يا جماعه انا ببقي حساسه اوي ف كلامي مع الناس اللى بحبهم زياده عن اللزوم عشان بخاف اخسرهم معرفش ليه عندي احساس اني ممكن افقد حد بحبه دايما لو خاني التعبير بس او اتعصبت مثلا ومبحبش الشد والخناق عمري ما اتخانقت مع اللى بحبهم برضو عشان بتوتر واعصابي بتبوظ من الصوت العالي واخاف اخسرهم بس فعلا احساس الشك اني ممكن اخسر حد بحبه دي مع اي خلاف او كلمه مني بالغلط ومقصدهاش بتبقي ملازماني اوي حتي لو معملتش حاجه تأذيه خايفه اقوله كلمه علي سبيل الجد تزعله وميقولش انه زعل مني ويشيل مني وممكن يسيبني او يكرهني بعد كده...كوني حريصه اوي ف كلامي واسلوبي واني مش مرتاحه اوي ومش واحده راحتي مع اللى بحبه ف الكلام او بالاصح مش على طبيعتي ده مضايقني ومضيق احساسي بإن ده انا وف نفس الوقت من جوايا بقول ان ده السبيل الوحيد عشان الناس دي تفضل ف حياتي والا كده ممكن يزعلوا مني ويسيبوني وانا بحبهم...انا معرفش ليه الاحساس ده عندي دايما
هو ده بيبقى احساس بقلة تقدير ذاتية او قلة استحقاق فى الاغلب بيكون انطبع جواكى بسبب ان غلطاتك وانتى طفله مكنتش بتعدى الا لما يقولولك كده مش هنحبك ومش هنقعد معاكى كبرتى على كده وجواكى احساس ان الغلطة تمنها بقاء الاشخاص الحقيقى بقى وبما انك كبرتى اعرفى ان الاشخاص اللى يمشوا عشان غلطة غلطتيها يبقى مشيانهم احسن ....انتى مش موجوده عشان تبقى صح على طول ..اذا كنتى بتغلطى وربنا مديكى طريقة تصليح الخطأ .. ربنا هو الوحيد اللى تركزى معاه انك متغلطيش ...انما البشر تصنفيهم اصلا على حسب اللى يقدر يتحملك بكل انسانيتك وبشريتك اللى بتتضمن اخطاء وسقطات وحزن وحاجات كتير غلسه .. انتى اللى تقفى وتقولى لو استحملتنى تبقى حبيبى وتستاهل تفضل قريب منى ....اتلككت وبتقفلى على الواحده يبقى امشى احسن
تم النشر الأربعاء، ٨ نوفمبر ٢٠٢٣
حاجة حلوة انك تكوني حريصة فكلامك مع ال حواليكي انك متزعليهمش ولا تؤذيهم بس الغلط عندك فالدافع المفروض دافعك يكون الحرص ع مشاعر الناس و ال مترضيهوش لنفسك مترضيهوش لغيرك و طبعا عشان خاطر ربنا مينفعش نأذي حد من عباده لكن ان يكون دافعك الخوف من انهم يسيبوكي ده ال محتاجة تراجعيه بصي انتي لازم تتعاملي ع طبيعتك و تكوني مرتاحة فاي علاقة عشانك و عشان ال قدامك كمان و صدقيني عمرك م هتخسري حد عشان كنتي ع طبيعتك معاه الا لو مكنش الحد ده اصلا مش مناسب ليكي و ربنا هيعوضك بالاحسن و ثقي فنفسك و فأنك شخصية كويسة صعب حد يسيبها و ان طبيعتك حلوة و انك مش اقل من حد و لا تحت تقييم حد و ربنا يوفقك 💜💜
تم النشر الأربعاء، ٨ نوفمبر ٢٠٢٣
انتي كده من زمان؟ وممكن تحكيلي عن طفولتك شوية! وعلاقة بابا وماما بيكي عامله ازاي سواء زمان وانتي طفلة او دلوقتي.
تم النشر الأربعاء، ٨ نوفمبر ٢٠٢٣
استشيري اخصائي نفسي
تم النشر الخميس، ٩ نوفمبر ٢٠٢٣
دي اسمها مشاكل التعلق، و مشاكل التخلي. كونك تتعلقي اوي بالناس ف يبقى عندك مشكلة ف الحساسية، و تاخدي الأمور على خاطرك من حبك ليهم، و لكن مع الوقت مشاكل التخلي بتتدخل و أي إحتكاك أو مشكلة هتحصل هتحسسك إنهم ماشيين. و ده بسبب إنهم مش قادرين يكوّنوا مساحة آمنة ليكِ علشان تعبري عن مشاعرك و أحاسيسك مهما كنتِ حساسة تجاهها.
تم النشر الخميس، ٩ نوفمبر ٢٠٢٣
كمان عندي مبدأ ثابت ف حياتي( معرفش بردو هو صح ولا غلط بس مرتاح مع المبدأ دا بغض النظر هو صح ولا غلط)، الي هو اني سايب باب حياتي مفتوح، الي يدخل يدخل والي يخرج يخرج، المهم اني عايش بطبعي وبعبر عن كل ارائي ومعتقداتي بكل حريه وعندي اسلوبي وشخصيتي، وبحب ايه وبكره ايه، باختصار بعبر عن نفسي بكل وضوح، الي يقبلني بطبيعتي يقبل والي مش عاجبه، شكرا سيادتك كنت اضافه في حياتي 😂 بس هعمل ايه مش هقدر اغير شخصيتي عشان تبقى شبه شخصيتك.
تم النشر الأربعاء، ٨ نوفمبر ٢٠٢٣
طيب مهو دا صح بردو مش غلط، اننا نكون حريصين ع كلامنا وقت عصبيتنا. انا بحييكي ع دا، وانا عن نفسي بحاول بصعوبه ع فكره امسك نفسي اما بتعصب واحيانا بنجح ف دا بس عادة بفشل. فكونك بتعرفي تعملي دا، عظيم جدا. تاني حاجه علاقتنا بالي حوالينا ليها حدود مختلفه، والقريبين جدا جدا هما الي بنكسر حواجزنا معاهم، بس مبتجيش مره واحده، وطالما لسه مش عارفه تبقى ع طبيعتك مع شخص يبقى لسه العلاقه مش بالعمق الي ممكن نكون متخيلينه اوي، ممكن بعدين تتعمق اكتر كدا.
تم النشر الأربعاء، ٨ نوفمبر ٢٠٢٣
لعرض السؤال في فدني اضغط هنا