السلام عليكم، هو مش هتحصل من غير سبب، ممكن فيه سبب منتبهتيش له أو تراكمات، مش لازم تكوني حاسة بها لكن لاشعوريا نفسك كانت بتخزنها لحد ما وصلت لمرحلة إظهار الأعراض بالطريقة دي. *** إلا بقى لو أرجعنا الموضوع للحسد والسحر وكده، بس بما إن مفيش ما يثبت فاحنا ممكن نلتزم بأذكار الصباح والمساء والرقية الشرعية إن أمكن، وكمان سورة البقرة اقرأيها يوميا كل ده للحفظ وتحسبا لو فيه أي حاجة من دي. ** ونقعد مع نفسنا بقى نراجع الفترة اللي فاتت من حياتنا، هل مريتِ بأي ضغوط؟ ظروفك الحياتية والأسرية؟ دراستك؟ ممكن قوي تلاقي حاجات مكنتيش واخدة بالك من تأثيرها وتراكمت لحد ما وصلت لاحتراق نفسي ونفسك دلوقتي محتاجة وقت تتعافى. ** ممكن تاخدي يومين كده مش بتعملي حاجة ولا بتفكري في الوضع وقد إيه مؤسف اللي أنتِ فيه وتفاهمي مع نفسك وإنها دلوقتي عاوزة ترتاح شوية، بعد كده ابدئي بخطوات صغيرة، حتى لو مش لكِ نفس تعملي الحاجات اللي كنتِ بتحبيها وبتفرحك قبل كده ارجعي اعمليها، لو كنتِ بترسمي، ارجعي ارسمي ولو خمس دقائق بس، انزلي اتمشي وغيري جو، لو حتى هتنزلي مكان قريب من بيتكم ولا محل تشتري حاجة.. اقعدي في البلكونة مع نفسك بالليل وتأملي السماء. أي أنشطة بسيطة من دي، ** مارسي الكتابة للتشافي، ممكن تخصصي عشر دقائق بعد ما تصحي من النوم وتصلي وتشربي قهوة ولا حاجة بتحبيها وتقعدي في البلكونة مثلا وتكتبي صفحة أو ١٠ دقائق، اكتبي أي حاجة، يوميات، مشاعر، فضفضة. الكتابة بتساعد. ** امشي كده فترة مع الرقية وسورة البقرة ولو لقيتِ لسه فيه صعوبة ومحتاجة متابعة مع مختصة فممكن تبقي تدخلي هنا وتشوفي قائمة الخبراء في فدني وتختاري خبيرة منهم تتواصلي معها، فيه منهم بيعملوا جلسات بأسعار مناسبة لأعضاء فدني. وفيه كمان الخط الساخن للدعم النفسي الخاص بالأمان العامة للصحة النفسية وعلاج الإدمان ( ١٦٣٢٨ ) ده مجاني تماما، والمستشفيات الحكومية فيها أقسام برضه الكشف بسعر مناسب. وربنا يسهل وتتخطي الفترة دي على خير وترجعي أفضل. بالتوفيق.💚💚
لعرض الإجابة في فدني اضغط هنا