السلام عليكم، أولا ربنا يوفقك في دراستك وحياتك. بالنسبة للعمل فإذا مفيش حاجة ماسة له فركزي على الدراسة حاليا وممكن تقتطعي جزء بسيط من يومك لتعلم المهارات اللي تقدري تشتغلي بها في العمل الحر بعد كده لأن الدراسة في الكليات الطبية خاصة بتحتاج وقت وجهد وممكن متقدريش توفقي بينهم لو مفيش خطة وإدارة وقت كويسة. ** لو لازم تشتغلي حاليا فده هيعتمد على المهارات اللي عندك، هل عندك مهارة الكتابة فتشتغلي كاتبة محتوى مثلا أو عندك تصميم فتشتغلي في التصميم الجرافيكي وهكذا. يعني أنتِ اللي تقدري تحددي المجال اللي تشتغلي بيه. ** كونك في طب أسنان هيكون كتابة المحتوى الطبي أو الترجمة الطبية قريبين لك فممكن تبدئي كده وتشوفي النظام إيه. عندك فيه أكاديمية ابن سينا فيها كورسات للمجالين لو حابة تجربي وفيه على اليوتيوب كورسات مجانية. ** كتابة المحتوى عموما هو مجال كبير ومش مقتصر على كتابة مقالات بس فيه منه كتابة محتوى تسويقي إعلاني زي الإعلانات وبوستات التسويق على السوشيال ميديا وفيه كتابة محتوى مقالات ومدونات وفيه كتابة سيناريوهات وغيره. فأنت إذا حابة تبدئي كتابة محتوى اقرئي الأول عنه ككل واختاري فرع منه يكون الأنسب لك. ممكن تشوفي الفيديو ده عن كتابة المحتوى وخدي فكرة https://youtu.be/O4qMjCwXukc?si=CXYaB8DlBNDw690t ** هتحتاجي طبعا تعملي نماذج عمل وبورتفوليو محترم عشان العميل يعرف مهاراتك ويختار على أساس النماذج إذا هيطلب خدمتك. العميل مش هيهتم بشهاداتك والكورسات اللي أخدتِه، اللي يهمه نماذج عملك اللي تثبت تقدري تعملي اللي طالبه. ** مهم جدا تعملي حساب لينكدن ومتخافيش أبدا منه ولا تحسي إن الكل هناك عنده إنجازات ومتقدم عندك، أهم حاجة عليه إنك تعملي حسابك صح وتكتبي مهاراتك واللي تقدري تعمليه وتنشطي في إظهار معلوماتك وكمان تعملي شبكة علاقات وتتفاعلي مع الناس هناك عشان تظهري ويفتكروكِ لو فيه مجال لفرصة شغل. *** لو ناوية على كتابة المحتوى فأرشح لك صفحة (عبر بالمحتوى) والعمل الحر عموما ممكن تتابعي صفحة وقناة يوتيوب (click your future) هتفيدك كتير في العمل الحر وإزاي تثبتي نفيك وتلاقي عملاء إن شاء الله. وبالتوفيق.
لعرض الإجابة في فدني اضغط هنا