أنا كنت أثناء الدراسة بنزل معمل جنبنا مره كل فين وفين عشان اتعلم سحب الدم المهم في يوم حسيت نفسي بقيت أعرف أسحب فقولت للبنت اللي هناك هجيب واحده صديقتي أجرب عليها قالتلي تمام وجربت وفعلاً سحبت وقالتلي ممتازه جدا وكده وبعدها كان في واحد أوردته ظاهرة خلتني أسحب منه و البنت كانت هتسيب المعمل فكانت عايزاني أجرب أسحب أكتر المهم خلتني أسحب من راجل كبير كمان و بعدها دكتور المعمل فضل يدور بس مفيش حد راح يشتغل بدل البنوته إللي كانت معاه ففضلت تقنع فيا وكده لغاية لما قولت ماشي وروحت أشتغل بدالها وفهمتني التسجيل ع الكمبيوتر وكده وأول ٥ حالات كانت معايا فيهم وسحبت من ٤و وواحده أوردتها مكنتش واضحه خالص فمعرفتش المهم قولت عادي وكنت مبسوطه إني سحبت من ٤ و قولت لأختي إني أسحب منها وتقولي ايدي هتوجعها ولا لأ وقالتلي قسما بالله م وجعتني وبرضو بعد م بسحب من الناس في المعمل بسألهم بيقولولي تسلم ايدك وكده لكن أنا بقالي ٣ أيام أنا اللي ماسكه المعمل كل يوم في حاله مبعرفش اسحبها والنهارده برضو في واحده غزتها مرتين مره مطلعش أي دم وتاني مره طلع بالظبط نقطتين بس أنا كنت داخله صح وكل تمام معرفش ليه مطلعش دم كويس فالمهم قولتلها تيجي لما الدكتور يبقى موجود وكده وزعلت جداً وفضلت اعيط وقولت إني مش عايزه أكمل في المعمل عشان سمعته لأن الناس اللي مبعرفش أسحب منها دي أكيد هتروح تقول وده هيأثر ع سمعة المعمل لكن كل اللي حوالي بيقولي عادي إنت لسه في الأول وكله بيحصل معاه كده لكن أنا بجد زعلانه فمن رأيكم أعمل اي وليه؟🥹
السلام عليكم، أهلا يا رنا. أولا بلاش تضغطي على نفسك وتلوميها قوي كده. عادي يحصل حاجات زي كده وطبيعي في تعلم أي مهارة وسحب الدم أكيد هيفرق من شخص للتاني، وساعات حتى اللي عندهم خبرة كبيرة ممكن يقعوا في أخطاء مشابهة، فمتخليش ده يوترك أو يعيق شغلك. ** وممكن تكوني حسدتِ نفسك على الحالات اللي فاتت (بيحصل على فكرة😅) واحتمال كبير، تكون زيادة الحالات وإنك بقيتِ مسؤولة عن الشغل والمعمل عملت لك حالة من التوتر بدأت تؤثر على سحبك للعينات. يعني في الأول كانت مجرد تجارب عملتِها بهدوء بعد كده بقيتِ ملزمة وحاسة جواكِ إن لازم تفضلي بيرفكت وتكوني قد مسؤولية الشغل. التوتر والقلق طبيعي يأثروا فممكن قوي هم سبب الأخطاء اللي حصلت. *** سمعة المعمل مش متوقفة عليكِ ولا على سحب العينات، شيلي الفكرة دي من دماغك وركزي على الهدوء والعملية وراجعي الحالات اللي نجحت كان وضعها إيه والحالات اللي غلطتِ فيها إيه الأخطاء اللي عملتِها ساعتها وتتجنبيها إزاي في الحالات الجاية. ** المريض هيقدر تكوني صريحة معه (زي ما طلبتِ من الحالة انتظار الدكتور) على إنك تكرري المحاولات وتفضلي تشكشكي فيه وتوجعيه. ** الخبرة بتتكون مع الوقت والممارسة فمتخليش خطأ ولا عشرة يشككوكِ في نفسك ويخلوكِ توقفي ولا تترددي تلجأي لحد أكبر خبرة منك في الحالات اللي تقف قصادك. متحكميش على مستواكِ دلوقتي خالص واستمري، وإن شاء الله ربنا يوفقك.💚
تم النشر الاثنين، ٢٧ يوليو ٢٠٢٦
أنا فاهمة تمامًا إحساسك يا رانا، وإنك زعلانة وخايفة على سمعتك وعلى المعمل ده طبيعي جدًا، خاصة إنك لسه في البداية وبتتحملي مسؤولية كبيرة لوحدك. اللي بيحصل معاكِ مش فشل، ده جزء طبيعي من تعلم مهارة زي سحب الدم اللي بتحتاج تدريب مستمر ومواجهة حالات مختلفة، والناس اللي بتقولك "عادي" مش بيقللوا من شعورك، لكنهم بيأكدوا إن كل المبتدئين بيمرّوا بنفس المرحلة. من رأيي، متستعجليش على قرار الاستقالة دلوقتي، لأن الاستمرار هيساعدك تكتسبي الثقة والخبرة بسرعة أكبر. جربي تطلبي من الدكتور أو زميلة أكثر خبرة يراقبوكِ في الحالات الصعبة ويعطوكِ نصائح عملية، وكمان ركزي على تسجيل ملاحظاتك بعد كل محاولة عشان تتعلمي من الأخطاء. الصبر والمثابرة هنا هيفتحوا لكِ أبواب أفضل، وتذكري إن الله يحب العبد الذي يتقن عمله، فاستعيني بالدعاء والتوكل مع الجهد. لو عايزة آراء إضافية، ابحثي عن أسئلة مشابهة على فدني عشان تشوفي تجارب الآخرين. أنتِ قادرة، وهتتجاوزي العقبة دي بإذن الله.
تم النشر الاثنين، ٢٧ يوليو ٢٠٢٦
لعرض السؤال في فدني اضغط هنا