بصي يا حبيبتي عشان تعملي أي حاجة ف الدنيا وتكملي فيها انتي لازم تكوني فعلاً عايزاها من جواكي وفارقة معاكي زي العُمرة كده لو انتي عايزة الحاجة بس اللي هو عادي لو ماتحققتش ماعتقدش إنك هتحاولي فيها بكل طاقتك ومش هتديها وقتك واهتمامك ف أنا عايزاكي دلوقتي تسألي نفسك سؤالين.. الأول هل أنا محتاجة المجموع العالي عشان أدخل بيه كلية الطب تحديداً؟! وللا ممكن أغير رأيي أو حاسة إني مش متأكدة لسة التاني هل لو ماجبتش مجموع حلو ومالحقتش الطب أو كلية عالية من كليات القمة كما يسمونوها هل هزعل وهتأثر وللا عادي مش هيفرق معايا كتير وهدخل أي حاجة تجيلي؟ ولو ماجبتش المجموع ده هل هيكون السبب تقصير مني وللا هبقى مظلومة أو نصيبي واللي ربنا مقدره ليا كده رغم إني سعيت وعملت اللي عليا؟ حاجة كمان ممكن تساعدك ف إنك تحسي بخطورة الوضع او المرحلة دي أو تحسي بالجدية ناحيتها هي فكرة إنها فرصة بين ايدك حالاً واجتهادك فيها وحصولك على مجموع عالي هيتيح ليكي خيارات كتير اوي وانتي اللي هتبقي بتختاري من بينها اللي يناسبك أما لو قصرتي فيها ف انتي بتحدِّي من الاختيارات دي للأسف وبتضيقي ع نفسك واحتمال كبير تحسي وقتها بالضياع والحيرة ف إنك تختاري طريق هتضيعي فيه كام سنة ممكن ف الآخر يطلع مش ده اللي كنتي بتدوري عليه أو هتحتاجي تتعبي كتير اوي وتتحملي مصاريف وتكاليف إضافية عشان تتعلمي مجال معين من اختيارك مش محتاج شهادة جامعية على حسابك الشخصي وتاخدي فيه كورسات او شهادات عشان تلاقي شغل يريحك ودخله كويس... إلخ لو أدركتي أهمية المرحلة اللي انتي فيها وإنها سنة واحدة بس ممكن تختصر عليكي طريق طويل بعدين وتفتحلك فرص كتير أكيد هتبدأي تديها وقت وجهد بإخلاص ((لازم تقعدي مع نفسك بجد وترشحي أفكارك لأن انتي صاحبة النية والقرار والاقتناع لو ماكانش منك عمرك ما هتاخدي خطوة ولا هتعملي حاجة))... وآخر حاجة حابة أقولهالك ليه ماتعمليش اللي عليكي وتتقني عملك ومذاكرتك السنة دي لمجرد إن ربنا بيحب إذا عمل أحدكم عملاً أن يتقنه.. استحضارك للنية دي صدقيني هيفرق جدا جدا ف نفسيتك وهيخليكي تتعلمي الإتقان ف أي حاجة ف حياتك عموماً وخليكي عارفة إن استثمارك في حاجة زي دي دلوقتي أو استثمارك ف تعلم طرق المذاكرة والحفظ والفهم والتذكر وكل ده هيفيدك ف أي مجال وأي مكان هتكوني فيه ف أي وقت ودايماً هيوصلك للنجاح المضمون وده بجد مش كلام دي حقيقة واقعية لأن كلنا من صغيرنا لكبيرنا ماينفعش نوقف نتعلم ونذاكر طول ما احنا عايشين لأن الدنيا بتطور وكل يوم بيبقى في جديد لو مش بنتابع التطورات دي ونذاكر مش هنقدر نواكب التطور ونوصل لأماكن أعلى ونترقى ونتميز ونحقق نجاحات ولو بدأتي الطريق ده من دلوقتي صدقيني هيفرق معاكي ف مرحلة الكلية والشغل وكل مراحل حياتك جربي ومش هتخسري وعذراً على الإطالة ♥️
آمين يارب، شڪرا جدا 🥰
تم النشر الاثنين، ٢٣ ديسمبر ٢٠٢٤
تسلمي من كل شر ♥️ .. بصي أنا مش عايزاكي توتري نفسك خالص ولا تحاولي تخلي دافعك للمذاكرة هو الخوف والتوتر عشان ده بيحسس بالعجز أكتر ما بيحفز .. عايزاكي لما تعملي حاجة تعمليها عن حب واقتناع وإدراك منك لأهمية الحاجة دي .. ف بما إن إجاباتك ع الأسئلة هي إنك فعلاً عايزة تدخلي كلية الطب وهتزعلي لو ماجبتيش المجموع يبقى انتي كده عندك الدافع اللي يخليكي تذاكري وطبعا من دلوقتي عايزين نبقى متفقين إننا لو سعينا وعملنا اللي علينا وبردو ماجبناش المجموع ده هيكون نصيب وقضاء وقدر ووقتها نكون متأكدين إن الخير ماكانش ف الحاجة دي أصلاً عشان بس مش عايزين الزعل وقتها يدخلنا ف اكتئاب ونفقد الشغف والطموح وكل الحاجات الوحشة دي .. استعيني بالله وابدأي اعملي اللي عليكي وأكيد مجرد ما تلاقي نفسك بتقربي كل يوم لحلمك هتتحفزي اكتر وهتتشجعي اكتر انك تكملي وان شاءالله تفرجي وتفرحي أهلك ♥️
تم النشر الاثنين، ٢٣ ديسمبر ٢٠٢٤
حبيبة قلبي تسلمي علي الڪلمات الجميله دي، بجد بتفرق معايا، حضرتك معاكي حق فعلا. اجابة السؤال الاول: انا فعلا محتاجه كلية الطب جدا. السؤال التاني: اكيد هزعل وهتأثر جدا جدا كمان. واللي بيزيدني توتر هو ان بابا بيقولي انه مش هيدخلني جامعه لو مجبتش مجموع عالى اصلا
تم النشر الاثنين، ٢٣ ديسمبر ٢٠٢٤
لعرض الإجابة في فدني اضغط هنا