الشخص اللي بحبه ديما عندي احساس من ناحيته انه مش بيقدر وجودي جمبه او مجهودي عشانه لما بيحصل معاه مشكله ويبقي زعلان او مضايق بفضل جمبه بالساعات بعمله كل حاجه اقدر عليها تخليه مبسوط في الاخر مش بيحسسني انه اتحسن او مثلاً مش بيقولي كلمه تقدير زي ربنا يخليكي ليا او كفايه وجودك واوقات وسط زعله لما يقول حاجه زعلتني وبزعل يقولي انا بس كان نفسي تبقي معايا وتخففي عني
ساعتها بحس ان كل مجهودي بقي تراب واني معملتش حاجه لما بزعل شويه بيقعد يقولي انتي بتسبيني انتي بتبعدي عني بتسبيني لوحدي مع ان مش بيعدي ساعتين زعل واتكلمت معاه في كده وقالي أنا بقدر وانتي محدش بيستحملني غيرك ويرجع تاني لنفس الموضوع
هو مكرس الفتره دي من حياته عشان يشتغل ويجمع فلوس لينا ديما يقولي انا مش بعمل حاجه بحبها انا مش زيي زي اي حد في سني انا بضيع الوقت اللي المفروض اعمل فيه اللي بحبه وده كمان بيزعلني
وديما شايف اللي ناقصه واللي مش معاه ولما بزعل من كده بيقولي انتي بتسبيني وبتبعدي عني جربت نبعد كذا مره بس مقدرناش احنا الاتنين هو بيحبني مالوش اهل او صحاب او حد قريب غيري وبيطلع عينه عشان نبقي سوا
اعمل ايه واتصرف ازاي احنا دلوقتي مش بنتكلم بسبب كده كل واحد زعلان لاسبابه ومعرفش هو بيتصرف ليه كده ومين فينا اللي صح
السلام عليكم، مش عارفة إذا كنتم مخطوبين ولا لأ، بس كلامك بيقول إنكم تقريبا مرتبطين. هو أصلا لو مخطوبة لشخص مش شايف غير نفسه في العلاقة ومش مقدر مجهودك وزي ما قلتِ مش شايف غير اللي ناقصه واللي بيزعله فإيه يخليكِ تكملي أصلا في خطبة زي دي؟ فما بالك لو أنتم أصلا مرتبطين بس؟ بتعملي إيه جنبه بالساعات وفي الآخر بتحسي إن ده كان تراب؟ ** أنا شايفة إنك محتاجة تقدري نفسك أكتر من كده. لو مخطوبة فالمشكلة أقل تعقيدًا، لأنك بتحاولي تنجحي علاقة رسمية هي بداية علاقة حلال، لكن لو مرتبطة فأنتِ بتبذلي جهد في سراب، في حاجة أصلا حرام ومش مضمون هتنتهي بزواج ولا فشكلة وكسرة قلب زي أغلب العلاقات من النوع ده. أنا مش هدخل في نوايا الشخص ده سواء خطيب أو غيره، لكن انتِ فين في المعادلة؟ طالما مش حاسة بتقدير وإنه بس شايفك الشخص اللي بيستحمله وبيدعمه وبيخفف عنه تعب وووو أنتِ فين بقى؟ هل أنتِ طبيعتكِ إنك شخص معطاء إلى ما لانهاية؟ فيه ناس دي طبيعتهم وبيعطوا بس ومش بياخدوا مقابل. لو أنتِ مش من الناس دي هتتعبي قوي، لو طول الوقت أنتِ اللي بتدي حتى لو كان زوجك، في النهاية هتتعبي وطاقتك هتنضب وعطاءك هيوقف وهتقلب بمرارة. فكري كويس وعززي نفسك شوية، الحب مش كل حاجة على فكرة، الحب ممكن قوي يقلب لشعور سام وعلاقة مؤذية. وبعد ما كنتِ مش قادر تبعدي زي ما بتقولي، ممكن قوي ييجي يوم وتكرهي نفسك والشخص ده بحجم الحب اللي كنتِ بتحبيه له.
تم النشر الأربعاء، ٣٠ أبريل ٢٠٢٥
لعرض السؤال في فدني اضغط هنا