انا رفضت ادخل كليه خاصه وماما من ساعتها مش بتكلمني هل كدا حرام عليه دخلت تربيه نوعيه قسم اقتصاد منزلي.تعبانه نفسيا وجسديا بجد
و الكليه اللي كانت هتدخلهاني فيها ييجي 100 الف وانا عندي 3 اخوات وبابا يدوبك موظف حكومي بجد معتش عارفه اتصرف معاها ازاي حاولت بكل الطرق اكلمها قالتلي مش عايزه اكلمك
بصي اللى عملتيه ده عين العقل وكرم اخلاق منك كمان ، اولا ريحي ضميرك مش حرام خالص اختيار الكليه ده مستقبلك انتي وطالما هى مش معصيه يبقي مفيش حرمانيه ، ثانيا انتي رحمتي باباكي من ديون او ضغط كان ممكن يكسره عشان بس منظره قدام الناس و مامتك زعلانة عشان 'الصورة' اللي كانت رسماها ليكي قدام القرايب والجيران اتهزت، هي مش شايفة دلوقتي غير الوجاهة الاجتماعية، لكن بكرة لما الدنيا تروق وتشوفك ناجحة ومصاريفكم ماشية بستر الله، هي نفسها اللي هتقول 'بنتي كان عندها حق'. ادخلي الكلية بقلب جامد: قسم اقتصاد منزلي فيه مجالات شغل ممتازة (تغذية، تصميم، ديكور، تدريس).. ابدأي شوفي كورسات أو مجالات النجاح فيها وأريها نماذج ناجحة من القسم ده "بالصدفة" وأنتي قاعدة معاها. وممكن نخلى والدك يتدخل فى الموضوع لانه هو اكتر واحد حاسس بالفرق المادي خليه يقول لها بوضوح: "البنت ريحتني وشالت عني حمل كبير، دي تستاهل تتشال على الراس مش نزعل منها يا رب يفتحها في وشك من وسع، ويجعل في كليتك دي الخير كله، ويرزقك فيها نجاح مكنتيش تحلمي بيه، ويخليكي أحسن واحدة في مجالك وتكوني أنتي السند والفخر الحقيقي لأهلك.
تم النشر الثلاثاء، ٧ أبريل ٢٠٢٦
بصي يا بنت الحلال انتي مغلطتيش خالص بالعكس انتي بنت أصول وشلتي حمل كبير من على كتاف أبوكي عشان عارفة البير وغطاه ومصاريف الكليات الخاصة بتقطم الظهر وموقفك ده قمة البر بأهلك والست الوالدة زعلانة عشان كان نفسها تتباهى بيكي وتشوفك في أحسن حتة بس ده زعل وهيروح لحاله والوقت هيداوي كل حاجة انتي بس محتاجة تطولي بالك وتفضلي تحايلي فيها وتدخلي أي حد بتحبه من العيلة يصالحكم على بعض والأهم من ده كله إنك تشدي حيلك في كليتك وتثبتي لها إنك هتنجحي في أي مكان وتفرحي قلبها بشهادتك وبكرة لما تلاقيكي ناجحة ومرتاحة وموفرة مليم لبيتك هي اللي هتيجي تبوسك وتقول لك كتر خيرك يا بنتي إنك فكرتي فينا ونفسك عفيفة المهم متخليش الشيطان يدخل بينكم واصبري على زعلها ده زعل محبة ودلع وكله هيعدي وانتي عملت الصح وضميرك لازم يكون مستريح وبالك هادي روحي بس بوسي على أيدها ورأسها منغير كلام لو فتحت معاكي كلام اتكلمي عادي لو مفتحتش اعملى كدا كل يوم وهتااقى الدنيا تمام ومفيش مشاكل وجد والله ربنا يحفظك ويسعدك 🌷
تم النشر الأربعاء، ٨ أبريل ٢٠٢٦
يا حبيبتي، أول حاجة: مش حرام عليكي خالص إنك رفضتي الكلية الخاصة، قرارك ذكي وعملي جداً مع ظروفكم المالية (100 ألف مش هينة على موظف حكومي مع 3 أخوات!). ومش حرام على مامتك كمان إنها زعلانة، بس القطيعة دي مش صح وبتتعبكم كلكم. الإسلام بيأمر ببر الوالدين، لكن براحة النفس والتواصل أحسن. أنتِ تعبانة نفسياً وجسدياً، فـ خدي وقتك واعتني بنفسك : اديها وقت شوية : الزعل بيروح، بس متضغطيش عليها دلوقتي. اكتبيلها رسالة حلوة : قوليلها "يا ماما أنا بحبك وفاهمة زعلك، بس كنت بحاول أحمي البيت. أنا هنا لو عايزة تكلميني"، وحطيها تحت الباب أو ع التليفون. ساعديها في البيت : اعملي حاجة بتحبها زي الطبخ أو التنضيف، ده بيفتح القلب بدون كلام. ادعي ربنا : صلي ركعتين وادعي إن ربنا يلين قلبها، وخلي عندك يقين إن الخير جاي. أنتِ في قسم اقتصاد منزلي حلو، هتتعلمي حاجات مفيدة لبيتكم. استمري في الدراسة وهتلاقي طريقك. لو عايزة دعم أكتر، دوري في فدني على أسئلة مشابهة ، أو شوفي الخبراء هنا: https://www.fedni.net/experts – فيه مدربين حياة ونفسيين هيساعدوكِ. أنتِ قوية يا بنتي، هتعدي! 💕 إيه رأيك نتابع مع بعض؟
تم النشر الثلاثاء، ٧ أبريل ٢٠٢٦
انتي قرارك صح جدا ومعلش اعذري مامتك هي عايزاكي احسن واحدة في الدنيا علي لو دا علي حساب نفسها وحتي لو هتبيع كل حاجة تملكها سواء هي او والدك علشان بس تبقي مبسوطة - معلش شوية وتهدي وانتي حاولي معاها كتير وبلا تياسي وانتي ان شاء الله ربنا هيكرمك في مجالك ربنا يوفقك يا رب ويجعلك دايما بنت بارة ب اهلك ربنا يبارك فيكي ويباركلك في اهلك اللهم امين
تم النشر الأربعاء، ٨ أبريل ٢٠٢٦
قرارك صحيح 100% .... وبعدين كمان انتى خدتى القرار دا علشانهم هما ف ديه حاجة جميلة منك إن انتى مفكرتيش ف نفسك بل فكرتى فى والدك واخواتك ... والله تربية نوعية جميلة جدا وبعدين أصلا بعيدا عن الخاص هتبقى واخدة أريحيه ومش متعلقة أو حاسة نفسك متكتفه هتعرفى تتعلمى كل اللى انتى عايزاه حتى لو مجال بعيد عن الكلية أصلا .... والدتك بقى حاولى متكلميهاش ب فكرة والدى واخواتى لأنها مش هتقتنع بسم الله كدا هتجمعى مع نفسك كدا كل عيوب الخاص وطبعا عيوبه كتير ف انتى هتجمعى العيوب بس والتخوفات وتبدأى فى لحظة هدوء كدا وروقان ما بينك وبينها تحسيسها انك اخترتى التربية النوعية ديه علشان نفسك انتى وراحتك وقد ايه كنتى متخوفة من الخاص وان عيوبه كذا وكذا يعنى زى ما يقولوا كرهيها فى الخاص بس بمنظورك انتى مش علشان اخواتك ووالدك والبيت والمصاريف وكدا لأن كل دا مش فارق معاها اللى فارق معاها انتى وانك تخشى كلية كويسه ف تعاليلها من حتة ان انتى شخصيا كنت عايزه تخشى خاص مابينك وما بين نفسك أو اى حاجه تانيه يعنى بس علشان العيوب ديه كلها والتخوفات وبتاع مرضتيش تخاطرى بنفسك ومستقبلك فاهمانى
تم النشر الأربعاء، ٨ أبريل ٢٠٢٦
طالما كانت عايزاكِ تدخلي كلية خاصة يبقى عايزاكِ تكوني في مكانة عالية، بصي أنتِ ممكن مثلًا تحاولي ترفعي التقدير وتحطي عينك على إنك تكوني دكتورة في الكلية، وكمان لما تلاقي منك شطارة وإنك كل سنة ترتبي على الدفعة هتحس أن دا فعلًا مكانك، شدي همتك بقى وفرحيهم، بلاش مثلًا تكوني حزينة انها مش بتكلمك فـ هتأثري على مستقبلك!! وخطوات عملية أفضل من التفكير الكتير والحزن وادعي كتير أنها تكون متقبلة وبإذن الله تعالى ربي قادر يخليها ترجع تكلمك وتكون أفضل معاكِ، وصدقيني والله وبالله دا حال كل الأهالي بعد ثانوية عامة بيكونوا مش راضين ولا حاسين بتعب الإنسان 😅 الله يرضى عنك اللهم ممكن برضو تصلي على النبي صلى الله عليه وسلم بنية أنها ترجع تكلمك وبجد هترجع أبشري أبشري وأنتِ جمييييلة جدًا لأنك فكرتي في مرتب والداك 💕 دا داليل إنك إنسانة حاسه بالمسؤولية
تم النشر الأربعاء، ٨ أبريل ٢٠٢٦
عارفه انها كانت عايزه الاحسن وانا كمان والله انا كنت نفسي ادخل خاص بس لما فكرت فيها صعبه عندي اخت ف الكليه واخويا مدرسه خاصه واخت ف ابتدائي.ودعيت كتير اوي والله تكلمني بس هي مش عايزه
تم النشر الأربعاء، ٨ أبريل ٢٠٢٦
ميأستش والله بقالي 9 شهور بحاول معاها بتتجاهلني وبتقولي كلام يحرق دمي ورغم كدا بسمع ومش برد
تم النشر الأربعاء، ٨ أبريل ٢٠٢٦
لعرض السؤال في فدني اضغط هنا