السلام عليكم
انا اهلي عاوزيني اتجوز إبن عمي هما مش بيجبروني لكن ده حلمهم وحلم جدي الله يرحمه انا البنت الوحيده معنديش اخوات واهلي خايفين عليا ومش عاوزيني اتجوز من بره عاوزيني اتجوز من العيله عشان يكونو متطمنين عليا واكون جمبهم
هو بيحبني وبيهتم بيا بس انا مش بحس ناحيته بأي حاجه بالنسبالي شخص مهم في حياتي بس عمري ما فكرت ف يوم من الأيام انو هيكون خطيبي ونتجوز وكده
كنت دائما افكر في اني هتجوز واحد غريب ف انا مش عارفه اعمل ايه ومش عاوزه ازعل اهلي عشان لو رفضت هيكون في زعل ومشاكل وف نفس الوقت مش عاوزه آجي على نفسي اي الحل
السلام عليكم، هو أولا، مش شرط القريب بيكون حماية للبنت، ساعات الأذى بيجي من الأقارب عادي، فمتخليش فكرة إن القريب هيحميك أو إنك مش عاوزة تزعلي أهلك تخليكِ تاخدي أي قرار غير مدورس. لو هو شخص كويس وعارفة دينه وأخلاقه، فكري في الموضوع وصلي استخارة ولو الموضوع فيه خير ربنا هييسره لك ولو كان شر لك هيتعسر حتى لو أهلك كلهم بيضغطوا عليكِ. ***** المشاعر عادي ممكن تنمو بعد التعارف والقرب فمش دي المشكلة. ادرسي الموضوع كويس وخلي قدامك العيوب والمزايا قبل ما تقرري، وأنتِ أدرى برضه بعائلتك وعلاقاتهم ببعض وهل ممكن يحصل زعل بعد كده لو حصل أي مشاكل بينكم ولا التعامل هيكون بعقلانية ومن غير ظلم لطرف أو إن يحصل جفوة ومشاكل أكبر بين كل أفراد العائلة. **** ولو وافقتِ على خطوبة، فهمي أهلك من البداية إن الخطوبة مجرد فترة بتدرسوا بعض فيها مش ملزمة لكِ إنك تكملي معه لو لقيتِ إن مفيش تفاهم أو قبول، لأن اللي بيحصل في الغالب إن البنت بتضطر تكمل عشان ميحصلش مشاكل وزعل في العائلة لو هي فسخت الخطوبة من قريبها وطبعا الوضع مش بيبقى أفضل حاجة بعد الزواج وبرضه بتضطر تكمل عشان نفس السبب حتى لو حياتها صعبة. ** فأنتِ لو متأكدة إن أهلك أو العائلة نفسها مش هيضغطوا عليكِ تكملي لو لقيتِ في فترة الخطوبة إنكم متنفعوش تكملوا سوا فخلاص، المهم قبل أي خطوة، تتفقي معهم على النقطة دي وتصممي عليها بعد كده ومتهتميش وقتها لو طلع مش مناسب واختاري اللي فيه مصلحتك لأن محدش منهم هينفعك بعد كده. *** ولو اتخطبتِ خليكِ حيادية وادرسيه كويس من ناحية الدين والأخلاق والتعامل ومتعلقيش نفسك به عشان التعلق والمشاعر ممكن تخليكِ تاخدي قرارات مش في صالحك أو تتقبلي عيوب متقدريش تغيريها بعد كده أو تتعايشي معها. فاستخيري كده وتوكلي على الله وإن شاء الله اللي فيه الخير يقدمه ربنا. بالتوفيق.💚💚
تم النشر الأربعاء، ١٤ أكتوبر ٢٠٢٦
وعليكم السلام يا ياسمين، شكراً إنك شاركتيني مشاعرك بصراحة كده. أنا فاهمة إن الموقف صعب عليكِ، خاصة إنكِ البنت الوحيدة وأهلكِ بيحبوكِ وخايفين عليكِ، وفي نفس الوقت مش عايزة تظلمي نفسك أو تزعليهم. ده شعور طبيعي جداً، ومش غلط إنكِ تحسي بالحيرة بين حبهم وحلمكِ الشخصي. أول حاجة، خلينا نتذكر إن الزواج في الإسلام قرار مشترك ويحتاج رضا الطرفين، ومش مجرد تلبية لحلم العائلة. ابن عمكِ بيحبكِ ويهتم بيكِ، وده شيء إيجابي، لكن الشعور ده لو مش متبادل من ناحيتكِ دلوقتي، فالأمر محتاج تفكير عميق. جربي تاخدي وقتكِ في الصلاة والاستخارة، واسألي نفسكِ: هل في إمكانية إن المشاعر تتطور مع الوقت لو اتعرفتي عليه أكتر كشريك حياة، ولا الرفض ده أساسي؟ كلمي أهلكِ بهدوء وصراحة، قولي لهم إنكِ بتحبيهم وبتقدري حلمهم، لكنكِ محتاجة تفكري في مستقبلكِ براحة، واطلبي منهم يدعموكِ في اتخاذ القرار الصح. لو رفضتِ، حاولي توضحي لهم إن ده مش رفض للعيلة، لكن رغبة في بناء حياة سعيدة بدون ضغط. ولو قبلتِ، خلي في بالكِ إن الزواج رحلة طويلة محتاجة تفاهم ومودة، مش بس حماية العائلة. في كل الأحوال، أنتِ مش لوحدكِ، وتقدري تبحثي عن أسئلة مشابهة على فدني عشان تشوفي تجارب تانية. خدي قراركِ بثقة، وربنا يوفقكِ للأفضل.
تم النشر الثلاثاء، ١٣ أكتوبر ٢٠٢٦
بسم الله، اولا ربنا يوفقك للي فيه الخير، ثانيا أنصحك تشوفي سلسلة ألف باء زواج للدكتور عبدالرحمن ذاكر الهاشمي، ثالثا طالما أنت مش شايفة حاجة منفرة في ابن عمك فصلي صلاة استخارة وخذي قرار الخطوبة ومش لازم تحسي ناحيته بحاجة، والخطوبة هتبين كل حاجة، وطالما صليتي استخارة فلو الجواز فيه "خير"- وحطي تحت خير ألف خط- ربنا هيكتبهولك ولو فيه" شر" فربنا هيبعده عنك
تم النشر السبت، ١٧ أكتوبر ٢٠٢٦
لأ الحاجات دي مفيهاش زعل .. ده مجرد اقتراح لازم يكونوا فاهمين إن قرارك يحتمل الرفض أو القبول ، ولو مش فاهمين نقطة زي دي وهيزعلوا ف ده مش ذنبك إنتي .. خدي القرار بناءا على رغبتك إنتي وده بعد ما تستخيري طبعًا
تم النشر الخميس، ١٥ أكتوبر ٢٠٢٦
لما تجربو خطوبة ويكون مفيش نصيب لأسباب مقنعة يبقى محدش هيزعل......ويمكن يكون هو الأنسب مين عارف
تم النشر الأربعاء، ١٤ أكتوبر ٢٠٢٦
صح شكراً لنصيحه حضرتك
تم النشر الأربعاء، ١٤ أكتوبر ٢٠٢٦
المشكله عندي زعل العيله لو قولت لا
تم النشر الأربعاء، ١٤ أكتوبر ٢٠٢٦
عامليه في فترة الخطوبة على إنه غريب وبتدرسيه وقرري بعد ٦ شهور على الاقل
تم النشر الأربعاء، ١٤ أكتوبر ٢٠٢٦
خايفه اخد خطوه واوافق واندم بعدين يعني مش عارفه ازاي اخد قرار بجد
تم النشر الأربعاء، ١٤ أكتوبر ٢٠٢٦
طبيعي ميبقاش في احساس بحاجة دلوقتي لأن ده بيكون بعد الزواج والعشرة ودلوقتي هو زي اي حد غريب ف ممكن تدي لنفسك فرصة وتاخدي خطوة بعيداً عن أي أفكار أو احكام مسبقة
تم النشر الثلاثاء، ١٣ أكتوبر ٢٠٢٦
لعرض السؤال في فدني اضغط هنا