انا عندي مشاكل كتير مع اهلي عارفين المشاكل بين الاب والام والخناقات وحاجات من هذا القبيل ودي حاجه بتأثر اوي علي نفسيتي وبتخليني معرفش افكر كويس او افكر في نفسي وطول الوقت بفكر في المشاكل دي وقد ايه انا بكره اهلي لانهم السبب في عقد نفسيه كتير عندي انا حاليا في تانيه ثانوي وطبعا دا محتاج مذاكره وتركيز بس انا مش بقدر اركز بسبب الخناقات الي مش بتخلص وفوق كل دا انا عندي صداع مزمن ونقص فيتامينات وانيميا ومشاكل تانيه من وانا صغيره وانا دايما بروح للدكاتره وامي زهقت دلوقتي لما اقولها وديني لدكتور بتقولي بعدين او بتطنش وانا الصراحه تعبت وعايزه حل ازاي اقنعها توديني اكشف، انا بحاول التزم في الصلاه علي قد ما اقدر بس مره اصلي وعشره لا انا عارفه ان دي حاجه مش كويسه وحاجه لا يفتخر بيها بس انا بحاول وكل ما اجي اقرب واحس اني هفضل اصلي ومش هقطع الصلاه برجع تاني عايزه حل ازاي اقدر استمر انا بحس بتأنيب ضمير طول الوقت، عندي ادمان للاغاني عايزه اعرف ازاي اوقف حتي لو مش عايزه اسمع اغنيه بلاقي نفسي بروح اسمع سعات بمسك نفسي يوم او يومين بعدين ارجع تاني ودي حاجه مضايقاني اوي،في الدراسه انا مش احسن حاحه يادوب اذاكر قبل الدرس الي عنده نصايح خصوصا في الجزء دا وازاي اقدر اقوي ذاكرتي واستيعابي،،، مختصر الكلام كله اني عايزه ما اتضايق في كل مره اشوف اهلي بيتخانقوا فيها وعايزه التزم في الصلاه وابطل سماع اغاني والتزم في المذاكره انا متدمره حرفيا لا باكل كويس ولا بطلع برا البيت نفسيتي وصحتي اسوء حاجه..اسفه لو طولت في الكلام بس انا محتاجه بجد النصيحه ازاي اغير من نفسي بسرعه لاني زهقت من الوضع دا
بما انك كنتي بتروحي لدكاترة حاولي تلتزمي بالعلاج اللي اكيد كنتي بتاخديه .. وكلي كويس، لان الاكل عامل مهم جدا برضه الخضروات مهمه جدا زي السبانخ مثلا. المكسرات اللحوم الاسماك البيض البقوليات لو والدتك مش راضية توديكي للدكتور، قولي لبابا مثلا او خالتك لو قريبة منك، او اي حد قريب منك في العيلة ينفع تطلبي منه الطلب ده، او تطلبي انه يكلم ماما ويقنعها. بالنسبة للمذاكرة، حاولي تعملي جدول للمذاكرة او دول لليوم بتاعك وتحاولي تلتزمي بيه، ولكن حطي فعلا حاجات تلتزمي بيها، متصعبيش الدنيا على نفسك، لو ده هيفشل معاكي، حاولي تذاكري مع اي حد من صحابك، الطريقة ديه بتجيب نتيجة كويس. بالنسبة للجو العام اللي في البيت، اي بيت لا يخلو من المشاكل، حاولي تقنعي نفسك بكده، واللي هيساعدك انك تعذريهم اكتر، هو معرفة سبب مشكلة كل واحد .. يعني مثلا ماما بتزعق طول الوقت، لو حاولنا نعرف ماما بتعمل كده ليه طول الوقت احتمال كبير تعذريها، ممكن علشان مش عارفه تعمل ايه في المصاريف، ممكن مش عارفه توفر ليكم المطلوب مثلا ف علشان كده متنرفزة، ممكن خناقات مع بابا فهي مضايقة، بضطر تطلع ده عليكم، بابا لو بيزعق ممكن من الشغل، برضه اي حد في مكانه، كمان في ظل الظروف ديه هيكون شايل هم كبير ومش عارف يتصرف ازاي! ف انتي من المنطلق ده حاولي تلاقي مبرر لكل واحد فيهم واعذريهم على الوضع ده، وافصلي تماما لما تحصل اي حاجه زي كده، حطي السماعات في ودنك مثلا وادخلي غرفتك. وافصلي تماما عن الجو ده. الاغاني بدليها بشئ تاني، اسمعي بودكاست هيفيدك وهتطوري من نفسك، كمان هو ممتع جدا ومش هتملي منه. ديه قائمة بودكاست كويسة سلسلة Hazcast لحازم الصديق سلسلة البودكاست ل لدروس اونلاين (احمد ابو زيد) سلسلة show cast ل أحمد شاهين بالنسبة للصلاة، شوفي الاسئلة ديه واجاباتها https://fedni.net/q/74505634/عايزة-التزم-في-الصلاة-و-ديني https://fedni.net/q/10260422/الكسل-عن-الصلاه https://fedni.net/q/91463311/نفسي-التزم-في-الصلاة-اوي
تم النشر الثلاثاء، ١٩ سبتمبر ٢٠٢٣
اي حاجةة هتخليكي تحسي بتأنيب الضمير بعدها متعمليهاش زي مثلا سماع الأغاني او إنك متصلِيش مةلا قومي وصلي هتحسي انك ارتاحتي عشان أديتي فالفرضِ اللي عليكِ واحده واحده وهتلاقي الدنيا ظبطت متيأسُيش. مفيش حد ملتزم إلتزام تام بس احنا بنحاول نرضي ربنا على قد ما نِقدر وافتكري لا يُكلف الله نفساً إلا وِسعها،ربنا فرض علينا الصلاه لانه عالم اننا نقدر نصلِي ولما حرم علينا حجات عالم اننا نقدر فعلا منعملهاش وهو حرَم او شرع لينا حجات لامه عالم بينا واي الصالح لينا.فاهمةة.
تم النشر الثلاثاء، ١٩ سبتمبر ٢٠٢٣
لو امك بتطنش توديكي الدكاترة ممكن تروحي مع ابوكي أو تاخدي حد من قرايبك يمكن هي مش فاضية مثلا اللي خلاني التزم عالصلاة اني فهمت ان انا اللي محتاج الصلاة يعني اما بفوتها كدا بضر نفسي، اربطي مواعيدك بالصلاة متخليهاش حاجة فرعية يعني مثلا وقت المذاكرة قولي هبدأ بعد صلاة العشا و اما العشا تأذن تصلي بعدين تبدأي مذاكرة وكذلك مع باقي الصلوات وخلي السجادة والعباية جمبك عشان متتكاسليش لازم تفهمي ان الاغاني مفيش منها اي فايدة وارهاق للعقل والمشاعر فالفاضي وانسب وافيد حاجة تبدلي الاغاني بيها هي البودكاست هيفيدك جدا وهتلاقي انك كنتي بتضيعي وقت في سماع الاغاني وبالمرة اسمعي بودكاست عن الصلاة أو سماع الاغاني هتلاقي فكرك عنهم اتغير تماما، احسن قنوات بودكاست : ايه المشكلة، وعي ، احمد عامر السيرة النبوية، حازم الصديق
تم النشر الثلاثاء، ١٩ سبتمبر ٢٠٢٣
مشاكل اهلي هي اكتر حاجه مأثره عليا اوي اصلا وضعهم زيي واسوء وانا عارفه انهم تعبانين في حياتهم وعندهم مشاكل بس دا بيأثر عليا بالسلب اوي يعني لما بيكونوا برا البيت انا بكون مرتاحه جدا ونفسيتي كويسه وبحس اني نشيطه علي عكس لما بيكونوا موجودين بحس بتعب غريب دايما ووجع في قلبي وبحس اني مش قادره اقوم ولا اعمل حاجه ولا عايزه اعمل حاجه حتي يعني هما بالنسبه ليا اكبر مشكله لو مش موجودين انا بكون احسن بكتير ومفيش حل لاني بشوفهم طول الوقت ومش هعرف اطنش الخناقات لاني بكون دايما جزء منها هما كدا من وانا صغيره مشاكل طول الوقت ولحد دلوقتي لسه ما اتعودتش لسه بتعب وبضايق لما بشوفهم او حتي افكر فيهم بسبب ان بابا بيزعقلي وبيشتمني دايما اتفاجت ان لو حد تاني زعقلي غيره مش هتكلم او اعمل حاجه عشان انا اتعودت اني اتشتم ويتزعقلي دايما موضوع الاهل دا بالذات ما اظنش اني هقدر احله بنصيحه نفسيتي متدمره تماما بسببهم ودا سببلي عقد كتير منها اني معنديش اي ثقه بنفسي نهائيا بخاف اطلع من البيت ممكن اقعد بالشهور من غير ما اطلع عشان بخاف من الناس معرفش ايه سبب الشعور دا بحس كأن الكل بيبصلي وانا اصلا معنديش ثقه بنفسي فا برتعش بمجرد ما اطلع الشارع ومعنديش ثقه في اي حد نهائيا ومشاكل تانيه كتير انا تعبت ومفيش حل معاهم جربت كل حاجه بس مفيش حاجه بتنفع شكلي هفضل كدا لحد ما اتخرج واشتغل بعدين هبعد عنهم بأي طريقه
تم النشر الأربعاء، ٢٠ سبتمبر ٢٠٢٣
طيب واضح ان فيه حاجات كتير مأثره عليكي ... معلش رتبيهم من حيث الأولويه يعني من حيث المشكله الي هيا لو اتحلت الباقي سهل ويتحل وراها.. واتناقشي معايا فيهم واحده واحده
تم النشر الثلاثاء، ١٩ سبتمبر ٢٠٢٣
لعرض السؤال في فدني اضغط هنا