السلام عليكم ورحمة الله وبركاته، حاجة حلوة جدًا إنك فكرت كده، أنت كده في بداية الطريق. أول حاجة، قلل السوشيال... ليه؟ خلينا نفترض إنك شفت فيديو، أيًا كان مضمونه، أو فكرة بتناقش شيء معين، وقررت تكتب رأيك. بعد كده، هتدخل التعليقات وهتلاقي آراء مختلفة، صح وغلط، وهتبدأ تتشتت… تشوف رأي تقول "آه والله صح"، تشوف التاني تقول "طب ده كمان منطقي"، وبعد شوية هتحس إن رأيك الأصلي كان "أي كلام"، مش بقول إن رأيهم غلط، لكن لو أنت ما حددتش رأيك الأول، مش هتعرف تثبّت وجهة نظرك، وهتفضل تايه بين كلام الناس. فالأفضل إنك تفكر الأول، تشوف وجهة نظرك، وبعدها تشوف آراء الآخرين، ولو كان فيهم رأي أحسن فكر فيه، ممكن يكون رأيك غلط، بس الفكرة إنك ما تبدأش من نقطة التشويش، لأنك وقتها مش هتعرف تكون رأي ثابت، ولا حتى تقدر توصّف الموضوع بشكل صحيح. طيب، إزاي نبني رأي أصلاً؟ الرأي مش مجرد إنك تقول حاجة وخلاص، الرأي مبني على معرفتك، أفكارك، ومعتقداتك، وكمان على خبرتك في الحياة، من مواقف مرّت عليك أو حاجات اتعلمتها من غيرك. عشان كده، هتلاقي إن في آراء صح وآراء غلط، لأننا مش كلنا عندنا نفس الخلفية ولا مرّينا بنفس التجارب. بس الأهم إن رأيك يكون له أساس منطقي ومبني على معرفة صحيحة. طب ازاي نكوّن المعرفة دي؟ أول حاجة، لازم تبقى واعي إنت بتدخل دماغك إيه. يعني مثلًا، مينفعش تكون بتسمع أغاني بس، ولما حد يقولك إنها حرام، تستغرب! أنت هنا رأيك مش مبني على معرفة، لكنه مبني على البيئة اللي أنت فيها. نفس الفكرة في أي موضوع، لو دماغك مليانة بكلام ناس سطحية أو تفكيرهم ضحل، هتلاقي نفسك بتكرر كلامهم من غير ما تحس. فكر في ده كأنك بتغذي عقلك، لو دخلت له حاجات مفيدة، هتقدر تبني رأي سليم، ولو مليته بحاجات تافهة، مش هتعرف تحلل أي حاجة بشكل منطقي. وفي النهاية، الرأي ممكن يتغير. عادي جدًا إنك تكتشف بعد فترة إن رأيك كان غلط، وده مش ضعف، بالعكس، دي علامة على إنك بتتعلم وبتتطور. أهم حاجة، إنك لما تبني رأيك، تحاول تشوف الموضوع من كذا زاوية، وتسمع لأكتر من وجهة نظر، عشان تقدر تحكم بموضوعية، بدل ما تكون متأثر بفكرة واحدة بس. خلاصة الكلام: فكر في رأيك قبل ما تتابع آراء الناس عشان ما تتشتتش. خلي رأيك مبني على معرفة وخبرة، مش مجرد كلام بيتقال. اختار المصادر اللي بتاخد منها معلوماتك، لأن ده اللي هيشكّل طريقة تفكيرك. ما تخفش تغير رأيك لو اكتشفت إنه غلط، لأن ده دليل على تطورك. وفي الآخر، الرأي مجرد رأي، مفيش حد رأيه صح 100% طول الوقت، بس المهم إنك تفكر وتحلل قبل ما تقرر.
لعرض الإجابة في فدني اضغط هنا