السلام عليكم ،
انا مبسلمش على رجالة ولا بختلط بالرجالة على ارض الواقع ولا برتبط ولا بصاحب الحمد لله
فكنت عايزة اتجوز المهم نزلت ابلكيشن تعارف بهدف الزواج لكن اكتشفت ان فيه منهم معظمه ناس بتتكلم كلام جنسي وكدا المهم في الاول حذفت الحساب بعدين بعد فترة حبيت اجرب اتكلم بطريقة جنسية وعجبني الكلام وبيثيرني وبستمتع بيه ، الى انا مدايقة منه انه عايزة اكمل كلام بس اكيد الشخص الي بكلمه شايفني واحدة مش كويسة ووحشة
انا بطلت اتكلم عشان حرام وعشان اي شخص بكلمه كدا اكيد شايفني رخيصة وعشان كرامتي ، بس انا حبيت الكلام الصراحة ،
النقطة التانية : انا فيه شخص اتعرفت عليه من الابلكيشنز دي وقولتله نبقى صحاب بدون كلام سكسي وهو وافق وحاليا بنتكلم كلام عادي
ومدايقة بردو انه بكلمه ،
السؤال هو انا واحدة رخيصة ولا ايه ؟
وفيه حاجة كمان الدافع الي خلاني اعمل الحجات الي انا قولتها دي انه مشوفتش حب من بابا ولا تقدير وبيهيني دايما وكمان عشان لسا متجوزتش
السلام عليكم، اللي حصل إن الموضوع تدرج معك، في البداية كان مستنكر وبعدين لمس جزء الحرمان العاطفي عندك ومع التعود أثر على كيمياء المخ فبقى عندك إدمان وطبيعي تحسي إنك عاوزة ترجعي حتى لو شايفة ده حرام وبتحسي بالاحتقار نحو التفكير ده. مش حكاية رخيصة والكلام ده. **** وعلى فكرة، الحل مش إنك ترتبطي برجل خاصة لو تقصدي الارتباط غير الرسمي، لو ده اللي تقصديه فمعظم العلاقات دي بتبقى تسلية وبرضه الشاب بياخد فكرة وحشة عن البنت اللي مرتبطة به. *** ولو تقصدي خطوبة وزواج فمش شايفة إن ده الحل. للأسف من واقع تجارب كتيرة قرأتها وكان فيه شكوى من أحد الزوجين، الحالات اللي بيكون فيها الشاب أو البنت مدمن إباحية أو متعود على النوع ده من الشات فهو للأسف بيستمر عليه حتى بعد زواجه وبيظلم معه الطرف الآخر ومش بيعيشوا علاقة سوية وبيرجع يفتح التطبيقات دي أو يشاهد الإباحية حتى رغم وجود المنفذ الحلال. فمش ده الحل خالص، ومش بقول لك كده عشان أخليكِ تيأسي، الفكرة كلها إنك لازم تعالجي جذر المشكلة. *** والأفضل تتابعي مع مختصة سلوكية، توصل معك لجذر المشكلة وتساعدك على حلها من الأساس وتمشي معك بخطوات عملية لحد ما تتخلصي من الإدمان ده. ** بالنسبة للي تقدري تعمليه مع نفسك حاليا، مترجعيش تنزلي التطبيقات دي أو غيرها مهما حسيتِ بالرغبة في الكلام، اقطعي علاقتك بالشخص ده حتى لو بتتكلموا كلام عادي. وسعي شبكة علاقاتك الواقعية (مع بنات) وخاصة لو بتتشاركوا الاهتمامات والهوايات وانزلي ورش أو مكتبات أو انضمي لجمعيات خيرية، ده هيملأ الفراغ اللي جواكِ وهيملأ وقتك كمان بحيث متلاقيش وقت للأفكار دي. *** لما تتابعي مع مختصة وتعالجي المشكلة السلوكية دي فكري في خطوة الزواج، لو محيطك الاجتماعي مش فيه فرص كويسة أو مش هتقدري تتكلمي مع حد يرشح لك زوج فممكن أرشح لك تطبيق (الصالون) فيه رقابة شديدة ومش هتلاقي فيه الأنواع السيئة اللي قابلتِها على التطبيقات التانية. ** الأهم من كل اللي فات، استعيني بالله ولا تيأسي وادعيه يثبتك ويبعد عنك كل الوساوس ويرزقك الزوج الصالح والذرية الصالحة. وأكثري من الاستغفار. بالتوفيق إن شاء الله. 💚
تم النشر السبت، ٧ نوفمبر ٢٠٢٦
وعليكم السلام ورحمه الله وبركاته يا بت الحلال إنتي مش رخيصة ولا حاجة بس إنتي ماشية في سكة غلط وبسبب الحرمان العاطفي اللي عندك من البيت بتدوري على التعويض في حتت تضرك وتجرح كرامتك والكلام ده كله بيجي على حساب نفسك ووقفتك الصح فرملي بقى واقعدي مع نفسك وشوفي إيه اللي ناقصك واشتغلي على حالك واقربي لربنا عشان تلاقي اللي يقدرك بجد بالحلال ومن غير ما تنزلي من نظر نفسك.. وجد والله انتي انسانه محترمه بجد ربنا يحفظك ويوفقك لما يحب ويرضى واتمنى لو تعرفي تمسحي الكلمه اللي كتبها دي يكون افضل عشان محدش يفهمك غلط .
تم النشر السبت، ٧ نوفمبر ٢٠٢٦
السلام عليكم ورحمه الله وبركاته انا حابه ابدا معاكي من اخر جمله كتبتي انه اللي خلاني اعمل كده هو اللي خلاني احب كده هو ازمتي مع بابا ااا هنا بتبدا ااا كل الابواب بتاعه الشيطان لما بيكون في عندنا نقص في حياتنا او يكون عندنا في ازمه من الازمات في حياتنا او عندنا احتياج غير مشبع واحنا مش بنتعامل معاه مضبوط او شايفين انه دي حاجه بتمنحنا احقيه الناس فهنا بيجي الشيطان ويبقى الملعب مفتوح قدامه يزقك على اي غلط او يقربك من اي غلط او يزين لك اي غلط وبعدين في الاخر يقوم حاطط لك الايه العنوان بتاع الباب المفتوح ده ويقول لك اصل انت عندك الحته الفلانيه وهنا خليني اقول لك انه من الاتجاه العلمي النقطتين دول ما لهمش علاقه ببعض خالص المساله الجنسيه ملهاش علاقه باز. مه الاب او نقصان الاحتياجات الخاصه بالاب اللي المفروض تكون مش بعمل الاب لان الاب انا مش معنديش احتياج جنسي من ولكن عندي احتياج نفسي عندي احتياج ليه علاقه بالرمز الذكوري فهنا هي بعيده عن النقطه دي النقطه اللي لها علاقه همم. بالرغبه وبالشهوه دي احتياج لوحده يتعلق بطبيعه الانسان وطبيعه ااا المرحله العمريه اللي هي بتكون خلاص من بعد البلوغ بتبدا الاحتياج الجنسي ده كل شويه يتزايد عشان كده يبقى لنا طريقتنا في اداره حياتنا في اداره نفسنا اللي تخلينا نكون قادرين نسيطر على الشهوه والرغبه دي طالما ملهاش ااا طريق حلال ونصرف فيه الشهوه دي فاا خلينا كده نبقى متاكدين ان دلوقتي احنا رجلينا ذلت في ايه في سكه الشيطان زيناها لنا واحنا دخلنا فيها فاحنا هنا محتاجين نعمل ايه هنعمل مجهود هيكون مجهود صعب في الاول ولكن همم هيوصلنا ان شاء الله ثاني ان احنا نرجع للارض المستويه بدل المنحدر اللي احنا نزلنا فيه ده احنا محتاجين نرجع ونبقى فاهمين انه الشهوه منتظره الطريق الحلال فقط لا غير الشهوه مش مبرر خالص ان انا اعمل اي حاجه حتى ولو كنت مزينها بشكل اصل احنا صحاب بس احنا مش بنتكلم الكلام ده ده بس احنا عارفين ان احنا هنا في مكان غلط احنا عارفين ان دي طريقه غلط ممكن تؤدي في وقت ضعف لان احنا نتكلم الكلام ده عادي جدا فاحنا مش محتاجين كل ده محتاجين نوقف ده ولو عندنا باب مفتوح لو عندنا نقص الماء ااا نتوجه ان احنا نعرف نتعامل معاه ازاي صح نتوجه ان احنا نعالجه صح بدل ما يكون هو دايما حجه الشيطان اللي بيجي زي اللي انا بيها الاخطاء.
تم النشر الثلاثاء، ١٠ نوفمبر ٢٠٢٦
لا ابعدي احسن عن تطبيقات دي او البيئات الي شبه دي اضرارها اكبر بكتير من منافعها ومش نضيفة ومش هيعملك مرادك اساسا، والولد ده نيته مش كويسة اصلا وهوا بيسايسك غالبا، وعشان موضوع برضوا بيقلب ادمان هوا النفس بتحاول تهرب من المشاكل الي عندك بأي حاجة فيها دوبامين حتى لو غلط وده معناه انك مش وحشة ولا حاجة دي حاجة بشرية عند ناس كلها المبتلية ودي سنة الحياة يعني، فانتي يعني الحل ان دماغك يتعود انه لما ينضغط مبيهربش للحاجات دي، فانتي حاولي على قد ما تقدري تقاومي اعراض الانسحاب دي، ويعني معرفش بس اعتقد اكيد لما تتجوزي ده هيساعدك تتخلصي من الموضوع ده لا دماغك لقى حاجة يفرغ ضغطه بجوانب حياة انشغل فيها او حتى هيساعد ، وابحثي برضوا وقيسي على نفسك عشان تتحسني وطبقي، واهم حاجة متزوديش الطينة بلة، ويعني فكري كدا مع نفسك وقولي لنفسك ان الحياة كدا كدا ماشية وانك لازم تقاومي وده ابتلاء تصبري عليه لحد دنيا تتفرج او الي اقصده يعني انك متجلديش نفسك زيادة عن اللزوم بسبب الموضوع ده، واهم حاجة تركزي ان دماغك يتعود انه لما ينضغط ميهربش للموضوع ده، وممكن تروحي لثيرابست عشان ممكن متعرفيش تتحسني لوحدك، ولما يكون ثيرابست متابعك حالتك اكيد مش هتدهور على الأقل ودي حاجة نفسها ان حالتك متدهورش دي في حد ذاتها يستاهل تروحي لثيرابست لو لقيتي حالتك بتدهور مش بنكلم على تحسن الحالة لأ الحالة اصلا بتدهور، وبعيدا بقا عن الشغل الذاتي وانك بتحسني نفسك بنفسك لوحدك، دوري على بيئة تتفاعلي معاها او انشطة البيئة دي بتأثر فيكي بشكل غير مباشر وممكن كمان هيخلي مخك ميحتاجش يزن عليكي عشان تروحي للحاجات مش صحية دي بسبب ضغوطك، يعني ارشحلك جدا تروحي اكاديمية قرآن او مسجد او اي حاجة دورات حفظ قرآن او علم شرعي او تتعلمي دينك عامةا حتى لو انتي مش ملتزمة مجرد ما هتلاقي صحاب بتتفاعلي معاهم ، الصحاب دول الي هيغروكي ويجروكي معاهم اصلا غصب عنك لأن الإنسان كائن اجتماعي وبيئي، البيئة المحيطة بيه بتشكل جزء كبير جداً من سلوكه واعرفي برضوا ان الحياة ضغط لكل الناس فمش الصح ان احنا لما ننضغط نروح للحاجات دي مع ان دي حاجة طبيعية بشرية بس هوا ده بقا الابتلاء او سنة الحياة انك تحاولي تروحي للحاجات الكويسة الفطرة السليمة عشان تدخلي جنة بإذن الله، ومتعتمديش ان زواج هوا الي هيخليكي تتخلصي من الموضوع ده لوحده، هوا اكيد هيساعدك او يوفر ظروف احسن بس لو اعتمدي عليه بس بدون ما تعتمدي على ذاتك وبيئة والثيرابيت مش هتقدري تتخلصي منه وكملي زي ما انتي على ارض الواقع انك مبتختلطيش مع الرجال
تم النشر الأحد، ٨ نوفمبر ٢٠٢٦
وعليكم السلام ورحمة الله وبركاته. أول حاجة أحب أقولها لكِ بصراحة وبكل حنان: لا، أنتِ مش رخيصة. الشعور بالضعة والانحطاط اللي بيجي لكِ دلوقتي هو دليل على إن جواكِ ضمير حي وكرامة بتدافع عن نفسها، مش دليل على إنكِ شخص سيء. اللي حصل إنكِ جربتِ حاجة محرمة وأعجبتكِ، وده طبيعي لأن الإنسان بيحب الإثارة، لكنكِ وقفتِ لما عرفتِ إنها بتتعارض مع قيمكِ ودينكِ، وده موقف يستحق الاحترام مش الإدانة. السبب اللي خلّاكِ تدخلي في الكلام ده مش بس الرغبة في الإثارة، لكنه كمان الجوع العاطفي اللي بتحسيه بسبب معاملة والدكِ، وكمان الضغط النفسي من تأخر الزواج. لما الإنسان ما بيشوفش حب وتقدير في بيته، بيحاول يعوّضه بأي طريقة حتى لو كانت غلط. ده مش عيب فيكِ، ده جرح قديم محتاج يتعالج بطريقة صحيحة. الكلام الجنسي خارج إطار الزواج حرام، وهو بيخلّي الإنسان يحس بالندم والضعف بعد كده، وده اللي بيحصل معاكِ دلوقتي. أما بالنسبة للشخص اللي بتكلميه دلوقتي "كصداقة"، فالصداقة بين الرجل والمرأة خارج الزواج غالبًا بتكون بوابة لمشاكل أكبر، وأنصحكِ بشدة إنكِ تقفلي الباب ده تمامًا عشان تحمي نفسكِ وكرامتكِ. بدل ما تفضلي تحكمي على نفسكِ بالسوء، ركزي على خطوات عملية: احذفي التطبيقات دي خالص، لأن وجودها هيخلّيكِ تفكري في الموضوع تاني. ادعي الله كتير إنه يرزقكِ زوجًا صالحًا ويصلح علاقتكِ بوالدكِ. حاولي تبني ثقتكِ بنفسكِ من خلال أنشطة مفيدة (دراسة، عمل، هوايات، رياضة) عشان ما تبقيش محتاجة لأي حد يديكِ إحساس بالقيمة. لو الجرح بسبب والدكِ لسه بيوجعكِ بقوة، ممكن تفكري في استشارة معالج نفسي متخصص في العلاقات الأسرية عشان تساعدكِ تتعاملي مع الشعور ده بطريقة أعمق. أنتِ بنت محترمة بتحاولي تحافظي على نفسكِ رغم الظروف الصعبة، وده شيء يستاهل التقدير. الندم اللي بتحسيه دلوقتي هو بداية الطريق للرجوع لنفسكِ ولربنا، مش نهاية الطريق. خدي خطوة بخطوة، وربنا هيعينكِ.
تم النشر السبت، ٧ نوفمبر ٢٠٢٦
لا يا حببتي انت مش وحدة وحشة ولا حاجة من الطبيعي ان احنا يكون لينا رغبة ده شيء طبيعي وانك جربتي ده وعجبك لانه من باب الفضول فانت اثارك فكرة انك دخلتي في حاجة جديدة اول مرة تجربيه اكيد ده حرام ومينفعش وانا فخورة جدا بأنك حاربتي نفسك وبعدتي عن اللي ميرضيش ربنا اما عنا الولد اللي بتحكي عنه ده بداية سكة بردو لان انت بتكلميه عادي دلوقتي لكن مع الوقت ممكن تحبيه وتلاقي نفسك بتتكلمي معه سكس بردو بس المشكله انك ساعتها هتكوني اتعلقتي بيه ومش هتقدري تسبيه وهو ممكن يستغلك عاطفيا وجسديا وممكن مع الوقت توصل لدرجة انه ياخد صورك ويبتزك غير ده كله انه حرام
تم النشر الاثنين، ٩ نوفمبر ٢٠٢٦
طيب هو مش مبرر خالص انك تنزلي ابلكيشن بس دى خطوات الشيطان وحاولي بقدر الامكان تبعدى عن اي حاجة حرام وقربي من ربنا واستغفرى وتوبي وادعي بزوج الصالح وكل واحد مكتوبله رزقو ولو حتي مكتوبلك العزوبيه الدعاء ممكن يغير القدر الحي علي الله في الدعاء والصدق في النيه والتوبة وارجعي لله لو اذنبتي الف مرة وربنا يتوب عليكي بإذن الله ♥
تم النشر الأحد، ٨ نوفمبر ٢٠٢٦
لعرض السؤال في فدني اضغط هنا