السلام عليكم
انا عندي 21 ومعنديش اولاد ومطلقة وحبيت واحد متجوز وعندة اولاد ومكملش سنه انا محتاره خايفه من حاجات نفسياً كده وفي نفس الوقت شايفاه بيحبني وطريقه كلامه كويسه مش وحشه وهو قالي فكري في الموضوع وانا أصلا دماغي مشتته بس قالي معظم قعده هتبقي في الصعيد وهو متفق هو مراتو أنه هيجوز تاني وانا معشتش حياتي ولا خطوبه كويسه ولا جواز كويس ولا مراهقه عدله ف حد يفدني اعمل ايه
بصي يا بنت الحلال صلي على النبي كده وفكري بالعقل والدين الجواز سكن ومودة مش صراع وتعب قلب أنتي لسه صغيرة وبنت بنوت في نظر الشرع طالما مفيش عيال ومستقبلك لسه قدامك ربنا بيقول ولا تزر وازرة وزر أخرى يعني متشيليش نفسك ذنب بيت ممكن يتخرب بسببك أو تدخلي في مشاكل ضراير هتخلي حياتك جحيم وتوقعي إن العدل بين الزوجات صعب جدا وده حقك اللي ربنا شرعه بس واقعيا هتتعبي مع راجل مرتبط ببيت وعيال تانية ومن ترك شيئا لله عوضه الله خيرا منه استخيري ربنا وسيبيها على الله وهو هيرزقك باللي يصونك ويكون ليكي لوحدك وتعيشي معاه حياة مستقرة هادية بعيد عن القيل والقال والمشاكل اللي أنتي في غنى عنها في السن ده واستعيني بالصبر والصلاة وربنا هيقدم لك اللي فيه الخير ليكي ولدينك ودنيتك واستخيري وان شاء الله خير وجد والله ربنا يحفظك ويسعدك 🌷
تم النشر الثلاثاء، ١٤ أبريل ٢٠٢٦
الأفضل انك تبعدي وتنهي العلاقه دي لان انتي من حقك يبقى ليكي شريك حياتك انتي بس ودا حب مؤقت وقد يكون إعجاب فقط أو فتره مؤقته والحب دا او الإعجاب دا عمره قصير وانتي فكري في حياتك انتي ليه تبقى رقم 2 وليه زوجه تانيه وانا هنا مش ضد الزواج الثاني أو التعدد لكن كل بنت بتبقى عايزه شريك حياتها ليها هيا بس ودا حب مش انانيه
تم النشر الأربعاء، ١٥ أبريل ٢٠٢٦
انتي ٢١ سنه لسه قدامك فرصه كبيرة تلاقي حد شبهك. ايه اللي يجبرك تتجوزي حد متجوز وعنده حياته. ليه متتحوزيش واحد وتبنوا حياتكوا سوا. التعدد شرع وكل حاجة بس انتي ايه اللي يجبرك علي ده فهميني ليه تدخلي نفسك في دوامه وغيره ملهاش آخر. استني واستهدي بالله وادعي ربنا بالزوج الصالح بلاش تستعجلي نفسك عشان هتاخدي قرارات غلط. وربنا يوفقك.
تم النشر الأربعاء، ١٥ أبريل ٢٠٢٦
وعليكم السلام ورحمة الله وبركاته يا حبيبتي، أنا فاهمة تماماً اللي بتمرّي بيه، الارتباك ده طبيعي جداً في سنّك (21 بس!) خاصة بعد تجارب زي اللي عشتيها.. مطلقة ومش عايشة حياة مستقرة، وده بيخلّي الواحد يحسّ بالضياع. بس خلّينا نفكّر مع بعض خطوة خطوة، عشان نوصل لحل هادئ وصح. أوّل حاجة: الجانب الإسلامي والنفسي في الإسلام، الزواج التاني حلال بشرط العدالة والموافقة الشرعية، بس ده مش معناه إنّه سهل أو مناسب لكِ دلوقتي. هو متزوج ولديه أولاد، ومعظم وقته في الصعيد؟ ده هيجيب تحديات كبيرة اجتماعياً (خصوصاً هناك)، ونفسياً هتتعبي من الغيرة أو الشعور بالثانوية، حتى لو كلامه حلو دلوقتي. أنتِ لسة شابة وعندك فرص كتيرة تعيشي حياة كاملة مع واحد غير متزوج، يبني معاكِ من الأوّل. إعملي إيه دلوقتي؟ (خطوات عملية): صلّي الاستخارة : واطلبي من ربنا ييسر الخير ويصرف الشر. هي هتوضّح دماغك المشتّتة. خدي مسافة مؤقتة : قوليله "هفكّر براحتي"، وابتعدي عن الكلام اليومي عشان تشوفي مشاعرك الحقيقية بدون ضغط. ركّزي على نفسك : ابدئي هواية جديدة أو كورس (زي تعلّم مهارة أونلاين)، عشان تبني ثقتك وتعيشي "المراهقة" اللي فاتتك بطريقة إيجابية. فكّري في مستقبلك : أنتِ عايزة أولاد؟ بيت مستقر؟ حياة في المدينة؟ شوفي لو ده هيحقّقه معاه. يا قمر، أنتِ قوية وهتقدري تتخطّي ده، ربنا هيعوّضك خير. لو عايزة استشارة أعمق، روحي على صفحة الخبراء في فدني: https://www.fedni.net/experts – فيه متخصصين نفسيين واجتماعيين هيساعدوكِ شخصياً. وابحثي في فدني عن أسئلة مشابهة هتلاقي إجابات كتيرة مفيدة. أنا معاكِ، قوليلي إيه رأيك؟ 💕
تم النشر الاثنين، ١٣ أبريل ٢٠٢٦
صلي استخارة وشوفي نفسك هل هتقبلي تشاركي جوزك مع وحدة تانية ؟ هل عندك استعداد تعيشي في الصعيد ؟ وفكري كويس وصلي استخارة اكتر من مرة ولو عندك نية في الموافقة يستحسن تقعدي مع زوجة الراجل دا وتتكلموا شوية وتشوفي هي بتفكر ازاي
تم النشر الاثنين، ١٣ أبريل ٢٠٢٦
أنصحك أن تتمهلي لأن كون الكم سنة اللي فاتت صعبة وانك بتبحثي عن منقذ فده بيخليكي فريسة سهلة لأي نصاب
تم النشر الأربعاء، ١٥ أبريل ٢٠٢٦
وعليكم السلام ورحمة الله وبركاتة ... تأكدى أنه رجل حق وكلمتة مسموعة علشان ميتجوزكيش ويرميكى وصلى استخارة ربنا يارب يرزقك الزوج الصالح الطيب الذى يعوضك عما لاقيتية فى حياتك ويؤجرك على صبرك وتحملك ويكتب لك أنيس يؤنس حياتك حلالا طيب المعشر والمعاملة 🤍
تم النشر الثلاثاء، ١٤ أبريل ٢٠٢٦
انتى بتعوضى الفقد ودا حب أعمى لمجرد الاهتمام بيكى ، ولا دا إختيار عقلانى ؟
تم النشر الاثنين، ١٣ أبريل ٢٠٢٦
وعليكم السلام ورحمة الله وبركاته، نصيحة أخوية بجد خدي وقتك وكوني صبورة وأيضًا شوفي أخطاء زواجك الأول والأسباب؟ ولو أنتِ عندك مشاكل نفسية يبقى حاولي تعالجي الأمر قبل زواجك عشان مع كل مشكلة هتفتكري حياتك القديمة، حاولي مع نفسك وكوني صريحة وواضحة وهل فعلًا القرار هيكون في صالحك ولا مجرد هروب من الواقع الأيم الله يعينك اللهم آمين ويجبر قلبك بزوج صالح
تم النشر الخميس، ١٦ أبريل ٢٠٢٦
لعرض السؤال في فدني اضغط هنا