السلام عليكم، هو أولا حاول تفصل بين خطط تطوير الذات وتعلمك وإتقانك للإنجليزي، أنا عارفة المحتوى الأجنبي كتير وهيفيدك لكن الحمد لله حاليا فيه محتوى بالعربي كتير ومفيد جدا وهيساعدك، ده إذا تقصد التأثير من ناحية المحتوى ومصادر التعلم. إذا قصدك إن عدم نجاحك معناه إنك مش عندك القدرة على النجاح في أهداف تانية فده هيحتاج منك تغير الفكرة دي لأن الاتنين ملهمش علاقة ببعض. فيه ناس مش بيحبوا تعلم اللغات أو عندهم صعوبة في اكتساب لغات جديدة لكن عندهم مهارات وملكات عالية تانية وفيه ناس عندها مهارة تعلم واكتساب اللغات بسرعة. فده لا يؤثر سلبا عليك كمتعلم وراغب في تطوير الذات ولا ينقص من ثقتك في نفسك. **** بالنسبة لتعلم الإنجليزية فطالما عندك عقدة منه حاول تغيير نظام تعلمك. لا تتعامل مع اللغة كمادة دراسية يلزم حفظها. ممكن طريقة تعلمها في المدرسة أثر سلبا على اكتسابك لها وفضل موجود حاجز نفسي فغير طريقة تفكيرك ناحية التعلم. طول ما أنت بتتعامل معها كواجب دراسي هيفضل الحاجز موجود. لغتنا الأم اكتسبناها بالسماع والممارسة طول الوقت مش بحفظ الكلمات والقواعد النحوية فتعامل مع أي لغة جديدة بنفس الطريقة. انغمس في اللغة بأكبر قدر ممكن.. اسمع بودكاست وفيديوهات يوتيوب في مواضيع بتحبها واقرأ كمان في مقالات عن المواضيع اللي بتهمك، جرب طريقة shadowing عشان تدرب عضلة التحدث وتكتسب مهارة التحدث أسرع. ومع الوقت هتلاقي مهارة السماع والفهم زادت ونسبة الجمل اللي ثبتت في ذاكرتك أكبر. فيه أسئلة كتير على التطبيق عن تعلم الإنجليزي واللغات عموما هتلاقي فيها نصائح أكتر فابحث عنها وإن شاء الله تفبدك أكتر. لو عندك أي سؤال قولي وإن شاء الله أرد عليك. وبالتوفيق.
لعرض الإجابة في فدني اضغط هنا