مساء الخير
عايزه احكي حاجه عارفه المفروض محكيهاش بس بجد انا مش قادره استحمل الوضع اكتر من كده انا طالبه عندي 21سنه كنت فكليه علاج طبيعي بس سحبت ملفي ومكملتش بسبب موضوع حصلى وبسبب نفس الشخص دا انا دخلت الكليه دي برضو
انا كنت مرتبطه بجد من وانا فتالته ثانوي انا اعرفو من تانيه ثانوي بس مكنتش قادره اكلمو بس خدت الخطوه فتالته ثانوي وفضلنا سنه ونص صحاب وبعدها فضلنا سنه ونص مرتبطين وبجد عشت معاه احلى ايام عمري ومتمنتش حاجه من الدنيا غيرو وفضلت دايما جمبو بس حسيت ف آخر فتره انو متغير وبقا بيتكلم دايما على الفراق وبعدها اختفى مره وحده شهرين وبعدها رجع بس كان غريب في كل حاجه
حسيت مش دا الشخص اللى فضلت 4 سنين احب فيه المهم قولتلو أن فى حد متقدملى من العيله وإهلي موافقين هنا واتصرف حاول نتخطب سنتين او تلت سنين رفض قال الموضوع مش في باله دلوقتي ولسه ميعرفش امتا ممكن يفكر قولتلو اشطا نتخطب تلت سنين قال مش هينفع وكده حاولت ألاقي حلول بس مفيش حل
فقالي ربنا يوفقك فحياتك وانا من البدايه قولتلك متتعلقيش بيا وخلينا صحاب احنا من شهر 8 منفصلين انا مش عارفه اتخطاه مسحت رقمو والصور والشاتات وكل حاجه بس كل دقيقه ببكي ودخلت في اكتئاب وبقيت عايشه على الفيتامينات والمنوم ومبقتش قادره اسيطر على دموعي بفكر فيه 24ساعه وحتى لما بنام بحلم بيه
مش قادره أنسى الذكريات اللى بينا ومش قادره أنسى ولا لحظه من اللى عشناها سوا هو وعدني اننا هنكون لبعض مش عارفه اى اللى حصل بجد مش مستوعبه اى حاجه وحاولت اكتر من مره اني انتحر
انا مسلمه وبحفظ قرآن وكنت ملتزمة في صلاتي بس دلوقتي انا مش بطلع برا اوضتي وعلطول بسمع اغاني وبطلت اصلى وعلى طول عياط مش قادره استوعب كل اللى حصلى دا نفسي أنساه وارجع لربنا من تاني مش عارفه انا ازاى بقيت كده وازاى وصلت لهنا انا ضعت عارفه بس مش قادره ارجع زي ما كنت أو أتحسن
حرفيا حياتي بقيت عباره عن عك هو كمل عادي ولا كأني كنت في حياته يوم وانا انتهيت مش عارفه اكرهو أو ابطل احبو 💔
السلام عليكم، بصي حبيبتي، أنا عارفة الموضوع صعب ومشاعرك مش بضغطة زر هتقدري تحذفيها وصعب ومؤلم اللي حصل بعد أربع سنين، لكن صدقيني لو وقفتِ مع نفسك وقفة وراجعتِ نفسك وبصيتِ للأمور من الزواية الصح هتلاقي إن مفيش حد أبدا في الدنيا يستحق تهلكي نفسك وتخسري دنياك وآخرتك عشانه خاصة لو حد باع ومفرقتيش معه. أنتِ كنتِ صادقة ومتمسكة لكن هو كان بالنسبة له الموضوع لعب عيال وتسلية لفترة ولما زهق زي أغلب الشباب ما بيعملوا قال لك ربنا يوفقك وأنا قلت لك متتعلقيش بي. كلامه وتصرفاته بتقول إنه من البداية كان بيتسلى وبيقضي وقت حلو وبيملأ فراغ عاطفي، فليه تسمحي لحد زي ده يضيع عليكِ أغلى أيامك وتخسري عشانه نفسك وعلاقتك بربنا وتهلكي نفسك بالطريقة دي؟ ** لو الحالة اللي أنتِ فيها عشان صعبان عليكِ نفسك فتمام أنا متفهمة مشاعرك لكن الطريقة اللي مكملة بها مش هي اللي هتساعد نفسك اللي صعبانة عليكِ، لو فعلا مهتمة لها يبقى اكسري الدائرة دي وفوقي لنفسك وحياتك. ده اللي نفسك محتاجاه منك. *** أما لو، الحالة اللي أنتِ فيها عشان مفتقداه ومش قادرة تعيشي من غيره وعايشة في جو الحب الأبدي وإنه كان كل حاجة في حياتك ومش هقدر أنسى أو أحب حد تاني وعمال تجتري ذكرياتكم سوا، فهنا أقول لك إنك غلطانة. طبيعي تحسي بحنين وتلاقي صعوبة في كسر التعلق، لكن ده مش معناها إنك تستسلمي للحالة دي وتهلكي نفسك عشان شخص ميستاهلش. المفروض تفكري نفسك كل شوية باللي حصل منه وتفوقيها من وهم الحب المثالي والذكريات الحلوة اللي عشتِها معه لأنها حتى وإن كانت غالية بالنسبة لك فهي في النهاية كانت بالنسبة له مجرد تقضية وقت، حتى لو قال لك كلام حب أو قد وعود فالحب مش بالكلام، والوعود اللي بتتقال في فورة العواطف والسحابة الوردية للحب مبيتاخدش بها والرجالة أول حد بيرميها ورا ظهرهم. ***** عارفة أول مخرج من مشكلتك إيه؟ إنك تستعيني بربنا وترجعي له وتعترفي إن علاقتك بالشخص ده كانت حرام (لأنها شرعا كانت حرام) فلازم تستغفري عنها، كثري الاستغفار وتوبي لربنا عن الفترة اللي كنتِ فيها على علاقة به وادعي ياخد بيدك ويعينك إنك تنسي وتتجاوزي. وتعاملي مع الماضي إنه درس واحفظيه عشان متكرريش الغلط ولا تسلمي مشاعرك بسهولة وتتعلقي بحد للدرجة المهلكة دي. متحاوليش تقاومي التفكير فيه ولا نسيان الذكريات، المقاومة بتزود التفكير. انشغلي بجدية في حياتك وأهدافك واطلعي من وهم الحب الأبدي زي ما قلت ومع الوقت الأفكار دي هتقل وهيصبح في النهاية مجرد ذكرى، جايز تفتكريها بوجع وجايز أصلا متحسيش بحاجة لما تخطر ببالك. وأرجع وأؤكد، متوقفيش حياتك ولا تهلكي نفسك أو تخسري دنياك وآخرتك عشان حد مهما كانت معزته عندك. استعيني بالله وربنا يوفقك.💚💚
تم النشر السبت، ٣١ أكتوبر ٢٠٢٦
متقاوميش التفكير ولا النسيان كل ما هتقاومي وتحاولي تنسي ألمك هيزيد ويشتد خليكي مرنه سيبي التفكير يشتغل ولا تقاوميه.. زاحمي التفكير بحاجات جديدة تانية واهمها الطاعة زي ما قلت سابقاً... ثم الأنشطة الرياضية اعملي رياضة اتمشي اخرجي مع صحباتك مارسي هواية بتحبيها... اسمعي بودكاست مفيد أو سلسلة محاضرات ع التيوب المهم الزحمة المفيدة لو احتجتي مساعدتي لن أتأخر عنكي بإذن الله تعالى في النصيحة تابعيني ....
تم النشر الجمعة، ٣٠ أكتوبر ٢٠٢٦
وعشان تخرجي من الصدمة دي املي الفراغ اللي سابه الشاب ده جواكي تمليه بطاعة الرحمن برجوعك تاني لربك حتى لو مش قادرة تصلي حاليا استغفري انتي محتاجة للاستغفار جدااااا متخليش الاستغفار يفارق لسانك..هو حبل النجاة ليكي حاليا .. انتي ف حالة عذاب والاستغفار هيخفف ويخفف لحد ما الألم يختفي وأنصحك تسمعي للشيخ امجد سمير واحمد العربي وأحمد جلال ومحمد الغليظ... اسمعي للناس دي هتستفيدي جدآ ان شاء الله
تم النشر الجمعة، ٣٠ أكتوبر ٢٠٢٦
مساء النور أختي الكريمة.. أولا انتي تجاهلتي طبيعتك وهى ان الانثى اكثر تعلق من الرجل والخيانة والتخلي والخذلان ممن أحبته يتركون فيها أثر سلبي كبير..والتعلق ده جيه ف وقت بدري وقت لايصح ليكي التعلق فيه ..الصح كنتي ركزتي ف دراستك وعبادتك لله...التعلق لازم ييجي ف وقته الصح وهو الزواج ..ده الطبيعي .. المهم دلوقتي انتي مش هتنسيه ف مرة وحدة ومتركزيش على انك تنسيه ركزي على انك تخرجي من الصدمة دي حاليا
تم النشر الجمعة، ٣٠ أكتوبر ٢٠٢٦
مساء الخير يا قمر، أول حاجة أحب أقولها لك إن اللي بتمرّي بيه دلوقتي صعب جدًا، ومش عيب إنك تحسي بالضياع والاكتئاب والدموع اللي مش بتوقف. أربع سنين مش فترة بسيطة، وطبيعي إن الذكريات والوعود اللي اتقالت تكون لسه بتأثر فيكِ بقوة. الأهم دلوقتي إنكِ عايزة ترجعي لربنا، وده أقوى خطوة ممكن تبدئي بيها. حتى لو الصلاة بقت صعبة، حاولي ترجعي بخطوات صغيرة جدًا: صلاة واحدة في اليوم، أو حتى مجرد الوضوء والجلوس على السجادة دقيقتين. القرآن اللي كنتِ بتحفظيه ممكن يكون ملجأ، اقرئي آيات عن الصبر والفرج، وخلّيها تكون تذكير يومي إن اللي بيحصل ده مش نهاية حياتك. ربنا شايف تعبك، وهو أرحم بيكِ من أي حد. بالنسبة للنسيان، هو مش هيحصل بين يوم وليلة، ومش لازم تكرهيه عشان تنسي. اللي ممكن يساعد هو إنكِ تركزي على حياتك تاني: ارجعي تفكري في دراستك أو أي هدف كان عندك قبل العلاقة دي، حتى لو خطوة صغيرة زي قراءة صفحة أو الخروج من الأوضة لمدة ساعة. كل ما تملي وقتك بحاجة مفيدة، الذكريات هتقل تدريجيًا. ولو حسيتِ إن الدموع والأفكار بتسيطر عليكِ، جربي تكتبي مشاعرك في مذكرة، ده بيساعد كتير في تصريف الألم. أنتِ قادرة ترجعي أقوى مما كنتِ، وهتكوني أحسن إن شاء الله. ابحثي عن أسئلة مشابهة على فدني، هتلاقي قصص كتير بتشبه حالتك وبتدي منظور أوسع. خدي وقتك، وربنا معاكِ في كل خطوة. 💛
تم النشر الجمعة، ٣٠ أكتوبر ٢٠٢٦
لعرض السؤال في فدني اضغط هنا