عمليًا : نامي 7-8 ساعات يوميًا، كلي وجبات منتظمة (بروتين زي بيض أو لحمة عشان الطاقة). مارسي رياضة خفيفة زي المشي 20 دقيقة يوميًا، هتقلل القلق ده شوية شوية. ادعي ربنا كتير: "رب اشرح لي صدري ويسر لي أمري"، واقري قرآن يوميًا ولو 10 دقايق، ده هيهديكِ. عشان تخافي تكرري النمط مع ولادكِ : أنتِ هتكسريه دلوقتي ! راقبي معاملتكِ للأطفال حواليكِ، وقولي كلمة طيبة واحدة يوميًا لأي طفل (حتى لو جار). ده تدريب، وهيخليكِ أم رائعة إن شاء الله، لأنكِ واعية وبتغيري. يا قمر، أنتِ مش زي أمكِ، أنتِ أحسن وهتكوني أقوى. لو عايزة دعم أكتر، ابحثي في فدني عن أسئلة مشابهة زي "ضغط عائلي" أو روحي لصفحة الخبراء https://www.fedni.net/experts وابحثي عن معالج نفسي أو مدرب حياة يساعدكِ بشكل خاص . ربنا معاكِ، وأنا هنا لو عايزة تفضفضي تاني. 💕 قاومي، أنتِ تستاهلي حياة أحسن!
تم النشر الخميس، ٣٠ أبريل ٢٠٢٦
انتي مش حساسه مبين عمرك صغير انصحك من بعد ما سمعت كل كلامك وفسرته انتي بدك حدا يهتم فيكي وهاد شعور طبيعي ممكن تشعر فيه اي بنت بس اهلك ظالمينك انا ما بدي منك انك تتجاهلي كلام اهلك بدي منك تسايريهم بل اول اعرفي انو الكلام ال عم يحكو هوا مو فيكي سببه انهم ما اهتمو فيكي وفرقوك عن اخواتك بس بحجت انك كبيره عطوك مسئولتهم سايريهم حاولي تتعلمي اكل صحي حاولي تعملي رياضه لائنو جسم صحي عقل سليم سعاده ابديه ولا تكمل الا لما تقربي من ربنا ادعي ربنا يهديهم ادعي ربنا يغفر لهم ادعي بس بدي منك توثقي في نفسك انت بنت متل اي بنت بكل دنيا حلوه صوتها حلو عندها شعر حبي نفسك بقلك انو الحيات ما تستاهل الا نعمل الي ربنا امرنا فيه وهيا العباده ول باقي دول ازا صارو يصيرو وازا ما صارو مش نصيبك ولا قدرك
تم النشر السبت، ٢ مايو ٢٠٢٦
بصي يا حبيبتي انتي مش ضعيفة هشة ولكن انتي بس حساسة شويتين .... عندك حساسية نفسية بسبب انتقادات أهلك والسلبية اللي عايشة فيها بس جسمك بيدي رد فعل لنفسيتك واحساك وجلدك لذاتك ده بالسلبية ... أول تحسي بإنك عايزة تفضفضي روحي اتوضي وصلي وكلمي ربنا في سجودك فضفضي بإحساسك ومشاعرك إدعي ربنا يقويك ويرزقك الثبات ويشفيك من حالتك الجسدية والنفسية... قربك من ربنا هو الشفاء الوحيد لحالتك صدقيني هو اللي هيديكي الغني عن البشر كلهم حتي أهلك نفسهم أنا بحيلك الكلام عن تجربة والله نفسي أسمع كلمة حلوة من أهلي نفسي في حد يدعمني ويشجعني ونفسي يومي يعد من غير ما حد ينتقدني ويعلق على غلطي ويتريق عليا ولكن كل ده ما عادتش بيهمني ... أنا ما علييش سوي برهم بس هما حسابهم علي ربنا أعمالهم لمشاعري وإحساسي ... مع إني بحبهم وخايفة عليهم ولكن أنا بشر أنا بردو زيي زيكم ولكن لا حياة لمن تنادي.... فبقيت لما أبدأ أحس بإحساس زي ده أروح أشكي لربنا وأدعي من كل قلبي أدعي لنفسي .... بقولك عن تجربة والله.... انتي مش وحشة ولا غلط ده بسبب تنشئتهم الغلط ... انتي عليكي برهم وعدم التأثر بآرائهم.... هقولك على حاجات حلوة كمان والله والله والله كانت سبب في عدم تأثري بكلام أهلي ... لزوم الإستغفار إلزمي الإستغفار حياتك هتتغير والله العظيم.... ازاي؟ أستغفر الله.... دي بس تقوليها طول اليوم في كل لحظة في كل وقت ما تخليش لسانك يخلوا من الإستغفار .... واحدة كمان سورة البقرة يومياً.... بصي دي بقي لوحدها معجزة ... بتبعد الشياطين إللي في البيت تحصين وحماية وشفاء تأثيرها علي البيت كله مش علي قارئها بس ... سبب للرزق والتوفيق والله الشخص الوحيد اللي عرف يحكي عن الإتنين دول هو الشيخ محمد حجازي جزاه الله خير الجزاء.....بصي بقي أفضل وقت تصلي فيه ركعتين ودول فضلهم كبير جداً ومن ناحية كمان تفضفضي فيهم هما ركعتين قيام الليل بيبدأوا من بعد الساعة 12 لحد الفجر بصي بقي والله واحد بيقول أنا مش فاكرة هو مين بيقول أنا مفيش دعوة دعيتها من قلبي وكلي يقين بالله في سجودي في قيامي الليل ما يخلصش اليوم إلا ودعوني مستجابة ولو تأخرت ما ينتاهش الأسبوع إلا وهي متحققة .... إدعي فضفضي ربنا قال في كتابه الكريم ونحن أقرب إليه من حبل الوريد.... ربنا أقرب ليكي من نفسك أقرب ليكي من فكرك أقرب ليكي من أي بشر أحن عليكي من أهلك والله إلتزمي باللي قولتلك عليه ولكن بيقين بالله عز وجل لمدة أسبوع بس وشوفي بنفسك انتي هتكوني عاملة ازاي وتحية بإيه والله أنا كنت زيك وأسود كمان أنا أستغفر الله ما كنتش بصلي مع إني في أسرة متدينة ولكن ما قدرتش بسبب كثرة الذنوب وعدم إحساسي بالعبادة وعدم خشوعي وكل ده كان علاجه في الإستغفار وسورة البقرة وقيام الليل..... وعدم التعلق بأي بشر وحالياً بدعي بالزوج الصالح عاجلا غير آجل يكون سبب نجاتي من الأسرة ... وبس يا حبيبتي أنا هنا في أي وقت لو بقيتي محتاجة أي مساعدة أو أستفسار وادعيلي بالله عليكي أنا طالبة في الأزهر تانية ثانوي أدبي ربنا يوفقنا وإياكم يارب العالمين ويارب يهديلك اهلك والله 🤲😔
تم النشر الجمعة، ١ مايو ٢٠٢٦
انتي مش وحشة او سيئة ، اهلك هما الي بيبصوا لنص الكباية الفاصي دايما ، اوعي تاخدي كلام اي حد سلبي بعين الاعتبار مدام مش بينتقدك بحكمة و بمنطق
تم النشر الجمعة، ١ مايو ٢٠٢٦
الشيء الوحيد الي حيخليكي متكرريش ده مع اطفالك في المستقبل هو التعافي و الوعي و انك تمري برحلة تعافي تدركي فيها كل شيء عن نفسك و عن ضرر الي حواليكي
تم النشر الجمعة، ١ مايو ٢٠٢٦
لعرض السؤال في فدني اضغط هنا